मरमिंना बोजनम वेसुड
(लूका १४:१५-२४)
22
1 येसु इंकुंदि मल्का,
लोकुल्कुंक वेसुड वेहासेक इल्हा वळकालय दल्गुतोर.
2 “नना मीकु स्वर्ग राज्येम बारेमते मर्रा उंदि वेसुड वेहंतन केंजट.
वरोर राजाल मत्तोर.
ओर ओना मर्रिना मरमिंकु उंदि बोजनम हीतोर.
3 आनि आ बोजनमकु वायालय बोन-बोनकु मुन्ने वेहचि मत्तोर,
ओर्कुन केय्सि तायलय,
ओना जीतागाह्कुन लोहतोर.
अस्के जीतागाह्क होंचि ओर्कुन केयतारित्ते ओर वायोम इंचि इत्तुर.
4 वायोम इंचि इत्तारित्ते,
मर्रा इच्चुर जीतागाह्कुन राजाल इल्हा वेहट इंचि लोहतोर गदा,
हूळाट,
मीवाहेंके नना बोजनम तयार कीतन.
नावा बल्सता कुर्रा आनि कोंदा कोयतन,
कुसिरगुडा वेसि तयार मंता.
अदुनहाटीं मिमेट मात्रम गाटो तिनालय ताकट इंचि इंटु,”
इंचि इत्तोर.
5-6 राजाल वेहिनागानि,
राजाना पोल्लेना पर्वा कियाकोंटा,
इच्चुर ओरा पोलालकुनेके होत्तुर,
इच्चुर बारे ओरा कबळ दंदानेके होत्तुर आनि इच्चुर बारे राजाना जीतागाह्कुन पीसि तंचि-तंचि हव्कीसि पोहतुर.
7 अस्के अद पोल्ले राजाल केंजतस्के ओन्कु इरगा होंग वाता.
पजा राजाल ओना सिपाइल्कुन लोहचि,
ओना जीतागाह्कुन हव्कुता अंटोर लोकुल्कुन हव्कीसि,
ओरा नाटुक तडमि हुपिस्तोर.
8 पजा राजाल ओना जीतागाह्कुन,
“मरमिंना बोजनम तयार मंता.
गानि केयता मनकलोर बेसटुर आयुर.
9 अदुनहाटीं मिमेट हरकुन पीसि,
गल्लीं पीसि,
बजारकु पीसि होंचि दोर्कुतोर अंटोर्कुन गाटो तिनालय केयसि तटु,”
इंचि इत्तोर.
10 अस्के जीतागाह्क,
हरकु,
गल्लीं पीसि होंचि बेसतोर,
सेड्डोर अंटुर्कुन जमा कीसि तत्तुर.
अस्के मरमिंन लोते हेडमितुर निंडिस होत्तुर.
11 अस्के राजाल वाता हेडमीतोर्कुन हूळतस्के,
मरमिंन लोप्पो बेसता कपडीं केरुवाa वरोर मनकल ओन्कु दिसतोर.
12 अस्के राजाल ओन,
“दादा,
मरमिंन लोप्पो बेसता कपडीं केरुवा,
निमे मरमिंना मंडाbता हिडु बल्हा वातिन?”
इंचि ओन पूसकीतोर गानि आ मनकल बतले वळका हिल्लोर.
13 अस्के राजाल ओना जीतागाह्कुन केयसि,
“ईना कय्क-काल्क दोहचि,
पलाते हीकटते पोहचीम्ट.
अगा मनानोर अळसेके,
वरगेयसेके,
पल्कु कोर्कसेक मनांतुर,”
इंचि इत्तोर.
14 पजा येसु,
“केयतोर वेल्लेटुरे मंतुर.
गानि पेर्कुत्तोरु मात्रम इच्चुरे मंतुर,”
इंचि वेसुड वेहामळ आपतोर.
येसुन तप्पुने दोर्का पियालय परिसिल्कुना उपायाल्क
(मरकुस १२:१३-१७; लूका २०:२०-२६)
15 पजा परिसिल्क अगटाल पेय्स्तुर आनि उंदगा जमा आसि,
येसुन बल्हा किसन्ना ओर वळकाना पोल्लेतेन ओना तप्पु दोर्का पियाना इंचि उपायम कियालय दल्गुतुर.
16 c परिसिल्क येसुन पसांचना उपायाल्क कीतुर आनि इच्चुर सिस्युल्कुन हेरोद राजाना मनकलोरतोनि ओनाहेके लोहचितुर.
आ मनकलोर येसुनगा होंचि,
“गुरु,
निमे सत्तेम वळकानोन आनि पेनदा हर्रि हुप्सानोन इंचि माकु एरपाट मंता.
अचोने आयका वेरेतोर बोर बतल इंतुर दाना निमे पिकिरगुडा कियिन,
इंका अंटोर उंदे इंचि वेहांतिन,
इदिंका माकु एरके.
17 अय्ते माकु उंदि पोल्ले वेहा,
रोम सरकारूंक कर दोहमळ बेसा मरि बेस आयोना,
मीवा विचारमते बतल मंता?”
इंचि इत्तुर.
18 ओरा लंगा उपायाल्क येसुंक मुन्नेटाले एर्का मत्तां इंचि येसु ओर्कुन,
“ए डोंगि लोकुरिटा,
बारि नावा परिक्सा एत्संतिर?
19 मिमेट कर दोहना कोत्तां नाकु हुप्सट,”
इंचि इत्तोर.
अस्के आ लोकुल्क ओन्कु उंदि एंडि रूपाय हुपिस्तुर.
20 हुपिस्तस्के येसु ओर्कुन,
“ई एंडि रूपाय पोर्रो बोना पोटुवा आनि पोर्रोल मंता?”
इंचि पूसकीतोर.
21 अस्के ओर,
“रोम सरकारता राजाना पोटुवा आनि ओनादे पोर्रोल राससि मंता,”
इंचि वेहतुर.
पजा येसु ओर्कु वेहतोर गदा,
“बद रोम सरकारूंक हियनदो अद रोम सरकारूंक हीम्टु आनि बद अय्ते पेनदादो अद पेनदुक हीम्टु.”
इंचि इत्तोर.
22 येसुना ई पोल्ले केंजतारित्ते,
ओर्कु इचंत्रम आसि ओर अगटाल वापस होत्तुर.
इच्चुर सदुकि लोकुल्क येसुन पसांचंलय हूळंतुर
(मरकुस १२:१८-२७; लूका २०:२७-४०)
23 अदे रोजु इच्चुर सदुकिर्क येसुनगा वातुर.
सदुकि लोकुल्क हासि मर्रा जीवाते तेदमडतुन नम्मुर.
24 ओर येसुनगा वासि,
“गुरु,
मूसाना नियम परकारम,
बोरन्ना मनकल मर्क-मियाह्क आयक मुन्नेन हायानय्ते ओना मुत्तोनतोनि ओना तम्मुह्क-दादालोर बोरन्ना मरमिं आसि,
हातोना वंसम बेर्सागोटालय पिलाल्कुन कना परांतुर.
25 अय्ते मावाव्टे एडुर दादाल-तम्मुह्क मत्तुर.
पेद्दा दादाना मरमिं आतां गानि मर्क-मियाह्क आयक मुन्नेन ओर हातोर.
पजा ओना मुत्तोन ओना तम्मुर मरमिं आतोर.
26 आ तम्मुर इंका मर्क-मियाह्क आयक मुन्नेन हातोर.
पजा मूडोवाड मरमिं आतोर आनि ओर इंका हातोर.
अल्हेने वरोर-वरोर एडुर इंका दादाल-तम्मुह्क आ मुरतळतोनि मरमिं आसि पिलाल्क आयवा मुन्नेन हातुर.
27 अंटोर हाता पज्जो,
आ मुरतळ इंका हाता.
28 इंदके सवाल बतल इत्ते,
हातोर्क मर्रा जीवा अरतस्के,
अद एडुर दादाल-तम्मुह्कनाल बोना मुत्तो आयार?
बारि इत्ते,
अद एडुरातोनि इंका मरमिं आसि मत्ता.”
इंचि सदुकि लोकुल्क पूसकीतुर.
29 अस्के येसु ओर्कु,
“मिमेट दर्मसास्त्रमतुन आनि पेनदा ताकततुन एरपाट कियाका तप्पु अर्तम कीकुंचंतिर.
30 हातोर मल्सि जीवा अर्रानुर अस्के,
ओर मरमिं आयुर,
आनि मरमिं कीसि इंका हिय्युर.
गानि ओर स्वर्गमता पेनदा दूतन लेसीं मरमिं आयाकोंटा मनांतुर.
31-32 गानि हातोर जीवा अर्रानुर इंचि दर्मसास्त्रमते वेहचि मंता,
अद बतल इत्ते,
‘नना अब्राहाम,
इसहाक आनि याकोबुना पेंदुन आंदुन,’
d इंचि पेन इत्ता.
अदुन हद्विसि दाना अर्तम बस्केने एरपाट किय्या हिल्लिरा?
इंचि अद हातोरा पेन आयोन गानि जीवाते मनानोरा पेन आंद,”
इल्हा येसु इत्तोर.
33 येसु इच्चोन वळकातारित्ते,
अगा मत्ता लोकुल्क ओना पोल्लें केंजसि इचंत्रम आतुर.
अन्निंकना पेद्दा पोल्ले बदु?
(मरकुस १२:२८-३४; लूका १०:२५-२८)
34 येसु सदुकिर्कुन वळकाकोंटा कीतोर इंचि परिसिल्कुंक तेळियतारित्ते ओर जमा आसि येसुनहेके वातुर.
35 ओरा लोप्पो दर्मसास्त्रम बेस तेळियतोर वरोर मत्तोर,
ओर येसुना पट्टु हूळालय येसुन,
36 “गुरु,
मूसाना नियम लोप्पो अन्निंकना पेद्दा आदेस बद आंद?”
इंचि सवाल पूसकीतोर.
37 अस्के येसु,
“निमे नीवा पेंदुन जीवा ताससि,
पूरा मनसुने आनि पूरा बुद्दिते पावरम कीम.
38 इदे मोदोलता अन्निंकना पेद्दा आदेस आंद.
39 आनि रेंडोवा आदेस बतल इत्ते,
नीवा पोर्रो नीकु बचोन पावरम मंतनो,
अल्हेने इंका वरोनपोर्रो गुडा इर्रा.
40 इव रोंडु आदेसकुना आदारम पोर्रेने मूसाना नियम आनि पेनदा कबुरतोर रासता पुस्तकाल्कु मंतां.”
इंचि येसु जवाब हीतोर.
येसु परिसिल्कुन सवाल पूसकीतोर
(मरकुस १२:३५-३७; लूका २०:४१-४४)
41 पजा परिसिल्क उंदगा जमा आसि मत्तस्के,
येसु ओर्कुन उंदि सवाल पूसकीतोर.
42 “किरिस्तुना बारेमते मीवा बाता विचारम मंता?
ओर बोना मर्रि आंदुर?”
अस्के परिसिल्क,
“ओर दाविद राजाना मर्रि आंदुर,”
इंचि इत्तुर.
43-44 अस्के येसु ओर्कुन,
दाविद राजाल ओना बजन संहिताते इल्हा रास्तोर.
पेन बाबाल नावा सामिन इत्तोर,
नना नीवा पगातोर्कुन नीवा कालकुनगा अराहनाजेम
निमे नावातोनि राज्येम कीम.
e
अय्ते दाविद राजाल पेनदा आत्माता हेंदाल ओन, “सामि” इंचि बल्हा इत्तोर?
45 कुद दाविद राजाल ओन “सामि” इंचि इत्तोर,
अय्ते ओर दाविद राजाना मर्रि बल्हा आया परांतोर?
इंचि इत्तोर.
46 अस्के यहुदिरा पेद्दाल्कुंक बोनके ओना पोल्लेता उत्तर तिरियसि हिया वाया हिल्ले.
आ रोजुनाल बोरे येसुन बतलन्ना पूस कियना हिम्मत किया हिल्लुर.