नाओमि दाना कोळियाटुन बोआजुनगा लोहंता
3
1 अस्के रूतना पोरळ नाओमि रूतुंक, ‘‘बिड्डा, नना नीवाहाटीं उंदि बेस लोन दोर्किच्चि हीते बेस आयवड. आनि इद निके मंचिदि. 2 बोआज मनाकु बेस दग्गेटा मनकल आंदुर. ओनगा कबळ कियना दासोताह्कुनतोनि कलियसि निमे कबळगुडा कीतिन. इय्याला नरकड़कु ओर कडातगा बंति वाटसेके मनानुर. 3 अदुनहाटीं नना वेहताप निमे कीम. होन! एर तुंगसि, बेसता साडी पोंडसि, बेस गमा-गमा गब्बु वायना अत्तर होकुकुन. पजा बेस तयार आसि ओना कडातगा होन्नु. गानि बदवेरदाका अय्ते बोआजुना गाटो तिनुड आयो, अदवेरदाका ओनकु निमे दिसमा. 4 ओर गाटो तित्तारित्ते बगा होंचि मींडंतोरो अद हूळसेके मन्नु. ओर मींडतस्के मेल्लगा होंचि ओना काल्कुना पोर्रोटा सेदर पकक कीसि ओना काल्कुनगा होंचि मींडा. पजा ओन्कु तेल्वि अर्तास्के ओरे नीकु वेहांतोर निमे बतल कियानद मंता!’’ वेहता.नाओमिना विनंतितुन रूत स्विकार कींता
5 अस्के रूत, “निमे बतल अय्ते वेहांतिनो, अदे नना कींतन,” इंचि पोरळतोनि इत्ता. 6 अदुनहाटीं रूत अद नर्का कडातगा होत्ता आनि दाना पोरळ वेहताप अन्नि कीता. 7 तिनुड-उनुड आता पजो बोआजुंक बेस अन्पिस्ता. अस्के बोआज जोन्ना गड्डातगा मींडालय होत्तोर. अस्के रूत ओना पजो मेल्लगा-मेल्लगा होत्ता आनि ओर मींडतद हूळसि ओना काल्कुना पोर्रोटा सेदर पकक कीसि चुपचाप बोआजुना काल्कुनगा मींडता. 8 मंचि नडजाम नर्का बोआज निद्रातेन इंकुंदि पकापोर्रो तिरियतोर. अस्के ओनकु ओना काल्कुनगा बतलो दल्गुताप अन्पिस्ता. अस्के तेदिसि हूळतस्के ओना काल्कुनगा उंदि मुरतड मींडसि मत्ता. अदुन हूळसि ओन्कु वेल्लेन इचंत्रम आता. 9 अस्के बोआज आ मुर्ताटुन,‘‘निमे बदुन आंदिन?’’ इंचि पूसकीतोर. अस्के रूत, ‘‘नना नीवा दासी रूतुन आंदुन, निमेन नाकुन कापाडानोन आंदिन. अदुनहाटीं नीवा सेदर नावा पोर्रोगुडा मुच्चा,” इंचि इत्ता.
बोआजुना बेसतनम
10 अस्के बोआज रूतुन, ‘‘बिड्डा, यहोवा पेन नीकु आसिर्वादम हिय्यिरकांटी. बारि इत्ते, निमे नावापोर्रो वेल्लेन दया हुपिस्तिन. दीनकन्ना मुन्ने निमे नीवा पोरळ पोर्रो हूपिस्ता दयाकन्ना इंदके निमे नावापोर्रो हूपिस्ता दया बच्चोनो वेल्ले आंद. निमे मरमीं आयनाहाटीं श्रिमंत हिलाकोंटे गरिब पोरान पह्ककुना पर्सि मन्नेन, गानि निमे अल्हा किया हिल्लिन. 11 बिड्डा निमे इंदके वेरियमा. नीकु बतल गावालेनो नना अदे कींतन. निमे उंदि बेस मुर्ताटुन इत्ता संगति इद सहरतोर्कु अंटोर्क एरपाटे मंता. 12 नना मीवा परिवारूंक बेस दग्गेटोन इत्ता पोल्ले निजमे. अय्नागानि नाकन्ना बागा दग्गेटोर पालिगाड इंका वरोर मंतोर. 13 इय्याला नर्कडकु इगेने आगा. पंगा आतंका मनम मीवा पालिगाड नीकु बतलन्ना सहायम कींतन इंतोरो मरि किय्योन इंतोरो पत्ता कीकोम. ओक्कला ओर नीकु सहायम कींतन इंचि ओप्कुनानय्ते बेसे, निमे ओनतोनि मरमीं आम. ओरगिंटा ओप्कुनाकोंटे, नना नीवातोनि मरमीं आसि एलिमेलेकुना बूमिन अस्सि नीकु मर्रा हींतन, इंचि नना जीवाते मनना यहोवा पेंदापोर्रो ओट्टु वाटसि पोल्ले हीसेक मंतन. अदुनहाटीं पंगायनदाका निमे इगेन आगा.’’ इंचि इत्तोर. 14 अस्के रूत पंगायनदाका बोआजना काल्कुनगा मींडता. हक्केरे हीकट मनानेंके इत्ते मनकलोर वरोंक-वरोर एरपाट कीकुन्ना पर्रूर अचोन हीकट मननेंकेन रूत तेदता. अस्के बोआज दान, “निमे इद नर्का नावा कडातगा वासि नर्कामेड नहागेन मत्तिन इत्ता संगतितुन बोर्के तेडिया हिय्यामन्नि,” इंचि इत्तोर. 15 पजा बोआज रूतुन, ‘‘नीवा सेदरतुन हहा,’’ इंचि इत्तोर. रूत सेदरतुन हह्तस्के बोआज दाना पोरळ नाओमिनाहाटीं अड्डेड(नालूं तव्वां) जोन्नां हीतोर. पजा जोन्नां मुल्ले दोहचि रूतना तल्लापोर्रो तासतोर आनि ओर सहरतेके होत्तोर. 16 पजा रूतगुडा दाना पोरळ नाओमिना लोन होत्ता. अस्के दाना पोरळ, ‘‘बल्हा बतल जर्गुता बिड्डा?’’ इंचि पूस कीतस्के, बोआज दानाहाटीं कीता अन्नि पोल्लेना बारेमते दाना पोरळकु वेहता. 17 पजा रूत दाना पोरळ नाओमिंक, ‘‘निमे उत्ता कय्कु लोन होनमड़ बेस आयो, अदुनहाटीं नीवा पोरळहाटीं ई अड्डेड जोन्नां पीसि ओम, इंचि बोआज नाकुन इत्तोर.’’ इंचि वेहता. 18 अस्के नाओमि दाना कोळियड़ रूतुन, ‘‘बिड्डा, बल्हा बतल अय्ते जर्गनद मंतनो अद जर्गनदाका गिचचो ओप्के पीसि मन. बोआज बतल कींतन इंचि निर्नायम कीतोरो अद कियनदाका ओर चुपचाप मन्नोर. दीना बारेमते मनाकु इय्याला पोडदु होनाका मुन्नेन तेळियंता.’’ इंचि इत्ता.