योहान पेनदा पोल्लेन वेहांतोर
3
1 तिबेरियुस कैसर इनना वरोर राजाल पूरा रोम राज्येम पोर्रो पेद्दा राजाल मत्तोर. ओर राज्येम कियालय दल्गिसि पदिहेन वर्सां पूरा आतां. अवे तूकुल्कुने पुंतुस पिलातुस इनानोर यहुदिया एरियाता राज्यपाल मत्तोर. अंतिपस हेरोद राजाल गालिल एरियाता राज्यपाल मत्तोर. इंका ओना तम्मुर पिलिप इतुरिया आनि तारकोनितीस इव एरियान पोर्रो राज्यपाल मत्तोरa. लिसानियास इनानोर बारे अबिलेन इनना एरियाता राज्यपाल मत्तोर. 2 अस्के हनन्याल आनि ओना हडे कयपाल इनानोर इव्वुर पेद्दा पेर्मालोर मत्तुर. अवे तुकुल्कुने बतल आता इत्ते जकरयाना मर्रि योहान उस्के बूमिते मननेंके ओनगा पेनदा वचनम एवता. 3 पजा ओर योर्दन बेरेटा सुट्टु-मट्टुना एरियांता तिरियसि, “कीता पापाल्क मापि आयनाहाटीं पेनदाहेके मनसु मार्सकुंचि बापतिस्मा येताट. अस्के पेन मीवा पापाल्कुन मापि कींता,” इंचि वेहचेके तिरियुंदुर. 4 इल्हा यसयाल इनना पेनदा कबुरतोर वेल्लेन वर्सां मुन्ने रासतद इंदके निजम आता. अद पोल्ले इल्हा मत्ता:“उस्के बुमिते केयानद उंदि अल्किर केंजा वांता,
सामि मीवा मनसुने वायनाहाटीं हर्रि तयार कीम्ट, इंका ओना हर्कुन सवरगा कीम्ट.
5 इत्ते, अन्नि लोद्दीं-लोंक्का निंडमळ गावाले,
अन्नि गुट्टां-गट्टुकु समानम आयमळ गावाले.
वंकर-डिंकर मत्ता हर्कु अन्नि सवरगा आयमळ गावाले,
आनि उतार-बोगडा मत्ता हर्कुगुडा समानम आयमळ गावाले.
6 अस्के अंटोर लोकुल्क पेन मुक्ति हियानदुन हूळंतुर.” b
योहान लोकुल्कुन तेरहंतोर
7 योहानुना हेंदाल बापतिस्माc येतकुननाहाटीं लोकुल्कु पेद्दा मंदानां-मंदां वातुर. अस्के बापतिस्मा हियना योहान ओर्कुन, “अरे विसम तरासकुनोरासंटोरिटा! पेनदा होंगुनाल तपिच्कुनालय बापतिस्मा येताट इंचि मीकु बोर वेहतुर? 8 बेसता कबाह्क कीसि, मिमेट निजमे मनसु मार्सुकुत्तिर इत्ता संगतितुन रुजुव कीसि हुप्सट. हिलाकोंटे पंडिं हादुवा मरालेह्का मीवा गति आयार. इंका ‘मोमोट अब्राहामुना वंसमतोरम आंदुम, पेन माकु सिक्सा हिय्यो,’ इंचि बस्केन इन्कुनमट. नना मीकु निजम वेहासेक, पेन अब्राहामनाहाटीं ई बंडानाल गुडा पिलाल्क पुट्टिचि हिया परंता, इंचि मीकु तेळियोना? 9 इंदके मरा मोदोल्ते मरसु इरसि मंता. बद अय्ते मरा मंचि पंडिं हादो, अदुन नरकीसि तडमिते वाटना सिक्सा हियमळ जरगंता,” इंचि इत्तोर.
10 अस्के आ लोकुल्क, “अय्ते इंदके मोमोट बतल कियना मरि?” इंचि योहानुन पूसकीतुर. 11 अस्के योहान, “बोनगा रोंडु अंगिं मंतां, ओर ओनद उंदि अंगि, अंगि हिल्वोंकु हियना आनि बोनगा अय्ते गाटो मंता, ओरगुडा हिल्वोंकु तूस कीसि हियना,” इंचि वेहतोर.
12 बापतिस्मा येतनाहाटीं अगा कर वसुल कियानोरगुडा वासि मत्तुर. ओर लोकुल्कुन वेल्लेन मुळाह्चि मत्तुर. ओरगुडा, “मोमोट बतल कीकोम गुरुजी?” इंचि पूसकीतुर. 13 अस्के योहान, “सरकार मीकुन बच्चोन जमा कियालय वेहता, अचोने जमा कीम्टु, दानकन्ना एक्को जमा कियमट,” इंचि ओर्कु वेहतोर.
14 अस्के इच्चुर सिपाइल्क गुडा ओनगा वासि, “अय्ते मोमोट बतल कीकोम मरि?” इंचि पूसकीतुर. अस्के योहान ओर्क, “मीकु दोर्कना पगारतेन मिमेट कूस मंटु, बोरहेकटाले आयि बेदरिच्चि हिलाकोंटे आबद्दम तप्पु दोस्सि कोत्तां येतमट,” इंचि वेहतोर.
15 पेन लोहना पिसागोटनोर बिरानेन वायानुर इंचेके लोकुल्क बेस आसेते एदुर हूळसेके मत्तुर. अदुनहाटीं योहानुन हूळसि अंटोर, वायनद मत्ता किरिस्तु ईरे अय्ते आयोर गदा, इल्हा ओरद-ओरे मनसुल्कुने इन्कुनुंदुर. 16 अस्के योहान ओरा मनसुना विचारमतुन एरपाट कीसि ओर अंटोर्कुन, “नना अय्ते मीकु बापतिस्मा एततोने हींतन. गानि बोरय्ते वायानोर मंतोर, ओर नाकन्ना एक्को ताकतवार मंतोर. ओर केरसि मत्ता हेरपुह्कुन इट्टना विल्वागुडा नाकु हिल्ले. ओर मीकु पवित्र आत्मा आनि तडमितोनि बापतिस्मा हींतोर. 17 ओना कयदे हेति मंता. दानतोनि ओर कडाते मनना वंजिन बेस हेचाहचि बुस्सितुन वेरे कींतोर आनि वंजिन बारे गुम्मिते इर्रंतोर. पजा आ बुस्सितुन बस्केन पिरवसोंटा तडमिते वाटसींतोर. इल्हेन मनाकुनगुडा कींतोर,” इंचि इत्तोर. 18 इल्हा योहान वेल्लेन पोल्लें कराहसेक, ओर्क बेसता कबुर वेहुंदुर.
योहान येसुंक बापतिस्मा हींतोर
19-22 योर्दन बेरेटे योहान वेल्लेन लोकुल्कुंक बापतिस्मा हीसेक मत्तोर. अस्के येसुगुडा अगा वासि योहानुना कयदे बापतिस्मा एतुतोर. बापतिस्मा एतुतंका येसु पारतना कियनेंके मब्बु अंता बैय्यरा आता. आनि पवित्र आत्मा पावरेम पिट्टे रूपमते वासि ओनपोर्रो रेयता. पजा स्वर्गमताल उंदि अल्किर, “निमे नावा पावरमगल्ला मर्रिन आंदिन, नना नीकुन वेल्लेन जीवा कींतन, नीवा लोप्पो नना वेल्लेन आनंदमते मंतन,” इंचि केंजा वाता.
पजा बतल आता इत्ते, अंतिपस हेरोद राजाल ओना दादाल पिलिप जीवाते मननेंकेन ओना मुत्तो हेरोदियास इनानदान ओनगा तच्चि इरकुत्तोरd. हेरोद राजाल ओना अंगेनतोनि कीता पापम आनि इंका वेरे-वेरे वेल्लेन तप्पु कबाह्कुनाहाटीं अंतिपस हेरोद राजान योहान तेराहतोर. अदुनहाटीं अंतिपस हेरोद राजाल योहानुन जेलने वाटसि, ओर (इत्ते हेरोद राजाल) कीता तप्पुकुने इंकुंदि तप्पु कल्पुकुत्तोरe.
योसेपुना वंसम
23 येसु सेवा कियना कबळ (लोकुल्कुंक पेनदा पोल्लें कराहना कबळ) सुरुव कीतस्के ओर दगेर-दगेरा मुप्पै वर्सानोर मत्तोर. लोकुल्क येसुन, योसेपुना मर्रि इन्कुनुंदुर. योसेप एलि पोर्रोलतोना मर्रि आंदुर. 24 एलिना बाना पोर्रोल मत्तातु, मत्तातुना बाना पोर्रोल लेवी, लेवीना बाना पोर्रोल मल्कि, मल्किना बाना पोर्रोल यान्ना, यान्नाना बाना पोर्रोल योसेपु. 25 योसेपुना बाना पोर्रोल मत्तियाल, मत्तियाना बाना पोर्रोल आमोस, आमोसुना बाना पोर्रोल नाहोम, नाहोमुना बाना पोर्रोल एस्लि,एस्लिना बाना पोर्रोल नागय्या. 26 नागय्याना बाना पोर्रोल मयातु, मयातुना बाना पोर्रोल मत्तियाल, मत्तियाना बाना पोर्रोल सिमय्या, सिमय्याना बाना पोर्रोल योसेकु, योसेकुना बाना पोर्रोल योदाल. 27 योदाना बाना पोर्रोल योहानन, योहानननुना बाना पोर्रोल रेसाल, रेसाना बाना पोर्रोल जेरुबाबेल, जेरुबाबेलना बाना पोर्रोल सलितिएल, सलितिएलना बाना पोर्रोल नेरी. 28 नेरीना बाना पोर्रोल मल्कि, मल्किना बाना पोर्रोल अद्दि, अद्दिना बाना पोर्रोल कोसाम, कोसामुना बाना पोर्रोल एलमादामु, एलमादामुना बाना पोर्रोल एर्राल. 29 एर्राना बाना पोर्रोल यहोसु, यहोसुना बाना पोर्रोल एलियाजर, एलियाजरना बाना पोर्रोल योरिमु, योरिमुना बाना पोर्रोल मत्तातु, मत्तातुना बाना पोर्रोल लेवी. 30 लेवीना बाना पोर्रोल सिमोनु, सिमोनुना बाना पोर्रोल यहुदाल, यहुदाना बाना पोर्रोल योसेपु, योसेपुना बाना पोर्रोल योनामु, योनामुना बाना पोर्रोल एलकिमु. 31 एलकिमुना बाना पोर्रोल मल्लयाल, मल्लयाना बाना पोर्रोल मिन्नाल, मिन्नाना बाना पोर्रोल मत्तातु, मत्तातुना बाना पोर्रोल नातानु, नातानुना बाबल दाविद राजाल. 32 दाविद राजाना बाना पोर्रोल यिस्सल, यिस्साना बाना पोर्रोल ओबेद, ओबेदुना बाना पोर्रोल बोवाज, बोवाजुना बाना पोर्रोल सलमोनु, सलमोनुना बाना पोर्रोल नहसोन. 33 नहसोनुना बाना पोर्रोल अमिनादाब, अमिनादाबुना बाना पोर्रोल अदमिन, अदमिनुना बाना पोर्रोल अरनि, अरनिना बाना पोर्रोल हेसरोन, हेसरोनुना बाना पोर्रोल पेरेस, पेरेसना बाना पोर्रोल यहुदा. 34 यहुदाना बाना पोर्रोल याकोब, याकोबुना बाना पोर्रोल इसहाक, इसहाकुना बाना पोर्रोल अब्राहाम,अब्राहामुना बाना पोर्रोल तेराहाल, तेराहाना बाना पोर्रोल नाहोर. 35 नाहोरुना बाना पोर्रोल सरुग, सरुगुना बाना पोर्रोल रेऊ, रेऊना बाना पोर्रोल पेलेग, पेलेगुना बाना पोर्रोल एबेराल, एबेरालना बाना पोर्रोल सेलाल. 36 सेलाना बाना पोर्रोल केनान, केनानुना बाना पोर्रोल अरपक्सद, अरपक्सदना बाना पोर्रोल सेमु, सेमुना बाना पोर्रोल नोहाल, नोहाना बाना पोर्रोल लामेक. 37 लामेकुना बाना पोर्रोल मतुसेल, मतुसेलना बाना पोर्रोल हनोक, हनोकुना बाना पोर्रोल यारेद, यारेदुना बाना पोर्रोल महलेल, महलेलना बाना पोर्रोल केनान. 38 केनानुना बाना पोर्रोल अनोस, अनोसुना बाना पोर्रोल सेतु, सेतुना बाना पोर्रोल आदाम, आदाम पेनदा मर्रि मत्तोर.