योनल पेनदुक पारतना कीतोर
2
1 योनल जिम्माता पीटाले पेनदुक पारतना कीतोर.2 “नना आपतिते मननेंके,
नना निक पारतना कीतन
निमे नावा पोल्लेतुन केंजतिन.
नना हामुटा लोप्पोटाल नीकुन केयतन
निमे नावा आवाजतुन केंजतिन.
3 निमे नाकुन लोत समुद्रमते पोहचि हीतिन
नीवा तडां नावा पोर्रोटाल होंचि नना अळगुंक मुंडुंगतन.
4 निहागटाल लक्कु आसिगुडा,
नीवा पवित्र गुळितुन मोळ्कंतन इंचि इनकुत्तन.
5 नना एता लोपो मुंडुगनेंके,
नावा जीवा पेय्सि होत्ताप आता.
नना समुद्रमते लोत एते मत्तन
आनि नावा तल्ला सुट्टु नास हुटकुत्ता.
6 नना समुद्रमता लोपोटा गुट्टाना अळगुंक होंचि मत्तन,
नना बस्केने पोर्रो वाया कोन्नेन.
अय्नागानि मा सामि यहोवा,
निमे नावा जीवातुन हामुरताल पिसागोटतिन.
7 नना बेहोस आसेक मननेंके,
नना नीकुन मति कीतन,
अस्के नावा पारतना
नीवा पवित्र गुळिते एवता.
8 इच्चुर लोकुल्कु बोम्मनु मोळ्कंतुर,
गानि अव बोम्मां ओर्क बस्केने सहायम कीयों.
9 गानि नना पाटानतोनि स्तुति कीसेक
निक मोक्कु हींतन,
नना मोळ्कता मोक्कुल्कु पूरा कींतन,
नीवा हेंदाले मुक्ति दोर्कंता,”
इंचि पेनदुक पारतना कीतोर.
10 अस्के पेन अद जिम्मातुन ओड्डुंक होंचि कक्कालय आदेस हीता. अय्ते अद जिम्मा ओड्डुंक होंचि योनान कक्कुता.