पत्रु, याकोब आनि योहान येसुना पज्जो दांतुर
5
1 उंदि रोजु येसु गालिलa इनना सेर्वुनगा नित्तिसि पेनदा पोल्लें वेहासेक मत्तोर. ओड्डुन पोर्रो येसु नित्तिसि पेनदा पोल्लें वेहानेंके, आ पोल्लें केंजालय अगा वेल्लेने लोकुल्कु ओना सुट्टु जमा आतुर. 2 अस्के येसु सेर्वु ओड्डुनगा रोंडु डोंगान हूळतोर. जिम्मां पियानोर डोंगानाल रेय्सि ओरा ओल्लां नोर्सेक मत्तुर. 3 येसु, अव डोंगानाल वरोर सिमोन पत्रु इननोना डोंगाते एकतोर. एकसि, अंटोर्क बेस केंजा वायना इंचि अद डोंगातुन ओड्डुनाल इच्चुर लक्कु ओसि निप्सा इंचि वेहतोर. ओर डोंगातुन लक्कु निप्पुसता पजा, येसु डोंगाते उद्दिस लोकुल्कुंक पेनदा पोल्लें वेहालय दल्गतोर.4 येसु पेनदा पोल्लें वेहमळ माहता पजा, “डोंगातुन वेल्ले लोतु मत्तगा ओसि मिमेट ओल्लां मर्रा वाटट,” इंचि सिमोनुन इत्तोर. 5 अस्के सिमोन इत्तोर, “गुरु! मोमोट नर्का पल्हिं तिप्पल्क अर्तोम, माकु उंदिंका जिम्मा दोर्का हिल्ले, गानि निमे इंचेके मंतिन अदुनहाटीं नना ओल्ला वाटंतन,” इंचि इत्तोर. 6 अस्के सिमोन आनि ओना दंटातुर येसु वेहताप कीतुर अय्ते वेल्लेने जिम्मां अर्तां. आनि ओल्लां हर्रालय आतां. 7 ओल्लां हर्रांतां बारे इंचि वेरे डोंगाते मत्ता ओरा दंटातोर्कुन आसरा आयालय सय्गें कीसि केयतुर. ओर वासि रोंडु डोंगाने जिम्मां निहतुर, अस्के ओरां रोंड डोंगा इंका मुळगालय आतां. 8-9 अचोने वेल्ले जिम्मां अरतद हूळसि, सिमोन पत्रु आनि ओना दंटातुर गिंटा वेल्ले इचंत्रम आतुर. अस्के सिमोन येसुना काल्कुना पोर्रो अरसि, “सामि, नना पापि मनकन आंदुन, नीवा दग्गेरे मनना लायक नना हिल्लेन,” इंचि इत्तोर. 10 अल्हेने जब्दीना इननोना मर्क याकोब आनि योहानल, ईर सिमोन पत्रुना दंटातोरे आंदुर. ईरगुडा इचंत्रम आतुर. अस्के येसु सिमोनुन, “निमे वेरिय्मा, इदवेरादाका निमे जिम्मां पियिंदिन, गानि इंदकेटाल निमे मनकलोर्कुन नहगा नावा सिस्युल्क आयालय पीसि वाकिन,” इंचि वेहतोर.
11 पजा ओर ओरा डोंगां ओड्डुंक तत्तुर आनि आयंका अव अन्नि अगाने होळसिसि येसुन पज्जो होत्तुर.
येसु कुस्ट रोगमतोन बेस कींतोर
12 अल्हेने उंदि रोजु, येसु उंदि नाटे मत्तोर. अगा वरोर मनकल कुस्टरोगमते पूरा निंडसि मत्तोर. इसंटा रोगमतोर्कुन यहुदिल्कु मुट्टुड इंचि इट्टा कोंदुर. ओर येसुन हूळतारिते ओना काल्कुना पोर्रो अरसि विनंति कीतोर, “गुरु, नीवा मनसु मत्ते नावा मुटुड तेंडसि नाकुन बेस किया परांतिन,” इंचि इत्तोर.
13 अस्के कुस्ट रोगमतोर्कुन इट्ते मुट्टुड इंचि तेळियसिगुडा येसु ओना पोर्रो कय इरसि “नीकुन बेस कियना नावा मनसु मंता, निमे बेस आम,” इंचि इत्तोर. इत्ता इनुडे ओना कुस्टरोगम पूरा बेस आता. 14 अद आता पजा येसु ओन, “इद पोल्ले बोनके वेहमा, गानि पेर्मानगा होंचि नना बेस आतन इंचि गवाइ वेहा, आनि मूसाना नियम वेहता परकारम, बेस आतन इंचि अंटोर्क तेळियालय मुट्टुड तेंडना मोक्कु हीम,”b इंचि आदेस हीतोर. 15 निमे बोर्के वेहमा इंचि वेहचि मत्तोर गानि येसुना पोल्ले मुनेटकन्ना एक्को लोकुल्कुंक तेळियसेक होत्ता. अदुनहाटीं वेल्लेन मंदि लोकुल्कु येसुना पोल्लें केंजालय आनि बिमार्कुनाल बेस आयालय ओना पज्जो-पज्जो वायुंदुर. 16 गानि येसु बोरे हिल्वगा अलग-सलग होंचि पारतना कियुंदुर.
येसु लकवा बिमारतोन बेस कीतोर
17 येसु उंदि रोज वरोन लोन पेनदा पोल्लें वेहानेंके, अगा परिसिल्कc, आनि दर्मसास्त्रम कराहना गुरुल्क उदिस मत्तुर. ओर गालिल आनि यहुदा एरियाना अन्नि नाह्कुनाल, अल्हेने येरुसलेम सहरताल वासि मत्तुर. पेनदा ताकत येसु सामिनगा मत्ताहेंके बिमारतोर्कुन बेस कियुंदुर. 18 हुळा! अस्के इच्चुर लोकुल्क वरोर लकवा बिमार मत्तोन कटुलते वाटसि तत्तुर. तच्चि येसु उदिस मत्तगा लोप्पो ओयालय हूळतुर. 19 गानि अगा वेल्ले गर्दि मत्ताहाटीं ओर लोता लोप्पो ओया परा हिल्लुर. अय्ते ओर बतल कीतुर इत्ते लोत पोर्रो एकतुर, अगा एकसि कवेल्क तेंडतुर आनि येसु लोप्पो बगा अय्ते उदिस मत्तोरो ओन्कु सवरगा आ लकवा बिमारतोन कटुल्क कटुले ओना मुन्ने रेहतुर. 20 येसु, ओरा विस्वासमतुन हूळसि, लकवा बिमारते मत्तोन, “नीवा पापाल्क मापि आतां,” इंचि इत्तोर.
21 इल्हा इत्तस्के, दर्मसास्त्रम कराहना गुरुल्क आनि परिसिल्क केंजसि, “पेनदा अपमानम कियानोर, ईर बोर आंदुर? पेंदुन होळसिसि इंका बोरे पापाल्कुन मापि किया परोर,” इंचि ओर-ओरे मनसुने विचारम कियालय दल्गतुर. 22 येसु सामि, ओरा मनसुना विचारमतुन एरपाट कीसि, “नावा बारेमते मीवा मनसुने इल्हा बारि विचारम कींतिर रो? 23 ई बिमारतोन, ‘नीवा पापाल्क मापि आता’ इनमड अल्कगाना? हिलाकोंटे, ‘तेदसि ताका’ इनमड अल्कगाना? 24 गानि मनकना रूपमते पुटतोन नाकु, ई बूमिपोर्रोटा पापाल्कुन मापि कियना अदिकार मंता इंचि मीकु हुप्संतन,” इत्तोर. इंचि लकवा बिमार आतोन, “नना नीकु वेहासेके, निमे तेदा आनि कटुल पीसि लोन होन,” इंचि इत्तोर.
25 अस्के ओर बिराना अंटोरा मुन्ने तेदतोर, आनि ओर बद कटुलते अय्ते मींडसि मत्तोरो अद कटुल पीकुंचि ओर पेनदुन तल्सुकुंचेके लोन होत्तोर. 26 अद हूळसि, अगा मत्तुर अंटोर वेल्लेन इचंत्रम आतुर आनि पेनदुन तल्सुकुनालय दल्गतुर. आनि वेरियसि, “इदवेरादाका मोमोट बस्केने इसोंटा इचंत्रम आयना कबाह्क हूळा हिल्लोम,” इंचि इनालय दल्गतुर.
कर वसुल कियना लेवी इनानोन येसु केयतोर
27 अद आता पजा, येसु पलाते पेय्ससि होननेंके, कर वसुल कियना नाकातगा वरोर लेवी पोर्रोलतोर कर वसुल कियानोन हूळतोर. येसु ओनगा होंचि, “निमे नावा पज्जो वा,” इंचि ओन इत्तोर. 28 अस्के ओर, ओनगा मत्तव अन्नि अगेने होळसि ओना पज्जो होत्तोर.d
29 पजा लेवी येसुन ओना लोन केयसि, उंदि पेद्दा बोजनम हीतोर. अगा वेल्लेटुर कर वसुल कियानोर, इंका वेरेटुर लोकुल्क येसु आनि लेवीनतोनि उदिस गाटो तिंचेके मत्तुर. 30 अस्के परिसिल्क आनि ओरा दर्मसास्त्रम कराहना गुरुल्क येसुना सिस्युल्कुनगा वासि, “मिमेट कर वसुल कियानोरe, पापिल्कु, इसंटोरतोनि कूळसि गाटो तिंतिर,” इंचि गुल्गालय दल्गतुर.
31 ओर गुल्गानद येसु केंजसि, “बेस मत्तोन्क डाक्टरना अम्सरम हिल्ले, गानि बोरय्ते बिमारते मंतोर ओन्क डाक्टरना अम्सरम मंता. इद मीकु तेळियोना? 32 अदुनहाटीं, ‘मोमोट बेसतोरम’ इनानोराहाटीं आयो गानि पापिल्कुन मनसु पेनदाहेके मार्सकुनालय वेहनाहाटीं नना वातन,” इंचि इत्तोर.
उपासमता बारेमे येसु जवाब हियमड
33 अगा मत्ता लोकुल्क येसुन, “योहानुना सिस्युल्क ऊके उपासम मंचि पारतना कींतुर, अल्हेने परिसिल्कुना सिस्युल्कुगुडा कींतुर, गानि नीवा सिस्युल्क बारे बस्केळक तिंचेक-उंचेक मनांतुर. इद बल्हा मरि?” इंचि पूसकीतुर. 34 येसु अदुन केंजसि, “मरमिना पेडल मननेंके ओना दंटातोर उपासम कींतुरा? 35 गानि बस्के अय्ते मरमिना पेडान ओना पगातोर वासि ओरागटाल पीसि ओयाना वेला वांता, अस्के ओर उपासम कींतुर. इल्हा नना बदवेरादाका अय्ते नावा सिस्युल्कुनतोनि मनांतानो अदवेरदाका ओर उपासम किय्युर,” इंचि येसु ओर्कु वेहतोर.
36 इत्ता पजा, येसु ओर्क उंदि सात्रम वेहतोर. “बोरे आयिर, पळाना कप्पिडकु बोंगा अर्ते अद बोंगातुन मुच्चालय, पूना कप्पिड्तुन हराहचि दाना तुकडातुन अंटा वाटोर. ओक्कला ओर अल्हा कियानय्ते पूना कप्पिड तुकडा हर्रांता आनि अल्हेने पूना कप्पिडता तुकडा पळाना कप्पिड्क सोकगुडा दिस्सो. 37 अल्हेने पूना अंगुर पानकमतुन, पळाना तोलपुर्काते बोरे दोस्सुर. अल्हा दोसते अद अंगुर पानकम पुल्लगा आसि पळाना तोलपुर्कातुन हराहचि वाटंता. अंगुर पानकम हिळु पोंगिस दांता आनि तोलपुर्का इंका नासडेम आंता. 38 अल्हा कियवा पूना अंगुर पानकम पूना तोलपुर्कातेने दोस्सना. अस्के तोलपुर्कातुन हर्हो. 39 बोरे आयिर, पळाना अंगुर पानकम उट्टारिते, पूना अंगुर पानकम गावाले इन्नोर. ओर पळाना अंगुर पानकमे बेस मंता इंचि वेहांतोर.” परिसिल्क येसुना पूना कराहमळतुन ओप्कुनाकोंदुर, अदुनहाटीं ओर इल्हा वेहतोर.