योना
योनाल पेनदा पोल्ले केंजोर
1
1 पेन, अमितुना मर्रि योनांकु वेहता गदा, 2 “निमे तेदसि निनवे सहरतगा होन, अगा होंचि ओर्क नावा पोल्ले वेहा. बारित्ते, नावा मुन्ने ओरा पापाल्क एक्को आतां,” इंचि इत्ता. 3 गानि योनल पेनदा पोल्ले केंजाका, दानकु दिसाकुंटा तर्सिस नाटे वित्तंतन इंचि योपा सहरते होत्तोर. अगटाल तर्सिस होनना डोंगाते कोत्तां हीसि उदतोर. उदसि, “नना डोंगाते उदसि मत्तोरतोनि तर्सिस नाटेंक पेनदुक दिसाकुंटा लक्कु दांतन,” इंचि इनकुत्तोर.वळि-दुमारमते डोंगा मुळंगलय आयमळ
4 अद डोंगा नड्डुम एते होत्तस्के, पेन पेद्दा वळि-दुमारम तेह्ता. आ वळि-दुमारमकु समुद्रमते एता तडां डोंगाकु दल्गिसि डोंगा पय्यालय आता. 5 अस्के डोंगा ताकसानुर वेरियतुर, अव्टे मत्तुर अंटुर ओरा पेनकुन मोळ्कालय दल्गतुर. डोंगा मुंळगार इंचि अव्टे मत्ता सामान पोहालय दल्गतुर. गानि, योनाल मात्रम डोंगाते हिड्ता अंतरमते होंचि बेस निद्रा होत्तोर. 6 पजा डोंगाता अदिकारि योनानगा वासि, “एय, तेदा, निक बल्हा निद्रा वासेक मंता? निमे तेदसि नीवा पेनदुन मोळ्का, नीवा पेन नीवा पोल्ले केंजसि मनाकुन पिसागोटार बारे,” इंचि इत्तोर. 7 अस्के डोंगाते मत्तुर वरोंक-वरोर इनालय दल्गतुर, “इद सनि (आपति) बोनाहेंदाल वातानो, मनम सिट्टिं वाटसि हूळकोम,” इंचि सिट्टिं वाटतस्के, सिट्टि योनना पोर्रोलते पेय्सता. 8 अस्के ओर योनानतोनि इत्तुर, “इद सनि बाताहाटिं वाता माकु वेहा. निमे बाता कबळ कींतिन? निमे बगाटाल वातिन? नीवा बद देसेम, बद जाति आंदु? इव अन्नि माकु वेहा,” इंचि इत्तुर. 9-10 अस्के योनाल ओरतोनि, “नना हिब्रु जातितोन आंदुन. मब्बुन, समुद्रमतुन बद पेन अय्ते पुटिस्ता, अद पेनदुने मोळ्कानोन आंदुन, नना पेनदा पोल्ले केंजाकुंटा लक्कु होंचेके मंतन,” इंचि इत्तोर. ओर अल्हा इत्तद केंजसि, ओर इंकिच्चो वेरियसि, “निमे इल्हा बारि कीतिन?” इंचि इत्तुर. 11 अद वेलाते समुद्रमते एता तडां इंका एक्को आसेक मत्तां. अदुनहाटिं ओर योनानतोनि, “इव एता तडां मग्गालय मोमोट बतल कीकोम वेहा,” इंचि इत्तुर. 12 योनाल ओर्कुन, “इद तकलिप नावाहाटिंगे मीवापोर्रो वासेक मंता. मिमेट नाकुन समुद्रमते वाटिस हीम्टु, अस्के वळि-दुमारम आगंता,” इंचि इत्तोर. 13 अय्नागानि ओर डोंगातुन ओड्डुंक ओयालय वेल्ले कोसिस कीतुर, गानि ओया परा हिल्लुर. बारित्ते, वळि-दुमारमते एता तडां बागा तेदसेक मत्तां. 14 अस्के ओर पेनदुन विनंति कीसि इत्तुर, “सामि, निमे बल्हा इत्ते अल्हा कीया परांतिन, निमे मावा पोर्रो दया कीम. ई मनकन मोमोट समुद्रमते पोहचेके मंतोम, ईनाहाटीं निमे माकुन हव्कमा आनि ईन हव्कतोम इंचि मावा पोर्रो बतले तप्पु दोसमा.” 15 अल्हा इंचि योनान समुद्रमते पोहचितुर. अस्के वळि-दुमारम आनि समुद्रमता तडां आगतां. 16 अस्के ओर वेरियसि पेनदुक मोक्कु हीतुर आनि मोक्कुल्कु मोळ्कुकुत्तुर. 17 योनान मिंगालय उंदि पेद्दा जिम्मातुन पेन लोहता, अद जिम्मा योनान मिंगता. योनाल जिम्माता पीटलोपो मूंड रोजकु, मूंड नर्कां मत्तोर.