पंचंगाल्क हुळानोर येसु सामिना काल्क मोळकालय वायमळ
2
1 येसु यहुदिया एरियाता बेतलहेम नाटे पुटतस्के अगा हेरोद इनना राजाल राज्येम कीसेक मत्तोर.
अदे कालमते पोड्दु पेयसना हेंदाल बोरो पंचांगम हूळानोर येरूसलेम सहरते वातुर.
2 वासि राजांक कलियसि,
“पूनें-पूने पुटता यहुदिल्कुना राजाल बगा मंतोर?
पोड्दु पेयसनाहेके ओर पुटताप मोमोट उंदि सुक्कातुन हूळतोम.
ओना काल्क मोळकालय मोमोट वातोम,”
इंचि राजन पूसकीतुर.
3 इद केंजसि हेरोद राजाल आनि येरूसलेम सहर अंता वेरिय्कुत्तुर.
4 अस्के हेरोद राजाल येरूसलेम सहरता पेद्दा पेर्मालोर्कaन आनि अगाटा दर्मसास्त्रम कराहना गुरुल्कुन अंटोर्कुन केय्सि ओर्कुन,
“किरिस्तु बगा पुट्टनद मत्तोर?”
इंचि पूसकीतोर.
5 अस्के ओर,
“यहुदिया एरियाता बेतलहेम नाटेने,”
इंचि वेहतुर.
6 बारित्ते एनकटा पेनदा कबुरतोर रासताप,
ए यहुदिया एरियाता बूमिपोर्रो मंदना बेतलहेम नाटेनोरिटा,
मिमेट मीवा नार सिन्नादे इंचि इन्कुन्मटु.
बारित्ते नावा इस्राएल देसेमता लोकुल्कुन कापाडनोर,
आ राजाल मीवा नाटेनेन पुटनद मंता.b
7 पज्जो हेरोद राजाल पोड्दु पेय्सना हेंदाल वाता पंचांगम हूळानोर्कुन सपुडदाका कलियसि “सुक्का बद वेलाक दिसता?,”
इंचि पूस कीसि एरपाट कीकुत्तोर.
8 पजा ओर,
“मिमेट होंचि आ पुटता पेडन बेस पह्कट आनि दिसतारित्ते नाकु वासि वेहट,
अस्के इंका होंचि ओना काल्क मोळककन,”
इंचि वेहचि ओर्कुन बेतलहेम नार लोहचितोर.
9 पजा राजाल वेहता पोल्लें केंजसि आ पंचांगम हूळानोर अगटाल पेय्स्तुर.
मुन्ने बद सुक्का दिस्सि मत्तानो अद सुक्का ओरा मुन्ने-मुन्ने होंचि आ पेडल मत्ता जेगा पोरेन आगुता.
10 आ सुक्कातुन हूळसि ओर्कु इरगा आनंदम आता.
पंचांगम हूळानोर येसु पुटतगा बेतलहेम नाटे होत्तुर.
11 ओर लोता लोप्पो होंचि आ पेडन तल्लुर मरियमनगा हूळतुर आनि आ पेडाना काल्कुनपोर्रो अरसि मोळकुतुर.
आयंका ओर जोरानाल बंगारम,
गंदकमc,
ऊदू इसंटा एक्को दराता वस्तुक तेंडसि ओन्क हीतुर.
12 आयंका “मल्सि हेरोदुनाहेके होनमट” इंचि पेन कलाते वेहताहेंका ओर इंकुंदि हर्रि पीसि ओरा देसेम पेय्सि होत्तुर.
येसुन पीसि इजिप्त देसेमते होनमळ
13 पंचांगम हूळानोर होत्तारित्ते,
योसेपुंक उंदि पेनदा दूता कलाते दिस्सी,
“निमे तेदा,
पेडन आनि ओना तल्लुन पीसि इजिप्त देसेम पेय्सि होन.
हेरोद राजाल पेडन हव्कनाहाटीं पह्कांतोर.
अदुनहाटीं नना नीकु मर्रा वेहनदाका अग्गेन मन्नु,”
इंचि वेहता.
14 अस्के योसेप अदे नर्का पेडन आनि पेडाना तल्लुन पीकुंचि नर्काने इजिप्त देसेम्कु पेय्सि होत्तोर.
15 आनि हेरोद राजाल हासोननदाका अग्गेन मत्तोर.
“नना नावा मर्रिन इजिप्त देसेमताल केयतन”d इंचि वेल्लेन वर्सां मुन्ने पेन बाबाल ओना कबुरतोरतोटी वेहचि मत्तोर.
अदे पोल्ले निजम आयगोम इंचि इदंता जर्गुता.
हेरोद राजाल बेतलहेम नाटेना पिलाल्कुन हव्कंतोर
16 आ पंचांगम हूळाना लोकुल्क ओन नाडहे कीतुर इन्कुंचि,
हेरोद राजांक इरगा होंग वाता.
आ पंचांगम हूळानोर हेंदाल आ पेडल पुटता वेला एर्का कीकुंचि मत्ताहेंका बेतलहेम आनि पका पीसि मत्ता नाटेने मनना रोंडु वर्सानोर आनि रोंडु वर्सांकन्ना सिन्नोर्क अंटोर मांड्सा पिलाल्कुन हव्कट इंचि हेरोद राजाल आदेस हीतोर.
17 इ परकारम यिरमिया इनना एनकटा पेनदा कबुरतोर वेहता पेनदा पोल्ले निजम आता.
अद पोल्ले इल्हा मत्ता:
18 रामाह इनना नाटे दुक्कमते अळाना सप्पुड केंजा वाता.
राहेल दाना पिलाल्कुनहाटीं अळसेक मत्ता,
बोर समत कियना गानि अद समत आया हिल्ले,
बारित्ते दाना पिलाल्क हासि होत्तुर.e
योसेपना परिवार इजिप्त देसेमताल मल्सि वायमळ
19 कोन्नि रोजकुंक हेरोद राजाल हातोर.
अस्के इजिप्तते मनना योसेपुनतोनि कलाते पेनदा दूता वासि,
20 “तेदा,
पेडन हव्कालय हूळसेक मत्तोर हातोर,
अदुनहेंके निमे पेडन आनि ओना तल्लुन पीसि इस्राएल देसेमते मल्सि होन,”
इंचि इत्ता.
21 अस्के योसेपु पेडन आनि पेडाना तल्लुन पीसि इस्राएल देसेमते मल्सि होत्तोर.
22 गानि यहुदिया एरियाता हेरोद राजाल हातारित्ते “ओना जेगाते ओना मर्रि अर्केलाल राजाल आतोर,”
इंचि तेळियतारित्ते ओर अगा होनालासि वेरियतोर.
आयंका कलाते पेन वेहताहेंका ओर गालिल एरियाते होत्तोर.
23 अगा ओर नासरेत इनना नाटे होंचि जेगा पीतोर.
इंचि “ओन नासरेततोर इंतुर.”
इल्हा पेनदा कबुरतोर मुन्नेने वेहचि मत्तद इंदके निजम आता.