बोआज आनि रूतुना मरमीं
4
1 पजा बोआज सहरता लोकुल्कु जमा आयाना उंदि जेगातगा होत्तोर.(अगटाल लोकुल्कु होनुड-वायुड कियुंदुर आनि आ जेगाते पेद्दाल्क न्यायमगुडा कियुंदुर) होंचि अगा उदतोर. रूतुंक वेहता एलिमेलेकुना बेस दग्गेटा पालिगाड वायनदाका अग्गेन उद्दिस मत्तोर. ओर वातस्के बोआज ओन, ‘‘दादा, हीके वा! इगे उद्दा,” इंचि इत्तास्के ओर वासि उदतोर. 2 अस्के बोआज गवाइदार्क इंचि सहरता पदि मंदि पेद्दाल्कुन जमा कीतोर, आनि ‘‘मिमेट इंका इगे उद्दट.’’ इंचि इत्तास्के ओरगुडा उदतुर. 3 अस्के बोआज एलिमेलेकुना पालिगान, ‘‘नाओमि मोआब देसेमताल मल्सि वाता. आनि अद इंदके मना दग्गेटोर एलिमेलेकुना बूमितुन अमसेक मंता. 4 अय्ते, इद सहरता लोकुल्कुना मुन्ने आनि मना पेद्दाल्कुना मुन्ने इदुना बारेमते नीकुन पूस कियना इंचि नना निर्नायम कीतन. अद बूमितुन निमे अस्कुंतन इनकुनानय्ते इगे उद्दिस मनना पेद्दाल्कुन मुन्ने अस्कुन. हिलाकोंटे नाकु वेहा. बारित्ते निमे नीवातोनि आया पर्रो इनानय्ते अद बूमितुन अस्साना जिम्मेदारि नावदे आंद इत्ता संगति नाकु एर्के मंता. निमे गिंटा अस्सोन इनानय्ते नना अस्सांतन,” इंचि इत्तोर. 5 मर्रा बोआज, ‘‘निमे गिंटा नाओमिनागटल अद बूमितुन अस्सानय्ते, नाओमिना हासोत्ता मर्रिना मुत्तो मोआबि देसेमता रूतगुडा निवदे आयार. आनि रूतुंकु मर्रि पुटतस्के अद बूमिपोर्रो आ मर्रिंके अदिकारम मनंता. इल्हा अद बूमि आ हासोत्तोना परिवारतोरागेन मनंता,” इंचि इत्तोर. 6 अस्के आ दग्गेटा पालिगाड, ‘‘नना आ बूमितुन अस्सा परोन. अल्हा हूळते अद बूमि नाके आयगोम, गानि नना दान अस्सा परोन. नना गिंटा दान अस्सानय्ते नावा संतम बूमितुन पोगोटकुना पींता. अदुनहाटीं अद बूमितुन निमे अस्कुना पर्रांतिन,’’ इंचि इत्तोर. 7 (एनकटा कालमते इस्राएल देसेमते ओक्कला बोरन्ना मनकल ओना बूमि-जेगातुन अम्मिना हिलाकोंटे अस्सिना, वरोर मनकल ओना कादा हेरपुम तेंडसि इंका वरोर मनकना कय्दे हिय्युंदुर. इद ओरा उंदि रिवाज आंदु. अल्हा कीते अम्मुड-अस्सुड जर्गुता इंचि रुजुव इत्ताप.) 8 पजा आ पालिगाड बोआजुन, ‘‘आ बूमितुन निमे असकुन,’’ इत्तोर आनि ओना कादा उंदि हेरपुम तेंडसि, बोवाजुंक हीतोर. 9 अस्के बोआज पेद्दाल्कुन आनि अगा सुट्टु मत्ता अंटोर लोकुल्कुन, ‘‘नना इय्याला नाओमिनाहेंदाल एलिमेलेक, महलिन, किलयोन ईरा अन्नि संपतितुन अस्सेके मंतन. आनि दीनकु मिमेट अंटोर गवाइ मंतिर. 10 अचोने आयका हासोत्ता महलिनना मुत्तो, मोआबि रूतुन इंका नना नावा मुत्तो इंचि पाटुंक ओंतन. हासोत्तोना संपति ओना परिवारतोरागेन मनना इंचि नना इल्हा कीसंतन. इल्हा कीते हासोत्तोना पोर्रोल ओना परिवारते ओना सरहते बस्केळक मनंता. इय्याला मिमेट अंटोर दीनकु गवाइ मंतिर.’’ इंचि इत्तोर. 11 इल्हा आ जेगातगा जमा आता अंटोर लोकुल्कु आनि पेद्दाल्क गवाइदार्क आतुर. पजा ओर, ‘‘नीवा लोन वायना ई मुर्ताटुन यहोवा पेन इस्राएल देसेमता वंसम तयार कीता राहेल आनि लिआaनालेह्का किय्यिकांटी. एप्राताb सहरते निमे पेद्दा ताकतवान आमु इंका बेतलहेम सहरते निमे पेद्दा पोर्रोल होत्ता मनकल आमु इंचि मोमोट पारतना कींतोम. 12 बल्हा तामरि यहुदानतोनि कलियसि पेरेसुन कंता. अदुनहेंदाल ओना परिवार वेल्लेन बेस परिवार आता. अल्हेन यहोवा पेन रूतुनहेंदाल नीकु वेल्लेन मर्कुन हिय्यिकांटी आनि नीवा परिवारगुडा बेस पोर्रोल होत्ता परिवार आयिकांटी,” इंचि इत्तुर.रूतुंकु मर्रि पुटंतोर
13 इल्हा बोआज रूतुनतोनि मरमीं आतोर. यहोवा पेंदा दयाते रूत नेला तपता, आनि रूतुंक मर्रि पुटतोर. 14 अस्के सहरता मुर्ताह्क नाओमिनगा वासि, ‘‘नीकुन आनि नीवा परिवारतुन कापाडानाहाटीं इच्चोन बेसतोन हीतादान्कु यहोवा पेंदा स्तुति कीम. ई पेडल इस्राएल देसेमते बेस पोर्रोल तरिरकांटी इंचि यहोवा पेन आसिर्वादम हिय्यिकांटी. 15 अचोने आयका ई पेडल नीकु ताकत हीसि, निमे मातिर आतास्के नीकुन बेस हूळिरकांटी. इदंता नीवा कोळियडहेंदाल जर्गुता. अद नीवाहाटीं मर्रिन कंता. दानकु निमे इत्ते वेल्लेन पावरम. नीवा कोळियड नीकु एडुर मर्कुंकन्ना बच्चोनो बेस,” इंचि इनालय दल्गुतां. 16 पजा नाओमि आ पेडन एतकुत्ता आनि सातिक अदुमकुंचि वेल्लेन पावरम कीता. अचोने आयका आ पेडाना ऊडगेम सिन्नस्केटाल पेद्दागा आयनदाका नाओमे कीता. 17 लोता पक्काता मुर्ताह्क आ पेडन पोर्रोल ओबेद इंचि दोसतां. पजा अव, ‘‘नाओमिंक इंदके वरोर मर्रि पुटतोर,’’ इंचि इत्तां. ई ओबेद पेद्दागा आसि इसै इननोना बाबो आतोर. आनि ई इसैयल बारे इस्राएल देसेमता पेद्दा राजाल दाऊदना बाबो आंदुर.
18 पेरेसना परिवारता वंसावलि इल्हा मंता: पेरेसना मर्रिन पोर्रोल हेसरोन. 19 हेसरोनना मर्रिन पोर्रोल एरामु. एरामुना मर्रिन पोर्रोल अमिनादाब. 20 अमिनादाबुना मर्रिन पोर्रोल नहसोन. नहसोनुना मर्रिन पोर्रोल सलमोन. 21 सलमोनुना मर्रिन पोर्रोल बोआज. बोआजुना मर्रिन पोर्रोल ओबेद. 22 ओबेदुना मर्रिन पोर्रोल इसै. आनि इसैना मर्रिन पोर्रोल दाऊद.