पेद्दा देय्यम येसुना परिक्सा येतंता
4
1 पजा येसु योर्दन बेरेटाल बापतिस्मा एतसि पवित्र आत्माते निंडतोर. निंडतस्के आत्मा ओन उस्के बूमिते पीसि ओता. 2 अगा नल्पै रोजकुनदाका पेद्दा देय्यम येसुना परिक्सा एतसेक मत्ता. नल्पै रोजकुना दाका येसु बतले तिना हिल्लोर. अदुनहाटीं अव रोजकु मारतस्के येसुंक पक्का करवेस्ता.3 करवेसतस्के पेद्दा देय्यम ओनगा वासि, “नना पेनदा मर्रिन इंचि निमेन वेहचंतिन, अय्ते ई बंडातुन हारि आयालय वेहा,” इंचि ओन इत्ता. 4 इत्तस्के येसु,
“नना वेहोन, बारित्ते मनकल सिराप तिंडि तित्तेने पिस्सोर,a इल्हा दर्मसास्त्रमते रासि मंता,” इंचि दान्कु जवाब हीतोर.
5 पजा पेद्दा देय्यम येसुन वेल्ले एत्तु जेगाते पीसि ओता. आनि उंदे मल्का दुनियातां पूरा राज्येल्कुन हूपिस्ता. 6 अल्हा हूपिचि, “इव अन्नि राज्येल्कुन ताकसालय नीकु अदिकारम हींतन, आनि राज्येल्कुना पेद्दातनम हींतन. बारित्ते अव अन्नि राज्येल्कु नावां आंदुं. नना इद अदिकारम बोन्क इत्ते ओन्क हिया परांतन. 7 अदुनहाटीं, निमे गिंटा नाकुन मोळकानय्ते इव अन्नि नीवांगें आंतां,” इंचि पेद्दा देय्यम इत्ता.
8 इत्तस्के, येसु दान,
“निमे नीवा पेंदुने मोळकना,
आनि सिराप दानदे सेवा कियना,b इल्हा दर्मसास्त्रमते रासि मंता,” इंचि इत्तोर.
9 आयंका पेद्दा देय्यम येरुसलेमते मनना गुळितगा येसुन ओसि, गुळि पोर्रो कोस्सक निल्हाता. निल्हाचि, “नना पेनदा मर्रिन इंचि निमेन वेहकुंचंतिन, अदुनहाटीं इगेटाल हिळु दुन्का, 10 नीकु बतले आयो, बारित्ते दर्मसास्त्रमते,
“पेन दाना दूतान नीकुन कापाळलय लोहंता,
नीवा काल्कुंक बदे बंडा दल्गाकुंटा.”
11 “नीकुन पोर्रोटद पोर्रोने अव दूतां कयकुने तेहाचि पींतांc इल्हा राससि मंता,” इंचि इत्ता.
12 अस्के येसु दान्कु इल्हा जवाब हीतोर.
“अर्तम हिलुवा कबाह्क कीसि, निमे नीवा पेनदा परिक्सा हूळमा,d इल्हागुडा दर्मसास्त्रमते राससि मंता,” इंचि इत्तोर.
13 इल्हा पेद्दा देय्यम अन्नि तीरुकुने येसुना परिक्सा एतसि हूळतारिते, दान्कु इंकुंदि मोका दोर्कनदाका ओन होळसि होत्ता.
येसु ओना सेवा सुरु कीतोर
14 पजा येसु पवित्र आत्माता ताकतते निंडिसि गालिलते वापस वातोर, आनि गालिल एरियाता अन्नि नाह्कुनोर ओनादे पोल्ले वळकुंदुर. 15 येसु ओरा दर्मसास्त्रम कराहना लोह्कुने होंचि पेनदा पोल्लें कराहुंदुर. अंटोर ओन बेस कराहंतोर इंचि तल्सुकुनुंदुर.
येसुन ओना नाटेनोर हय्सा हिल्लुर
16 अल्हेने पजा, येसु सिन्नस्केटाल बेर्सता नार नासरेतते होत्तोर. वारमता नोमकेम रोजुने ओना अलबट मत्ताप दर्मसास्त्रम कराहना लोते होंचि, दर्मसास्त्रम हदवालय नित्तुतोर. 17 अस्के यसायाल इनना पेनदा कबुरतोर रासता पुस्तकम ओन्क हीतुर. ओर आ पुस्तकमते उंदि पोल्ले दोर्किचि, इल्हा हदवालय सुरु कीतोर.
18 पेनदा पवित्र सेवक इल्हा वेहचंतोर, “पेनदा आत्मा नावापोर्रो वाता.
गरिबोर्कुंक बेसता कबुर वेहालय,
पेन नाकुन निल्हता.
दोहचि वाटसि ओतोर्कुन,
पेन होळसीता इंचि वेहालय,
गुड्डोर्कुन ‘मिमेट हूळंतिर’ इंचि वेहालय,
तकलिपते मनानोर्कुन, तकलिपताल तेंडालय,
19 पेन दया कियना वेला एवता,
इंचि वेहालय नाकुन लोहता.”e
इल्हा रासि मत्तदुन हदुवतोर.
20 हदुवमड आतारित्ते, पुस्तकमतुन बंद कीसि वरोर चपरासिंक हीसि कराहलय येसु हिळु उदुतोर. आ दर्मसास्त्रम कराहना लोते मत्ता अंटोरा नदर ओनाहेकेने मत्ता. 21 अस्के येसु ओर्कुन, “इयाला मिमेट केंजतव दर्मसास्त्रमता पोल्लें, मीवा मुन्ने नावा कयदाल पूरा आतां,” इंचि इत्तोर.
22 अंटोर, “ओर बेस वेहतोर, बेस-बेसतां पोल्लें ओना तोडदाल पेय्सुंदुं,” इंचेके ओर इचंत्रम आतुर. आसि ओर, “ईर अय्ते योसेपुना मर्रि आंदुर. ईनकु इच्चोन तेल्वि बगटाल दोर्कुता?” इंचि इत्तुर.
23 अस्के येसु ओरतोनि, “‘मत्तु हियानोना! निवद निमेने बेस कीस हुप्सा,’ इंचि उंदि सात्रम मत्ताप, मिमेट इंका नाकुन तप्पाकोंटा इंतिर, इत्ते, ‘कपर्नहुमते निमे कीता अद्बूताल्कुना बारेमते मोमोट केंजतोम, अव अद्बूताल्क नीवा संतम नाटेनेगुडा कीम,’ इंचि इंतिर. 24 नना मीकु निजम वेहांतन, बोरे पेनदा कबुरतोंक आयि, ओना नाटेनेन ओन्क कदर मन्नो. 25 अद बल्हा इत्ते, पेनदा कबुरतोर एलियाना कालमते बतल जर्गुता मीकु एर्केना? अस्के पूरा देसेमते मूड वर्सां हारुं नेल्कुनदाका पिर्रु वाया हिल्ले, अदुनहाटीं वेल्ले कर्वु अर्सि मत्ता. नना मीकु निजम वेहांतन, अद वेलाते इस्राएल देसेमते वेल्लेने मुंडामोस्ता मुरताह्क मत्तांf. 26 गानि बदे मुंडामोस्ता मुरताटगा सहायम कियनाहाटीं पेन एलियान लोहा हिल्ले. ओन सिराप सिदोन सहर दग्गेटा सारपत नाटेना वेरे जातिता मुंडामोस्ता मुरतटगा लोहता.g 27 अल्हेने पेनदा कबुरतोर एलिसानाh कालमते इंका कुस्टरोगम आतोर इस्राएल देसेमते वेल्लेटुरे मत्तुर. गानि ओराव्टेटाल वरोन इंका बेस कियालय पेन एलिसान लोहा हिल्ले. सिराप सुरिया देसेमतोन नामान इननोने बेस कीतोरi, इल्हा बोरे पेनदा कबुरतोंक आयि, ओना नाटेनेन ओन्क कदर मन्नो,” इंचि वेहतोर.
28 इस्राएल लोकुल्कुन होळसि, वेरे देसेमता लोकुल्कुन पेन सहायम कीता इंचि येसु वेहतस्के, दर्मसास्त्रम कराहना लोते उदिस मत्तोर अंटोर्क इरगा होंग वाता. 29 होंग वातस्के ओर तेदसि, येसुन ओरा नाटेनाल पलाते गुंजिस ओतुर. ओरा नार उंदि गुट्टापोर्रो मत्ता. येसुन गुट्टा पोर्रोटाल दोब्बिस हियालय एत्तु मत्तागा ओतुर. 30 गानि येसु ओरा नड्डुमताल पेय्सिस होत्तोर.
देय्यम पीतोन येसु बेस कींतोर
31 अगटाल येसु ओना सिस्युल्कुनतोनि गालिल एरियाता कपर्नहुमj नाटे होत्तोर. अगा वारमता नोमकेम रोजुननाडु पेनदा पोल्लें कराहमड सुरु कीतोर. 32 ओर इच्चोन अदिकारमते करहुंदुर गदा, ओना पोल्लें केंजसि लोकुल्कु इचंत्रम आयुंदुर. 33 अगा दर्मसास्त्रम कराहना लोते वरोर देय्यम पीता मनकल मत्तोर. ओर येसुन हूळसि जोरते वरगेयसि केयतोर, 34 “ए नासरेत नाटेना येसु! मोमोट देय्याल्कुनतोनि नीकु बाता कबळ? माकुन नासडेम कियालय वातिना? निमे बोन आंदिन नाक एरपाट हिल्लेना? निमे पेन लोहता पवित्र मनकन आंदिन,” इत्तोर. 35 अस्के येसु ओना लोप्पो मत्ता देय्यमतुन, “चुपचाप मन! ओनगाटाल पेय्सि होन,” इंचि वेराहतोर. वेराहतस्के, अद ओन हिळु अराहचि, ओन्कु बतले नोप्पि कियाकोंटा, ओना लोप्पोटाल पेय्सि वित्तुता.
36 अगा मत्तोर लोकुल्कु इचंत्रम आसि, वरोंक-वरोर वळकालय दल्गतुर, “इद बसोंटा पोल्ले आंदु? ओर अदिकारमते आनि ताकतते देय्याल्कुंक हुकुम हींतोर, अव पेय्सि दांतां!” इंचि इत्तुर. 37 इल्हा येसुना पोल्लें सुट्टु-मट्टु मत्ता अन्नि नाह्कुने तेळियसि होत्ता.
येसु उंदि बिमार मुरताटुन बेस कींतोर
38 येसु दर्मसास्त्रम कराहना लोताल पेय्सि सिमोन इननोना लोन होत्तोर. सिमोनुना पोरड बागा एळकीते मत्ता. ओर दाना एडकितुन बेस कियालय येसुन विनंति कीतुर. 39 अस्के येसु दाना दग्गेरे नित्तिसि एडकितुन, पेय्सि होन, इंचि वेराहतोर आनि दाना एडकि रेयता. अस्के अद बिराना तेदसि, ओर्क गाटो-जावा दोस्सि ओरा सेवा कियालय दल्गुता.
येसुनाहेंदाल वेल्लेटुर बेस आतुर
40 पोळदु होनना वेलाक वेरे-वेरे बिमारते मत्तुर्कुन ओनगा पीसि वातुर.k वातस्के येसु वरोन-वरोनपोर्रो कय इरसि, ओर्कुन बेस कीतोर. 41 वेल्लेटुर्कुन देय्याल्कु पीसि मत्तां. अव देय्याल्कुन येसु वेराहचि पेचाहत्तोर. देय्याल्कु ओरागटाल पेय्सनेंके, “निमे पेनदा मर्रिन आंदिन” इंचेके जोरते वरगेयसेके पेय्सुंदुं. बारित्ते, ओर किरिस्तु आंदुर इंचि अव एरपाट कीतां. गानि येसे किरिस्तु आंदुर इंचि वेहना वेला एवुवाहेंके येसु अवुन वळका हिया हिल्लोर.
येसु वेरे-वेरे नाह्कुने दांतोर
42 पंगातस्के येसु, नाटुन होळसि बोरे हिल्वगा ओंटिगा होत्तोर. गानि लोकुल्क ओन पह्कसेके-पह्कसेके दोर्किस्तुर, आनि निमे माकुन होळसि होनमा इंचि आपालय हूळतुर. 43 अस्के येसु ओर्कुन, “पेन मनकलोरगा राज्येम कियना बेसता कबुरतुन नाकु वेरे नाह्कुने इंका वेहा पींता. इदे कबळताहाटीं पेन नाकुन लोहता,” इंचि वेहतोर. 44 अल्हेने पजा येसु, यहुदि लोकुल्कु मनना वेरे-वेरे नाह्कुना दर्मसास्त्रम कराहना लोहकुने होंचि पेनदा पोल्लें वेहुंदुर.