दर्मसास्त्रम कराहना गुरुल्क आनि परिसिल्कुना होंग
(मरकुस १२:३८-४०; लूका ११:३७-५२; २०:४५-४७)
23
1 सिस्युल्कुन आनि अगाटा मंदितुन हूळसि येसु इत्तोर गदा,
2 “दर्मसास्त्रम कराहना गुरुल्कुंक आनि परिसिल्कुंक मूसाना नियम कराहना हक्कु मंता.
3-4 इंचि सिराप ओर कराहंतुर गानि कराहताप किय्युर.
ओर मनकलोरा हट्टन पोर्रो इरगा वजनय्ते इर्रांतुर गानि आ वजनतुन कांजसि ओयनेंके मात्रम गिचचो आसरा गुडा आयुर.
दानहाटीं ओर मीकु बतल-बतल वेहंतुरो अव अन्नि कीसेके ताकटु,
गानि ओर कीताप मात्रम कियमट.”
5 ओर ओरा कबाह्क लोकुल्क हूळाना इंचि कींतुर.
पेनदा पोल्लेन राससि,
तायतुकुने निहचि पेद्दा-पेद्दा दुम्में ओरा दंडा कयकुंक आनि कप्पर्क दोहकुंतुर.
आनि ओरा कपडीना कोंगुल्कु जिल्लर-जल्लर होळसिंतुर.
लोकुल्क ओर्कुन “सादु” इनागोम इंचि इल्हा कींतुर.a
6 अचोने आय्का मिटिंगुल्कुने आनि दर्मसास्त्रम कराहना लोह्कुने,
पेद्दाल्क उद्दना जेगाते उदमळ इत्ते ओर्कु एक्को इस्टम.
7 हाटुमते,
हरकुन पीसि होनानेंके वायानेंके ओर्कुन नमस्कार कियाना आनि गुरु इंचि केयाना,
इल्हा ओर्कु बेस अनपिचंता.
8 गानि मिमेट मीकुन “गुरु” इंचि इनागोटकुन्मटु.
बारित्ते मिमेट अंटोर तम्मुह्क-दादालोर्क आंदिर.
मीवा अंटोरा गुरु वरोरे.
9 इद बूमिते मिमेट बोने “बाबा” इंचि इनमटु,
बारित्ते स्वर्गमते मनना पेने मीवा बाबाल आंद.
10 अल्हेने मीकुन बोरे “सामि” इंचि केया मन्नि.
बारित्ते मीकु वरोरे सामि मंतोर ओर किरिस्तु आंदुर.
11 गानि बोराय्ते पेनदा मुन्ने अंटोर्कन्ना पेद्दा आयालय हूळांतोर,
ओर अंटोरा सेवा कियानोर आयिर.
12 बोराय्ते,
ओनद ओरे पेद्दा इनकुनानुर,
पेन ओन सिन्ना किय्यार.
अल्हेने बोराय्ते पेनदाहाटीं सिन्ना आसि ताकांतोर,
ओन पेन पेद्दा किय्यार.
13 अरे परिसिल्क आनि दर्मसास्त्रम कराहना गुरुल्कुनिटा!
मिमेट डोंगिर्क आंदिर,
मीकु बच्चोन पेद्दा गोसा वायार,
बारित्ते स्वर्ग राज्येमते होनानुरा हर्रि मिमेट बंद कीतिर.
मिमेट अय्ते होन्निर,
आनि होनानोर्कुन इंका होन्ना हिय्यिर.
14 b(अरे दर्मसास्त्रम कराहना गुरुल्क आनि परिसिल्क,
मीकु एक्को सिक्सा आयार.
मिमेट मुंडामोस्तवना सम्सारम तिंचि मुळाहतिर.
आनि लोकुल्कुंक हुप्सालय वेल्लेने जेप पारतना कीताप डोंग कींतिर.
मिमेट डोंगिर्क आंदिर!
मीकु बच्चोर पेद्दा गोसा वायार.)
15 अरे डोंगि दर्मसास्त्रम कराहना गुरुल्क आनि परिसिल्कुनिटा!
वरोन मीवा मतमते तायालय मिमेट देसे-देसेम तिरीयसि बूमि-मब्बु उंदि कींतिर.
ओर मीवा लोप्पो वातस्के,
मिमेट ओन मीकन्ना एक्को पापमते अराहचि नरकमते लोहंतिट,
दानहाटीं मीकु बच्चोर पेद्दा गोसा वायार.
16 अरे,
हर्रि हुप्संतोम इनना गुड्डिर्कनिटा!
मिमेट इंतिर गदा,
बोराय्ते पेनदा गुळिता ओट्टु तिंतोर,
ओन्कु बतल आयो.
गानि बोराय्ते गुळि लोप्पोटा बंगारमता ओट्टु तिंतोर,
ओन्कु मात्रम आ ओट्टु परकारम ताका पींता,
इंचि इंतिर.
दानहाटीं मीकु बच्चोर पेद्दा गोसा वायार.
17 अरे गुड्डिर!
बद पेद्देद,
बंगारमा बंगारमतुन पवित्र कियना गुळिआ?
18 इंका इल्हा इंतिर गदा,
बोराय्ना पेन गद्देता ओट्टु तिंचि दान परकारम ताकाकुंटे बतल आयो,
गानि पेन गद्दे पोर्रो वाटता उपारमता ओट्टु बोराय्ते तिंतोर,
ओन्कु मात्रम आ ओट्टु परकारम ताका पींता.
19 अरे गुड्डिर्कनिटा!
पेन गद्दे पेद्देदा मरि पेन गद्दे हेंदाल पवित्र आयना दाना पोर्रो वाटता उपारम पेद्देदा?
20 अदुनहेंके बोर पेन गद्देता ओट्टु तिंतोर,
ओर पेन गद्दे पोर्रो मत्ता अन्निटवुना ओट्टु तित्तापे.
21 अल्हेने बोराय्ते गुळिता ओट्टु तिंतोर,
ओर गुळिते मनना पेनदा ओट्टु इंका तिंतोर.
22 आनि बोराय्ते स्वर्गमता ओट्टु तिंतोर,
ओर पेनदा राजगद्दे आनि राजगद्देपोर्रो उदिस मनानोनद इंका ओट्टु तिंतोर.
23 अरे दर्मसास्त्रम कराहना गुरुल्क आनि परिसिल्कुनिटा!
मिमेट जिल्करा,
सोप इसोंटा पंटाताल इंका पदि तुसकुनाल उंदि तूस पेनदुक हींतिर.
गानि न्यायमते तिरियमड,
दया कियमळ,
पेनदापोर्रो विस्वासम इरमड इसोंटव दर्मसास्त्रमता बेसता पोल्लेन मिमेट होळसिंतिर.
इंचि पदि तुसकुनाल उंदि तूस पेनदुक हीसेके मिमेट इव अन्नि पोल्लेन होळसियाकुंटा ताका मत्तिर.
दानहाटीं मीकु बच्चोरो गोसा वायार.
24 हर्रि हुप्संतोम इनना गुड्डिर्कनिटा!
मिमेट नुल्लेतुन बारे वडा पीसि उंटिर गानि लोटापेटातुन बारे हूळवा अल्हे मिंगांतिर.
25 अरे डोंगि दर्मसास्त्रम कराहना गुरुल्क आनि परिसिल्कुनिटा!
मिमेट गिन्नें-गिलासकु सिराप लोकुल्कुंक दिस्सालय पलाताल तोमसी साप कींतिर,
गानि लोप्पो मात्रम मीवा कराब गुनाल्क,
मीवा पापाल्क निंडिस मंतां.
दानहाटीं मीकु बच्चोर गोसा वायार.
26 अरे गुड्डि परिसिल्कुनिटा!
मुन्ने मीवा गिलासकुन लोप्पोटाल तोमसि नोर्राटु,
अस्के अद पलाते इंका बेस दिसंता.
27 अरे दर्मसास्त्रम कराहना गुरुल्क आनि परिसिल्कुनिटा!
मिमेट तेल्लटा सुन्ना होकता गोरीं लेसीं मंतिर.
अव पलाताल हूळालय सक्कगा दिसंतां,
गानि लोप्पो हूळते,
पीनगुना बोक्कां कळियसि होंचि गब्बु पीसि मनंतां.
दानहाटीं मिमेट डोंगिर आंदिर,
मीकु बच्चोर गोसा वायार.
28 अल्हेने मिमेट इंका पलाताल लोकुल्कुंक पक्का सत्तेमतोर लेह्का दिसंतिर.
गानि मीवा पीट लोप्पो नडेह कियना बुद्दि,
पापमता कबाह्क निंडिस मंता.
29 अरे दर्मसास्त्रम कराहना गुरुल्क आनि परिसिल्कुनिटा!
मिमेट मुन्नेटा पेनदा कबुरतोर्कुना आनि सत्तेमतोर्कुना गोरीं दोहचि अवुन सिंगारिचंतिर.
दानहाटीं मिमेट डोंग कियानोर आंदिर,
मीकु बच्चोर गोसा वायार.
30 अल्हा कीसि मिमेट इंतिर,
“मोमोट पेद्दाल्कुना कालमते मंचि मत्ते,
पेनदा कबुरतोर्कुन हव्कानेंके,
ओर्क सायता आया कोन्नेम.”
31 इंका मिमेट इल्हा ओप्कुंतिर गदा,
“मोम्मोट पेनदा कबुरतोर्कुन हव्कतोरा वंसमतोर्कुम आंदूम,”
इंचि.
32 अय्ते मिमेट मीवा पेद्दाल्क सुरुव कीता पापमतुन पूरा कीम्टु.
33 ए तरासकुनसंटोरिटा!
आनि नय तरास पोरिह्कुनसंटोरिटा,
मिमेट नरकमते बल्हा अयना होनमळ तप्पो.
34 केंजट,
नना मीहेके पेनदा कबुरतोर्कुन,
बुद्दि मत्तोर्कुन,
दर्मसास्त्रम कराहना गुरुल्कुन लोहचंतन,
मिमेट ओर इच्चुर्कुन क्रुसुनपोर्रो मोल्लाने कोह्ककिर,
हवकिकीर आनि इच्चुर्कुन मीवा दर्मसास्त्रम कराहना लोहकुने पोट्टेते तनकिर,
तंचि ओर्कुन नाहकुने तिराहकिर.
35 दीनहेंदाल बा मुन्नेटा सत्तेमता लोकुल्कुन हव्कतुर,
ओरा पापमता सिक्सा पूरा मीवापोर्रो अर्रार.
आ लोकुल्क बोर इत्ते,
सत्तेमंतुड मत्ता आबेलना अगटाल अय्ते गुळि आनि पेन गद्देता नड्डुम हव्कुता बर्काना मर्रि जकरयान दाका.
36 नना मीकु निजम वेहचंतन,
इव अन्नि पोल्लें ई पीळिता लोकुल्कुना पोर्रो अर्रंतां.
37 ए येरूसलेम,
येरूसलेम!
निमे पेनदा कबुरतोर्कुन हव्कनादान आंदिन.
आनि निहेके लोहता कबुरतोर पोर्रो निमे बंडां हुकंतिन.
कोर्रु बल्हा दाना पीसेन रेक्कना हिडु ओल्लिचंता,
अल्हेन नना इंका नीवा पिलाल्कुन ओल्लिचंतन,
इंचि बच्चुंगो मल्का नना इनकुत्तन.
गानि नीकु इस्टम मनाहिल्ले.
38 हूळाट,
इंदके पेन मीवा गुळितुन होळसि दांता.
आनि पूरा गुळिअंता बतल हिलाकोंटा आंता.
39 इंदके नना मीकु वेहासेक मंतन,
मिमेट “सामिना पोर्रोलते वायानोंक आसिर्वादम” इंचि इननदाका नाकुन मर्रा हूळिर.