येसुना पुट्मळ
2
1 योहान पुटतस्के, रोम सरकारता राजाल कैसरa अगस्तुस ओना कय हिळु मनना अन्नि देसेल्कुना लोकुल्कुनद सिरगंति कियना इंचि आदेस हीतोर.b 2 कुरिनियुस इनना पोर्रोलतोर सिरिया एरियाता राज्यपाल मननेंके ई सिरगंति आता. आनि इदे मोट्टा मोदाटा सिरगंति आंद. 3 अय्ते सिरगंतिता आदेस दोर्कुताहेंके अंटोर लोकुल्क पोर्रोलीं रासागोटकुनालय बोना नाटे ओर होत्तुर.4 अल्हेन योसेप दाविद राजाना वंसमतोर मत्तोर. अदुनहाटीं ओर गालिल एरियाता नासरेत नाटेनाल यहुदिया एरियाता दाविद राजाना पुटता नार बेतलहेम इनना नाटेंक होत्तोर. d c 5 ओर सिरगंतिहाटीं नार होननेंके ओनतोनि एर्रा बोट्टु आसि मत्ता मरियमुन पीसि होत्तोर. अस्के अद पीटे मत्ता. 6 ओर अगा मननेंकेने दाना एरपूराना वेला वाता. 7 आनि अद दाना तोल्सूर मर्रिन कंता. अगा ओर्कु आगालय बेस जेगा दोर्कुवाहेंके मरियम आ पेडन पेगुने हुटता, हुटसि कोळकाते कोंदाक कुटार तासाना डालाते वाटसि इरता.
गोर्रें मेहानोरतोनि पेनदा दूताता वळकुमळ
8 अय्ते अदे नर्का इच्चुर गोर्रें मेहानोर नाटेना पलाते नेलीने ओर ओरा गोर्रेना कावेल कीसेक मत्तुर. 9 अस्के अचानक ओरा मुन्ने उंदि पेनदा दूता वासि नितुता आनि सामिना पेद्दातनमता वेल्गु ओरा सुट्टु एल्गता. अदुन हूळसि गोर्रें मेहानोर इरगा वेरियकुत्तुर. 10 अस्के पेनदा दूता ओर्कुन, “मिमेट वेरियमट. नना मीवाहाटीं उंदि बेस कबुर पीसि वातन. इद कबुर अंटोर लोकुल्कुंक बेस आनंदम हींता. 11 इय्याला दाविद राजाना इद नाटे, मीकुन पिसागोटनोर पुट्तोर, ओरे किरिस्तुe सामि आंदुर. 12 ओन मिमेट एरपाट कियना चिन्ह बतल इत्ते, उंदि कोळकाते पेगुने हुटसि कोंदांक कुटार तासाना डालाते वरोर सिन्ना पेडल मीकु दिसनूर,” इंचि इत्ता. 13 अल्हा इत्ता इन्मळे इंका वेल्लेन पेनदा दूतां वातां. वासि अगा मत्ता पेनदा दूतातोनि कलियसि पेनदुन तल्सुकुंचेके,
14 “स्वर्गमते पेनदा कदर आयि,
आनि बूमिपोर्रो अद पावरम कीता लोकुल्कुंक सांति दोर्किकांटी,”
इंचि इनालय दल्गुतां.
15 पजा पेनदा दूतां ओर्कुन होळसिसि स्वर्गमते मल्सि होत्तां. अस्के आ गोर्रें मेहानोर वरोंक-वरोर, “अय्ते ताकट! मनोम बेतलहेम नाटे दाकोम. होंचि, सामि मनाकु वेहताप जर्गुता गटनातुन हूळकोम,” इंचि इनालय दल्गुतुर.
16 पजा ओर अगटाल बिराना होत्तुर होंचि अगा मरियमुन आनि योसेपुन हूळतुर. इंका अगा कोळकाते कोंदांक कुटार तासाना डालाते सिन्ना पेडल मत्तदगुडा हूळतुर. 17 हूळता पज्जो, ओर्कु आ पेडाना बारेमते पेनदा दूता बतल वेहतानो, अद पोल्लेतुन आ गोर्रें मेहानोर अंटोर्क वेहतुर. 18 ओर वेहता पोल्लेतुन केंजता हरेक मनकल इचंत्रमते अरतोर. 19-20 पजा आ गोर्रें मेहानोर ओर्क पेनदा दूता बतल अय्ते वेहता, अल्हेन जर्गुतदुन केंजसि, हूळसि ओर पेनदुन इरगा तल्सुकुंचेके मल्सि होत्तुर. गानि मरियम मात्रम अव अन्नि पोल्लेन दाना मनसुने इरकुंचि इदुना अर्तम बतल मरि, इंचेके ऊके विचारम कीसेके मनुंदु.
सामिना कयदे येसुन अपाजेप्पांतुर
21 इल्हा आ पेडल पुटसि एनमिदि रोजकु आतस्के ओनाद कतना रिवाज कीतुर. आनि मरियम नेला तप्पका मुन्नेन पेनदा दूता दानकु वेहता परकारम, आ पेडना पोर्रोल “येसु” इंचि इरतुर.
22-24 पजा मूसाना नियम परकारम दाना मुट्टुड तेंडालय ओर येरुसलेम गुळिते होत्तुर. होंचि “रोंडु पावरेल्क हिलाकोंटे रोंडु गुव्वां अयना मोक्कु हियना.”f इंचि मूसाना नियमते राससि मत्ताप मोक्कु हीतुर. अल्हेने मूसाना नियमते, “तोल्सूर पेडन बस्केळक सामिंक हियना.”g इंचि वेहचि मंता. अदुनहाटीं सामिना कयदे येसुन अपाजेपतुर. मूसाना नियमते, “तोल्सूर पेडन बस्केळक सामिंक हियना.”h इंचि वेहचि मंता. अचोने आयका “रोंडु पावरेल्क हिलाकोंटे रोंडु गुव्वां अयना मोक्कु हियना.”i इंचि मूसाना नियमते राससि मंता.
इल्हा ओर सामिना नियम परकारम मोक्कु हियालय येरुसलेम होत्तुर.
सिमोन येसुना बारेमते पेनदा पोल्ले वेहांतोर
25 अवे तूकुल्कुने येरुसलेमते सिमोन पोर्रोलतोर वरोर मनकल मनुंदुर. ओर बेस सत्तेमंतुड आनि पेनदा पोल्लेपोर्रो ताकानोर मत्तोर. इस्राएलता लोकुल्कुंक पेन बस्के सुकम-सांति हींतनो इंचेके ओर एदुर हूळसेके मनुंदुर. आनि ओनतोनि पवित्र आत्मा मत्ता. 26 इंका पवित्र आत्मा, “बदवेरदाका अय्ते निमे, ‘पिसागोटना किरिस्तुन’ हूळिन, अदवेरदाका नीकु हामुर वायो,” इंचि ओन्कु वेहचि मत्ता. 27 पजा पवित्र आत्मा सिमोनुंक वेहताहेंका, योसेप आनि मरियम गुळितगा वाता रोजे ओरगुडा गुळितगा होत्तोर. मूसाना नियम परकारम दंडकाल्क कियनाहाटीं पेडना तलुर-बाबो पेडन अगा पीसि वातुर. 28 सिमोन आ पेडन ओरागटाल तेंडकुंचि एतकुत्तोर, एतकुंचि पेनदुन इल्हा तल्सुकुनालय दल्गुतोर:
29 “ए सामि, निमे नाकु हीता पोल्ले परकारम नीवा सेवक नना, इंदके सांतिते हाया परांतन,
30 बारित्ते निमे पेरकुत्ता पिसागोटनोन नना नावा कळकुन निंडा हूळतन,
31 निमे ओन दुनियाता अंटोर लोकुल्कुना मुन्ने पेरकुत्तिन,
32 वेरे जातिनोर्क बेसता हर्रि हुप्सना वेल्गु, आनि नीवा इस्राएल लोकुल्कुंक पेनदाहेंदाल दोर्कुता पेद्दातनम ओरे आंदुर.”
33 सिमोन मातरल येसुना बारेमते वळकाना पोल्लें केंजसि, ओना यावल-बाबल इचंत्रमते अरतुर. 34 पजा सिमोन ओर्क आसिर्वादम हीतोर, आनि येसुना यावल मरियमुंक इल्हा वेहतोर: “बिड्डा, इस्राएलते ई पेडनहेंदाल वेल्लेन मंदि लोकुल्कुंक नस्टम जरगार आनि वेल्लेन मंदि लोकुल्कुंक बेसगुडा जरगार. ई पेडल इत्ते पेनदाद उंदि चिन्ह आंदुर. ई चिन्हातुन वेल्लेन मंदि पास्कानुर. 35 इदुनहेंदाल वेल्लेन मंदिता मनसुना विचाराल्क पलाते अर्रनुं. गानि नीकु मात्रम उंदि कसेर नीवा गुंडेताल आरपार पेय्सि होत्ताचोन दुक्कम वायार.”
हन्नाल येसुना बारेमते अंटोर्क वेहंता
36 अगा पेनदा कबुर वेहना उंदि मातिर मनुंदु, दान पोर्रोल हन्ना. अद अस्सेर वंसमते पुट्टता पनुवेल पोर्रोलतोना मिय्यड आंद. अद वेल्लेन मातिर आसि मत्ता. मरमिं आता एडूं वर्सानेन दाना मुय्दो हासोत्तोर. 37 इल्हा अद मुंडा मोससि एनबै नालुं वर्सां आतां. अद रोज-रोज गुळिते वासेके मनुंदु. अद बस्केळक उपासम मंचेके पेनदुक पारतना कियुंदु. 38 सिमोन मातरल योसेप आनि मरियमुनतोनि वळकासेकेन मत्तोर, अस्केन अद ओरा दग्गेर्क वाता आनि पेनदुक दन्यवाद कीता. पजा बोर लोकुल्क अय्ते, पेन इस्राएल लोकुल्कुन ओरा तिप्पल्कुनाल बस्के पेच्हार इंचेक एदुर हूळसेके मत्तुरो, आ अंटोर लोकुल्कुंक आ पेडाना बारेमते अद वेहता.
39 इल्हा सामिना नियम परकारम कियानव अन्नि दंडकाल्क कियमळ मारतारित्ते योसेप आनि मरियम गालिल एरियाते मनना ओरा नासरेत इनना नाटेंकु मल्सि होत्तुर. 40 पजा पेडल पेद्दा बेर्सतोर. ओन्कु पेन ताकत आनि बुद्दिगुडा बेस हीता. आनि दाना दया ओनपोर्रो मत्ता.
येसु येरुसलेम सहरतेन आगांतोर
41 येसुना यावल-बाबल दाटसि होनना पंडुगुjनाहाटीं एटा येरुसलेम सहर होनुंदुर. 42 अय्ते येसु पन्नेंड वर्सानोर आतोर, अस्केगुडा एटा होत्ताप येसुन पीसि पंडुगुनाहाटीं येरुसलेम होत्तुर.k 43 पजा पंडुग मारतंका येसुना यावल-बाबल ओरा नार मल्सि होनालय पेय्सतुर. गानि येसु मात्रम येरुसलेमतेन आगिसि मत्तोर. अयना इद संगति मात्रम ओना यावल-बाबंक बिल्कुल एरपाट आया हिल्ले. 44 मनातोनि कलियसि ताकाना मंदितेन मंतोर बारे, इनकुंचि ओर इंकुंदि रोजमेड ताकसेक होत्तुर. पजा ओर ओरा जीवातोर्कुन, एरपाटतोर्कुन पूसकीसेके पहकालय दल्गुतुर. 45 हीके-हेके पहकीसि हूळतुर गानि येसु ओर्कु दिसा हिल्लोर. अदुनहाटीं ओर मर्रा ओन पहकसेक-पहकसेक येरुसलेम वापस होत्तुर.
46 मूड रोजकु आतस्के गुळितगा येसु ओर्कु दिसतोर. अगा ओर यहुदि गुरुल्कुनतोनि उद्दिसि ओरा पोल्लें केंजसेके इंका ओर्कुन सवाल्क पूसकीसेके मत्तोर. 47 येसुना उसारतनमतुन आनि जवाब हियानदुन हूळसि अगा मत्तोर अंटोर इचंत्रमते अरतुर. 48 ओना यावल-बाबल गुडा ओन हूळसि इचंत्रम आतुर. पजा ओना यावल ओन, “निमे मावातोनि इल्हा बारि कीतिन पेडा? नीवा बाबल, नना इरगा परेसान आसि नीकुन बगा-बगा पहकतोम नीकु एरके ना?” इंचि पूसकीता.
49 अस्के येसु ओर्कुन, “मिमेट नाकुन बारिंक पहकतिट? नना नावा बाबाना लोतेन मनमळ बेस इंचि मीकु तेळियोना?” इंचि इत्तोर. 50 गानि येसु वळकुता पोल्लेना अर्तम मात्रम ओना यावल-बाबंक तेळिया हिल्ले.l