येसु कराहता पारतना
11
1 उंदि मल्का येसु उंदि जेगाते पारतना कीसेक मत्तोर. पारतना आतंका ओना सिस्युल्कुनाल वरोर सिस्युड ओन, “सामि, योहान ओना सिस्युल्कुंक बल्हा पारतना कियमळ कराहतोरो, अल्हेन निमे माकुगुडा पारतना बल्हा कियमळो करहा,” इंचि इत्तोर.2 अस्के येसु ओर्कुन, “मिमेट पारतना कियनेंके इल्हा इंटु,
“ए स्वर्गमते मनना मावा पेनबाबा,
नीवा पोर्रोल्तुन अंटोर कदर कियिरकांटी.”
“आनि निमेन मावा पोर्रो राज्येम कीम.
3 माकु रोजता तिंडि इय्यालागुडा हीम.”
4 “माकु विरोदमते कीता तप्पुकुन मोमोट बल्हा माप कीतोमो,
अल्हेन निमेगुडा मोमोट कीता तप्पुकुन माप कीम.”
“आनि सेड्डा कबाह्क कियना आसेनाल माकुन कापाडा.”
तल्कते पेन हींता
5-6 पजा येसु ओर्कु इल्हा वेहालय दल्गतोर. “मिवाव्टेटाल बोरो वरोर, मीवा दंटातोनगा नडजाम नर्का होंचि, अरे दादा, नहगा इंदकेन वरोर दंटागाल वातोर. गानि ओन्कु अट्टिस दोसालय नहगा बतले हिल्ले. अदुनहाटीं नाकु इच्चुं पर्रिक बदल हीम, इंचि इत्तोर इन्कुंटु! 7 अस्के आ दंटागाल लोप्पोटाले, नना नावा पिलाल्कुनतोनि मींडसि मंतन, नना तेदते ओरगुडा तेदांतुर, इंका तल्पुगुडा लोप्पोटाल गट्टिगा वाटतन. अदुनहाटीं नना इंदके तेदिस नीकु बतल हिया परोन. नाकुन वट्टिदे परेसान कियमा, इंचि इंतोर. 8 नना मीकु वेहानद बतल इत्ते, आ दंटागाल ‘नावा दंटागाल वातोर,’ इंचि तेदसि ओन्कु पर्रिक हिय्या हिल्लोर. गानि ओना दंटागाल ओन उंदेतीर, हीम-हीम इंचेके बातिमलाडताहाटीं ओर तेदसि ओन्कु गावाले मत्ताचोन पर्रिक तप्पाकोंटा हींतोर. 9 अदुनहाटीं नना मीकु वेहचंतन पेनदुन तल्कसेक मंटु, मीकु हिय्यार. पह्कसेक मंटु, मीकु दोर्कार. तलपुन टोक-टोक कीसेक मंटु, मिवाहाटीं तल्पु तेंडार. 10 बारित्ते तल्कानोर्क अंटोर्क हियमळ जर्गंता. पह्कानोर्क अंटोर्क दोर्कंता. आनि तल्पुन टोक-टोक कियनोनहाटीं तल्पु तेंडमळ जर्गंता. 11-12 मर्रि ओना बाबोन, जिम्मा तल्कते ओन्कु तरास हियानोर,a हिलाकोंटे मेंज तल्कते ओन्कु मिच्चो हियानोर मीवाव्टे बोरन्ना बाबो मंतोरा? हिल्लोर. 13 अय्ते मिमेट सेड्डोर्क आसिगुडा मीवा पिलाल्कुंक मात्रम बेसतद हियमळ तेळियतस्के, स्वर्गमते मनना पेन बाबाल, ओन तल्कानोंक पवित्र आत्मा बच्चोन वेल्ले हियनुर?”
येसुना ताकत पेनदागटाल मंता
14 वरोर मनकन देय्यम पीसि मत्ता. अदुनहाटीं ओर मूकल आसि मत्तोर. पजा येसु आ मनकानाल अद देय्यमतुन पेच्हाचि गेदुमतोर, अस्के आ मूकल वळकालय दल्गतोर. इदुन हूळसि अगा मत्ता अंटोर लोकुल्कुंक वेल्लेन इचंत्रम आता. 15 गानि अव्टेटाल इच्चुर मंदि इनालय आतुर, “बेलजेबुल इनना पेद्दा देय्यमता सहायमतोनि ओर देय्याल्क गेदमंतोर.”
16 इंका इच्चुर मंदि बारे येसु पेनहेंदाल वातोरा हिल्लेना इंचि ओना परिक्सा हूळालय स्वर्गमताल उंदि चिन्ह हूप्सा इत्तुर. 17 ओरा मनसुना विचाराल्कुन एरपाट कीसि येसु ओर्कुन इल्हा इत्तोर, “बदन्ना राज्येमते ओरद ओरके अर्राकोंटे अद राज्येम उंदि रोज पाडासि दांता. अल्हेन उंदि लोते मनानोरा नड्डुम वरोनद वरोंक अर्राकोंटा मत्ते अद लोन इंका उंदि रोज नासडेम आसि दांता. 18 मिमेट इत्तिर गदा, नना बेलजेबुल इनना पेद्दा देय्यमता सहायमतोनि देय्याल्क गेदुमतन इंचि. अल्हा अय्ते देय्यमतोने देय्यमतुन गेदमानय्ते देय्यमता राज्येम बल्हा नित्तिसि मनांता? 19 सरे! नना बेलजेबुल इनना देय्यम सहायमते देय्याल्क गेदमांतन इन्कुंटु. मरि मीवा पोल्लेपोर्रो ताकानोर बोरा सहायमते देय्याल्कुन पेच्हांतुर? अदुनहाटीं मीवा विचाराल्क तप्पुड विचाराल्क इंचि मीवा पोल्लेपोर्रो ताकानोरे मीकु वेहानुर. 20 गानि ओक्कला नना पेनदा सहायमते देय्याल्क पेचाहनय्ते पेन मीवापोर्रो राज्येम कियना वेला दग्गेर्क एवता इत्ताप.”
21 “वरोर ताकतवार मनकल गोर्कां, कसेह्क, तुपाकीं पीसि ओना लोता कावेल कीतेने, ओना लोता लोप्पो मनना अन्नि वस्तुक बेस मनंतां. 22 गानि ओनकन्ना एक्को ताकतवार मनकल वासि ओनतोनि लडाइ कीसि ओन ओळिच्चानय्ते, बव गोर्कां, कसेह्कुन पोर्रो वेल्लेन वर्सानाल बरोसा इरतोर, अवुन अंटावुन इग्गुकुंचि ओनगा मत्ता मालुन दोसकुंतोर. अवुनंता पजा अंटोर्कुंक पंचि हींतोर.”
23 “बोर नावातोनि हिल्लोर ओर नावा विरोदमते मंतोर. आनि बोरय्ते नावातोनि कलियसि कबळ किय्योर ओर नावा विरोदमते कबळ कींतोर.”
24 “देय्यम बस्के अय्ते मनकानाल पलाते अर्रंता, अस्के अद आराम कियालय एर हिल्वा जेगा पह्कंता. गानि दान्कु असंटा जेगा दोर्को. अस्के अद बतल कींता इत्ते, नना होळसि वाता लोन मर्रा तिरियसि दांतन इंता. 25 अद बस्के अय्ते आ लोन तिरियसि वांता, अस्के दान्कु आ लोनु हेय्सि, ऊसताप बेस साप कीसि दिसंता. 26 पजा अद देय्यम अगटाल मल्सि होंचि दानकन्ना एक्को ताकत मत्ता एडूं देय्याल्कुन पीसि वांता, आनि अंटव कलियसि अदे लोते मनालय दल्गंतां. इल्हा आ मनकना परिस्तिती मुन्नेटा परिस्तितिकन्ना एक्को कराब आंता.”
निजम आसिर्वादम
27 पजा बतल आता इत्ते, येसु इव पोल्लें वेहसेकेन मत्तोर, अच्चोटेन अगा मत्ता मंदिताल उंदि मुरतळ लगांचि, “नीकुन कंचि, पाल उहचि, बेरसागोटता आ तल्लुर वेल्लेन आसिर्वादम दोर्कुतद आंदु,” इंचि इत्ता. 28 अस्के येसु, “गानि बोरय्ते पेनदा वचनाल्क केंजसि अवुन पीसि ताकंतोरो ओर एक्को आसिर्वादम दोर्कुतोर आंद,” इंचि इत्तोर.
लोकुल्क चिन्ह तल्कंतुर
29 वेल्लेन लोकुल्क जमा आयानद हूळसि येसु इल्हा वळकालय दल्गतोर: “इद पीळि वेल्लेन पापमते निंडिस मंता. अदुनहाटीं चिन्ह हुप्सा इंचि पूस कीसंतुर. गानि योनाल इनना पेनदा कबुरतोन लोहचि पेन बद चमत्कारम हुपिस्ता अदे चिन्ह हुपुसमळ जर्गंता, दान्कु तप्पा इंका वेरे बद्दे चिन्ह हुपुसमळ जर्गो.b 30 बल्हा योनाल निनवे सहरता लोकुल्कुनाहाटीं चिन्ह आतोर, अल्हेन मनकंक पुटतोन नना ई पीळितोरहाटीं चिन्ह आंतन. 31 सोलोमोन राजाल वेहना बेसता पोल्लें केंजनाहाटीं सीबा देसेमता रानि वेल्लेन लक्कुटाल वाता. अयना सोलोमोन राजांकन्ना पेद्दोड वरोर इग्गे मंतोर. गानि इद पीळिता लोकुल्क मात्रम ओना पोल्लें बोरे केंजसेक हिल्लुर. अदुनहाटीं आकिरता न्यायम जर्गना रोजुने, अद रानि नित्तिसि इद पीळितोरपोर्रो तप्पुक-दोसेल्क दोस्सार. 32 निनवे सहरता लोकुल्क योनाना पोल्लें केंजसि मनसु मार्सकुत्तुर. अदुनहाटीं निनवे सहरता लोकुल्क आकिरता न्यायम जर्गना रोजुने इद पीळिता लोकुल्क तप्पु कीतुर इंचि दोसेम दोस्सानुर. अयना इंदके इग्गे योनांकन्ना पेद्दोड वरोर मंतोर.”
वेळसि आनि वेल्गु
33 “बोरे आयिर, वेडसि अंटिचि दान गुल्ला हिळु मुच्चिसि हिलाकोंटे साटूंक इर्रोर, गानि लोप्पो होळियानोर्क अंटोर्क बेस वेल्गु दिसानाल दीसोडि पोर्रो एत्तुने इर्रांतोर. 34 नीवा कळकु नीवा मेंदुल्कु वेडसिलेह्का आंदुं. नीवा कळकु बेस मत्ते नीवा मेंदुलंता बेस वेल्गु मनंता. ओक्कला नीवा कळकु बेस हिलाकोंटे नीवा मेंदुलंता हीकटे मनंता. 35 अदुनहाटीं नीवा लोप्पो मनना वेल्गु पिरसोन्नाकुंटा बेस कापाडकुन. 36 नीवा पूरा मेंदुल पुरागा वेल्गुने मत्ते, अद वेडसि एल्गुताप बेस एल्गुसेके मनंता आनि गिचचो मेंदुलगुडा हीकटते मन्नो.”
येसु परिसिल्कुनपोर्रो होंग आंतोर
37 इल्हा येसु ओना वळकुमळ मारतस्के वरोर परिसि ओना लोन येसुन गाटो तिनालय केयतोर. अय्ते येसु ओना लोन होंचि लोप्पो होळियसि गाटो तिनालय उदुतोर. 38 येसु यहुदिल्कुना रिवाज परकारम कय्कु नोरसि गाटो तिनालय उद्दा हिल्लोर. अदुन हूळसि आ परिसिंक इचंत्रम आता. 39 आ परिसि मनकना मनसुना विचारमतुन एरपाट कीसि येसु सामि ओन इल्हा इत्तोर, “मिमेट परिसि लोकुल्क गिन्नें-गिलासकु सिराप लोकुल्कुंक दिसालय पलाताल तोमसी साप कींतिर, गानि लोप्पो मात्रम मीवा कराब गुनाल्क, वेल्लेन लालच निंडिस मनंता. 40 अरे बुद्दि तक्को लोकुरिटा! पलाता बाजु तयार कीता पेने लोप्पोटा बाजु तयार कीता. 41 अदुनहाटीं मिहगा बतल अय्ते मंतनो अदुन गरिब लोकुल्कुंक मनसुनाल हीम्ट. अस्के मीवाहाटीं अन्नि बेस आंता. 42 अरे परिसि लोकुरिटा! मीकु तप्पाकोंटा पापम दल्गंता. बारित्ते मिमेट मीवा तोटाते पुटता सांबार, मेती आकिना पंटाता पदि तूसकुनाल उंदि तूसु पेनदुक हींतिर. इच्चोन सिन्ने-सिन्ने पोल्लें मीकु मति मनंतां, गानि निजम न्यायमतुन आनि पेनदा पावरमतुन मात्रम मिमेट मति किय्यिर. पदि तूसकुनाल उंदि तूसु पेनदुक हियमळ इद बेसे. गानि इद कीसेक-कीसेक बव कबाह्क अय्ते तप्पाकोंटा कियगोम, अवगुडा किया पींता. 43 मिमेट दर्मसास्त्रम कराहना लोह्कुने पेद्दा मनकलोर उद्दाना कुर्सिनपोर्रो उद्दानाहाटीं तंलाडसेक मनांतिर. इचोने आयाका हाटुमते आनि हर्कुन पीसि होनानोर अंटोर मीकु नमस्कारम कियना इंचि कोरांतिर. अदुनहाटीं मीकु पेनदा सिक्सा तप्पो. 44 अगा बोंदा मंता इंचि तेळियका लोकुल्कु बोंदातुन जारसेके दांतुर. आ बोंदानसंटा मनकलोर मिमेट आंदिर. अदुनहाटीं मीकु पेनदा सिक्सा तप्पो.”
येसु दर्मसास्त्रम कराहना गुरुल्कुनतोनि वळकंतोर
45 अस्के दर्मसास्त्रम वेल्ले तेळियसि मत्ता वरोर गुरु वासि येसुन, “गुरु, निमे इसोंटा पोल्लें वळकीसि मावदगुडा अपमानम कीसंतिन,” इंचि इत्तोर. 46 अस्के येसु इल्हा वळकालय दल्गतोर. “अरे दर्मसास्त्रम कराहना गुरुल्कुनिटा मीकु पेनदा सिक्सा तप्पो! बारित्ते मिमेट लोकुल्कुनपोर्रो, तेहते तेदा पर्रुवा मोता तासंतिट, गानि मिमेट मात्रम अद मोतातुन तेहालय उंदि वेलुगुडा तासिर.c 47 इंका मिमेट पेनदा कबुरतोराहाटीं गोरीं दोहांतिर. गानि आ पेनदा कबुरतोर्कुन मीवा तादो-बाबुर्के हव्कुतुर. अदुनहाटीं मीकु पेनदा सिक्सा तप्पो. 48 इल्हा कीसि मिमेट मीवा एनकाटोराव्टे आनि ओर कीता कबाह्कुने कलियसि मंतिर इत्ताप हुपिचचंतिर. बारित्ते मीवा एनकाटोर बारे पेनदा कबुरतोर्कुन हव्कुतुर आनि मिमेट बारे ओरा गोरीं दोहचंतिर. 49 अचोने आयका पेन दाना बेस बुद्दिते मीवा बारेमते इल्हा वेहता, नना पेनदा कबुरतोर्कुन आनि प्रेरितुल्कुन ओरगा लोहांतन. अस्के ओर, ओराव्टेटाल इच्चुर्कुन बारे हव्कानुर आनि इच्चुर्कुन बारे इरगा तकलिप कियानुर.”
50 “अस्के बतल आंता इत्ते, इद दुनिया पुटतास्केटाल बच्चोन मंदि पेनदा कबुरतोर हातुरो, ओरा अंटोरा नेत्तुरता हिसाब ई पीळितोराहेंदाल एतमळ जर्गंता. 51 इत्ते आदामुना मर्रि हाबेलुनागटाल अय्ते गुळि आनि मोक्कु हियना गद्दे नड्डुम हव्कीसि पोहता जकरयानगडक. नना मीकु निजम वेहासेक मंतन, ईर अंटोरा नेत्तुरता हिसाब ई पीळिता लोकुल्कुनहेंदाले एतमळ जर्गंता. 52 अरे दर्मसास्त्रम कराहना गुरुल्कुनिटा, मीकु पेनदा सिक्सा तप्पो. बारित्ते लोकुल्कुंक पेनदा बारेमते तेळिया मन्नि इंचि दानहेके होनना हरदुन बंद कीतिर. गानि मिमेट कुद्दु अद हर्रि पीसि होन्निर आनि बोरय्ते होनना कोसिस कींतुर ओर्कुन इंका होना हिय्यिर.”