पार्तना कीसेकेने मंदना
18
1 पजा येसु ओना सिस्युल्कुन, “रोज पारतना कीसेके मंदाना, पारतना कियानाहाटीं बस्केने पज्जोळ्क आया मनि,” इल्हा इंचि उंदि वेसोडि वेहातोर. 2 “उंदि नाटेने वरोर न्यायम कियाना पेद्दा मनकल मत्तोर. ओर पेनदुक वेरियाकोंदुर आनि लोकुल्कुना पर्वा कियाकोंदुर. 3 अदे नाटेने उंदि मुंडामोस्ता मुर्तळ मत्ता. अद ओनागा रोज वासि, ‘नावापोर्रो अन्यायम आता, दीन न्यायम कियमळ गावाले,’ इंचि ओन इनुंदु. 4 ओर वेल्लेने रोजकुनदाका दाना पोल्लेन केंजाकुंटा मत्तोर. गानि उंदि रोज ओर इल्हा विचारम कीतोर. ‘नना पेनदुक वेरियानोन आयोन आनि मनकलोर्कुन पर्वा कियानोन आयोन. 5 अय्नागानि इद मुर्तळ रोज वासि नाकुन परेसान किसेक मंता. अदुनहाटीं इंदके नना दीना न्यायम कींतन. हिलाकुंटे इद बस्केळ्के नाकुन परेसान कियार,’ इनकुत्तोर.”6 मर्रा येसु सामि इत्तोर, “न्यायम कियाना सेड्डा मनकल बतल इत्तोर, अद पोल्लेतुन मति कीम्टु. 7 पेन पेरकुत्ता लोकुल्कु न्यायम आयागोम इंचि नर्का-पल्लिं पेनदुन पारतना कीसेक मनांतुर, पेन ओर्क सहाय्यम कियालय आलसेम कियारा? 8 नना मीक वेहासेक मंतन, पेन ओरा न्यायम बिराना कियार. अय्नागानि मनकना रुपमते पुटतोन नना मल्सि वातस्के, इद बूमिते विस्वासम होळसाकुंटा पारतना कीसेक मंदानुर दोर्कानुरा?” इंचि वेहतोर.
मनम पेनदा मुन्ने सिन्नागासि मंदमळ गावाले
9 बोरय्ते लोकुल्कु मोमोटे सत्तेमते मंतोम, बेस मंतोम इंचि इंकावरोन सिन्ना हूळुंदुर, ओराहाटीं इंका येसु उंदि वेसोडि वेहतोर. 10 इव्वुर मनकलोर गुळिते पारतना कियालय होत्तुर. ओरंटे वरोर बारे परिसि मनकल, इंका वरोर बारे कर वसुल कियानोर. 11 परिसि अलग नित्तिसि पारतना कियालय दल्गतोर, ए पेनबाबा! नना इंका वरोनलेसीं दोंगन आयोन, इंकावरोन बोंकिचानोन आयोन, बोगम कबाह्क कियानोन आयोन आनि ई कर वसुल कियानोनलेसिं लोकुल्कुन मुळहानोन आयोन. 12 वारमकु रोंडु मल्कां उपासम मनंतन आनि नावा कमायताल पदि तूसकुनाल उंदि तूस निक दानमगुडा हींतन, इंचि इत्तोर.
13 “गानि कर वसुल कियानोर लक्कु निततोर, ओनकु पोर्रो हूळालयगुडा दैरनेम आया हिल्ले. ओर कीता पापमतुन मति कीकुंचि, चाति तंचेके पारतना कीतोर, ‘ए पेनबाबा, नना पापि मनकन आंदुन, नावापोर्रो दया कीम,’ इंचि इत्तोर. 14 नना मीक वेहांतन गदा, ओरा इव्वुरा लोप्पोटाल कर वसुल कियानोरे पेनदा मुन्ने सत्तेमतोर आसि लोन होत्तोर. गानि परिसि सत्तेमतोर आयोर. बारित्ते, बोर ओनद ओरे नना पेद्दोन इंचि इनकुंतोर, पेन ओन सिन्नगा कींता. आनि बोर ओनद ओरे नना सिन्नोन इंचि इनकुंतोर, पेन ओन पेद्दा कींता,” इल्हा वेहाचि येसु सामि वेसोडितुन महात्तोर.
येसु सिन्ना पिलाल्कुन आसिर्वादम हींतोर
15 उंदि रोज लोकुल्कु ओरा सिन्ना पिलाल्कुना पोर्रो येसु कय इरसि आसिर्वादम हियागोम इंचि ओनागा तायालय दल्गतुर. गानि ओना सिस्युल्कु पिलाल्कुन तायमट इंचि तेर्हात्तुर. 16 गानि येसु पिलाल्कुन केयसि इत्तोर, “पिलाल्कु नहगा वायिरकांटी, ओर्कुन आपमट, बारित्ते पेनदा राज्येम सिन्नागासि मनना पिलाल्कुनसंटोरदे आंदु. 17 नना मीक निजम वेहांतन, बोरे आयिर ओरा मनसुने पेनदा राज्येमतुन सिन्ना पिलाल्कुनालेसीं ओपकुन्नुर, ओर पेनदा राज्येमते होळया पर्रुर,” इंचि सिस्युल्कुंक वेहातोर.
सिरमंत मनकल पेनदा राज्येमते होळियमड वेल्ले कस्टम
18 पजा वरोर यहुदिल्कुना लिडर इल्हा इत्तोर, “गुरु, निमे सत्तेमतोन आंदिन. निमे नाक वेहा, बस्केळ्क पिस्सना पिसवरहाटीं नना बतल कीकन?” इत्तोर. 19 इत्तस्के येसु ओन, “निमे नाकुन सत्तेमतोन इंचि बारि इंचंतिन? पेनदुन होळसि बोरे सत्तेमतोर हिल्लोर. 20 नीकु मूसाना नियमकु अय्ते एरपाटे: बोगमतनम कीयमा, बोरकुन हव्कमा, दोंगातनम कीयमा, आबद्दम गवाइ हीयमा आनि तल्लुर-बाबोना पोल्ले केंजा,”a इंचि इत्तोर. 21 “इवन्नि पोल्लें नना सिन्नस्केटाले किसेके वातन गुरु,” इंचि यहुदि लिडर इत्तोर. 22 ओना पोल्लेन केंजसि येसु ओन, “निजमे निमे इवन्नि पोल्लें कीसेक वातिन गानि नीवागा इंकुंदि पोल्ले तक्को मंता. अद बतल इत्ते, नीवागा मंदना दनमतुन पूरा अमसि, अदुन गरिबोर्कुंक तूसि हीम. अल्हा कीते निक स्वर्गमते दनम दोर्कार, दाना पजा निमे नावा पज्जो ताका,” इंचि इत्तोर. 23 इल्हा येसुना पोल्ले केंजतारिते ओनकु वेल्ले दुकम आता. बारित्ते ओनगा वेल्लेने दनम मत्ता. 24 ओर दुकम आतद हूळसि येसु, “सिरमंत मनकलोरा मनसुन लोप्पो पेनदुन राज्येम किया हियमळ इत्ते वेल्ले कस्टम. 25 बस्केनना लोटापेटा सूदि बोंगाताल होळिया परंताना? दानकन्ना वेल्ले कस्टम इत्ते, सिरमंत मनकलोर पेनदा राज्येमते होळियमड,” इंचि इत्तोर.
26 अस्के येसुना पोल्ले केंजानोर, “अल्हा अय्ते बस्केळ्क पिस्सना पिस्वर बोनकु दोर्कंता मरि,” इंचि इत्तुर. 27 इत्तस्के येसु ओर्कुन, “इव पोल्लें मनकना कय्दे आया पर्रों, गानि पेनदा कय्दे इवन्नि आया परंतां,” इंचि इत्तोर. 28 अस्के पत्रु येसुन, “हूळा सामि, मोमोट अय्ते लोन-दारा होळसि नीवा पज्जो वातोम,” इंचि इत्तोर. 29 इल्हा इत्तस्के, “नना मीक निजम वेहंतन, पेनदा राज्येमताहाटीं ओना लोन-दारातुन, मुत्तोन, दादल-तम्मुह्कुन, पिलाल्कुन, यावल-बाबन होळसियानुर, 30 ओनकु इद कालमते होळसितवुंकन्ना बच्चोरो एक्को सम्सारम आनि जीवातुर दोर्कानुर, वायाना कालमते बस्केळ्क पिसाना पिसवर इंका दोर्कार,” इंचि येसु वेहतोर.
येसु ओना हामुरता बारेमे वेहांतोर
31 पजा येसु ओना पन्नेंड सिस्युल्कुन पक्काक केयसि इत्तोर, “केंजाट, मनम येरुसलेम होंचेके मंतोम. मनकना रुपमते पुटतोन, ना बारेमते पेनदा कबुरतोर बतलय्ते रासतोर, अद पूरा आंता. 32 नाकुन वेरे जातितोरा कय्दे अप्पजेपंतुर, ओर नाकुन उस्कानुर, पास्कनुर, अपमानम कियानुर. 33 मर्रा ओर नाकुन पोट्टेते तंचि हव्कानुर. गानि मूंड रोजकुंक मर्रा जीवा अरंतन,” इंचि वेहतोर. 34 गानि ओना सिस्युल्कुंक मात्रम ओर वळ्कता पोल्ले तेळिया हिल्ले. अद पोल्ले ओराहाटीं मर्ममते मत्ताहेंके, ओर्क बतल अर्तम आया हिल्ले.
वरोर गुड्डिन येसु बेस कीतोर
35 पजा येसु यरिहो नाटेना दग्गेरे एवतोर. अगा हर्दा पक्काते वरोर गुड्डि बिच्चम तल्कसेके उदसि मत्तोर. 36 ओना पक्काताल वेल्लेने लोकुल्क होनना सप्पुळ केंजसि, “इगे बतल आसेके मंता,” इंचि पूसकीतोर. 37 अस्के बोरो ओन, “नासरेत नाटेना येसु इगेटाल होंचेके मंतोर,” इंचि वेहतुर. 38 वेहतस्के ओर गुड्डि, “येसु, दाविद राजाना वंसमतोना, नावा पोर्रो दया कीम,” इंचि जोरसे वरगेयतोर. 39 वरगेयतस्के ओना मुन्नेटाल होनानोर, “चुपचाप मन,” इंचि तेर्हत्तुर. गानि ओर इंका जोरसे, “दाविद राजाना वंसमतोना, नावा पोर्रो दया कीम,” इंचि वरगेयतोर. 40 अस्के येसु अगाने नित्तिसि, “ओन नहगा पीसि वटु,” इत्तोर. 41 पजा ओन येसुनगा तत्तस्के, “निक बतल गावाले?” इंचि इत्तोर. “नावा कळ्क दिस्सनाल कीम सामि,” इंचि गुड्डि इत्तोर. 42 पजा येसु ओन, “इंदकेटाल हूळालय दल्गा, निमे नावा पोर्रो विस्वासम कीताहाटींगे बेस आतिन,” इंचि इत्तोर. 43 इत्तस्केने ओर हूळालय दल्गतोर आनि पेनदुन तलुस्कुंचेके पज्जो होत्तोर. अगा मत्ता लोकुल्क अल्हा आतद हूळसि, ओर इंका पेनदुन तलुस्कुनालय दल्गतुर.