यहुदि पेद्दाल्क येसुना परिक्सा हूळमळ
(मरकुस ८:११-१३; लूका १२:५४-५६)
16
1 परिसिल्क आनि सदुकिर्क येसुनगा वातुर.
ओर येसुना परिक्सा हूळाना उद्देसमते “निमे स्वर्गमताल वातिन इंचि मोमोट नम्मानाहाटीं माकु उंदि चिन्ह हुप्सा,”
इंचि इत्तुर.
2 अस्के येसु,
“पोड्दु होंचि मब्बु एर्रगा आयानय्ते मिमेट पिर्रु वायो इंतिर,
3 आनि हक्केर्कु मब्बु गुम्मरा आयानय्ते मिमेट इय्याला वडि दुमारम वांता बारे इंतिर.
मीकु मब्बुना रूपाल्कु एरपाट किया वांता,
गानि इद कालमते पेन बतल कीसंता अदुन मिमेट एरपाट कीसेक हिल्लिर.
4 सेड्डोर्क आनि पेनदा पोल्ले केंजुवा लोकुल्क चिन्ह हुप्सा इंतुर गानि योनाल इनना पेनदा कबुरतोना चिन्ह तप्पा इंकुंदि चमत्कारम हुप्सोन,”
इंचि इत्तोर.
आयंका ओर ओर्कुन होळसिसि होत्तोर.
येसु यहुदिल्कुना बारेमते वेहांतोर
5 सिस्युल्क सेरवुना हब्बेर ओड्डुंक होत्तुर,
गानि ओर हारिं ओयालय मरुंगतुर.
6 अस्के येसु ओर्कुन,
“परिसिल्क आनि सदुकिर्कुनद होयता पिंडिता बारेमते उसारते मंटु.”
इंचि इत्तोर.
7 अस्के ओर वरोंक-वरोर विचारम कीसि,
“मनम हारिं तायालय मर्गतोम दानहाटीं इल्हा इंचेके मंतोरो बतोलो,”
इंचि इत्तुर.
8 गानि येसु ओरा विचारमतुन एरपाट कीसि,
“अरे तक्को विस्वासमतोरिटा,
मनागा हारिं हिल्लें इल्हा विचारम मिमेट बारि किसेक मंतिट?
9 इदवेरदाका इंका मीकु तेळिया हिल्लेना?
हेय्युं हारिंने,
हेय्युं वेय्कुना मंदि तित्तद इंका मीकु मति हिल्लेना?
तित्तारित्ते बच्चुं तट्टाना हारिं मिमेट जमा कीतिर मीकु मति हिल्लेना?
10 अल्हेने नालूं वेय्कुना मंदि एडुं हारिं तिनानेंके,
बच्चुं तट्टाना हारिं जमा कीतिर मीकु मति हिल्लेना?
11 नना मीवातोनि वळकातद हारिना बारेमते आयो इंचि मीकु बल्हा तेळियसेक हिल्ले?
नना बारे परिसिल्क आनि सदुकिर्कुना होयता पिंडिता बारेमते उसारते मंटु इत्तन,”
इंचि इत्तोर.
12 अस्के ओर्कु,
“हारिना होयता पिंडिता बारेमते उसारते मंटु,”
इंचि वेहा हिल्लोर गानि परिसिल्क आनि सदुकिर्कुना कराहना बारेमते उसारते मनालय वेहतोर इंचि तेळियता.
येसे किरिस्तु आंदुर
(मरकुस ८:२७-३०; लूका ९:१८-२१)
13 येसु कैसरिया पिलिप एरियाते होत्तारित्ते,
“मनकंक पुटतोन नावा बारेमते लोकुल्क बतल इंतुर?”
इंचि सिस्युल्कुन पूसकीतोर.
14 अस्के सिस्युल्क,
“इच्चुर इंतुर गदा निमे बापतिस्मा हियना योहानुन आंदिन.
आनि इंका इच्चुर इंतुर गदा निमे एलियाल आंदिन आनि इंका बोरो इंतुर गदा निमे यिरमियन हिलाकोंटे पेनदा कबुरतोरव्टेटाल बोनो वरोन आंदिन.”
इंचि इत्तुर.
15 “अय्ते मरि,
मिमेट,
नना बोन आंदुन इंतिर?”
इंचि येसु ओर्कुन पूसकीतोर.
16 “निमे जीवाते मनना पेनदा मर्रिन किरिस्तुन आंदिन,”
इंचि सिमोन पत्रु इतोर.
17 अस्के येसु “योनाना मर्रि सिमोनु!
नीकु आसिर्वादम दोर्कुता.
बारित्ते,
इद पोल्ले नीकु बोर मनकल वेहा हिल्लोर,
गानि नावा स्वर्गमता बाबाल नीवा लोप्पोटाल वेहतोर.
18 इंदके नना नीवा पोर्रोल पत्रुa इंचि इरसंतन,
बारित्ते इदे बंडापोर्रो नना नावा चर्च bनिल्हांतन.
आनि दीनु हामुरगुडा कूल्हा पर्रो.
19 नना नीकु स्वर्ग राज्येमता तालम कय्कc हीसंतन,
अदुनहाटीं निमे बोर्कु अय्ते इद बूमिपोर्रो पेनदा राज्येमते होळियना अदिकारम हींतिनो,
ओर्कुन पेन दाना राज्येमते होळिया हींता.
आनि निमे बूमिपोर्रो बोर्क अय्ते पेनदा राज्येमते होळियना अदिकारम हिय्यिनो,
ओर्कुन पेनगुडा दाना राज्येमते होळिया हिय्यो.”
इंचि इत्तोर.
20 पजा सिस्युल्कुंक कडक आदेस हीसि,
“ननाने किरिस्तुन आंदुन इंचि मिमेट बोर्क वेहमट,”
इत्तोर.
येसु ओन्कु वायना हामुरतुन वेहांतोर
(मरकुस ८:३१; ९:१; लूका ९:२२-२७)
21 अस्केटाल येसु,
“नाकु येरूसलेम होना पींता.
अगा यहुदि पेद्दाल्क,
पेद्दा पेर्मालोर आनि दर्मसास्त्रम कराहना गुरुल्कुन हेंदाल वेल्ले तकलिप कीसि नाकुन हव्कानुर.
आनि मूंड रोजकुने नना मर्रा जीवाते तेदंतन,”
इंचि येसु ओना सिस्युल्कुंक वेहालय दल्गुतोर.
22 अस्के पत्रु ओन अलग ओसि,
“अल्हा वळका मन्नि सामि!
पेन दीन तपिचगोम.
नीकु इल्हा बस्केने आयामन्नि,”
इंचि इत्तोर.
23 गानि येसु पत्रुनेके तिरीयसि,
“निमे पेनदालेसीं विचारम कीसेक हिल्लिन गानि लोकुल्कुनलेसीं विचारम कीसंतिन,
अरे देय्यम बुद्दिते वळकाना मनका,
नावा मुन्नेटाल पेय्सि होन.
निमे नावाहाटीं उंदि आपत आंदिन.”
इंचि इत्तोर.
24 अस्के येसु ओना सिस्युल्कुनतोनि,
“बोरन्ना गिंटा नावा पज्जो वायना मत्ते ओर ओना पूरा इस्टाल्कु होळसिसि नावाहाटीं तकलिप अर्राना तयारते नावा पज्जो वायिर.
25 बोरय्ते ओना जीवातुन पिसागोटालय हुळांतोर,
ओना जीवा होन्नार.
गानि बोरय्ते नावाहाटीं जीवा होनागोटंतोर अद ओन्कु दोर्कंता.
26 बोरन्ना गिंटा पूरा दुनियांता संपालिचि आनि ओना जीवातुन पोळागोट्कुत्ते ओन्कु बता पाय्दा आंता?
मनकल ओना जीवाहाटीं बदला बतल हियनुर?
27 मनकंक पुटतोन नना नावा बाबाना महिमातेd दूतनतोनि वांतन,
आ वेलाते बोरे मनकल आयिर,
ओर कीता कबाह्कुना परकारमे ओर्क इनाम हींतन.
28 नना मीकु निजम वेहासेक मंतन,
इग्गे नितिस मनानोरा लोप्पोटाल इच्चुर इल्हा मंतुर गदा,
मनकंक पुटतोन नाकुन नावा राज्येमते वायनेंके बदवेरदाका अय्ते हूळुर,
अदवेरदाका ओर्कु हामुर वायो,”
इंचि इत्तोर.