मनकल तयार कीता पद्दतकुंकन्ना पेनदा पोल्ले बच्चोनो पेदेदि
15
1-2 पजा येरूसलेमताल इच्चुर परिसिल्क आनि दर्मसास्त्रम कराहना गुरुल्क येसुनगा वासि,
“नीवा सिस्युल्क पेद्दाल्कुना रित-रिवाजुने बारि ताकुर?
ओर तिनाका मुन्ने कय्क बारि नोर्रुर?”
इंचि पूसकीतुर.
3 अस्के येसु ओर्कुन,
“मिमेट अय्ते मीवां मुन्नेटा रित-रिवाजकुन ताकसालय पेन वेहता पोल्लेतुन होळसेक मंतिर.
4 पेन अय्ते इत्ते गदा,
निमे नीवा तल्लुर-बाबोना कदर कीम.
अचोने आय्का बोरय्ते तल्लुर-बाबोन पोर्रो सापनेम दोस्संतोर ओन हव्कमडे गावाले इंचिगुडा पेन इत्ता.
5 गानि मिमेट अय्ते,
बोरन्ना ओना यावन-बान,
नना मीकु हियनद पूरा पेनदुके हींतन,
दानहाटीं मीवा सहायम किया पर्रोन,
इल्हा तल्लुर-बाबोना कदर इर्रना अवसरम हिल्ले,
इंचि कराहंतिर.
6 इत्ते मिमेट मीवा रित-रिवाजकुनाहाटीं पेन वेहता पोल्लेतुन होळसेक मंतिर.
7 अरे डोंगिरिटा,
यसयाल पोर्रोलता पेनदा कबुरतोर मीवा बारेमते निजमे वेहतोर,
ओर इत्ताप
8 ईर लोकुल्क सिराप तोडदेने नावा कदर कींतुर,
गानि ईरा मनसु मात्रम नहागटाल बच्चोनो लक्कु मनंता.
9 ओर अंगडमे नावा पोर्रोल एतसेके मनांतुर.
बारित्ते ओरहाटीं मनकलोर तयार कीता पद्दतके निजमतव,
अवुना पालन कियमळे दर्मम इंचि कराहंतुर.”a
10 अस्के येसु लोकुल्कुन दगेर्क केयसि,
“केंजट आनि अर्तम कीकुंटु.
11 बतल अय्ते तोळदाल लोप्पो दांतनो अद मनकन कराब किय्यो,
गानि बद अय्ते तोळदाल पलात्कु वांतनो अदे मनकन कराब कींता.”
इंचि इत्तोर.
12 पजा सिस्युल्क येसुनगा वासि,
“निमे वेहतद केंजसि परिसिल्क होंग आतुर इद नीकु तेळियतना?”
इंचि पूसकीतुर.
13 अस्के येसु जवाबुने,
“स्वर्गमते मनना नावा बानाहेंदाल वाटुवद बदे मोल्का आयि,
दान पीकिस पोहमळ जर्गंता.
14 ओरद होन्नि,
ओर गुड्डोर्कुंक हर्रि हुप्सना गुड्डोर्क आंदुर.
ओक्कला वरोर गुड्डोड इंका वरोर गुड्डोंक हर्रि हुप्सालय होत्ते इव्वुर इंका पोक्कातेन अर्रांतुर,”
इत्तोर.
15 पजा पत्रु,
“निमे वेहता इद वेसुडितद अर्तम बतल माकु वेहा,”
इंचि इत्तोर.
16 अस्के येसु “मीकु इंदके नना तेळिया हिल्लेना?”
इंचि पूसकीतोर.
17 “बतल अय्ते तोळदे दांतनो अदंता पीटे दांता आनि पज्जो पलाते अर्रंता.
इद मीकु इंकागुडा तेळिया हिल्लेना?
18 गानि बव पोल्लें अय्ते तोळदाल पलाते पेय्संतंगों अव मनसुनाल वांतां,
अवे पोल्लें मनकन कराब कींतां.
19 इत्ते कराब विचाराल्क,
हव्कामळ,
बोगमतनम,
दोंगातनाल्कु,
अबाद्दाल्क आनि इंकावरोन तेंडिस पोहमड इवन्नि पापि कबाह्क मनसुनाले पलाते वांतां.
20 अदुनहाटीं मनकन हेड्हानव इवे पोल्लें आंदुं.
गानि कय नोर्राकोंटा तिनानय्ते मनकल कराब आयोर.”
इंचि वेहतोर.
वेरे जातिता मुरतळकु सहायम कींतोर
21 पजा येसु अगटाल पेय्सि सूर आनि सिदोन एरियाते होत्तोर.
22 अस्के हुळा!
उंदि कनानि मुरतळb येसुनगा अळसेक वासि,
“सामि,
दाविद राजाना मर्रि,
नावा मिय्यटुन देय्यम पीसि वेल्ले तकलिपने मंता,
नावापोर्रो इच्चुर दया हुप्सा” इंचि मोत्कुनालय दल्गुता.
23 गानि येसु मात्रम बतले वळकाकोंटा सपुडदाका मत्तोर.
अस्के सिस्युल्क येसुनगा वासि,
“आ मुरतळ मना पज्जो मोत्कुंचेके वासंता दान वापस लोहचिम.”
इंचि विनंति कीतुर.
24 अस्के येसु,
“गानि नाकुन पेन बाबाल सिराप इस्राएलता तप्सोत्ता लोकुल्कुनाहाटीं लोहचितोर.”
इंचि इत्तोर.
25 अयना आ मुरतळ मर्रा येसुन मुन्ने वासि टोंगरां ऊनसि,
“सामि नाकु सहायम कीम,”
इंचि इत्ता.
26 अस्के येसु,
“पिलाल्कुना हारिं तेंडकुंचि अवुन नय्कुंक वाटमळ बेस आयो,”
इंचि इत्तोर.
27 अस्के आ मुरतळ,
“अद निजमे सामि,
गानि लोता मनकल तिननेंके हिडु अर्ता अंटकुल्कुन अय्ते नय्के तिंतां,”
इंचि इत्ता.
28 अस्के “बाई नीवा विस्वासम गट्टिदि.
इंचि नीवा इच्चा मत्ताप नीकु जर्गीकांटी,”
इंचि येसु इत्तोर.
आनि अस्केन दाना मिय्यड बेस आता.
येसु नालूं वेय्कुंकन्ना वेल्ले मंदिक गाटो दोसतोर
29 पजा येसु अगटाल गालिलता सेरवुनहेके होत्तोर आनि अगा उंदि गुप्पापोर्रो एक्किस उदुतोर.
30 अस्के वेल्लेन मंदि लोकुल्क ओनागा वातुर.
वायनेंके गुड्डोर्क,
गूनोर्क,
कुंटोर्क-तोंटोर्क,
मूकालोर्क आनि इंका वेरे रोगाल्कुनोर्कुन पीसि ओनागा तायसि ओना काल्कुनगा इरतुर.
येसु अंटोर्कुन बेस कीतोर.
31 अस्के मूकालोर्क वळकालय दल्गुतुर,
कुंटोर्क ताकालय दल्गुतुर,
तोंटोर्क सवरगा आतुर,
गुड्डोर्क हूळालय दल्गुतुर.
इवंता हूळसि जमा आता लोकुल्कुंक इचंत्रम आता,
आनि इस्राएलता पेनदा स्तुति कीतुर.
32 पजा येसु ओना सिस्युल्कुन दगेर्क केय्सि,
“ईर लोकुल्क नहगा मूंड रोजकुनाल मंतुर,
ईरगा तिनालय बतल हिल्ले.
आनि ईरकुन उपासम लोहुड बेस आयो.
ओक्कला अल्हे लोहते कर्वेस्सि नडुम हरदे बगानना कूलाबडनुर.
अदुनहाटीं नाकु ई लोकुल्कुन हूळसि पापम अन्पिच्चंता,”
इंचि इत्तोर.
33 अस्के सिस्युल्क येसुन,
“इच्चो वेल्ले लोकुल्कुंक इच्चो वेल्ले गाटो ई केडाते मनाकु बगा दोर्कार?”
इंचि इत्तुर.
34 अस्के “मिहगा बच्चुं हारिं मंतां?”
इंचि येसु ओर्कुन पूस कीतस्के ओर “एडूं हारिं आनि इच्चूं सिन्ने जिम्मां मंतां.”
इंचि इत्तुर.
35 अस्के येसु मंदितुन हिडु बूमिपोर्रो उदा वेहतोर.
36 पजा येसु आ एडूं हारिन आनि आ जिम्मान कयदे पीसि पेनदुक दन्यवाद हीतोर.
मरा अवुन तुकडां कीसि सिस्युल्कुना कयदे हीतोर.
अस्के सिस्युल्क आ हारि तुकडन अगा मत्ता लोकुल्कुंक तूसि हीतुर.
37 अगा मत्ता अंटोर मंदि पीरनिंडा तित्तुर.
पजा मिगुल्ता हारि तुकडन जमा कीते अव एडूं तट्टां आतां.
38 अगा तिनानोराव्टेटाल मुर्ताह्कुन आनि पिलाल्कुन होळसिसि नालूं वेय्कुना मंदि मांडसे मत्तुर.
39 पजा अगा मत्ता मंदितुन होनालय वेहासि ओर डोंगाते उदिस मगदान इनना एरियाक पेय्सि होत्तोर.