मत्तयाल रासतद बेसता कबुर
येसु सामिना पेद्दाल्कुना तंतुल्क
(लूका ३:२३-३८)
1
1 येसु किरिस्तुaना पेद्दाल्कुना तंतुल्कb इल्हा मंतां.
येसुना एनकटा मातिर-दादाल अब्राहाम आंदुर.
अब्राहामुना तंतुनाल दाविद राजाल पुटतोर,
दाविदुना तंतुनाले येसु सामि वातोर.
2 अब्राहामुंक इसहाक पुटतोर,
इसहाकुना मर्रि याकोब,
याकोबुना मर्क यहुदाल आनि ईना तम्मुह्क-दादालुर.
3 यहुदाना मर्क पेरेस आनि जेराल,
इरा यावन पोर्रोल तामरी आंद.
पेरेसुना मर्रि हेसरोन,
हेसरोनुना मर्रि अराम,
4 अरामुना मर्रि अमिनादाब,
अमिनादाबुना मर्रि नहसोन,
नहसोनिना मर्रि सलमोन,
5 सलमोनुना मर्रि बोवाज,
बोवाजुना यावन पोर्रोल राहोबी आंद.
बोवाज आनि ओना मुत्तो रूतुंकु ओबेद पुटतोर.
ओबेदुना मर्रि यिस्सल,
6 यिस्सलना मर्रि दाविद राजाल.
दाविदना मरि सुलेमान,
सुलेमानना यावल मोदाला उरियाना मुत्तो मत्ता.
7 सुलेमानुंकु रहोबाम पुटतोर.
रहोबामुना मर्रि अबियेल,
अबियेलुंकु आस्यल पुटतोर.
8 आस्यना मर्रि येहोसपात,
यहोसपातुना मर्रि योराम,
योरामुना तंतुनाल उजियाल पुटतोर.
9 उजियाना मर्रि योताम आनि योतामुना मर्रि अहाज,
अहाजना मर्रि हिजकियल.
10 हिजकियनहेंदाल मनस्से पुटतोर,
मनस्सेना मर्रि आमोन,
आमोनुना मर्रि योसियाल.
11 इस्राएल लोकुल्कुन गुलाम कीसि बेबिलोन देसेमते ओयनेंके योसियांक येकोनियेल आनि इंका ईना तम्मुह्क आतुर.
12 बेबिलोन ओता पज्जो येकोनियंकु सलितियेल पुटतोर,
सलितियेलुन मर्रि जेरुबाबेल.
13 आनि जेरुबाबेलुना मर्रि अबियुद,
अबियुदुना मर्रि एलकिमु,
एलकिमुंकु अजिरल पुटतोर.
14 अजिरना मर्रि सादोक,
सादोकुना मर्रि याकिम,
याकिमुंकु एलहुदल पुटतोर.
15 एलहुदना मर्रि एलियाजर,
एलियाजरना मर्रि मत्तान,
मत्तानिंकु याकोब पुटतोर.
16 याकोबुना मर्रि योसेप,
योसेपुन मुत्तो मरियम.
मरियम “किरिस्तु” इनना येसु सामिन यावल आंद.
17 इ परकारम अब्राहामुनगटाल दाविदुन दाका पडनालूंग तंतुल्क.
दाविदुनगटाल बेबिलोनते गुलाम कीसि ओयान दाका पडनालूंग तंतुल्क.
अल्हे बेबिलोनते यहुदिल्कुन गुलाम कीसि ओतागटाल अय्ते येसु किरिस्तु पुट्टनदाका पडनालूंग तंतुल्क आतां.
येसुना पुटमळ
(लूका २:१-७)
18 येसु किरिस्तुना पुटमळ इल्हा जर्गता.
मरियमुन योसेपुंक तल्किस एर्रा बोट्टु कीतुर.
योसेप मरियमुन इट्टक मुन्नेने पवित्र आत्माcता हेंदाल मरियमुंकु पीर आता.
19 मरियमुन तल्कता योसेप सत्तेमंतुड मत्तोर.
अद पीटे मत्ता संगति ओन्क तेळियतस्के दान अंटोरा मुन्ने बदनाम किया मन्नि इन्कुत्तोर.
अदुनहाटीं बोर्के तेळियकुंटा मरियमुन होळसना विचारम कीसेक मत्तोर.
20 गानि इल्हा विचारम कीसेक मनानेंके पेनदा दूताd कलाते वासि,
“योसेपु,
दाविदुन तंतुनोना,
निमे मरियमुन नीवा मुत्तो इंचि स्विकारम कियालय वेरिय्मा.
बारित्ते दाना पीटे मनना पिंडेम पवित्र आत्मा हेंदाल आसि मंता.
21 अद पेडन कनंता,
ओर ओना लोकुल्कुन ओरा पापाल्कुनाल पिसागोटंतोर.
अदुनहाटीं ओना पोर्रोल येसु दोस्सा,”
इंचि वेहता.
22 मुन्ने पेनदा कबुरतोर रासता पोल्ले निजम आयनाहाटीं आता.
अद पोल्ले इल्हा मंता.
23 हुळाट,
मरमिं आयवा पेगिड्क पीर आसि,
वरोर मर्रिन कनांता.
आनि ओना पोर्रोल इम्मानुएल दोस्सानुर.
e
इत्ते,
“मनातोनि पेन मंता,” इंचि ई पोर्रोल्क अर्तम.