सोडसिट्टिता बारेमते येसु कराहता पोल्लें
19
1 इव अन्नि पोल्लें वेहामळ आतारित्ते येसु गालिल एरियाताल पेय्सि योर्दन बेरेडता हब्बेर ओड्डुंक मनना यहुदिया एरियाते होत्तोर.
2 अस्के वेल्लेन मंदि ओना पज्जो होत्तुर.
आनि अगा मत्ता बिमारतोर्कुन येसु बेस कीतोर.
3 पजा अगा इच्चुर परिसिल्क इंका वातुर आनि येसुन बल्हानना तप्पुने दोर्का पियना इंचि येसुन,
“मूसाना नियम परकारम,
बदन्ना उंदि कारनम पोर्रोटाल मुत्तोन होळसिय्या वच्चा?”
इंचि पूसकीतुर.
4 अस्के येसु,
“मिमेट दर्मसास्त्रमते हदविसिंका मंदकीट,
बस्के अय्ते पेन ई दुनियातुन तयार कीतानो,
अस्केने मांड्सा आनि मुरतटुन तयार कीता.a
5 दीनाहाटीं पेन इल्हा इत्ता,
मांड्सा यावन-बाबान होळसिसि ओना मुत्तोन पीसि मनांतोर.
आनि ओर इव्वुर उंदे मेंदुल आसि मनांतुर.
6 अदुनहाटीं ओर इव्वुर वेरे आयका उंदे आंदुर.
ओर इव्वुरकुन पेन कल्पुता,
इंचि ओर्कुन बोरे वेरे कियना हिल्ले,”
इंचि इत्तोर.
7 इद केंजसि परिसिल्क,
“अल्हा अय्ते मरि,
मनकल ओना मुत्तोंक सोडसिट्टि हीसि होळसियना आदेस मूसाल बारिंक हीतोर?”
इंचि मर्रा पूसकीतुर.
8 अस्के येसु ओर्कुन,
“मिमेट पेन वेहता पोल्लेन पिय्योम इत्ताहेंका मूसाल मुत्तोह्कुन होळसियना आदेस हीतोर,
गानि मुन्नेटाल इसंटा सोडसिट्टि हियना पद्दत मनाहिल्ले.
9 नना मीकु वेहासेक मंतन गदा,
बोरय्ते ओना मुत्तोन बोगमतनमता कारनम आयवा वेरे कारनमताहाटीं होळसिसि वेरेदानतोनि मरमिं आंतोरो ओर बोगमतनम कींतोर.”
इल्हा इत्तोर.
10 इद केंजसि ओना सिस्युल्क ओन,
“अय्ते मुत्तो आनि मुय्दोन नड्डुम इसंटा लेक्का मत्ते मरमिं आयाकोंटेन सूटि,”
इंचि इत्तुर.
11 येसु ओर्कु इल्हा समजांस्तोर,
“मिमेट इत्ता पोल्लेतुन स्विकारम कियमळ अंटोर्क कुदुरो,
गानि बोनकु अय्ते ई पोल्लेन पीसि ताकना ताकत पेन हीतनो ओरे स्विकारम कींतोर.
12 बारित्ते बोरो-बोरो तलुह्कुना पीटाले आडिगुंलोर्क आसि पुटतोर मंतुर,
मनकलोरा कयदालगुडा आडिगुंलोर्कb आतुर मंतुर,
आनि स्वर्ग राज्येमता हेंका इच्चुर मंदि मरमिं आयाकोंटा मंतुर.
इंचि बोर्क अय्ते ई पोल्लें नच्चंतंगो ओर इदुन स्विकारम कियिरकांटी.”
येसु पिलाल्कुंक आसिर्वादम हींतोर.
(मरकुस १०:१३-१६; लूका १८:१५-१७)
13 पजा इच्चुर लोकुल्क ओरा पिलाल्कुना पोर्रो कय इर्सि पारतना कियाना इंचि येसुनगा पीकुंचि वातुर,
गानि सिस्युल्क मात्रम ओर्कुन तेराहतुर.
14 अस्के येसु,
“पिलाल्कुन नाहेके वाया हीम्टु,
ओर्कुन आपमटु.
बारित्ते स्वर्ग राज्येम इसंटोरदे आंद,”
इंचि सिस्युल्कुन इत्तोर.
15 पजा येसु पिलाल्कुना पोर्रो कय इर्सि आगटाल पेय्सि होत्तोर.
दनवंतुड येसुन पूसकींतोर
(मरकुस १०:१७-३१; लूका १८:१८-३०)
16 वरोर मनकल येसुनगा वासि,
“गुरु,
बस्केळक पिस्सना पिसवर गावाले मत्ते नना बसंटा बेसता कबाह्क कीते सरे?”
इंचि पूसकीतोर.
17 “बेस इत्ते बतल,
नाकुन बारि पूसकींतिन?
बेसतद अय्ते पेन उंदे आंद.
नीकु गिंटा बस्केळक पिस्सना पिसवर गावाले अनपिच्ते पेनदा नियम परकारम ताका.”
इंचि येसु इत्तोर.
18 “बव नियमकु?”
इंचि आ मनकल येसुन इत्तरित्ते,
“बोने हव्कुमा,
बोगमतनम कियमा,
दोंगातनम कियमा,
आबद्दम गवाइ हियुमा,
19 नीवा यावन-बाना कदर इर्रा आनि निमे नीवा पोर्रो बल्हा पावरम कींतिनो अल्हेन इंका वरोनिंका पावरम कीम.”
इंचि येसु वेहतोर.
20 अस्के आ लेय्योड,
“नना इव अन्नि कीसेकेने वातन,
इंका नावा लोप्पो बतल तक्को मंता?”
इंचि येसुन इत्तोर.
21 अस्के येसु,
“नीकु गिंटा सत्तेमते पुरागा आयनद मत्ते,
निहगा मत्ता दनमतुन अम्सि,
गरिबोर्कुंक तूसि हीम.
अस्के नीकु स्वर्गमता दनम दोर्कंता.
अस्के निमे नहगा वासि ना पज्जो ताका.”
इंचि ओन इत्तोर.
22 गानि ओनगा सोम्मु वेल्लेन मत्ताहेंका ई पोल्ले केंजसि लेय्योड सिम्मरा आसि पेय्सि होत्तोर.
23 अस्के येसु ओना सिस्युल्कुन,
“नना मीकु निजम वेहासेक मंतन,
स्वर्ग राज्येमते दनवंतुल्कु होनुडु इत्ते कस्टमे.
24 नना इंका वेहासेक मंतन,
स्वर्ग राज्येमते दनवंत मनकल होनना दानकन्ना लोटापेटा सूदि बोंगाताल होनमळ अल्कगा मंता,”
इंचि इत्तोर.
25 इद केंजसि सिस्युल्कुंक वेल्ले इचंत्रंम आता.
अदुनहाटीं ओर येसुन “अय्ते मरि बोर्क मुक्ति दोर्कार?”
इंचि पूसकीतुर.
26 अस्के येसु ओना सिस्युल्कुनहेके बागा हूळसि,
“मनकलोर्क ओरद ओरे मुक्ति दोर्किच्कुना परुर,
गानि पेन मात्रम अन्नि किया पर्रंता.”
इंचि इत्तोर.
27 अस्के पत्रु,
“हुळा,
मोमोट अय्ते मत्तद-हिलवद अन्नि होळसिसि नीवा पज्जो वातोम.
अय्ते माकु बतल दोर्कार?”
इंचि येसुन इत्तोर.
28 “नना मीकु निजम वेहासेक मंतन,
पूना युगमते,
मनकंक पुटतोन नना नावा महिमाता राजगद्देपोर्रो उद्दंतन,
अस्के नावा पज्जो मनानोर मिमेट इंका पन्नेंडु राजगद्देन पोर्रो उदिस इस्राएलता पन्नेंडु गोत्राल्कुंकु न्यायम कींतिट.
29 अचोने आयका नावाहाटीं बोरय्ते लोन-दारा,
दादालुर-तम्मुह्कुन,
अक्काह्क-सेल्लेह्कुन,
यावन,
बाबान,
पिलाल्कुन,
इंका बूमिं-जेगां इव अन्नि होळसितुरो ओर्कु आ होळसितवुंकन्ना नूर अंताल्क एक्को दोर्कार.
इंका ओर्क बस्केळक पिस्सना पिसवर दोर्कार.
30 इदुनहाटीं बोरय्ते मुन्ने मंतोर वायना कालमते ओर पज्जो अर्रानुर.
आनि पज्जोटोर मुन्ने अर्रानुर,”
इंचि येसु ओन इत्तोर.