नोमकेम रोजुना मालक येसु आंदुर
6
1 उंदि मल्का इल्हा आता गदा, येसु नोमकेम रोजुने गोह्कुना नेलीनाल होंचेके मत्तोर. होननेंके ओना सिस्युल्क हेन्कु उरहाचि कयदे नल्सि तिंचेके होत्तुर. 2 अद हूळसि इच्चुर परिसिल्क, “नोमकेम रोजुने बदे कबळ कियमळ ओज्जो, अय्ते मिमेट अद बारि कीसेक मंतिर?” इंचि इत्तुर.3 अस्के येसु ओर्कुन, “मुन्नेटा कालमते दाविद राजांक आनि ओना दंटातोर्कुंक करवेस्तस्के ओर बतल कीतोर, इद मिमेट हदवा हिल्लिरा? 4 ओर पेनदा डेराते होळियतोर, अगा पेनदुक वाटता हारिन पेर्मालोर्क तप्पा बोरे तिन्नुरa, अय्नागानि अवुन ओर तित्तोर आनि ओना दंटातोर्कुंक इंका हीतोर, इदुन मिमेट दर्मसास्त्रमते बस्केने हदवा हिल्लिरा?b अस्के पेनगुडा दाविद राजान तप्पु कीतिन इंचि इना हिल्ले” इंचि इत्तोर. 5 येसु ओर्कुन मर्रा इत्तोर, “मनकंक पुटतोन नना नोमकेम रोजुने इंका मालक आसि मंतम,” इंचि इत्तोर.
नोमकेम रोजुने येसु वरोर मनकन बेस कींतोर
6 अल्हेने इंकुंदि नोमकेम रोजुने येसु दर्मसास्त्रम कराहना लोन होंचि कराहसेक मत्तोर. अगा वरोर तिना कय वत्सि होत्ता मनकल मत्तोर. 7 अद लोतगा इच्चुर दर्मसास्त्रम कराहना गुरुल्क आनि परिसिल्क, नोमकेम रोजुने ओना कयदुन येसु बेस कींतोरा बतला, इंचि हूळसेक मत्तुर. येसु ओन बेस कियानय्ते, नोमकेम रोजुने बल्हा बेस कीतोर इंचि तप्पुने दोर्का पियालय पोंचादोसि मत्तुर.c
8 गानि येसु मात्रम ओरा विचाराल्कुन येसु एरपाट कीतोर. एरपाट कीसि कय वत्सोत्तोन, “तेदसि अंटोरा मुन्ने नित्ता,” इंचि येसु इत्तोर, इत्तस्के ओर तेदसि मुन्ने वासि निततोर. 9 अस्के येसु अगा मत्तोर्कुन, “नना मीकुन उंदि पोल्ले पूसकींतन वेहाट. नोमकेम रोजुने बद कबळ कियमळ ओज्जंता, बेसता कबळ कियमळा? हिलाकोंटे कराब कबळ कियमळा? वरोना जीवा पिसागोटमळा? हिलाकोंटे वरोना जीवातुन नासडेम कियमळा?” इंचि इत्तोर. 10 येसु अंटोर्कुन हूळतोर, गानि बोरे बतल वळका हिल्लुर. अस्के वत्सि होत्ता कयदोन, “नीवा कय हहा,” इंचि येसु इत्तोर. ओर कय हहातोर आनि ओना कय बेस आता. 11 गानि परिसिल्कुंक आनि दर्मसास्त्रम कराहना गुरुल्कुंक बागा होंग वाता. येसुन बतल बल्हा कियना इंचि ओर-ओरे विचाराल्क कियालय दल्गतुर.
येसु पन्नेंड मंदि प्रेरितुल्कुन पेरतोर
12 पजा उंदि रोजकु येसु पारतना कियालय उंदि गुट्टापोर्रो होत्तोर. अगा ओर नर्का-पल्लिं पेंनदुक पारतना कीतोर. 13 पंगातस्के ओना सिस्युल्कुन अंटोर्कुन दग्गेर्कु केयतोर. केयसि ओराव्टेटाल पनेंड मंदितुन पेरतोर. पेरसि ओर्कु, प्रेरितुल्क इंचि पोर्रोल दोसतोर. येसु पन्नेंड मंदितुन पेरकुत्तोर ओरे प्रेरितुल्कd इंचि पोर्रोल दोसतोर. 14 पन्नेंड मंदि बोर-बोर इत्ते, सिमोन (ईन पत्रु इंचि येसु पोर्रोल दोसतोर),e सिमोनुना तम्मुर आंद्रियल, जब्दिना मर्क याकोब आनि योहान, पिलिप, बरतलमय, 15 मत्तयाल(ईर कर वसुल कियना लेवी आंदुर, ईन मत्तयालगुडा इंतुर), तोमाल, अल्पीना मर्रि याकोब, सिमोन जिलोति(रोम सरकारता विरोद कियना पार्टितोर) 16 तद्दि यहुदल(ईना बाना पोर्रोल याकोब) आनि केरयोत नाटेना यहुदल(ई यहुदले आकिरते येसुन पगातोरा कयदे पीसि हीतोर).
बिमारकु मत्तोर्कुन येसु बेस कींतोर
17 पजा येसु ओना सिस्युल्कुनतोनि गुट्टा पोर्रोटाल हिळु रेय्सि, सपाट जेगाते निततोर. अगा ओना सिस्युल्क वेल्ले मंदि मत्तुर. अचोने आयाका पूरा येरुसलेम सहरताल, यहुदिल्कु मनना वेरे-वेरे नाह्कुनाल आनि समुद्रम ओड्डु पीसि मत्ता सूर-सिदोन एरियानाल वेल्लेटुर लोकुल्क ओनगा जमा आसि मत्तुर. 18 ओर अंटोर येसु वेहता पोल्लें केंजालय आनि बिमार्कुनाल बेस आयालय वासि मत्तुर. बोर्कु अय्ते देय्याल्क पीसि मत्तंगो ओरगुडा वासि बेस आतुर. 19 आ मंदि अंता ओन इट्टालय हूळसेके मत्तुर. बारित्ते ओनागटाल पेनदा ताकत वायुंदु आनि ओर अंटोर्कुन बेस कियुंदुर.
पेन बोर्कुन बेस हूळंता?
20 पजा येसु ओना सिस्युल्कुन हूळसि इल्हा इत्तोर,
“मिमेट बोरय्ते गरिब मंतिरो, मीकुन पेन बेस हूळंता,
पेनदा राज्येम मीवासंटोरदे आंदुf.
21 मिमेट बोरय्ते इंदके करवुने मंतिट, मीकुन पेन बेस हूळंता,
बारित्ते, मीवा करवु सल्लारंता.g
बोरय्ते इंदके दुक्कमते मंतिट, मीकुन पेन बेस हूळंता,
बारित्ते मिमेट वायना रोजकुने कवसेक मनंतिट.h”
22 “मिमेट मनकंक पुटतोना सिस्युल्क आताहाटीं बस्के अय्ते लोकुल्क मीकुन हय्साकुंटा आयानुर, गेदमिसि हियानुर, पास्कनुर, मिमेट हेळसि होत्तिर इंचि मीवा पोर्रोल एताकुंटा मनानुर, अस्के मीकुन पेन बेस हूळंता. 23 बोर मीवा विरोदमते मंतुर, ओरा एनकटा पेद्दाल्कगुडा मुन्नेटा पेनदा कबुरतोर्कुन इल्हेने तकलिप कीतुर. अदुनहाटीं मीक तकलिप वातस्के, मिमेट कुसिते एगरट. बारित्ते, मुन्नेटा पेनदा कबुरतोर्क दोर्कुताप, स्वर्गमते मीकुगडा पेद्दा इनाम मंता,”i इंचि इत्तोर.
24 मर्रा येसु इल्हा इत्तोर, “ए दनवंतुल्कुनिटा! मीकुन पेन बेस हूळो,
बारित्ते, मीकु सिराप इग्गेटा सुकम-सांते दोर्कंता.
25 इंदके पीरनिंडा तिनना लोकुल्कुनिटा! मीकुन पेन बेस हूळो,
मुन्ने मिमेट करवुने मनकिर.
इंदके कव्वानोरिटा! मीकुन पेन बेस हूळो,
वायना रोजकुने मिमेट दुक्कमते अळकिर.”
26 इंदके अंटोरहेंदाल कदर दोर्किचकुत्तोरिटा! मीकुन पेन बेस हूळो, बारित्ते बोरय्ते मीक कदर हीतुर ओरा एनकटा पेद्दाल्कगुडा मुन्नेटा पेनदा डोंगि कबुरतोर्क कदर हियुंदुर. आ डोंगि कबुरतोर्क दोर्कुताप मीकुगुडा सिक्सा दोर्कार.
पगातोर्कुन पावरम कियना
27 इंदके नावा पोल्लें केंजानोरिटा! नना मीक वेहानद बेस केंजट. मीवा पगातोर्कुन पावरम कीम्ट. मीकुन हय्सवोर्कुन बेस हूळाट. 28 बोरय्ते मीकु सापनेम हींतोर ओन, निमे सल्लगा पिस्सा, इंचि इंटु. बोरय्ते मीकुन तकलिप कींतोर, ओनाहाटीं पेनदुक पारतना कीम्ट. 29 बोरन्ना मीवा सेंपापोर्रो तंते ओना मुन्ने इंकुंदि सेंपा तिरहट. बोरन्ना मीवा अंगि तेंडकुत्ते, ओन्कु मीवा बनियागुडा तेंडिस ओया हीम्ट. 30 मीकुन बोरन्ना बतलन्ना तल्कते अद हीसि हीम्ट, आनि बोरन्ना मीहागटाल बतलन्ना ओते, अदुन वापस तल्कमट. 31 लोकुल्क मीवातोनि बल्हा मनना इंचि इनकुंतिरो, अल्हेने मिमेट लोकुल्कुनतोनि मनना. 32 बोर मीकुन पावरम कींतुरो, ओर्कुने मिमेट पावरम कीते, मीकु पेनदाहेंदाल बतल पायदा दोर्कंता? पापि लोकुल्कगुडा ओर्कुन पावरम कियानोर्कुन पावरम कींतुर गदा. 33 मीकुन बेस हूळानोर्कुंके मिमेट बेसता कबाह्क कीसि हीते, मीकु पेनदाहेंदाल बतल पायदा दोर्कंता? पापि लोकुल्कगुडा अल्हे कींतुर. 34 बोर वापस हींतुरो ओर्के बाकिक हीते, मीकु पेनदाहेंदाल बतल पायदा दोर्कंता? पापि लोकुल्कगुडा वापस दोर्कंतां इंचि बाकिक हींतुर.
35 अल्हा कियाकोंटा मिमेट मीवा पगातोर्कुन पावरम कीसि ओर्कुन बेस हूळाट. बाकि वापस दोहंतोर इंचि आसे इराकुंटा बाकि हीम्ट. अस्के पेन मीकु पेद्दा इनाम हियार, मिमेट अन्निटकन्ना पेद्दा पेनदा मर्क-मियाह्कु आकिट. बारित्ते, बोराय्ते पेनदुन मति किय्युर आनि कराब मंतुर असोंटा लोकुल्कुनपोर्रो इंका पेन दया कींता. 36 मीवा पेन बाबाल बल्हा दया कींतोर अल्हेन मिमेटगुडा दया कियानोर आम्टु.
इंकावरोन पोर्रो तप्पु दोसमटु
37 “इंका वरोनपोर्रो तप्पु दोसमटु, अस्के पेन मीवापोर्रो इंका तप्पु दोसो. मिमेट इंकावरोन, ‘तप्पु कीतोन,’ इंचि इनमटु, अस्के पेन मीकुनगुडा ‘तप्पु कीतोर,’ इंचि इन्नो. मिमेट वेरेतोर्कुन मापि कीम्टु, अस्के मीकुनगुडा पेन मापि किय्यार. 38 अवसरम मत्तोर्कु बीसकेतनम कियाकोंटा हीम्ट, अस्के पेन मीकुगुडा हिय्यार. बेस मनसु मत्ता सावकारिनलेह्का तव्वाते निहचि, अदमिसि, कुदलिचि, पोंगनाल मीवा ओटिते वाटताप, पेन मीकु हिय्यार. बारित्ते, बद तव्वाते मिमेट इंका वरोंक कह्चि हीकिर, अदे तव्वाते पेन मीक कह्चि हिय्यार.j”
39 मर्रा येसु ओर्क उंदि सात्रम वेहतोर: “वरोर गुड्डि मनकल, इंका वरोर गुड्डि मनकंकु हर्रि हुप्सा परांतोरा? अल्हा कीते, ओर इव्वुर इंका पोक्कते अरांतुर.k 40 सिस्युड ओना गुरुंकन्ना पेद्दा आया परोर, गानि गुरुनां पूरा करियसि ओर गुरुनलेसीं आंतोर.
41 “निमे नीवा कळदे मनना सितकुनसोंटा पेद्दा तप्पुन हूळाका, नीवा तम्मुना कळदे मनना बुस्सितसोंटा सिन्ना तप्पुन बारि हूळंतिन? 42 नीवा कळदे सितकु इर्सि, नीवा तम्मुना कळदे मनना बुस्सितुन तेंडा हीम इंचि बल्हा इना परांतिन? ए डोंगि मनका! मुन्ने नीवा कळदे मनना सितकुन तेंडा, दाना पज्जो नीवा तम्मुना कळदे मनना बुस्सितुन तेंडालय बेस हूळा परांतिन.”
रोंडु तीरकुना पंडीं
43-44 “पंडीन हूळसि मरा बद इंचि एरपाट किया वांता. बेसता मराकु कराब पंडि हादों, कराब मराकु बेसता पंडि हादों. हाह्कुना पोदानाल अंगुर पंडिं हादों हिलाकोंटे ईरामुस्टी मराकुनाल मरका पंडिं हादों. 45 बेसता मनकना मनसुनाल बेसता पोल्लेंगे पेय्संतां, कराब मनकना मनसुनाल कराब पोल्लेंगे पेय्संतां. बारित्ते, मनकना मनसुने मुनेटाल बव पोल्लें निंडिस मंतां, अवे पोल्लें ओना तोडदाल पेय्संतां.”
रोंडु तीरकुना लोकुल्क
46 “नना वेहता पोल्लेन केंजिर अय्ते, नाकुन सामि, सामि इंचि बारि इंतिर? 47 बोरे आयिर नहगा वासि, नावा पोल्लें केंजसि, नावा पोल्लेनलेसीं ताकंतोर, ओर बसंटोर आंदुर वेहंतन केंजाट. 48 ओर बसंटोर इत्ते, ओर लोन दोहालय पायवां लोत तव्विसि, बंडातोनि पुनादि दोहचि लोन दोहतोर. बस्के अय्ते कम्मुड वाता, एता तडां वासि लोतुक दल्गतां. अय्नागानि अद लोन कदला हिल्ले. बारित्ते, अद लोन गट्टिगा दोहचि मत्ता. 49 गानि बोरय्ते नावा पोल्लेन केंजसि अल्हा ताकोर, ओर बसंटोर इत्ते, ओना लोन पुनादि दोहाकेने बूमिपोर्रो लोन दोहतोर. बस्के अय्ते एता तडां वासि लोतुक दल्गतां. अस्के अद लोन कूलसि अर्ता आनि पूरा नासडेम आसि होत्ता,” इंचि येसु ओर्कुन इत्तोर.