पेनदा पोल्लेन योनल केंजमड
3
1 पेनदा पोल्ले मर्रा उंदि मल्का योनंक केंजा वाता, 2 “निमे तेदा, तेदसि निनवे इनना पेद्दा सहरते होन, अगा होंचि नना वेहना पोल्लेन ओर्क वेहा,” इंचि केंजा वाता. 3 अस्के योनल तेदसि, पेन आदेस हीताप निनवे सहरते होत्तोर. अद सहर, ई कोस्साताल आ कोस्सादाका ताकसि होनालय मूंड रोजकु दल्गुंदु, अच्चोर वेल्ले पेद्दगा मत्ता. 4 योनल अद सहरते उंदि रोज ताकसि, “नल्पै रोजकु आतारित्ते निनवे सहर नासडेम आंता,” इंचि वेहालय दल्गतोर. 5 अस्के निनवे सहरतोर योनल वेहता पेनदा पोल्लेन पोर्रो बरोसा कीसि, उपासम मनालय निर्नायम कीतुर. सिन्न-पेद्दा बतले इनाका अंटुर पापाल्कुनाल मल्तोम इंचि हूप्सनाहाटीं पोतां हुटकुत्तुर. 6 अद पोल्ले निनवे सहरता राजाना केव्कुने अर्ता. अस्के ओर राजगद्देताल रेय्सि, ओर केरसि मत्ता कपडिं तेंडिसि, पोतां हुटकुंचि बूळदिते उदतोर. 7 राजाल आनि ओना मंत्रिल्कुना हेंदाल आदेस मत्ता: निनवे सहरता अंटुर लोकुल्कु आनि अन्नि जिवरासिं उपासम मंदना. बतले तिना मनि, एर इंका उना मनि. 8 अंटुर लोकुल्कुंक पोतां हुटकुना पींता आनि जिवरासिना पोर्रो इंका पोतां वाटा पींता. अंटुर बेसता पिसवर पिसालय, सेड्डा कबाह्क होडसंतोम इंचि पेनदुक पारतना कीयमड गावाले. 9 अस्के उंदि वेलाते पेनदा होंग सल्लगासि, मनापोर्रो दया कियार आनि मनाकुन नासडेम आयाकोंटा पिसागोटार, इंचि राजल सहरते हाटा वेहतोर. 10 पेन निनवे सहरता लोकुल्कुन हूडतस्के, ओर सेड्डा कबाह्कुनाल तिरियतद दानकु दिसता. अदुनहाटीं निनवे सहरतुन नासडेम किया हिल्ले गानि ओर्कुन पिसागोटता.