वरोर नेदा मालकुना वेसुड
20
1 येसु मर्रा इत्तोर.
नना मीकु स्वर्ग राज्येम बारेमते उंदि वेसुड वेहंतन केंजट.
वरोर नेदा मालक मत्तोर.
ओर हक्केरेने तेदसि,
ओना अंगुर बगिचाते कबळ कियालय बूतिनोर्कुना हाटीं पलाते होत्तोर.
2 आनि उंदि रोजुना बूति,
मनकंकु उंदि एंडि रूपाय हींतन इंचि करार कीसि,
ओर्कुन अंगुर बगिचाते कबळक लोहतोर.
3 जावोळ्द पोड्दु आतस्के आ नेदा मालक हाटुमते होंचि हूळतोर,
अस्के रिकम मनानोर इच्चुर मंदि ओन्कु दिसतुर.
4 “मिमेट इंका नावा अंगुर बगिचाते कबळ कियालय होंट.
मीवा कबळलायक बूति नना मीकु हींतन,”
इंचि मालक ओर्क वेहतोर.
अल्हा इत्तारित्ते ओर इंका बगिचाते कबळ कियालय होत्तुर.
5 आ मालक पियाटील आनि पोंटेकु मर्रा हाटुमते होत्तोर.
आनि रोंडु मल्कां इंका बूतिनोर्कुन तच्चि बगिचाते कबळ कियालय वेहतोर.
6 पोड्दु अर्रालय गंटामेड मत्तस्के आ मालक मर्रा उंदि मल्का हाटुमते होत्तोर,
अस्के इंका इच्चुर मंदि रिकम मत्तोर्कुन हूळतोर.
“मिमेट इगे पोड्दुमेड वट्टिदे बारि नितिस मंतिर?”
इंचि मालक ओर्कुन पूसकीतोर.
7 अस्के ओर,
“माकुन बोरे बूतिकु केया हिल्लुर,
दानहेंके मोमोट नितिस मंतोम दादा!”
इंचि इत्तुर.
अस्के आ मालक ओर्कुन,
“अल्हा अय्ते मिमेट इंका नावा अंगुर बगिचाते कबळ कियालय होंट,”
इंचि वेहतोर अस्के ओर होत्तुर.
8 “पोड्दु होत्तारित्ते अंटोर बूतिनोर्कुन केयसि,
अंटोर्क बूति हीम,
आकिर वातोरकुंक मुन्ने हीम,
मुन्ने वातोर्कुंक आकिर हीम,”
इंचि मालक ओना जीतागानकु वेहतोर.
9 पोड्दु अर्रालय गंटामेड मत्तस्के बूति वातोर,
बूति एतालय होत्तुर,
अस्के ओर्कु पोड्दुमेटा बूति दोर्कुता.
10 अदुन हूळसि हक्केरे वाता बूतिनोर “माकु वेल्लेन कोत्तां दोर्कनुं बारे,”
इंचि इनकुत्तुर.
गानि ओर्कु इंका अचोने बूति दोर्कुता.
11-12 आ बूति एततस्के ओर मालकुन इत्तुर,
“ईर पज्जो वासि उंदि गंटा कबळ कीतुर,
मोमोट अय्ते ईरकन्ना एक्को कस्टमते,
एर्रना एद्दीते कबळ कीतोम.
गानि निमे माकु ओरा अचोने बूति हीतिन,
इद माकु नच्चा हिल्ले,”
इंचि गुल्गुतुर.
13 “नना नीकु बतल अन्यायम किया हिल्लेन दादा,
नना नीकु उंदि रोजुना बूति हींतन इंचि इत्तस्के निमे ओप्कुतिन गदा?
14 अदुनहाटीं निमे गुल्गाकोंटा नीवा बूति पीसि होन.
नीकु नना बच्चोन बूति हीतन,
अचोने बूति ईर आकिरते वातोर्क इंका हियना इल्हा नावा मनसु मंता.
15 नना नावा कोत्तन नावा मनसु मताप कर्स कियना हक्कु नाकु हिल्लेना?
नना बेस मनकन मत्ताहाटीं निमे ना पोर्रो बारि अळसंतिन?”
इंचि ओरा अव्टेटाल वरोन मनकन मालक इत्तोर.
16 इदुन परकारम बोर मुन्नेटोर मंतुर,
ओर आकिरतोर आयनुर,
अल्हेने बोर आकिरतोर मंतुर,
ओर मुन्नेटोर आयनुर,
इंचि येसु वेसुड वेहामळ आपतोर.
येसु ओना हायना हामुरतुन मर्रा वेहांतोर
(मरकुस १०:३२-३४; लूका १८:३१-३४)
17 येसु येरूसलेमते होननेंके,
पन्नेंडु सिस्युल्कुन उंदि बाजुंक ओसि,
18 “केंजट,
मनम येरूसलेम होंचंतोम,
अगा होत्ता पजा मनकंक पुटतोन नाकुन पेद्दा पेर्मालोर्कुना आनि दर्मसास्त्रम कराहना गुरुल्कुना कयदे पीसि हियनुर.
आनि ओर ओन्कु हामुरता सिक्सा हियालय वेहानुर.
19 पजा नाकुन वेरे जातितोर्कुंक हियनुर.
अस्के आ वेरे जातितोर नावापोर्रो उस्कानूर-पास्कनुर,
पोट्टेते तन्नानुर,
पजा नाकुन क्रुसुनपोर्रो मोल्लां कोह्कानुर.
गानि मूंड रोजकुने हामुरताल तेदंतोरa,”
इंचि इत्तोर.
उंदि यावल येसुन विनंति कींता
20 अच्चोटेने जब्दीना मुत्तो दाना मर्क याकोब आनि योहानुन पीसि,
येसुनगा वासि ओना काल्कुनपोर्रो अर्सि उंदि विनंति कीता.
21 अस्के “नीकु बतल गावाले,
अक्का?”
इंचि येसु दान पूस कीतस्के,
“निमे नीवा राजगद्देपोर्रो उदतस्के नावा इव्वुर मर्कुन,
वरोन नीवा तिना बाजुंक,
आनि इंकावरोन नीवा डेमा बाजुंक उपिच्चि,
नीवातोनि राज्येम कियालय नाकु पोल्ले हीम” इंचि अद इत्ता.
22 “मिमेट बतल पूसकीसंतिरो,
अद मीकु तेळिय्सेक हिल्ले?
नना बद तकलिपने अरसंतन,
अद तकलिप मिमेट अर्रा परंतिरा?”
इंचि येसु इत्तोर.
अस्के “हो,
मोमोट इंका आ तकलिप अर्रालय तयार मंतोम,”
इंचि ओर इत्तुर.
23 पजा येसु ओर्कुन,
“नना अर्राना तकलिब मिमेट अर्रा परंतिर,
निजमे!
गानि राज्येम कियानेंके,
नावा तिना बाजुंक आनि नावा डेमा बाजुंक उपिचना अदिकार नाकु हिल्ले.
अद जेगा बोराहाटीं ना बाल तयार कीतोरो,
ओरे अगा उद्दा परांतुर,”
इंचि वेहतोर.
24 आ दादाल-तम्मुना पोल्लें केंजसि,
अगा मत्ता कळमता पदि मंदि सिस्युल्क ओरापोर्रो होंग आतुर.
25 अस्के येसु सिस्युल्कुन ओना दग्गेरे केयसि,
“ई दुनियाता राजालोर ओरा जीतागाह्कुन,
ओरा कयदा हिडु इर्रालय हूळंतुर,
अल्हेने ई दुनियाता पेद्दा मनकलोर्क गुडा सिन्ना मनकलोर पोर्रो हक्कु हुप्सालय हूळंतुर,
इद मीकु एर्के.
26 गानि मिमेट मात्रम ओरालेसीं आयना आयो.
मीवा अव्टेटाल बोरय्ते स्वर्ग राज्येमते पेद्दा आयालय हूळांतोरो,
ओर मीवा लोप्पो सेवा कियगोम.
27 इंका मीवाव्टेटाल बोरय्ते मुन्ने अर्सि ताकालय हुळंतोरो,
ओर मीवा सेवा कियानोर आयगोम.
28 इत्ते मिमेट मनकंक पुटतोन नावा लेह्का मनना,
बारित्ते नना वेरेतोर हेंदाल सेवा कीकुनालय वाया हिल्लेन गानि वेरेतोरा सेवा कियालय आनि वेल्ले मंदितुन पापमताल तेंडालय,
ओराहाटीं नावा जीवा हियालय वातन,”
इंचि इत्तोर.
येसु इव्वुर गुड्डोर्कुन बेस कीतोर
(मरकुस १०:४६-५२; लूका १८:३५-४३)
29 येसु आनि ओना सिस्युल्क यरिहो सहरताल पेय्सि होननेंके,
ओना पज्जो लोकुल्कुना पेद्दा मंदा वाता.
30 अस्के हरदा पक्काते इव्वुर गुड्डोर्क उदिस मत्तुर.
मावा मुन्नेटाल येसु होंचंतोर,
इंचि ओर्कु एरपाट आतस्के,
ओर येसुन लगांचि केय्सि,
“ए सामि,
दाविद राजाना संतानमतोनाb!
निमे,
मावा पोर्रो दया कीम!,”
इंचि इत्तुर.
31 आ गुड्डोर्कुन अगा मत्ता लोकुल्क “सपुडदाका मंटु” इंचि तेराहतुर.
गानि आ गुड्डोर्क मात्रम,
लगांचि “ए सामि,
दाविद राजाना संतानमतोना,
मावा पोर्रो दया कीम,”
इंचि मोत्कुनालय दल्गुतुर.
32 अस्के येसु अगा आगसि,
ओर्कुन केयसि “नना मीवाहाटीं बतल कियना इंचि मीवा इच्चा मंता?”
इंचि पूसकीतोर.
33 अस्के आ गुड्डोर्क,
“माकु दिस्सनाल मावा कळकुन बेस कीम सामि!”
इंचि ओर इत्तुर.
34 येसुंक ओरापोर्रो दया वाता आनि येसु ओरां कळकुन इटतोर.
इट्ता इटुडे ओरां कळकु बेस आसि,
दिसालय दल्गतां.
अस्के ओर इंका येसुन पज्जो होत्तुर.