रूत आनि बोआज
2
1 अय्ते बेतलहेम सहरते वरोर श्रिमंत मनकल मनुंदुर, ओन पोर्रोल बोआज.ओर नाओमिना मुय्दो एलिमेलेकुना पालिगाड मत्तोर. 2 उंदि रोज मोआबि रूत दाना पोरळ नाओमिन, “नना नेलिनेके दाकाना यावा? ओक्कला बोरन्ना ना पोर्रो दया हूपिस्ते ओरा नेदे होंचि तपसोत्ता कर्रेना पर्गे पेरसि तर्रांतन.” इंचि इत्तास्के, “सरे होन,” इंचि पोरळ इत्ता. 3 पजा रूत नेलिनेके होत्ता. होंचि पंटा कोय्यना बूतीनोर पजो-पजो होंचि तपसोत्ता कर्रेन जमा कीकुनुंदु. पजा बतल आता इत्ते, अद बद नेदे अय्ते पर्गे पेरसेके मत्तनो अद नेलि दाना मामाल एलिमेलेकुना पालिगाड बोआजनद मत्ता.बोआज रूतुन हूळांतोर
4 रूत अगा मनानेंकेन बोआज बेतलहेम सहरताल नेदागा वातोर. वासि बूतीनोर्कुन मंचि-सेड्डा पूस कीसि, ‘‘मीतोनि बस्केळक यहोवा पेंदा तोळ मन्निकांटि,’’ इंचि इत्तोर. अस्के आ बूतीनोरगुडा बोआजुन,‘‘सामि नीकु इंका आसिर्वादम हिय्यिरकांटि,’’ इंचि इत्तुर. 5 पजा बोआज बूतीनोर पोर्रो पेद्दोड इंचि इरता पेद्दा जीतागान, “अद बाई बोना मिय्यड आंद?” इंचि पूसकीतोर. 6 अस्के आ पेद्दा जीतागाड, ‘‘अद मोआब देसेमताल नाओमिनतोनि वाता मोआबि बाई आंद. 7 अद हक्केरेन नहगा वासि, ‘दादा, नना ई बूतीनोरा पजो-पजो होंचि हिड अर्सि मत्ता हेनकुन पर्गे पेर्रा पर्रंतना?’ इंचि पूसकीता. आनि हक्केटाल आगाकोंटा उंदेतीर कबळ कीसेके मंता. अद हुळा! अगा दिस्सना लोन दानादे,” इंचि वेहतोर.
रूतना पोर्रो बोआज दया हुप्सांतोर
8 इद केंजसि बोआज रूतुन, ‘‘बिड्डा हिक्के केंजा! निमे पर्गे पेर्रालय इंका बोना वेरे नेदे होनना अम्सरम हिल्ले, निमे इदे नावा नेदे पर्गे पेर्रा. आनि नावा नेदे बुतोताह्कुना पजो-पजो ताकसेके मन. 9 बूतीनोर बा नेदे मुनुम पींतुरो ओर्कुन नजर वाटसेके ओरा पजो-पजो पर्गे पहकासेक होनु. नना लेय्या बूतीनोर्कुंक नीकुन तकलिप हियामन्नि इंचि वेहतन. नीकु दूपा आतास्के बूतीनोर उनना अळकाता एरे मुळाह्चि उन,” इंचि रूतुंक वेहतोर. 10 अस्के रूत बोआजुंक नमस्कारम कियनाहाटीं बूमितगड्क वंगुता. पजा बोआजुन, “नना अय्ते वेरे देसेम दान. अय्नागानि निमे ना पोर्रो दया हूपिसतिन. नाकु वेल्लेन इचंत्रम आसेक मंता,” इंचि इत्ता. 11 अस्के बोआज दानकु इल्हा वेहालय दल्गुतोर. “निमे नीवा पोरळ नाओमिंक कियना हरेक सहायमता बारेमते नाकु एरपाट मंता. इंका नीवा मुय्दो हासोत्तंकागुडा निमे नीवा पोरळकु सहायम कीतिन. इचोने आयो! निमे नीवा यावान-बाबान, नीवा देसेमतुन होळसिसि इद देसेमते वातिन. इगे नीकुन बोरे एरपाटतोरगुडा हिल्लुर. अयना निमे नीवा पोरळ नाओमिनतोनि इगे वातिन. 12 निमे कीता अन्नि बेसता कबाह्कुनाहाटीं यहोवा पेन नीकु इनाम हींता. इस्राएलतोरा पेंदा रेक्काना हिडु निमे निडाहाटीं वातिन, अद नीकुन बस्केळक कापाळिकांटी.” 13 अस्के रूत, “बाबा, नना अय्ते सिराप उंदि दासि मुर्ताटुन आंदुन, निहगा कबळ कियना उंदि दासिदानलेसींगुडा नना हिल्लेन. अयना निमे नावा बारेमते वेल्लेन दयाता पोल्लें वळकतिन आनि नाकु बेस दैर्यनेम हीतिन,” इंचि इत्ता.
बोआज रूतुन बेस हूळांतोर
14 पिय्यटील गाटो तिननेंके बोआज रूतुन, ‘‘बाई हिके वा! इव हुळा हारीं आनि इद हुळा पानकम. इव्टे हारीं मुळाह्चि तिन,’’ इंचि इत्तोर. अस्के रूत आ बूतीनोरतोनि कलियसि उदुता. पजा बोआज दानकु इच्चुं पिरकीं हीतोर. अस्के रूत पीरनिंडा तित्ता. तिननेंके इंका गोडाचुं मिगिलिसिगुडा मत्तां. 15 पजा रूत अगटाल तेदसि मर्रा कबळ पोर्रो होत्ता. बोआज बारे ओना बूतीनोरकुंक वेहातोर गदा, ‘‘रूतुन, जोन्ना कर्रेना कट्टाना पक्का पीसिगुडा पर्गे पेर्रा हिम्टु, दान आपमट. 16 दानकु पर्गे पेर्रालय पेडेक मत्ता इंच्चु कर्रें होडस्सेके होंटु, दान पर्गे पर्रानेंके आपमटु, दानकु तकलिप हियमट.’’ इंचि वेहतोर.
पर्गे पेरतदुन पोरळकु हूपसंता
17 रूत पोड़द होननदाका नेदे कबळ कीसेक मत्ता. पजा रूत पोद्दाला जमा कीता पर्गेतुन पंजा तंचि पेडेकुन वेरे कीता, अस्के दगेर-दग्गेरा पदि किलोंदाका जोन्नां आतां. 18 पजा अवुन मुल्ले दोह्ता आनि पोरळकु हुप्सानाहाटीं तल्लापोर्रो ताससि लोन ओता. अचोने आयका पिय्याटील तिनानेंके मिगुल्ता पिरकींगुडा दानकु हीता. 19 पजा नाओमि रूतुन, “इय्याला इव पेडेक निमे बगाटाल जमा कितिन? निमे बगा कबळ कीतिन? नीकु सहायम कीतोनकु सामिना आसिर्वादम दोर्कि.” इंचि इत्ता. अस्के रूत, “नना बोनगा कबळ कीतानो ओन पोर्रोल बोआज आंद,” इंचि इत्ता. इल्हा अद बोना नेदे कबळ कीतानो अदुना बारेमते दाना पोरळकु वेहता. 20 अस्के, “ओनकु यहोवा पेन आसिर्वादम हिय्यिरकांटि. जीवाते मत्तोर पोर्रो आनि हासोत्तोर पोर्रो, अंटोरपोर्रो सामि दया कींतोर. बोआज मना पालिगाह्कुनाल वरोर दग्गेटा पालिगाड आंदुर. इंका ओर मनाकुन कापाडानोर आंदुर.” इंचि नाओमि दाना कोळियडकु वेहता. 21 अस्के मोआबि रूत दाना पोरळतोनि, “बोआज नाकुन मर्रा वासि कबळ कीम इंचि इत्तोर. अचोने आयका कोता मारानदाका ओना बूतिनोरतोनि कलियसि कबळ कीसेक मनालयगुडा वेहतोर,” इंचि इत्ता. 22 अस्के नाओमि दाना कोळियड रूतुन, “बिड्डा, निमे बोआजुना नेदे ओना बूतिनोरतोनि कलियसि कबळ कियमड़ नीकु बच्चोनो बेस. ओकला निमे इंका वेरे बोरादाना नेदे कबळ कियालय होत्तिन इत्ते अगा नीकुन बोरन्ना तकलिप किया पर्रांतुर,” इंचि इत्ता. 23 अदुनहाटीं रूत बोआजुना बूतोताह्कुनतोनि कलियसि कबळ कीसेक मनुंदु. अचोने आयका अद जोन्नां कोतां मारानदाका पर्गे पेरसेके मत्ता. आनि गोह्कुना कोतां आयानदाकागुडा अग्गेन कबळ कीसेक मत्ता. इल्हा रूत दाना पोरळ नाओमिनतोनि बेस कलियसि मनुंदु.