इच्चुं मुरताह्कु ओना पज्जो दांता
8
1 पजा इल्हा जर्गुता गदा, येसु अन्नि सहरकुने आनि नाह्कुने पेनदा राज्येमता बारेमते बेसता कबुर वेहासेके तिरियालय दल्गतोर. ओनतोनि पंन्नेड मंदि प्रेरितुल्क मत्तुर. 2 अगा देय्याल्कुनाल, बिमारकुनाल बेस आतव इच्चुं मुरताह्क इंका ओरतोनि मत्तां. अव मुरताह्कुनाल उंदि मगदलेनि नाटेनद मरियम पोर्रोलता मुरतळ मत्ता. येसु दानगाटाल एडुं देय्याल्कुन पेचाह्चि मत्तोर. 3 इंकुदि मुरतळ योहानि इनानद, हेरोद राजाना दिवांजी कोजा इननोना मुत्तो मत्ता. अल्हेने सुसान्नल आनि वेल्लेन मुरताह्क इंका मत्तां. इवन्नि मुरताह्क येसुना आनि ओना सिस्युल्कुना सेवाताहाटीं अवुना संतम कोत्तान कर्स कियुंदुं.विज्जां तासना वेसुड
(मत्तयाल 13:2-15; मरकुस 4:1-12)
4 अल्हेने उंदि रोजु वेरे-वेरे नाह्कुनाल वेल्लेटुर लोकुल्कु येसुनगा वासि जमा आसेक मत्तुर, अस्के येसु ओर्क उंदि वेसुड वेहतोर. 5 अद इल्हा मत्ता, “वरोर मनकल विज्जां वीतलय पेय्सतोर, विज्जां वीतनेंके इच्चुं पेडेक हर्दे अर्तां, अव पेडेकुन हर्रि पीसि होनानुर-वायानुर जारतुर, आनि पिट्टें वासि अवुन तित्तां. 6 इच्चुं विज्जा पेडेक, इच्चुन तोडि मत्ता बंडाना जेगाते अर्तां आनि अव मोलियतां. गानि अगा पदना दोर्कुवाहाटीं वतिस होत्तां. 7 इच्चुं विज्जा पेडेक हह्कुना जप्पि जेगाते अर्तां. अवुनतोनि हह्कुना जप्पि इंका बेरसि अव मोल्कन बेरसा हिया हिल्लें. 8 इच्चुं पेडेक बारे बेस जेगाते अर्तां, अव बेस मोलियतां, आनि नूर अंताल्कुना पंटा पेय्सतां,” इंचि वेहाचि, “मिहागटाल बोन्क अय्ते नावा पोल्लें केंजाना मनसु मंता, ओर बेस केंजाट,” इंचि इत्तोर.
9 ओना सिस्युल्कु, “ई वेसुटा अर्तम बतल गुरु?,” इंचि पूसकीतुर. 10 पूस कीतस्के येसु ओर्कुन इत्तोर, “मीकु इत्ते पेन, दाना राज्येमता मर्ममतुन एरपाट कीकुनालय बुद्दि हीता. गानि वेरेतोर्कुंक बारे वेसुटे वेहांतन. इल्हा कीते
“ओर नावा कबाह्कुनहूळांतुर,
गानि अव कबाह्कुन अर्तम कीकुन्नुर
ओर केंजांतुर
गानितेळियागोटकुन्नुर.”a
येसु विज्जां वीतुता वेसुडता अर्तम वेहांतोर
11 “इद वेसुटा अर्तम इल्हा मंता, विज्जा पेडे इत्ते पेनदा पोल्ले आंदु. 12 विज्जा पेडेक हर्दे अर्तां इत्ते दाना अर्तम इल्हा मंता. बोरो-बोरो पेनदा पोल्लेन केंजांतुर गानि पेद्दा देय्यम ओरा मनसुने वासि ओर विस्वासम कीसि ओर्कु मुक्ति दोर्का मनि इंचि पेनदा पोल्लेन मर्गगोटंता, असंटोर इत्ते विज्जा पेडे अर्ता हर्दासंटोर आंदुर. 13 इच्चुं विज्जा पेडेक बंडाना जेगाते अर्तां दाना अर्तम इल्हा मंता, बोरय्ते पेनदा पोल्लेन कुसिते केंजसि विस्वासम कींतुर गानि ओरा मनसुने पेनदा पोल्ले गट्टिगा नाटकुन्नो. ओर्क पेनदा पोल्लेनहेंदाल बतलन्ना तकलिप वाते, बिराना विस्वासमताल पज्जोळक होनानोर्क इत्ते, विज्जा पेडेक बंडाना जेगाते अर्तासंटोर आंदुर. 14 इच्चुं विज्जा पेडेक हह्कुना जप्पि जेगाते अर्तां, दाना अर्तम इल्हा मंता, ओर पेनदा पोल्लें केंजांतुर गानि विस्वासमते मननेंके-मननेंके सम्सारमता पिकिर, दनमता आस्ति आनि दुनियाता सुकाल्क इव अन्नि ओर्कुन पेनदा पोल्लेन लोप्पो बेर्सा हिय्यों. असंटोर इत्ते, विज्जा पेडेक हह्कुना जप्पि जेगाते अर्तासंटोर आंदुर. 15 गानि बेसता जेगाते अर्ता विज्जा पेडेकुना अर्तम इत्ते, बोरय्ते पेनदा पोल्लेन सत्तेम आनि बेस मनसुने केंजसि, अव पोल्लेन मनसुने इरांतुर. पजा ओर्क बच्चोन तकलिप वायना गानि ओप्केते पेनदा पोल्लेते ताकसेके बेसता कबाह्क कींतुर, असंटोर इत्ते विज्जा पेडेक बेसता जेगाते अर्तासंटोर आंदुर,” इंचि इत्तोर.
पेनदा पोल्ले वेलगु हींता
16 मर्रा येसु वेहतोर, “बोरे आयिर वेडसि निरिचि गंजुना हिळु मुच्चोर अल्हेने कटुल हिळु इंका इर्रोर. गानि लोप्पो वायानोर्क वेडसिता वेलगु दिसागोम इंचि दान दिसोड पोर्रो इरंतोर. 17 अल्हेने मकिचि मत्ता पोल्लें अन्नि बय्यार आयनुं, असोंटा वेला वायार. 18 अदुनहाटीं बेस मनसु ताससि केंजाट, बारित्ते, बोनगा करियाना बुद्दि मंता, पेन ओनकु इंका हियार गानि बोनगा करियाना बुद्दि हिल्ले, ओनगा मत्तद इच्चुन बुद्दितुन इंका तेंडकुनार,” इंचि इत्तोर.
येसुना सिस्युल्के ओना निजम जीवातोर
19 अस्के येसुना यावल आनि ओना तम्मुर ओनागा कलियालय वातुर. गानि गर्दि मत्ताहाटीं ओर ओनकु कलिया परा हिल्लुर. 20 अदुनहाटीं बोरो येसुन, “नीवा यावल आनि तम्मुर नीकु कलियालय पलाते नित्तिसि मंतुर,” इंचि वेहतुर.
21 वेहतस्के येसु ओर्कुन इत्तोर, “बोरय्ते पेनदा पोल्लें केंजसि अल्हेने ताकंतुरो, ओर्कुने नावा यावल आनि नावा तम्मुर इंतन,” इंचि इत्तोर.
वडि-दुमारमतुन येसु आपंतोर
22 अस्के उंदि रोज येसु ओना सिस्युल्कुनतोनि डोंगाते उदिसि, “मनम सेरवुना हब्बेरे दाकोम दट,” इंचि इत्तोर. इत्तस्के ओर होनालय पेय्सतुर.
23 ओर डोंगाते होनेंके-होनेंके येसु मींडतोर. अस्के सेरवुने पेद्दा वडि-दुमारम वाता, आ वडि-दुमारमतेंदाल डोंगाते एर निंडालय आता. निंडताहेंका ओर वेल्ले तकलिपने अरतुर. 24 पजा सिस्युल्क येसुनगा होंचि, “गुरु, गुरु मनम मुळगसेक मंतोम,” इंचि इत्तुर. अस्के ओर तेदसि वडि-दुमारमतुन आनि एता तडान गद्दरिचतोर, अय्ते वडि-दुमारम आगता आनि तडां इंका दिसाकुंटा आतां. 25 येसु ओर्कुन, “मिमेट नावापोर्रो विस्वासम बारि इर्रा हिल्लिर?” इंचि इत्तोर. गानि ओर वेरियतुर आनि ओर-ओरे इनालय दल्गतुर, “ईर गद्दरिचतारिते ईना पोल्लें वडि-दुमारम आनि एता तडां इंका केंजतां, ईर बोर आंदुर?” इंचि इचंत्रम आतुर.
देय्यम पीता मनकन येसु बेस कींतोर
26 पजा ओर गिरासेनि इनना वेरे जातिता लोकुल्कुना जेगाते एवतुर, अद जेगा गालिल सेरवुना हबेटा बाजुंक मत्ता. 27 येसु डोंगाताल बल्हा रेयतोर अल्हेने वरोर देय्याल्क पीतोर गिरासा सहरता मनकल अगा वातोर. ओर वेल्लेने रोजकुनाल कपडिं केर्राकुंटा कुळकेंगे मनुंदुर, ओर लोन मनाकोंदुर, हातोर्कुन दोस्साना सोर्रेते मनुंदुर. 28-29 देय्यम ओन ऊके-ऊके पियुंदु, लोकुल्कु ओन गोल्सुकुने दोहचि कावेल मनुंदुर. गानि ओर गोल्सुकुन नेम्हुंदुर, अस्के देय्यम ओन बोरे हिल्वागा ओयुंदु. येसु अद देय्यमतुन ओनागटाल पेय्सि होनालय हुकुम हीतोर. ओर येसुन हूळसि, “ए अन्निटकन्ना पेद्दा पेनदा मर्रि येसु, नावातोनि नीकु बतल गावाले? नना नीकुन विनंति कींतन, नाकुन तकलिप कियमा,” इंचि जोरसे वरगेयसि ओना मुन्ने अरतोर.
30 येसु ओन, “नीवा पोर्रोल बतल?” इंचि पूसकितोर. ओनकु वेल्लेने देय्याल्कु पीसि मत्ताहाटीं, सैनम इंचि इत्तोर. 31 पजा देय्याल्कु येसुनतोनि, “माकुन नरकमता लोतु जेगाते होनना हुकुम हियमा,” इंचि बच्चोरो विनंति कीतां.
32 अगा गुट्टापोर्रो वेल्लेने पद्दीं मेय्सेक मत्तां, “माकुन अव पद्दीना लोप्पो लोहचिम,” इंचि देय्याल्क येसुन विनंति कीतां, अस्के येसु अवुन पद्दीना लोप्पो होना हीतोर. 33 अस्के देय्याल्कु मनकना लोप्पोटाल पेय्सतां आनि पद्दीने होंचि होळियतां. अस्के बोत्तिगा पद्दीं गुट्टा पोर्रोटाल डोलसेक होंचि सेरवुने अरसि मुळगिसि हासि होत्तां. 34 पजा पद्दीं मेहानोर इल्हा आतद हूळतुर, हूळसि वित्सि होंचि गिरासा सहरते आनि पक्का पीसि मत्ता नाह्कुने इद पोल्लेतुन वेहातुर. 35 बतल आता इंचि हूळालय अगाटा लोकुल्क येसुनगा वातुर. वासि हूळतस्के, देय्याल्कुनाल इळबडता मनकल येसुना काल्कुनगा उदिस मत्तोर. ओर बेस कपडिं केरसि, बेस तेल्विते मत्तोर. अदुन हूळसि नाटेनोर वेरियतुर. 36 येसुना कबाह्कुन हूळतोर अगा बोरय्ते मत्तुरो ओर, देय्याल्कु पीता मनकल बल्हा बेस आतोर इंचि लोकुल्कुंक वेहतुर. 37 अस्के गिरासेनि एरियाता अंटोर लोकुल्कु बागा वेरियतुर, वेरियसि, “निमे मावगाटाल पेय्स होन,” इंचि येसुन विनंति कीतुर. अदुनहाटीं येसु आनि ओना सिस्युल्क होनालय डोंगाते उदतुर. 38 उदता पजा, देय्याल्कुनाल बेस आता मनकल, “नाकुन नीवातोनि ओम गुरु,” इंचि येसुन विनंति कीतोर. गानि येसु ओन इल्हा इंचि मल्हाचि लोहतोर, 39 “निमे लोन होन आनि नीवाहाटीं पेन बतल कीता अद वेहा,” इंचि इत्तोर. अस्के ओर मल्सि होंचि, येसु ओनाहाटीं बतल-बतल कीतोरो अव अन्नि सहरते अंटुर्क वेहाचेके तिरियतोर.
येसु हासोत्ता पेगिटुन जीवा अरहंतोर आनि बिमार मुरतटुन बेस कींतोर
40 पजा येसु गालिल एरियाते मल्सि वातस्के ओन एदुर हूळसेक मत्तोर अंटोर लोकुल्क कुसिते ओन्क कलियतुर. 41 अच्चोटेने दर्मसास्त्रम कराहना लोता अदिकारि याईर इननोर अगा वातोर. ओर येसुना काल्कुनपोर्रो अरसि, “नावा लोन वा,” इंचि विनंति कीतोर. 42 बारित्ते ओन्क पन्नेंड वर्सानद उंदे मियड मत्ता, अद हायनाल आसि मत्ता.
अदुनहाटीं येसु आ अदिकारिनतोनि होनानेंके अगा बागा गर्दि मत्ताहेंके लोकुल्कु दोब्बें-नूकें कीसेक मत्तुर. 43 अगा गर्दिते उंदि मुरतळ मत्ता, दानकु पन्नेंड वर्सानाल कपडि होनुंदु. दानां पूरा कोत्तां मत्तु हियानोर्कुंक हीसि-हीसि महत्ताb गानि दान बोरे बेस किया परा हिल्लुर. 44 अद मुरतळ येसुना पज्जो वासि पलाते आसि मत्ताहेंके सिराप ओना कपडिता अंचुन इटता. इटता पजाने दाना कपडि होनमड बंद आता. 45 अस्के येसु, “नाकुन बोर इटतुर?” इंचि पूसकीतोर. अगा मत्तुर अंटोर, “नना आयोन, नना आयोन,” इंचि इनानेंके पत्रु इत्तोर, “अंटोर नीवा सुट्टु आसि दोब्बें-नूकें कीसंतुर गुरु, बोरन्ना दल्गिस मनानुर,” इंचि इत्तोर.
46 गानि येसु इत्तोर, “आयो, बोरो नाकुन बेस आयानाहाटीं इटतोर. बारित्ते, ना लोप्पोटाल सक्ति पेय्सि बोनो बेस कीताप नाकु अनपिस्ता.” 47 पजा अद मुरतळ, “नना इटतद एरपाट कीतोर,” इंचि वेर्रेक वनकुसेके वासि ओना काल्कुना पोर्रो अर्ता. आनि अगा अंटोर लोकुल्कुन मुन्ने अद येसुन बारि इट्ता आनि बल्हा बिराना बेस आता इंचि वेहता. 48 अस्के येसु दान, “बाई! निमे विस्वासम कीताहेंकेन बेस आतिन, कुसिते होन,” इंचि इत्तोर.
49 येसु इल्हा इंचेके मनेंकेने दर्मसास्त्रम कराहना लोता अदिकारिना लोताल बोरो वरोर वासि, “नीवा मियळ हाता, गुरुन लोन ओयालय तकलिप कीसि इंका बाता पाय्दा हिल्ले,” इंचि अदिकारिन इत्तोर.
50 अस्के येसु अदुन केंजसि आ अदिकारिन, “निमे वेरियमा, नावापोर्रो विस्वासम इरा! अद पिसंता,” इंचि इत्तोर.
51 येसु ओना लोन वातोर, वासि पेगिळ मत्ता अर्राते बोर्कुने होळया हियवा, सिराप पत्रुन, योहानुन, याकोबुन आनि पेगिटा तल्लुर-बाबोन पीसि लोप्पो होळियतोर. 52 अंटोर पेगिटाहाटीं अळसेक, मोतकुंचेके मत्तुर. गानि येसु ओर्कुन, “अळमट! अद हाया हिल्ले, निद्रतेन मंता,” इंचि इत्तोर.
53 अद पेगिळ हाता इंचि ओर अंटुर्क एरपाट मत्ता. अदुनहाटीं येसु इत्ता पोल्ले केंजसि ओर कवतुर. 54 पजा येसु आ पेगिटा कय पीसि, “पेगिटुना, तेदा!” इंचि केयतोर. 55 अस्केन दाना जीवा मल्सि वाता आनि अद पेगिळ बिराना तेदिस उदता. पजा दान्कु तिनालय बतलाना हीम्टु इंचि येसु वेहतोर. 56 अद हूळसि, दाना तल्लुर-बाबो इचंत्रम आतुर. गानि, “इगे आता पोल्लेतुन बोर्के वेहमटु,” इंचि येसु ओर्कु हुकुम हीतोर.