स्वर्ग राज्येमते पेहरोर बोर?
(मरकुस ९:३३-३७, ४२-४८; लूका ९:४६-४८; १७:१-२)
18
1 आ वेलाते सिस्युल्क येसुनगा वासि,
“स्वर्ग राज्येमते अंटोर्कन्ना पेहरोर बोर?”
इंचि पूसकीतुर.
2-3 अस्के येसु वरोर सिन्ना पेडन केयसि ओरा नड्डुम निपिच्चि इल्हा वेहालय दल्गुतोर.
“नना निजम वेहंतन,
मीवा गुनाल्कुन मार्सकुंचि मिमेट पेडनलेसींa आयवा,
स्वर्ग राज्येमते बस्केन होना परिर.
4 दानहाटीं बोरय्ते ओनाद ओरे ई सिन्ना पेडन लेह्का सादा-सिंपल मनांतोर,
ओरे स्वर्ग राज्येमते पेहरोर आंदुर.
5 आनि बोरय्ते ना पोर्रो विस्वासम कियना ई सिन्ना पेडनसंटोन बेस हूळांतोर,
ओर नाकुन बेस हूळांतोर.
6 गानि बोराय्ते ना पोर्रो विस्वासम कियना सिन्ना पेडनसंटोन नावा पोर्रोटा विस्वासमताल तप्सालय हूळांतोर,
ओना बोंडगेक जोत्ता बंडा दोहाचि ओन बेरेडता लोतु एते ओसि मुळुहमळे बेस मनंता.
7 ई दुनियाते कोन्नि इसंटा पोल्लें मंतां गदा,
आ पोल्लेनहेंदाल दुनिया लोकुल्कुन विस्वासमताल तप्संता.
अदुनहाटीं ई दुनियाकु बचोन गोसा वायार!
आनि इवन्नि अय्ते जरगानुंगें गानि अव बोनाहेंदाल अय्ते जर्गंतांगो ओन्कु बचोन गोसा वायार!”
8 उंदि वेलाते नीवा कय आयि काल आयि नीकुन विस्वासमताल तपिस्ते दान नर्कीसि पोच्चा.
बारित्ते रोंडु कय्क,
रोंडु काल्क मंचि बस्केन पिर्रुवा तडमि मनना नरकमते होनना दानकन्ना,
कूटाल आसि स्वर्गमते होनमडे निहाटीं बेस.
9 अल्हेने नीवा कळु नीकुन विस्वासमताल तपिस्ते दान तेंडिस पोच्चिम,
बारित्ते रोंडु कळकु मंचि नरकमता तडमिते होनन दानकन्ना गुड्डोड आसि स्वर्गमते होनमडे नीकु बच्चोनो बेस.
10 हूळाट,
नावापोर्रो विस्वासम कीता ई सिन्नोरकुन बोने तेंडिस पोहमटु.
नना वेहनद बतल इत्ते,
ओरा पेनदा दूतां स्वर्गमते मनना नावा पेनबाबांक बस्केळक कलियसेके मनंतां.
11 (अचोने आयका मनकंक पुटतोन नना तप्सोत्तोर्कुन पिसागोटलय वातन.)b
12 “बोनागना नूर गोर्रें मंतां इनकुंटु.
अंटेटाल उंदि गोर्रे तप्पिस होनानय्ते,
ओर टोंबै तोम्मिद(९९) गोर्रेन अगेने गुट्टापोर्रो होळसिसि आ उंदि गोर्रेतुन पहकालय होन्नोरा?
13 दांतोर,
आनि ओन्कु गिंटा होत्ता गोर्रे दोर्कानय्ते,
नना निजम वेहसेक मंतन,
आ टोंबै तोम्मिद होनवा गोर्रेंकन्ना,
तप्पिसोत्ता उंदि गोर्रे पोर्रो एक्को आनंदम आयानुर.
14 अल्हेने ई सिन्नोरकुनाल वरोर इंका नासडेम आयामन्नि इंचि स्वर्गमते मनना बाना मनसु मंता.”
तपसोत्तोर्कुंक बतल वेहना?
15 cओक्कला तम्मुर आयि दादाल आयि नीवा विरोदमते पापम कियानय्ते,
निमे वरोने ओनागा होंचि ओर कीता पापम ओन्कु तेळियागोट्सि वेहा.
ओरगिंटा नीवा पोल्ले केंजानय्ते निमे ओना मनसुन गेल्सताप.
16 उंदि वेला ओरगिंटा नीवा पोल्ले केंजुवस्के,
वरोर-इव्वुरकुन नीवा पज्जो पीसि होन.
बारित्ते,
अगा बतल जर्गुतनो अदुन वेहालय ओर गवाइ मनांतुर.
17 ओक्कला ओर ओरा पोल्लेगुडा केंजाकुंटे चर्चुतोर्क वेहा.
आनि चर्चुतोर वेहतदगुडा केंजाकुंटे,
ओर पेनदा मनकल आयोर इंचि इनकुन.
हिलाकोंटे कर वसुल कियानसंटोरd इनकुन.
18 “eनना मीकु निजम वेहसेक मंतन,
निमे बूमिपोर्रो बद अय्ते दोहकिन अद स्वर्गमते दोहानुर,
आनि निमे बूमिपोर्रो बद अय्ते होळसकिन अद स्वर्गमते होळसियानुर.
19 अचोने आयका नना वेहनद निजम बतल इत्ते,
ई बूमिपोर्रो मीवा लोप्पोटाल बोरन्ना इव्वुर उंदि आसि मीकु बतल अय्ते गावालेनो अद तल्कानय्ते स्वर्गमते मनना नावा पेन बाबाल तप्पकोंटा हींतोर.
20 बारित्ते बगा अय्ते नावा पोर्रोलते इव्वुर-मुव्वुर उंदगा जमा आंतुरो,
अगा ओरा नड्डुम नना मनांतन,”
इंचि येसु इत्तोर.
वरोनद वरोर माप कियना
21 अस्के पत्रु येसुनगा वासि,
“सामि,
वरोर तम्मुर आयि दादाल आयि नावा विरोदमते पापम कियानय्ते,
नना ओन बच्चुं मल्कां माप कीकन?
एडुं मल्कंगां?”
इंचि पूसकीतोर.
22 अस्के येसु ओन्कु,
“एडूंगें मल्कां आयो,
ओर बच्चुं मल्कां तप्पु कियना गानि ओन निमे माप कीसेक मन्नु,”
इंचि वेहतोर.
23 पजा येसु इल्हा वेहालय दल्गुतोर,
स्वर्ग राज्येम वरोर राजन लेह्का मंता.
आ राजाल ओन्कु बाकी मत्ता जीतागाह्कुना हेंदाल बाकीं वसुल कियना इंचि विचारम कीतोर.
24 आनि ओर वसुल कियालय सुरुव कीतस्के,
वरोर लाको रूपेना बाकी मत्ता जीतागान राजानहेके तत्तुर.
25 आ जीतागानगा बाकीं दोहालय बतांगें हिल्लेक मत्तां.
अस्के राजाल ओन्कु आदेस हीतोर गदा,
“ओर ओना मुत्तो-पिलाल्क,
लोन-दारा अचोने आय्का ओनागा बतल अय्ते मंतनो अद अन्नि अम्मिसि,
वाता कोत्तानाल बाकीं दोहिरकांटी,”
इंचि वेहतोर.
26 अस्के आ जीतागाल राजाना काल्कुनपोर्रो अर्सि बात्मिलाडतोर,
“राजा नाकु कोन्नि रोजकुना मुदत हीम,
मेल्लगा-मेल्लगा नावा बाकी पुरागा दोहंतन,”
इंचि इत्तोर.
27 अस्के आ राजांक जीतागाना दया वासि ओना बाकीं अंता पुरागा माप कीसि होळसितोर.
28 पजा आ जीतागाल अगटाल पेय्सि होननेंके ओन्कु नूर रूपें बाकी मत्ता ओना दंटाता जीतागाल हरदे कलियतोर.
अस्के ई मुन्नेटा जीतागाल आ जितागाना बोंळ्गे पीसि,
“नाकु हियना कोत्तां बस्के हींतिन?
नाकु इंदकेटद इंदकेन हीम,”
इंचि ओन इत्तोर.
29 पजा आ जीतागाल मुन्नेटा जितागाना काल्कुना पोर्रो अर्सि विनंति कीसि,
“निमे कोन्नि रोजकु ओपके पीम,
नना नीवा बाकीं नीकु हींतन,”
इंचि इत्तोर.
30 अय्ना ओर बतले केंजाकोंटा,
ओर बाकी दोहनाल जेप ओन जेलुने वाटसीतोर.
31 अस्के इगे जर्गतद ओना दंटाता जीतागाह्क हूळतुर आनि ओर्कु वेल्ले दुक्कम आता.
आनि ओरा राजानगा होंचि इगे जर्गतव अंता वेहतुर.
32 अस्के राजाल ओन केय्सि इत्तोर,
“अरे बुद्दि हिल्वा मनका,
नीकु इच्चोर इंका दया वाया हिल्लेना?
निमे नावा काल्क पीसि विनंति कीतिन अय्ते नना नीवा पूरा बाकीतुन माप कीतन.
33 नना बल्हा नीवा पोर्रो दया कीतनो अल्हेने निमे नीवा दंटातोना पोर्रो दया किया मत्तिन.”
34 इंचि राजाल ओनपोर्रो होंग आसि ओन जेलने वाटसीतोर.
आनि ओना बाकी नेम्मनजेप ओन जेलनाल होळसा हिल्लोर.
35 इल्हेने मिमेट इंका मीवा तम्मुन आयि दादान आयि मनसुनाल माप कियाकुंटे ई राजाल बल्हा कीतोरो अल्हेने नावा स्वर्गमते मनना बाबाल इंका मीकुन माप किय्योर.