लूकाल रासतद बेसता कबुर
लूकाल येसुना बारेमते रासंतोर
1
1-4 तियपिलुस सायाबुa, मावा नड्डुम येसु कीता कबाह्कुना बारेमते वेल्लेन लोकुल्कु रासालय कोसिस कीतुर. बोरय्ते जर्गुता आ गटनन कळकुने हूळतुर आनि पेनदा बेसता कबुरतुन कराहतुर, ओरे माकु ई पोल्लें एव्विचि हीतुर. माकु एव्ता पोल्लेन ननागुडा बेस हदविसि, परमेरका कीसि तेळियागोटकुत्तन. अदुनहाटीं इव अन्नि पोल्लेन बेस उंदान पज्जो उंदि नीकु राससि लोहना इंचि नाकु अन्पिस्ता. दीनहेंदाल निमे बतल अय्ते करियतिनो, अदे निजम इत्ता संगति नीकु तेळियंता.जकरयाल आनि एलिसिबांक संतानम दोर्कना कबुर
5 यहुदि जातिता लोकुल्कु मनना एरिया पोर्रो पेद्दा हेरोद राजाल राज्येम कियना कालमते, जकरयाल पोर्रोलता यहुदि जातितोर वरोर पेर्माल मत्तोर. ओर आबिया इनना पेर्मालोरा गँगुना मेंबर मत्तोर.b आनि जकरयान लेह्का ओना मुत्तो एलिसिबाल गुडा हरुनc पेर्माना वंसमतदे मत्ता.d 6 ओर इव्वुरगुडा पेनदा नदरते बेस बक्तुल्क मत्तुर आनि सामि वेहता अन्नि नियमकु आनि आदेसकुना परकारम ताकुंदुर. 7 गानि ओर्कु पिलाल्क आया हिल्लुर, बारित्ते एलिसिबाल गोडमुर्रादि मत्ता. अल्हेने ओर इव्वुर वेल्लेन मातरालोर आतुर.
8 बस्के अय्ते जकरयाना गँगुनोरद येरुसलेम सहरते मनना गुळिते सेवा कियना वारम वाता, अस्के ओर अगा पेर्माल इंचि पेनदा सेवा कीसेक मत्तोर. 9 पेर्मालोरा रिवाज मत्ताप सिट्टिं वाटसि पेनदा गुळिते गुगलेम वाटालय जकरयान पेरतुर. 10 ओर गुगलेम वाटना वेलाते पलाते जमा आता अंटोर लोकुल्क पारतना कीसेक मत्तुर.e
11 अच्चोटेने ओन्क सामिनद उंदि दूता, गुगलेम वाटना गद्देता तिना बाजुंक नित्तिस मत्तद दिसता. 12 जकरयाल पेनदा दूतातुन हूळसि उल्कीसि अर्तोर आनि इरगा वेरियकुत्तोर. 13 पजा पेनदा दूता ओन, “जकरया, वेरियमा. पेन नीवा पारतनातुन केंजता. नीवा मुत्तो एलिसिबाल नेला तपसि वरोर पेडन कनंता, निमे ओना पोर्रोल योहानf इंचि इर्रा. 14 पेडल पुटताहाटीं नीकु अय्ते वेल्लेन कुसि आंता. अचोने आयका वेल्लेन लोकुल्कुंक इंका आनंदम आंता. 15 बारित्ते आ पेडल सामिना नदरते पेद्दोर आंतोर. ओर अंगुर पंडिना पानकम आयि इंका वेरे बदे कल्लु उन्नोर.g अचोने आयका यावाना पीटे मननास्केटाले ओर पेनदा पवित्र आत्माते निंडसि मनंतोर. 16 ओर मीवा वेल्लेन इस्राएल लोकुल्कुन मीवा पेनदाहेके तिरहंतोर. 17 ओर, बाबुर्कुना मनसुन ओरा मर्क-मियाह्कुनहेके तिरहंतोर. पेनदा पोल्लें केंजवोर्कुन सत्तेमता तेल्वि दोर्किचकुना वेहंतोर. सामि मीवा नड्डुम वायका मुन्ने सामिनाहाटीं लोकुल्कुन तयार कियालय ई पेडल एलियानगाh मत्ता गुनम आनि ताकततोनि सामि वायना कबुरतुन सामि वायका मुन्नेन वेहांतोर,” इंचि इत्ता.
18 पजा जकरयाल पेनदा दूतातुन, “नना अय्ते मातरन आतन. इंका नावा मुत्तोगुडा वेल्लेन मातरि आता. अय्ते निमे इत्ता पोल्ले निजम आयार इंचि नाकु बल्हा तेळियार?” इंचि पूसकीतोर. 19 अस्के पेनदा दूता, “निमे नाकुन बोर इनकुंचंतिन?नना गब्रिएलi दूतातुन आंदुन. नना पेनदा मुन्ने नित्तिस मननादुन आंदुन. नीवातोनि वळकानाहाटीं आनि इद बेसता कबुर वेहनाहाटीं पेने नाकुन लोहता. 20 नना वेहता पोल्लें अय्ते वेला वातस्के निजम आयानुंगे, अयना निमे नावा पोल्लेपोर्रो विस्वासम इर्रा हिल्लिन. अदुनहाटीं नावा पोल्ले निजम आयानदाका नीकु वळका वायो, निमे मूकन आसि मनांतिन,” इंचि वेहता. 21 इदंता जर्गनेंके पलाते नित्तिस पारतना कीसेक मत्ता लोकुल्क इचंत्रम आसि, जकरयाल गुळिता लोप्पो इच्चोन आलसेम बारि कीसंतोर, इंचेके एदुर हूळसेक मत्तुर. 22 पजा जकरयाल गुळिताल पलाते वातोर. गानि ओर लोकुल्कुनतोनि वळका पराहिल्लोर. अस्के लोकुल्क, “गुळिता लोप्पो ईर बतलो दर्सनम हूळतोर बारे! अदुनहाटीं वळका पर्राका सय्गें कीसंतोर,” इंचि इन्कुत्तुर. 23 इल्हा ओना सेवा कियना रोजकु मारतां, अस्के ओर ओना लोन होत्तोर.
24 कोन्नि रोजकु आता पज्जो, ओना मुत्तो एलिसिबाल नेला तपता. नेला तपतस्के अद हेय्युं नेल्कुनदाका लोताल पलाते पेय्साकोंटा लोप्पेन मत्ता. 25 अस्के अद, “नाकुन गोडमुर्रद इंचि लोकुल्क कव्वुंदुर. गानि लोकुल्कुना नड्डुम नावा सिग्गु होनानायो इंचि सामि नाकु इल्हा सहायम कीतोर,” इंचि इत्ता.
येसु पुट्टना कबुर
26 एलिसिबाल नेला तप्सि हारूं नेल्क आसंतां. पेन अवे तूकुल्कुने, गब्रिएल इनना दाना दूतातुन गालिल एरियाता नासरेत पोर्रोलता सहरते मनना उंदि मरमिं आयवा पोरिनगा लोहता. 27 आ पोरिन पोर्रोल मरियम. आ पोरिनद दाविद राजाना वंसमते पुटता योसेप इनना वरोर मनकनतोनि एर्रा बोट्टु आसि मत्ता.j 28 आ गब्रिएल दूता दाना दगेर्क होंचि दानतोनि, “पेनदा आसिर्वादम दोर्कुता बाई, नीकु नमस्कारम! पेन नीकु तोळ मंता,” इंचि इत्ता. 29 पेनदा दूताता पोल्ले केंजसि मरियम वेल्लेन परेसान आता. ई नमस्कारमता अर्तम बतल आयावच्चु, इंचि इचंत्रमते अर्ता.
30 अस्के पेनदा दूता दान, “मरियम, वेरियमा! पेन नीकु आसिर्वादम हीता. 31 केंजा! निमे नेला तप्पंतिन आनि वरोर मांड्सा पेडन कनांतिन. निमे ओना पोर्रोल येसु (इत्ते पेन पिसागोटंता) इंचि दोस्सा. 32 ओन अंटोर ‘अन्निटकन्ना पेद्दा पेनदा मर्रि’ इंचि इनानुर, इल्हा ओर पेद्दा पोर्रोलता मनकल आयानुर. आनि ओना वंसमता पेद्दा मनकल दाविद राजानलेसीं पेन ओनगुडा राजाल कींता. 33 अचोने आयका ओर इस्राएल लोकुल्कुनपोर्रोk राज्येम कींतोर. इंका ओना राज्येम बस्केने मारो,” इंचि इत्ता. 34 अस्के मरियम पेनदा दूतातुन, “नावां अय्ते मरमिं इंका आया हिल्लें, नाकु मुय्दोगुडा हिल्लोर. अय्ते मरि इद बल्हा निजम आयार?” इंचि पूसकीता.
35 अस्के पेनदा दूता, “पेनदा पवित्र आत्मा नीवा पोर्रो वांता आनि अन्निटकन्ना पेद्दा पेन बाबाना ताकतहेंदाल नीवा पोर्रो उंदि निडा अर्रंता, अस्के निमे नेला तप्पंतिन. दानहाटीं नीकु पुट्टना पेडल पवित्र मनांतोर आनि ओन ‘पेनदा मर्रि’ इंचि इंतुर.l 36 केंजा! नीवा जीवातद एलिसिबालगुडा मातरितनमते नेला तप्सि मंता. अंटोर लोकुल्क दान गोडमुर्रदि इंचि इनुंदुर, गानि अद नेला तप्सि हारूं नेल्क आसंता. 37 पेन अन्नि कबाह्क किया पर्रंता, अद किया परवद बतले हिल्ले,” इंचि दानकु वेहता.
38 अस्के मरियम, “नना अय्ते पेनदा सेवा कियनादान आंदुन, निमे इत्तापे नाकु जरगिकांटी,” इंचि इत्ता. पजा पेनदा दूता अगटाल पेय्सि होत्ता.
मरियम जकरयाल आनि एलिसिबानगा दांता
39 पजा अवे रोजकुने मरियम बतल कीता इत्ते, बिरा-बिरा तयार आसि गुट्टांन लोप्पो मनना यहुदिया एरियाता उंदि नाटे होत्ता.m 40 नाटे एवतस्के अद जकरयाना लोन होंचि एलिसिबांक नमस्कारम कीता. 41 मरियम वळकुता पोल्लेतुन केंजसि एलिसिबाना पीटे मत्ता पिंडेम मेसुलता, आनि एलिसिबाल पवित्र आत्माते निंडिस होत्ता. 42 निंडिस होंचि अद पेद्दा आवाजते, “अन्नि मुरताह्कुंकन्ना निमे एक्को आसिर्वादम दोर्कुता मुरताटुन आंदिन मरियम! अल्हेने नीवा पीटे मनना पिंडेमगुडा वेल्लेन आसिर्वादम दोर्कुतद आंद. 43 नावा सामिना यावल नाकु कलियालय वायमळ इत्ते गम्मत पोल्ले आयो. इच्चोर वेल्ले कदर नाकु बगाटाल दोर्कुता? 44 हुळा! नीवा अल्किर केंजता केंजुडे नावा पीटे मत्ता पिंडेम कुसिते मेसुलता. 45 इंका निमे पेन वेहता पोल्लेतुन निजम आयि इंचि विस्वासम कीतिन, अदुनहाटीं निमे वेल्लेन आसिर्वादम दोर्कुतदुन आंदिन,” इंचि एलिसिबाल इत्ता.
मरियम पेनदुन तल्सकुंता
46 पजा मरियम इल्हा इनालय दल्गुता:
“नना नावा मनसुनाल पेनदुन तल्सुकुंतन.
47 नाकुन पिसागोटना पेन नावा आत्माकु कुसि हीता.
48 नना दाना उंदि सिन्ना दासिदान आंदुन. अयना पेन नावापोर्रो दाना दया हुपिस्ता. हुळा! इगेटाल नाकुन पीळि-पीळिना अंटोर लोकुल्क ‘पेनदा आसिर्वादम दोर्कुतद,’ इंचि इनानुर.
49 बारित्ते अन्निटकन्ना पेद्दा पेन नावाहाटीं पेद्दा-पेद्दा कबाह्क कीता. दानद पोर्रोल पवित्रमाता पोर्रोल आंद.
50 दानकु वेरियसि दाना कदर कीसेके ताकानोर पोर्रो दाना दया पीळिना-पीळिनदाका मनंता.n
51 अद दाना ताकत हुपिस्ता. गर्रा मत्ता लोकुल्कुन ओरा विचाराल्कुन नुसारे हिके-हेके पायिस्ता.
52 अद राजुल्कुन ओरा राजगद्दे पोर्रोटाल हिळु रेहता. आनि कदर हिलवोर्कुन बारे पेद्दा कीता.
53 हिलवोंक गावाले मत्तव हीसि समादानम कीताo. सिरमंत लोकुल्कुन बारे उत्ता कय्क लोहता.
54-55 अद मना एनकटा पेद्दाल्कुंक हीता पोल्ले परकारम,
दाना सेवा कियना इस्राएल लोकुल्कुंक सहायम कीता. इत्ते अब्राहाम आनि ओना वंसमतोरा पोर्रो बस्केळक दया कियानदुन मति इरता,” इंचेके मरियम पाटा पारता.
56 इल्हा मरियम एलिसिबानगा मूड नेलकु मत्ता. आनि पजा दाना लोन अद होत्ता.
बापतिस्मा हियना योहानुना पुटमळ
57 एलिसिबांक नेलां निंडिसि अद पेडन कंता. 58 दानकु मर्रि पुटतोर इंचि दाना पक्का लोहकुनोर्क आनि जीवातोर्क तेळियता अस्के, पेन दाना पोर्रो वेल्लेन दया हुपिस्ता, इंचि दानातोनि अंटोरगुडा वेल्लेन कूस आतुर.
59 आ पेडल एनमिदी रोजकुनोर आतस्के ओना कतनाp कियनाहाटीं ओर अंटोर वातुर. वासि आ सिन्ना पेडना पोर्रोल ओना बाबोना पोर्रोल पोर्रोटाल जकरया इंचि दोसानद मत्ता. 60 गानि पेडाना यावल मात्रम, “मन्नि, ई पेडन पोर्रोल ‘योहान’ इंचि दोसगोम,” इत्ता. 61 अस्के दान ओर अंटोर, “निजमे गानि, मीवा जीवातोरा लोप्पो इ पोर्रोलतोर बोरे मनकल हिल्लोर गदा,” इंचि इत्तुर.
62 पजा ओर ओना बाबान सय्गें कीसि, “निमे ई पेडन पोर्रोल बतल इर्रांतन इंचि इनकुंचंतिन?” इंचि पूसकीतुर. 63 अस्के आ पेडाना बाबाल रासालय उंदि पाटी तल्कुतोर आनि, “ओना पोर्रोल योहान आंद” इंचि रासतोर. अस्के रासतदुन हूळसि अंटोर्क इचंत्रम आता. 64 अस्केन जकरयांक तोड्डि वाता. अस्के ओर वळकुसेके पेनदुन तल्सुकुनालय दल्गतोर. 65 अगा पका पीसि मत्तोर अंटोर इरगा वेरियतुर. आनि इद संगति यहुदिया एरियाता गुट्टन पीसि मत्ता नाहकुने तेळियसि होत्ता. 66 ई संगति केंजता हरेक मनकल विचारम कीसि, “ई पेडल मुन्ने ताकसि बतल आयानुर?” इंचि इनुंदुर. बारित्ते आ पेडन पोर्रो निजम पेनदा कय मत्ता.
जकरयाल पेनदुन तल्सुकुंतोर
67 पजा आ पेडाना बाबो जकरयाल पवित्र आत्माते निंडिसि होत्तोर. निंडिस होंचि इल्हा पेनदा पोल्ले वेहालय दल्गतोर.
68 “मावा इस्राएलतोरा पेनदुन नना तल्सुकुंतन, बारित्ते अद दाना लोकुल्कुंक सहायम कियालय वाता आनि ओर्कु मुक्ति हीता.
69-70 पेन दाना पवित्र कबुरतोराहेंदाल वेल्ले वर्साना मुन्ने इत्ताप,
अद मावाहाटीं दाना सेवक दाविद राजाना वंसमताल वरोन वेल्लेन ताकत मत्ता मुक्ति हियनोन लोहचीता.
71 मावा पगातोरागटाल आनि हयस्वोरागटाल माकु मुक्ति हींता.
72 मावा एनकटा तादो-बाबुरा पोर्रो दया हुप्संतन इत्ता. आनि ओर्कु हीता पवित्र करारतुन बस्केन मति मरगोन इंचि इत्ता.
73 ई करार मावा एनकटा पेद्दा मनकल अब्राहामुनतोनि कीता ओट्टु आंदु.”
74-75 अद करार इल्हा मत्ता गदा, “मिमेट पिसतच्चुं रोजकु बक्तिते आनि पवित्र मंचेके, वेरियाकोंटा नावा सेवा कियनाहाटीं,
नना मीकुन मीवा पगातोरा कयदाल होळसींतन.
76 ए नावा सिन्ना पेडा! इंदके नीकुन अन्निटकन्ना पेद्दा पेनदा कबुरतोन इंचि इंतुर. बारित्ते निमे सामिना हर्रि तयार कियालय ओना मुन्ने-मुन्ने ताकंतिनq.
77 आनि मीवा पापाल्क मापि आतेने मीकु मुक्ति दोर्कंता, इत्ता संगतितुन निमे ओना लोकुल्कुंक वेहांतिन.
78 बारित्ते पेन दाना पेद्दा दया मनापोर्रो हुप्पिचि, स्वर्गमताल वरोर पोडदुनसंटोन लोहंता.
79 ओर, हामुर इनना निडा आनि पापमता हीकटते मनना मनापोर्रो वेलगु अराहचि, मनाकुन सांतिता हर्दे ताकसंतोर.” इंचि इत्तोर.
80 इल्हा आ पेडल पेदा बेर्सतोर. आनि आत्मातेगुडा बेस गट्टिगा आतोर. ओर ओना इस्राएल लोकुल्कुंक पेनदा पोल्लें वेहना वेला एवनदाका ओर उस्के बूमिनेन मत्तोर.