येसुना रूपम मारियंता
(मरकुस ९:२-१३; लूका ९:२८-३६)
17
1 हारुं रोजकु आतारित्ते येसु पत्रुन,
याकोबुन आनि ओना तम्मुर योहानुन पीकुंचि अलग-सलग उंदि एत्तु गुप्पा पोर्रो होत्तोर.
2 अगा ओरा मुन्नेने ओना रूपम मारिय्ता.
आनि ओना मोकम पोड्दुना लेसीं जगजगा मेर्सता आनि ओना कपडीं वेलगुना लेसीं तेल्लगा आतां.
3 अस्केने मूसाल आनि एलियाल अगा वासि येसुनतोनि वळकानद ओर्कु दिसतुर.
4 अस्के पत्रु येसुन,
“मनम इगेने बेस मंतोम सामि!
नीवा मनसु मत्ते,
नीकु उंदि,
मूसांकु उंदि आनि एलियांकु उंदि इल्हा मूंड डेरां वाटंतन,”
इंचि इत्तोर.
5 पत्रु वळकासेकेन मत्तोर,
अस्केन उंदि तेल्ला मब्बु तेर्पे ओरापोर्रो निडा कीता,
आनि आ मब्बुनाल उंदि इसंटा अल्कीर केंजा वाता,
“इर नावा पावरमता मर्रि आंदुर,
इनतोनि नना कूस मंतन,
मिमेट इनां केंजट.”
6 आ अल्कीर केंजतस्के येसुनतोनि मत्ता सिस्युल्क वेरियसि बूमिपोर्रो मुसकिर कुच्चि अरतुर.
7 अस्के येसु ओरा दग्गेर वासि ओर्कुन इट्टिसि,
“वेरियमट,
तेदट” इत्तोर.
8 बस्के अय्ते तेदसि कळकु विच्चिसि पोर्रो हूळतुरो,
अस्के ओर्कु येसुंक तप्पा अगा बोरे दिस्सा हिल्लुर.
9 इदंता आतंका येसु आनि सिस्युल्क गुप्पा पोर्रोटाल हिडु रेय्नेंके येसु सिस्युल्कुंक वेहतोर गदा,
“मिमेट गुट्टापोर्रो बतल अय्ते हूळतिरो अद मनकंक पुटतोन नना हामुरताल तेदन दाका बोरके वेहमट,”
इंचि आदेस हीतोर.
10 “मरि किरिस्तु वायना मुन्ने,
एलियाले मोदाला वायमळ गावाले इंचि दर्मसास्त्रम कराहना गुरुल्क बारिंक इंतुर?”
इंचि सिस्युल्क पूसकीतुर.
11 अस्के येसु इत्तोर गदा,
“एलियाल तप्पाकोंटा वांतोर,
वासि मुन्ने बल्हा मत्ता अल्हा तयार कींतोर.
12 गानि नना मीकु वेहनद बतल इत्ते,
एलियाल वासे मंतोर गानि ओन बोरे एरपाट कियवा ओर्कु इस्टम वाताप ओर ओन कीतुर.
मनकंक पुटतोन ननागुडा ओरा हेंदाल अल्हेन कस्टाल्क बोगींचनद मंता.”
इंचि वेहतोर.
13 येसु बापतिस्मा हियना योहानुना बारेमते वेहासेक मंतोर इंचि सिस्युल्कुंक अस्के तेळियता.
येसु देय्यम पीता पेडन बेस कींतोर
(मरकुस ९:१४-२९; लूका ९:३७-४३)
14 येसु आनि ओना सिस्युल्क लोकुल्कुनगा वातारित्ते वरोर मनकल ओनागा वासि येसुना मुन्ने टोंगरां उहचि,
15 “सामि!
नावा मर्रिन पोर्रो दया हुप्सा.
ओन्कु कुंदेल रोगम अर्तस्के ओर ऊके-ऊके तडमिते आनि एते अर्रांतोर,
इंचि ओन्कु इरगा तिप्पल्क आसेक मंता.
16 नना ओन नीवा सिस्युल्कुनगा तत्तन गानि ओर बेस किया परा हिल्लुर,”
इंचि इत्तोर.
17 अस्के येसु,
“अरे अविस्वासि आनि हर्रि तपता लोकुरिटा,
नना बचोदाका मितोनि मनकन?
नना मीकुन बचोन सहन कीकन?
ओन नाहेके तटु.”
इंचि इत्तोर.
18 ओन तत्तस्के येसु आ पेडन पीता देय्यमतुन गद्दरिच्चि गेदुमतोर.
आनि अस्केन आ पेडल बेस आतोर.
19 पजा सिस्युल्क येसुनगा बोर हिल्वस्के वासि,
“आ देय्यमतुन मोमोट बारी तेंडा पर्रा हिल्लोम?”
इंचि पूसकीतुर.
20 अस्के “मीवद पेनदापोर्रो गट्टिगा विस्वासम हिल्ले.
नना मीकु निजम वेहासेक मंतन,
मी लोप्पो आवाल्कुना पेळेतच्चो अय्ना विस्वासम मननाय्ते ‘इ गुट्टातुन इगेटाल हेके जर्गिसि होन’ इंचि मिमेट इननाय्ते अद जर्गिसि होंदार.
मिमेट अन्नि कबाह्क किया परांतिर.
21 a (गानि इसंटा देय्याल्क सिराप पारतना आनि ओक्कापोद्दूक कीतेने दांतां),”
इंचि येसु इत्तोर.
ओना सतता हामुरता बारेमते वळकांतोर
(मरकुस ९:३०-३२; लूका ९:४३-४५)
22 ओर गालिलते वातंका उंदि जेगाते जमा आतस्के,
“मनकंक पुटतोन नाकुन लोकुल्कुना कयदे दोर्का पीसि हियनद मंता.
23 ओर ओना जीवा तिंतुर आनि मूड रोजकुंक ओन्कु मर्रा जीवा अर्रार,”
इंचि येसु ओर्कुन इत्तोर.
इद केंजसि सिस्युल्कुंक इरगा दुक्कम अन्पिस्ता.
24 अगटाल येसु कपर्नाहुम नाटेंक वातस्के गुळिना कर वसुलि कियानोर पत्रुनगा वासि,
“मीवा गुरु,
गुळिता कर दोहोरा?”
इंचि पूसकीतुर.
25 अस्के पत्रु,
“आ दोहंतोर!”
इंचि इत्तोर.
ओर लोता लोप्पो होत्तोर,
होंचि येसुंक वेहाक मुन्नेन येसु,
“सिमोनु,
नीकु बतल अन्पिच्चेक मंता?
ई दुनियाते मनना राजुकु जकात आयि कर आयि बोरा हेंदाल एतंतुर,
ओरा मर्कुन हेंदाला मरि इंका बोरन्ना वेरेतोरा हेंदाला?”
इंचि पूसकीतोर.
26 अस्के पत्रु,
“वेरेतोरा हेंदाल,”
इंचि इत्तरित्तेन येसु ओन,
“अय्ते मर्क पिरि मंतुर मरि!
27 अय्ना ओर्कुन नाराज किया मन्नि इंचि निमे गालम वाटालय होन्नु आनि मुन्ने अर्ता जिम्मातुन पीसि दाना तोडदुन पर्हा,
पर्हातारित्ते उंदि कल्दार दोर्कार.
अद ओसि नावा आनि नीवा पोर्रोलते कर दोहासि हीम.”
इंचि इत्तोर.