येसु वरोर अदिकारिना सेवाकुन बेस कींतोर
7
1 येसु लोकुल्कुंक बव पोल्लें अय्ते वेहना मत्तोरो, अव पूरा वेहता पज्जो ओर कपर्नाहुम होत्तोर. 2 अगा वरोर रोम सरकारता दरोगाल मत्तोर. ओना वरोर दासुड बिमारते हायनाल आसि मत्तोर. ओन दरोगाल बागा पावरम कियुंदुर. 3 आ दरोगाल येसुना बारेमते बस्के अय्ते केंजतोरो, अस्के इच्चुर यहुदि पेद्दाल्कुनतोनि इत्तोर गदा, “मिमेट येसुनगा होंचि, ‘दरोगाना दासुड बागा बिमारते मंतोर, ओन बेस कियालय नीकुन वा इंचि वेहालय माकुन लोहतोर,’ इंचि वेहाट,” इत्तोर. 4-5 ओर येसुनगा वासि, “आ दरोगाल बेसतोर आंदुर, ओर मावा यहुदि लोकुल्कुन पावरम कींतोर. ओर मावाहाटीं दर्मसास्त्रम कराहना लोन इंका दोहचितोर, अदुनहाटीं निमे ओन्कु सहायम कीम,” इंचि येसुन बातिमलाडसेके मत्तुर.6 अस्के येसु ओरतोनि पेय्सतोर. ओर दरोगाना लोतुक दग्गेरे एवतस्के, ओर ओना दंटातोर्कुन येसुनहेके इल्हा वेहालय लोहतोर, “ए गुरु, निमे तकलिप अरमा. निमे नावा लोन अडगु वाटानच्चो मंचितनम नहगा हिल्लेa. 7 अचोने आयका नना नीकु कलियाना विचारमगुडा किया हिल्लेन. निमे सिराप अगाटाले पोल्ले इन, नावा जीतागाड बेस आंतोर. 8 पोल्ले इनमड इत्ते बतल नाकु तेळियंता. बारित्ते, नना इंका वरोना कयदा हिळु कबळ कियानोन आंदुन. नावा कयदा हिळुगुडा इच्चुर सिपाइल्कु मंतुर. नना बोनना ‘होन’ इत्ते ओर दांतोर, नना बोनना ‘वा’ इंचि केयते ओर वांतोर. वरोन जीतागान, ‘इद कीम’ इंचि इत्ते, इदुने कींतोर. इल्हेने इद बिमारता पोर्रो इंका नीवा अदिकारम मंता,” इंचि कबुर लोहतोर.
9 इद पोल्ले केंजसि येसु वेल्ले इचंत्रम आतोर. ओर पज्जोळक तिरीयसि, ओना पज्जो वायना मंदितेके हूळसि, “नना वेहानद केंजट, इच्चोर पेद्दा विस्वासम इस्राएलते मना यहुदि जातितोर्कुनेगुडा दिस्सो,” इंचि इत्तोर.
10 येसु सामिनेके लोहचिता दंटातोर मल्सि दरोगाना लोतेके वातस्के ओना दासुड बेस आसि दिसतोर.
येसु वरोर हाता मनकन जीवा अरहंतोर
11 पजा येसु नाईन इनना नाटेनहेके पेय्सतोर. ओनातोनि ओना सिस्युल्क आनि वेल्लेटुर लोकुल्क मत्तुर. 12 येसु नाटेने होळियना गेटुना दग्गेर्क एवतोर, अच्चोटेने वरोन हातोन बोंदा दोसालय ओसेके मत्तुर. हातोना यावल मुंडामोसि मत्ता. दानकु ईर वरोरे मर्रि मत्तोर. नाटेनोर वेल्लेटुर लोकुल्क दानातोनि पेय्सतुर. 13 येसु सामिंक दान हूळसि दया वाता, अस्के “निमे अळमा बाई,” इंचि इत्तोर. 14 इत्ता पजा, दग्गेरे होंचि पाडेतुन इटतोर. अस्के पाडेतुन कांजानोर अगाने आगतुर. अस्के येसु हातोन, “पेडा तेदा!” इंचि इत्तोर. b 15 इत्तस्के, आ हासोत्ता पेडल तेदिस उदुतोर आनि वळकालय दल्गतोर. पजा येसु ओन ओना यावंक हीसितोर.
16 अगा मत्तोर अंटोर्क वेर्रे दल्गता, ओर वेरियसि, “पेन दाना लोकुल्कुन सहायम कियालय वाता रो! मना नड्डुम दाना पेद्दा कबुरतोन लोहचिता,” इल्हा इंचेके पेनदुन तल्सुकुनालय दल्गतुर. 17 येसुना इद पोल्ले यहुदि लोकुल्कु मनना अन्नि नाह्कुने तेळियसि होत्ता.
बापतिस्मा हियना योहान ओना सिस्युल्कुन येसुनहेके लोहमड
18-19 इव जर्गतव अन्नि पोल्लेन, बापतिस्मा हियना योहान जेलने मननेंके ओना सिस्युल्क होंचि ओन्कु वेहतुर. वेहतस्के, इव्वुर सिस्युल्कुन योहान केयसि, “पेन पिसागोटनोन लोहना मत्ता, ओन निमेन ना? हिलाकोंटे मोमोट इंका वरोना एदुर हूळमळा?” इंचि पूसकियालय ओर्कुन येसु सामिनगा लोहतोर. 20 ओर सिस्युल्क येसु सामिनगा वासि, “गुरु! ‘पेन पिसागोटनोन लोहना मत्ता, ओन निमेन ना? हिलाकोंटे मोमोट इंका वरोना एदुर हूळमळा?’ इंचि नीकुन पूसकियालय, पेनदा पोर्रोलते बापतिस्मा हियना योहान माकुन लोहतोर,” इंचि इत्तुर.
21 अस्केने येसु वेल्लेटुरा बिमार्कुन, नोप्पिन, देय्याल्कु पीसि मत्तोर्कुन बेस कीतोर आनि वेल्लेटुर गुड्डोर्कुना कळकु दिसनाल कीतोर. 22 अल्हा कीसि ओर्कुन इत्तोर, “इंदके मिमेट बतल हूळतिर, बतल केंजतिर अवुन होंचि योहानुंक वेहाट: पेनदा ताकतते गुड्डोर्क हूळसेक मंतुर, कुंटोर्क ताकसेक मंतुर, कुस्टरोगम आतोर बेस आतुर, सेव्टोर्क केंजसेक मंतुर, हातोर्क तेदसेक मंतुर आनि गरीबोर्कुंक बेसता कबुर केंजालय दोर्कसेक मंता. 23 इव अन्निन हूळसि, अन्स-मन्स कियाकोंटा बोरय्ते नाकुन नम्मंतुरो ओरे नसिबतोर,” इंचि वेहतोर.
येसु योहानुना बारेमे वेहंतोर
24 योहानुना सिस्युल्क अगटाल पेय्सि होननेंके, येसु लोकुल्कुनतोनि योहानुना बारेमते इल्हा वेहतोर, “मिमेट उस्के बूमिते बसोंटा मनकन हूळालय होत्तिर? वळिक ऊंगना जाडिलेह्का ऊके-ऊके पोल्लेतुन बदलांचनोन हूळालय होत्तिरा? 25 हिलाकोंटे मिमेट बसंटोन हूळालय होंचि मत्तिर? मलमल कप्पिड केर्ता मनकन हूळालय होंचि मत्तिरा? केंजाट! मलमल कपडीं केर्रानोर आनि सिरमंतुल्क राजवाडाते मनांतुर, उस्के बूमिते आयो! 26 अय्ते मरि मिमेट बतल हूळालय होत्तिर? पेनदा कबुरतोन हूळालय होत्तिरा? हो! नना मीकु वेहासेके मंतन, मिमेट बोन अय्ते हूळतिर ओर पेनदा कबुरतोर्ककन्ना बच्चोरो पेद्दा मंतोर. 27 ओना बारेमते पेन नाकु इल्हा वेहचि मत्ता.
“हुळाट, नना नावा कबुरतोन निकन्ना मुन्ने लोहासेक मंतन.
ओर निमे वायनाहाटीं हर्रि तयार कींतोर.”c
इंचि दर्मसास्त्रमते राससि मंता. 28 “नना मीकु वेहांतन, पडना नियमतुन पीसि ताकानोरव्टे योहानुंकन्ना पेद्दा बोरे हिल्लोर. अय्नागानि, पेन राज्येम कियानोरव्टे अंटोरकन्ना सिन्नोर इंका योहानुंकन्ना पेद्दा मंतोर,” इंचि वेहतोर.
29 (अस्के वेल्लेटुर लोकुल्क, आनि कर वसुल कियानोर इंका येसु वेहता पोल्लेन केंजतुर. केंजसि, पेनदा हर्रि सत्तेम हर्रि, इंचि इत्तुर. ओर्क अंटोर्क योहान मुन्नेने पेनदा पोर्रोलते बापतिस्मा हीसि मत्तोर. 30 गानि परिसिल्क आनि दर्मसास्त्रम कराहना गुरुल्क बारे योहानुना हेंदाल पेनदा पोर्रोलते बापतिस्मा एतुवा, पेन ओर्क हूपिस्ता हर्दे ताका हिल्लुर.)
31-32 मर्रा येसु इल्हा वळकालय दल्गतोर, “ई पीळिता लोकुल्क बोरालेसीं मंतुर इंचि, ओर्कुन बोरा लोप्पो कल्पकन? इदुन केंजट, बोरो पिलाल्क बजारते उदिस, ओरा दंटातोर्कुन इल्हा इंचेके केयंतुर,
“मोमोट मीवाहाटीं दुकमता पाटां पारतोम
अय्ना मिमेट अळा हिल्लिर.
मोमोट मीवाहाटीं तूरिलाते एगराना पाटां उह्कुतोम
गानि मिमेट एगरा हिल्लिर.”
33 “अल्हेने बापतिस्मा हियना योहान गोल्लाबामा तिनुंदुर, अंगुर पंडिना पानकम उनाकोंदुर, अदुनहाटीं मिमेट ओन, देय्यम पीता इंचि इत्तिर. 34 गानि मनकंक पुटतोन नना तिंचेक-उंचेक वाताहेंके, ओन हुळाट, ओर गाकुडोर आंदुर, रिम्मल आंदुर, कर वसुल कियानुरा आनि पापि लोकुल्कुना दंटातोर आंदुर इंचि नाकुन इंतिर. बजारते उदसि मत्ता गडसु पोरलोर मत्ताप, योहान अल्हा मत्तोर अयना मिमेट ओना पोल्लें केंजा हिल्लिर, इंदके नना इल्हा मंतन अयना मिमेट नावा पोल्लेंगुडा केंजसेक हिल्लिर. 35 गानि पेनदा बुद्दिते बोरय्ते ताकंतुर, ओरा कबाह्क सत्तेमतव मनंतां.”
पापि मुरतळ येसुना काल्कुंक अत्तर निय होकता
36 उंदि मल्का सिमोन इनना वरोर परिसि मनकल येसुन गाटो तिनालय ओना लोन केयतोर. अस्के येसु ओना लोन होंचि गाटो तिनालय उदतोर. 37 अगा आ नाटेने उंदि पापि मुरतळ मत्ता. दानकु, येसु वरोर परिसिन लोन गाटो तिंचंतोर इंचि तेळियतस्के अद उंदि बंडाता गुर्गिते बेस गमागमा गब्बु वायना अत्तर निय पीसि वाता. 38 वासि येसुना पज्जो नित्तिसि अळसेके दाना कळकुनाल पोंगाना एरतोनि येसुना काल्कुन नहालय दल्गुता. पजा दाना केल्कुनतोनि उसमुंदु आनि ओना काल्कुन बुर्सेके अत्तर निय होकुंदु. 39 अल्हा कियानद हूळसि, बोरय्ते येसुन केयतोरो आ परिसि, “इद अय्ते पापि मुरतळ आंदु! ईर निजमे पेनदा कबुरतोर आसि मत्ते, ओन इट्टानद बसोंटा मुरतळ आंद इंचि ओन्कु तेळियसि मनवळ. आनि पापि मुरतळ इटते मुट्टुळ इंचि दान इट्टा हियाकोन्नेर,” इंचि ओर इनकुत्तोर.
40 अस्के येसु ओना मनसुन एरपाट कीसि, “सिमोन, नीकुन उंदि पोल्ले पूसकियना मंता,” इंचि इत्तस्के ओर, “वेहा गुरुजी,” इंचि इत्तोर. 41 अस्के येसु उंदि वेसुड वेहतोर, “इव्वुर मनकलोर वरोर सावकारनगाटाल बाकि तेंडतुर, वरोर हेय्युं नुह्कु आनि इंका वरोर बारे एबै एंडि बंडिं. 42 गानि ओर बाकि दोहा परा हिल्लुर. अदुनहाटीं सावकार ओरा इव्वुरा बाकितुन मापि कीतोर. अय्ते इंदके ओरा इव्वुरा लोप्पोटाल सावकारुन बोर एक्को पावरम कींतोर, वेहा?” इंचि पूसकितोर. 43 अस्के सिमोन, “बोरय्ते एक्को बाकि मत्तोर, ओरे एक्को पावरम कियानुर बारे,” इंचि इत्तोर. इत्तस्के येसु ओन, “निमे बरोबर वेहतिन,” इत्तोर.
44 येसु मुरतटहेके तिरियसि सिमोनुन इत्तोर, “निमे ई मुरताटुन हूळा. नना नीवा लोन वातन, निमे नावा काल्क नोर्रालय एरगुडा हिय्या हिल्लिनd. गानि इद बारे दाना कांडेह्कुनतोनि नावा काल्कुन नाहचि, केल्कुने उसुमता. 45 निमे नाकुन बुर्सि नमस्कारम किया हिल्लिन, गानि नना लोप्पो होळियतस्केटाल इद नावा काल्कुन बुर्सेके मंता. 46 निमे नावा तल्लक निय होकसि नाकु कदर हिया हिल्लिन, गानि इद नावा काल्कुंक वेल्लेन दराता अत्तर निय होकुता. 47 अदुनहाटीं नना नीकु वेहांतन गदा, अद वेल्लेन पावरम कीता, बारित्ते दाना अन्नि पापाल्क मापि आतां. गानि बोनद इच्चुने पापमता मापि आता, ओर इच्चुने पावरम कीतोर.”
48 पजा येसु आ मुरताटुन, “नीवा पापाल्क मापि आतां,” इंचि इत्तोर. 49 अस्के ओनतोनि गाटो तिंचेक उदिस मत्तुर अंटोर, “ईर बोर आंदुर रो, ननाने पेन इत्ताप पापाल्कुन मापि कींतोर?” इल्हा ओरद-ओरे वळककुनालय दल्गुतुर. 50 पजा येसु आ मुरतटुन, “निमे नावापोर्रो विस्वासम कीताहाटीं पेन नीकु मुक्ति हीता, निमे सांतिते होन,” इंचि इत्तोर.