येसु ओना पन्नेंड सिस्युल्कुन सेवाताहाटीं लोहतोर
9
1 येसु ओना पन्नेंड मंदि सिस्युल्कुन वेरे-वेरे जेगानाल उंदगा केयतोर. केयसि ओर्क अन्नि देय्याल्कुन पेच्हानद, बिमारकुन बेस कियना ताकत आनि अदिकारम हीतोर. 2 पजा येसु ओर्कुन, पेंनदा राज्येम बारेमते बेसता कबुर वेहालय आनि बिमारतोर्कुन बेस कियालय लोहतोर.3 ओर्कुन लोहनेंके इत्तोर, “मिमेट सेवा कियालय होननेंके मीवातोनि दुड्डु, जोरा, गाटो, कोत्तां आनि एक्कोतव अंगिं ओयमट. 4 उंदि नाटे होत्तस्के मीकुन बद लोते अय्ते केयांतुरो, अद नार होळसनदाका अदे लोते मंटु. 5 बद नाटेना लोकुल्कु मीकुन मना हियुरो, अद नाटेनाल पेय्सनेंके ओर कीता तप्पुन हुप्सालय उंदि गवाइ लेह्का मननाहाटीं, मिमेट मीवा काल्कुना दुम्मु दुल्पिसी पेय्सट” इंचि वेहतोर.
6 अस्के ओर अगटाल पेय्सि, नार-नार बेसता कबुर वेहासेके, बिमारतोर्कुन बेस कीसेके होत्तुर.
हेरोद राजाल येसुना बारेमते विचारमते अरतोर
7-8 पजा गालिल एरियाता हेरोद राजाल, बस्के अय्ते येसु कियना कबाह्कुना बारेमते केंजतोरो अस्के बतल जर्गसंता ओन्कु बतले तेळिया हिल्ले. बारित्ते इच्चुर लोकुल्क, “योहान हातोरा लोप्पोटाल मर्रा तेदतोर,” इंचि इनुंदुर. इंका इच्चुर लोकुल्क, “एलियाल इनना पेनदा कबुरतोर मर्रा वातोर,” इंचि इनुंदुर आनि इच्चुर लोकुल्क बारे, “एनकटा पेनदा कबुरतोरा लोप्पोटाल बोरो वरोर जीवा अरतोर,” इंचि इनुंदुर.
9 गानि, “नना अय्ते योहानुना तल्ला नेम्हतन, इंदके इसोंटा पोल्लें केंजसेक मंतन, अय्ते ईर बोर आंदुर?” इंचि हेरोद राजाल ओन हूळाना विचारम कीतोर.
हेय्युं वेय्कुंकन्ना एक्को मंदिक येसु गाटो हींतोर
10 पजा प्रेरितुल्क मल्सि वातस्के ओर बतल-बतल कीतुर अव अन्नि येसुंक वेहतुर. वेहतस्के, येसु ओर्कुन लोकुल्कुनाल अलग कीसि बोर्के तेळियाकुंटा बेतसेदा इनना सहर पीसि ओतोर. 11 गानि येसु बगा मंतोर इंचि लोकुल्कुंक तेळियता, अस्के ओर ओन दोर्काबेटसि ओना पज्जो होत्तुर. अय्ते येसु कुसिते ओरतोनि कलियतोर आनि पेनदा राज्येमता बारेमते ओर्क वेहतोर. आनि ओरागटाल बोर्क बेस आयनद मत्ता ओर्कुन बेस कीतोर.
12 पोळदु होनना वेलाते पन्नेंडु सिस्युल्कु येसुनगा वासि, “मनम नाटेनाल वेल्लेन लक्कु मंतोम, अदुनहाटीं लोकुल्कुन लोहचिम, ओर दग्गेरे नाह्कुने आनि नेलिने होंचि तिनालय गाटो आनि मींडालय जेगा दोर्किचकुंतुर,” इंचि वेहातुर.
13 अस्के येसु ओर्कुन, “मिमेटे बतलन्ना ओर्क तिनालय हीम्ट,” इंचि इत्तोर. ओर इत्तुर, “महगा सिराप हेय्युं हारिं आनि रोंडु जिम्मां मंतां, अवुन तप्पा बतले हिल्लें. मोमोट होंचि ई अंटोर लोकुल्कुनाहाटीं गाटो असिसि तायना इंचि निमे इंचेकेना?” इंचि इत्तुर. 14 अगा दगेर-दगेरा हेय्यूं वेय्कुना मंदि मांडसा मत्तुर. गानि येसु सिस्युल्कुनतोनि, “ओर्कुन एबै-एबै मंदि कीसि उपसट,” इंचि इत्तोर.
15 ओर अल्हे कीतुर आनि ओर अंटुर्कुन उपिस्तुर. 16 पजा येसु हेय्यूं हारिं आनि रोंडु जिम्मां पीतोर, आनि स्वर्गमताहेके हूळसि पेनदुक दन्यवाद कीसि अवुन तुकडां कीतोर. अल्हा कीसि, “इवुन लोकुल्कुंक हीम्ट,” इंचि सिस्युल्कुंक वेहतोर. 17 लोकुल्कुंक हीतस्के, ओर पीरनिंडा तित्तुर. आनि मिगुल्ता तुकडां जमा कीते अव पन्नेंड तट्टां निंडुतां.
येसुए किरिस्तु आंदुर
18 उंदि रोज येसु वरोरे पारतना कीसेक मननेंके, ओना सिस्युल्कुगुडा ओनतोनि मत्तुर. येसु ओर्कुन, “नना बोन आंदुन इंचि लोकुल्कु इंतुर?” इंचि पूसकीतोर. 19 पूस कीतस्के, “इच्चुर बारे नीकुन बापतिस्मा हियना योहानल, इच्चुर बारे एलियाल आनि इच्चुर बारे एनकटा पेनदा कबुरतोरा लोप्पोटाल बोरो वरोर जीवा अरतोर,” इंचि इंतुर. 20 “गानि मिमेट बतल इंतिर?” इंचि येसु सिस्युल्कुन मर्रा पूसकीतोर. अस्के, “निमे पेन लोहता पिसागोटनोन किरिस्तुन आंदिन,” इंचि पत्रु इत्तोर.
21 अस्के पत्रुना पोल्लेतुन केंजसि येसु, “नना किरिस्तुन इंचि बोर्के वेहमट,” इंचि ओर्क गट्टिगा हुकुम हीतोर.
येसु ओना हामुरता बारेमते वेहांतोर
22 पजा ओरतोनि, “मनकना पीटे पुटतोंक इत्ते नाकु, तीरातव वेल्लेन तकलिप्कु आयना मंता आनि यहुदि पेद्दल्क, पेरमालोर्क, दर्मसास्त्रम कराहना गुरुल्क ईर नाकुन हय्साकोंटा आयानुर, हव्कानुर. गानि नना हासि मूड रोजकुंक मर्रा जीवाते तेदंतन,” इंचि इत्तोर.
23 पजा ओर अंटोर लोकुल्कुन, “नावा पज्जो बोरय्ते वांतन इंतोरो, ओर ओना इस्टाल्क होळसि, रोज नावाहाटीं तकलिप अर्राना तयारते नावा पज्जो ताका पींता. 24 बोर ओना जीवातुन पिसागोटालय हूळंतोर, ओर ओना जीवातुन पोगोट्कुंतोर, ओन्कु बस्केळक पिस्सना पिसवर दोर्को गानि नावाहाटीं बोरय्ते जीवा हींतोर, ओन्कु बस्केळक पिस्सना पिसवर दोर्कंता. 25 दुनियातां अन्नि तीरुकुना सुकम दोर्किस गुडा, ओना जीवातुन पोळागोट्कुते बता पायदा? 26 बोर नाकुन आनि नावा पोल्लेन वेहालय पज्जो-मुन्ने कींतोर, मनकंक पुटतोर बस्के अय्ते ओना महिमाaते, ओना बाना महिमाते आनि पवित्र पेनदा दूताना महिमाते वायानुर, अस्के असोंटा मनकन नावोर इनालय पज्जो-मुन्ने कियानुर. 27 गानि, नना मीकु निजम वेहांतन, इगे नित्तिसि मननोरा लोप्पोटाल इच्चुर इल्हा मंतुर, ओर हायाका मुन्नेने पेनदा राज्येमतुन हूळंतुर,” इंचि वेहतोर.
मूसाल आनि एलियाल येसुनतोनि दिसमळ
28 येसु इव पोल्लें वेहचि एनमिदि रोजकु आता पजा, पत्रुन, योहानुन, याकोबुन ईरकुन पीसि गुट्टापोर्रो पारतना कियालय होत्तोर. 29 ओर पारतना कियनेंके ओना मोकम मारियता आनि ओना कपडीं तेल्लगा आसि मेरसालय दल्गतां. 30-31 अस्के अचानक, येसुनगा मूसाल आनि एलियालb महिमाcते वासि, येसुना हामुर येरुसलेमते बल्हा पूरा आंता, इंचि वळकसेके मत्तुर. 32 पत्रु आनि ओना दंटातुर निद्रा होंचि मत्तुर. पजा ओर निद्रताल तेदतस्के येसुना महिमातुन हूळतुर आनि ओनतोनि ओर इव्वुर मनकलोर नित्तिस मत्तद इंका हूळतुर. 33 गळसेम मत्तारिते मूसाल आनि एलियाल येसुनगाटाल होननेंके पत्रु येसुन, “सामि, मनम इगे मनमळ बेस मंता. अय्ते मनम मूड डेरां वाटकोम. उंदि नीवाहाटीं, उंदि मूसानाहाटीं आनि इंकुंदि बारे एलियानाहाटीं,” इंचि इत्तोर. (ओर ई पोल्लें वळकनेंके विचारम कियाकोंटेन वळकतोर.) 34 ओर ई पोल्लें वळकसेकेन मत्तोर उंदि मब्बु तेर्पे वासि ओर्कुन मुचका होत्ता, अस्के ओर मुव्वुर वेरियतुर. 35 आनि ओर्कु मब्बुनाल, “ईर नावा मर्रि आंदुर, ईन नना पेर्कुत्तन, ईनां केंजट,” इंचि पेनदा अल्किर केंजा वाता. 36 अद अल्किर मारतस्के ओर्क अगा येसु वरोरे दिसतोर. अगा हूळतद आ वेलाते ओर बोर्के वेहा हिल्लुर.
देय्यम पीतोन येसु बेस कीतोर
37 इंकुंदि रोज ओर गुट्टा पोर्रोटाल हिळु रेयतुर, अस्के वेल्लेन लोकुल्क येसुंक कलियालय वातुर. 38 अस्के आ मंदिताल वरोर मनकल जोरते वरगेयसि, “गुरु, नना नीवा काल्क मोळ्कंतन, नावा मर्रिन पोर्रो दया कीम, नाकु ओर वरोरे मर्रि आंदुर. 39 ओनपोर्रो देय्यम अरंता, अस्के ओर बागा वरगेयंतोर, आनि ओना तोडदाल पोंगुर पेय्सानाल ओन तेल्हंता, अद ओन बस्केने होळ्सो, तकलिप कीसेकेने मनंता. 40 अदुन गेदमालय नना नीवा सिस्युल्कुंक विनंति कीतन, गानि ओरतोनि आया परा हिल्ले,” इंचि इत्तोर.
41 अस्के येसु ओर्कुन, “अरे विस्वासम हिल्वोर आनि गलत विचारम कियना लोकुरिटा, नना बदवेरदाका मीवातोनि मंदकन? इंका बच्चुं रोजकु सहन कीकन? नीवा मर्रिन इगे पीसि वा,” इंचि आ मनकन इत्तोर. 42 आ पेडल येसुनेके वायानेंकेने देय्यम ओन हिळु अराहता आनि तेल्हता. अस्के येसु आ देय्यमतुन गद्दरिचतोर आनि पेडन बेस कीसि ओना बाबांकु अप्पजेपतोर. 43 अस्के अंटोर लोकुल्क पेनदा ताकततुन हूळसि इचंत्रम आतुर.
येसु ओना हामुरता बारेमते वेहतोर
येसु बतल अय्ते कीतोरो अद हूळसि अंटोर लोकुल्क इचंत्रमते मननेंके येसु ओना सिस्युल्कुन इत्तोर. 44 “इंदके नना मीकु बतलय्ते वेहांतनो, अव पोल्लेन मिमेट बेस केंजट. मनकंक पुटतोन नाकुन, पगातोरा कयदे पीसि हियानद मंता,” इत्तोर. 45 गानि अद पोल्ले ओना सिस्युल्कुंक तेळिया हिल्ले. अद पोल्ले ओर्क तेळियामन्नि इंचि मक्किचि मत्ता. आनि अद पोल्लेता बारेमते ओन पूस कियालयगुडा ओर वेरियुंदुर.
अंटुर्कन्ना पेद्दा बोर?
46 पजा सिस्युल्कु, “मना लोप्पो अंटुर्कन्ना पेद्दा बोर?” इदुना बारेमते लोल्लीं कियालय दल्गतुर. 47 गानि येसु ओरा मनसुना विचारमतुन एरपाट कीतोर. कीसि वरोर सिन्ना पेडन केयसि ओना दग्गेर निल्हातोर. 48 निल्हाचि येसु ओर्कुन, “बोरय्ते ई सिना पेडनसंटोन नावा पोर्रोलते स्वीकार कींतोर ओर नाकुन स्वीकार कींतोर. अल्हेने बोरय्ते नाकुन स्वीकार कींतोर ओर नाकुन लोहता पेनदुन इंका स्वीकार कींतोर. अदुनहाटीं बोरय्ते मीवा लोप्पो अंटुर्कन्ना सिन्ना मंतोर, ओरे अंटुर्कन्ना पेद्दोड आंदुर,” इंचि इत्तोर.d
मीकु विरोद कियवोर मीवोर आंद
49 अस्के योहान, “गुरु, नीवा पोर्रोलते देय्याल्कुन पेचहानेंके मोमोट वरोन हूळतोम. ओर मावालेसीं नीवा पज्जो ताकानोर आयोर, अदुनहाटीं ओन अल्हा िकयमा इंचि आपतोम,” इंचि इत्तोर. 50 इत्तस्के येसु योहानुन, “ओन आपमट, बारित्ते बोरय्ते मीक विरोदमते हिल्लोर, ओर मीवोरे आंदुर,” इंचि वेहतोर.
सामरिया सहरते येसुंक कदर दोर्को
51 येसु स्वर्गमते होनना रोजकु दग्गेरे वासेक मत्तां. अदुनहाटीं ओर येरुसलेम होनालय गट्टी निरनायम कीतोर. 52 ओर पेय्सका मुन्ने ओना कबुरतोर्कुन लोहतोर. ओर ओन्कु जेगा तयार कियालय सामरि जातितोरा उंदि नाटे एवतुर. 53 गानि येसु येरुसलेम होनालय पेय्सतोर इंचि सामरि जातिता लोकुल्कु ओन अगा आगा हिया हिल्लुर.e
54 ओर्कुन अगा आगा हिया हिल्लुर अय्ते ओना सिस्युल्कु याकोब आनि योहान, “सामि! ओर्कुन हव्कालय, मब्बुनाल तडमि अर्रि इंचि मोमोट हुकुम हीकोम, इल्हा नीवा विचारम मंताना?” इंचि इत्तुर. 55 अस्के येसु ओरेके तिरियसि ओर्कुन तेरहतोर.f 56 पजा ओर अगटाल वेरे नाटे होत्तुर.
येसुना पज्जो ताकमळ
57 ओर हरपीसि ताकसेक मननेंके बोरो वरोर येसुन, “निमे बगा-बगा दांतिनो, अगा-अगा नना नीवा पज्जो वांतन,” इंचि इत्तोर. 58 अस्के येसु ओन, “नक्कांक मनालय सोर्रें मनंतां आनि पिट्टेंक मनालय गूडां मनंतां, गानि मनकंक पुटतोन नाकु मात्रम तल्ला इर्रालयगुडा जागा हिल्ले,” इत्तोर.
59 पजा येसु इंकावरोन, “नावा पज्जो वा” इत्तोर. गानि ओर, “सामि, मुन्ने नाकुन लोन होना हीम, नावा बाबाल हासोत्तस्के ओन बोंदा दोसि वांतन,” इंचि इत्तोर. 60 अस्के येसु ओनतोनि, “हातोर्कुन हातोरे बोंदा दोसिरकांटी, निमे मात्रम पेनदा राज्येमता कबुर वेहा,” इंचि इत्तोर.