येसु डेब्बै रोंड सिस्युल्कुन सेवाहाटीं लोहातोर
10
1 इद आता पजा, येसु इंका डेब्बै रोंड मंदि सिस्युल्कुन पेरतोर. पेरसि, बव नाह्कुने अय्ते ओन्के होनना मत्ता अव नाह्कुने ओना सिस्युल्कुन इव्वुर-इव्वुरकुन कीसि मुन्ने लोहातोर. 2 ओर्कुन लोहानेंके इल्हा वेहातोर, “पंटा वेल्लेने पंडुता गानि बूतिनोर तक्को मंतुर. अदुनहाटीं पंटाता मालकुंक बूतिनोर्कुन पंटा कोयालय लोहा इंचि विनंति कीम्टु.a 3 मिमेट होंट! तोडेल्लिना मंदाते गोर्रे पोरीह्कुन लोहताप नना मीकुन लोहासेक मंतन.b 4 मीवातोनि कोत्ताना संचि, जोरा आनि हेरपुह्क पियमट. आनि हर्रि पीसि होननेंके बोरन्ना कलियते ओरतोनि वेल्लेनजेप वळकसेके मनमट.c 5 बोनदन्ना लोन होतस्के, मुन्ने मिमेट ‘इद लोतुक सांति दोर्कि’ इंचि इंटु. 6 अद लोते सांति गावाले इनना मनकल मत्ते अद सांति ओनगा दांता, गानि अगा गिंटा सांति गावाले इनना मनकल हिलाकुंटे अद सांति मिहगा मल्सि वांता. 7 मिमेट बद लोन दांतिरो अद लोतुर बतल हीते अदे तिंचेक-उंचेक अदे लोते मंटु. बारित्ते कबळ कियानोंकु बूति दोर्कंता. अलग-अलग लोह्कुने मनमट. 8 मिमेट बद सहरते दांतिरो, अद सहरतोर मीकुन बेस मान-मरयादा कीते, ओर मीक बतल तिनालय हींतुर अदे तिंटु. 9 अगाटा बिमारतोर्कुन बेस किम्टु आनि ‘लोकुल्कुनपोर्रो पेन राज्येम कियना वेला दग्गेर्क एवता’ इंचि ओर्क वेहाट. 10-11 गानि मिमेट बदन्ना सहरते होतस्के ओर मीकुन बेस मान-मरयादा कियाकुंटे, अगाटा हरकुने होंचि, ‘मिमेट माकु मरयादा कियुवा विरोदमते, मावा काल्कुंक अंटता मीवा सहरता दुब्बागुडा मोमोट इगेन दुल्पसंतोम. अय्नागानि इद मतिते इराटु, लोकुल्कुनपोर्रो पेन राज्येम कियना वेला दगेर्क एवता,’ इंचि ओर्क वेहाट. 12 नना मीकु वेहांतन, सदोम सहरतोर्कुन ओरां कराब कबह्कुनाहाटीं पेन ओर्कुन बल्हा नासडेम कीतानो,d दानकन्ना एक्को आ नाटेना लोकुल्कुंक सिक्सा आयार,” इंचि येसु ओर्क वेहतोर.येसुना पोल्लें केंजवोरा नाह्कु
13 येसु मर्रा इत्तोर, “ए कोरजिना आनि बेतसेदा नाटेना लोकुरिटा! मीक सिक्सा तप्पो. बारित्ते, मिहगा बव अदबूतामाता कबाह्क कीतन, अवे गिंटा सूर आनि सिदोन नाह्कुने कीसि मत्ते, ओर बस्केनो पापमताल मनसु मार्सकुत्तुर इंचि पोतां-कपडीं हुटकुंचि, बूळदिते उदसिe मन्नेर. 14 गानि न्यायम जर्गना रोजुने पेन सूर आनि सिदोन इव नाह्कुंकन्ना एक्को मीक सिक्सा हिय्यार. 15 ए कपरनाहूम नाटेना लोकुरिटा! मिमेट स्वर्गमते दांतोम इनकुंचंतिरा? होन्निर, मिमेट नरकमते दांतिट.”
16 “सिस्युल्कुनिटा! बोर मीवा पोल्लें केंजंतोरो, ओर नावा पोल्लें केंजंतोर. आनि बोर मीकुन हय्सोर ओर नाकुन हय्सोर. आनि नाकुन हय्स्वोर नाकुन लोहता पेनदुनगुडा हय्सोर,” इंचि येसु वेहातोर.
येसुना सिस्युल्कु कूस आंतुर
17 पजा, येसु लोहता डेब्बै रोंडु मंदि सिस्युल्कु वेल्लेन कुसिते मल्सि वातुर. वासि येसुंक, “सामि, नीवा पोर्रोल्ते देय्याल्कगुडा मावा पोल्लेतुन केंजतां,” इंचि वेहतुर. 18 अस्के येसु ओर्कु, “नना पेद्दा देय्यमतुन मब्बुनाल पिळगुनलेसीं अर्रनेंके हूळतन. 19 केंजट, नना मीकु तरासकु, मिच्चोन जारानद आनि पगातोरा पूरा बलमतुन गेल्सानद अदिकारम हीतन. मीकुन बोरे नुकसान किया पर्रुर. 20 अय्ना मीवा पोल्ले देय्याल्कु केंजतां इंचि कुस आयमट, गानि मीवा पोर्रोल स्वर्गमते राससि मंता इंचि कुस आंटु,” इंचि वेहतोर.
येसु पेनबाबांक दन्यवाद कींतोर
21 अस्केने येसु पवित्र आत्माते निंडिसि कूस आसि इल्हा इत्तोर: “ए बाबा, स्वर्गम आनि बूमितुन पुटिस्ता सामि, नना नीकुन तल्सुकुंतन. बारित्ते निमे ई पोल्लेन, ‘मोमोट उसारतोर्कुम, बुद्दि मत्तोर्कुम,’ इंचि वेहकुनानोर्र्कुंक हूप्सा हिल्लिन गानि पिलाल्कुंकf हूपिस्तिन. निजमे बाबा, नीवा विचारम इल्हे कियानद मत्ता,” इंचि इत्तोर.
22 पजा “नावा बाबाल अन्नि नावा कयदे हीतोर. मर्रि बोर आंदुर इंचि बाबांक तप्पा बोर्के तेळियो. आनि बाबाल बोर आंदुर इंचि मर्रिंक तेळियंता. आनि मर्रि बोर्कुनय्ते बाबान हूप्सालय पेरतोर ओर्कु तेळियंता,” इंचि इत्तोर.
23 पजा ओर सिस्युल्कुनहेके तिरियसि बोर्के तेळियाकुंटा, “मिमेट हूळानवुन हूळाना कळकु वेल्लेन नसिबतव. 24 बारित्ते नना मीकु वेहांतन, वेल्लेटुर पेनदा कबुरतोर्कुंक आनि राजालोर्कुंक मिमेट हूळाना कबाह्कुन हूळाना इच्चा मत्ता, गानि ओर हूळा परा हिल्लुर. इंका मिमेट केंजना पोल्लेन केंजाना इच्चा मत्ता, गानि ओर केंजा परा हिल्लुर,” इंचि इत्तोर.
25 उंदि रोजु, मूसाना नियम एक्को तेळियता वरोर गुरु नितुतोर. नित्तिसि येसुना परिक्सा हूळानाहाटीं, “गुरु, बस्केळक पिसना पिसवर गावाले इत्ते नना बतल कीकन?” इंचि पूसकीतोर. 26 अस्के येसु ओन, “मूसाना नियमते बतल राससि मंता? दानहेंदाल नीकु बतल तेळियता?” इंचि इत्तोर. 27 इत्तस्के आ गुरु, “निमे सािम इनना पेनदुन, नीवा पूरा मनसुनाल, पूरा आत्माताल, पूरा ताकतताल आनि पूरा बुद्दिताल पावरम कीम. अल्हेने नीवा पोर्रो निमे बचोन पावरम कींतिनो अचोने पावरम नीवा पक्कातोर पोर्रो कीम. इल्हा राससि मंता,” इंचि जवाब हीतोर. 28 अस्के येसु ओन, “निमे बरोबर वेहतिन, अल्हेन निमेगुडा कीम, अस्के नीकु बस्केळक पिसना पिसवर दोर्कंता,” इंचि इत्तोर. 29 ओर, नना सत्तेमंतुन इंचि हूप्सालय, “नावा पक्कातोर इत्ते बोर आंदुर?” इंचि येसुन पूसकीतोर.
सामरि जातिता मनकना वेसोडि
30 अल्हा पूस कीतस्के येसु ओन्कु उंदि वेसुड वेहातोर: “वरोर मनकल येरुसलेम सहरताल यरिहो इनना नार होंचेके मत्तोर. होननेंके नड्डुम हरदे ओन दोंगल्कु पीतुर. ओर ओनगा मत्ता सामानतुन इग्गुकुत्तुर, कपडीं तेंडकुत्तुर. पजा ओन पक्का तंचि, डुक-डुक जीवा मननेंके होळसि होत्तुर.”
31 “पजा बतल आता इत्ते, अदे हरिपीसि वरोर पेर्माल होंचेक मत्तोर. आ पेर्माल हिळु अरसि मत्ता मनकन हूळतोर आनि होरियसि होत्तोर. 32 ओर होतस्के वरोर लेविg जातिता मनकल अदे हर्रि पीसि वातोर. ओर इंका हिळु अरसि मत्ता मनकन हूळतोर आनि होरियसि होत्तोर. 33 ओर होत्ता पजा, अदे हर्रि पीसि वरोर सामरि जातिता मनकलh अगा एवतोर. एवतस्के हिळु अरसि मत्ता मनकन हूळसि ओनकु इरगा जीवा नोता. 34 ओर ओनगा वातोर, वासि ओन्कु देब्बां आतगा, अवुन पोर्रो निय आनि अंगुर पंडिना पानकमi होकसि पट्टी दोहातोर. दोहता पजा, आ सामरि मनकल हिळु अरसि मत्ता मनकन ओना गाड्दी पोर्रो वाटसि, उंदि लॉजुने ओसि ओन बेस हूळकुत्तोर. 35 इंकुंदि रोज लॉजता मालकुंक रोंडु एंडि कोत्तां हीसि, ईन बेस हूळा, ईनाहाटीं एक्को कोत्तां कर्स आयानय्ते, नना मल्सि वातस्के अव नीकु हींतन इत्तोर.”
36 पजा येसु ओन, “दोंगाल्कुन कयदे देब्बां तित्ता मनकंक मुव्वुर मनकलोर कलियतुर. आ मुव्वुर लोप्पो नीवा विचारमते ओना पक्कातोर बोर आंदुर?” इंचि पूसकीतोर. 37 अस्के आ गुरु, “बोरय्ते ओन हूळसि ओन्कु सहायम कीतोर ओरे,” इंचि इत्तोर.
अस्के येसु ओन, “होन, ओर कीताप निमेगुडा कीम,” इंचि इत्तोर.
मरियम आनि मार्ता
38 पजा येसु आनि ओना सिस्युल्कु हर्रि पीसि होननेंके, उंदि नाटेनगा एवतुर. अगा उंदि मार्ता इनना मुरतळ मत्ता. अद येसुन दाना लोन ओसि बेस हूळकुत्ता. 39 दान्कु मरियम इनना उंदि हेलळ मत्ता. अद सामिना काल्कुनगा उद्दुता आनि ओर वेहना पोल्लें बेस केंजसेक मत्ता. 40 गानि दाना अक्कल मार्तांकु वेरे-वेरे कबाह्क मत्ताहाटीं, पूरा मोता दान पोर्रोने अर्ताप आता. अदुनहाटीं अद येसुनगा वासि, “सामि, नावा हेलळ पूरा कबळ नावा पोर्रोने वाटसि हीता, इद निमे हूळसेके हिल्लिना? नाकु आसर आयालय दानकु वेहा,” इंचि इत्ता.