माप कियमळ आनि विस्वासमता बारेमते कराहमळ
17
1 उंदि रोज येसु ओना सिस्युल्कुनतोनि इत्तोर, “पापमते अराहना पोल्लें वायाका मन्नों, अव अय्ते वांतंगे. गानि अवु बोना हेंदाल वांतांगो, ओनकु मात्रम सिक्सा तप्पो. 2 सिन्ना पिलाल्कुनालेसीं नाकुन विस्वासम कियानोर्कुनगाटाल बोनना वरोन पापमते अराहालय बोरय्ते हूळांतोर, ओर पापमते अराहका मुन्नेने ओना बोंडगेक जोत्ता बंडा दोहाचि ओन समुद्रमते ओसि वाटतेने बेस मनंता. 3 अदुनहाटीं मिमेट उसारते मंटु.“मीवा दंटातोर तप्पु कीते ओन समजांचटु, ओर कीता तप्पुन, इंदके नना किय्योन इंचि ओप्पुकुत्ते, ओन मापि कीम्टु. 4 उंदि रोजुने ओर एडुं मल्कां तप्पु कीते आनि एडुं मल्कां इंका ओर मीवगा वासि, ‘नना तप्पु कीतन, इंदकेटाल इल्हा किय्योन,’ इंचि ओप्पुकुत्ते, ओन मापि कीम्टु,” इंचि वेहातोर.
5 इल्हा येसु वेहातद केंजसि, “मावा विस्वासमतुन बेर्सागोटा सामि,” इंचि ओना प्रेरितुल्क इत्तुर. 6 इत्तस्के येसु सामि ओर्कुन, “मीवा विस्वासम आवाल्कुना पेळेतच्चो मनना गानि, मिमेट इद पेद्दा ताडि मरातुन, ‘निमे नीवा हिह्कुनतोनि पीकका वासि, समुद्रमते होंचि अर्रा,’ इंचि इत्ते अद मरा मीवा पोल्ले केंजंता,” इंचि इत्तोर.
जीतागाना जिमेदारि
7 येसु मर्रा इल्हा वेहातोर, “मीवगा बोनागना वरोर जीतागाल मंतोर इनकुंटु, ओर नांगेल पूहाचि हिलाकुंटे गोर्रें मेहाचि, बस्के अय्ते ओना कबाटाल लोन वांतोर, अस्के, ओर वाता वायमुळे, ‘गाटो तिनालय उदा,’ इंचि इंतिरा? बस्केने इनिर. 8 गानि इल्हा इंतिर गदा, ‘नाकु गाटो अटा, वेरे कपडिं केरसि नाकु गाटो वाटसि हीम, नना तित्ता पजा निमे तिन’ इंचि इंतिर. 9 निमे वेहता कबळ जीतागाल कीतोर इंचि ओन, ‘बेस कीतिन’ इंचि बस्केने इनिर. 10 अल्हेने मिमेट इंका पेन वेहता कबळ पूरा मारतस्के, ‘मोमोट मामुल जीतागाह्कुम आंदुम, माक बद कबळ कियाना मत्ता अदे कबळतुन कीतोम’ इंचि इंटु,” इंचि येसु वेहातोर.
येसु मोंडिरोगमतोर्कुन बेस कीतोर
11 पजा येसु येरुसलेम होनानेंके सामरिया आनि गालिल एरियाना नड्डुमताल होंचेके मत्तोर. 12 अस्के बदो उंदि नाटेने होळियनेंके मोंडिरोगम आतोर पदि मंदि हर्दुक इच्चुर लक्कु नित्तिसि मत्तुर. 13 ओर येसुन हूळसि, “ए येसु, ए सामि! मावा पोर्रो दया कीम,” इंचि वरगेयतुर.a 14 येसु ओर्कुन हूळसि, “मिमेट होंचि, मीवा मेंदुल पेरमालोर्कुंक हूप्सट,”cb इंचि इत्तोर. इत्तस्के ओर होनेंक-होनेंकेने बेस आतुर. 15 अस्के ओरागटाल वरोर मनकल नना बेस आतन, इंचि हूळतोर, हूळसि पेनदुन जोर-जोरसे तल्सुकुंचेके येसुनगा मल्सि वातोर. 16 वासि ओना काल्कुनपोर्रो अरसि ओन्क दन्यवाद कीतोर. ओर सामरि जातिता मनकल मत्तोर, इत्ते सिन्ना जातितोर मत्तोर.d 17 येसु ओन, “पूरा पदि मंदि बेस आया हिल्लिरा? कळमता तोम्मिद मंदि बेके होत्तुर? 18 पेनदुन तल्सुकुनालय, ई सामरि जातितोन होळसि, कळमतोर बेस आतोर बोरे वाया हिल्लुरा?” इंचि इत्तोर. 19 मर्रा येसु ओन, “तेदिस होन! निमे विस्वासम कीताहाटीं बेस आतिन,” इंचि इत्तोर.
पेनदा राज्येम वायमळ
20 उंदि मल्का परिसिल्कु, “पेनदा राज्येम बस्के वांता?” इंचि येसुन पूसकीतुर. अस्के येसु, “पेनदा राज्येम वायानद कळ्कुंक दिसो. 21 पेन मीवा नड्डुम राज्येम कींता. अदुनहाटीं पेनदा राज्येम इगे मंता, अगा मंता इंचि लोकुल्क इन्नुर,” इंचि वेहातोर. 22 अद वेहता पजा सिस्युल्कुन इल्हा इत्तोर, “मनकना रुपमते पुटतोर वायाना रोजुन हूळाना विचारम कींतिर, गानि मिमेट हूळा पर्रिर इसोंटा वेला वायार. 23 अस्के, हूळाट! मनकना रुपमते पुटतोर इगे मंतोर, अगा मंतोर इंचि लोकुल्कु इनानुर, गानि मिमेट अगा होनमट, ओरा पजो ताकमट.e 24 मब्बुने उंदि बाजुंक मेर्सते इंकुंदि बाजुंक बल्हा वेलगु अरंतानो, अल्हेने नना मर्रा उंदि मल्का मल्सि वायानेंके आयार. 25 गानि दानकन्ना मुन्ने नाकु बागा तकलिप वायार. इद पीळितोर नाकुन हय्सुर.”
26 एनकटे, नोहा मातरना कालमते बल्हा जर्गतनो अल्हेने मनकना रुपमते पुटतोर वायानस्के आयार. 27 नोहा मातरल डोंगाते नेंगनादाका लोकुल्कु तिंचेके-उंचेके मत्तुर, मरमिं आसेक मरमिं कीसेक मत्तुर. अस्के पेद्दा कम्मुड वासि अंटुर्कुन मुळाहता.
28 लूतुना कालमते इंका अल्हेने आता. लोकुल्कु तिनना, उनना, असना, अम्मना, वीतना लोह्कु दोहना कियुंदुर. 29 गानि लूतु सदोम सहरताल बस्के अय्ते पेय्सतोर, अस्के मब्बुनाल तडमि डोग्गां अरसि अद नाटेनोर अंटुर्कुन नासडेम कीता. 30 अल्हेने नना मनकना रुपमते पुटतोन वायानस्के इंका आंता. 31 अदुनहाटीं अद रोज बोरन्ना लोतपोर्रो मत्ते, लोता लोपो मंदना सामानतुन तायालय हिळु रेयानायो. अल्हेने बोरन्ना पोलमते मत्ते इंका ओर मल्सि वायानायो.f 32 लूतुना मुत्तो पेनदा पोल्ले केंजवा, सदोम सहरतुन तिरीयसि हूळतस्के, दानकु बल्हा आता, अदुन मति कीम्टु.g
33 “बोरय्ते ओना जीवातुन ई दुनियाते पिसागोटालय हूळांतोर, ओर ओना जीवातुन पोगोटकुंतोर. आनि बोर ओना जीवातुन नावाहाटीं पोगोटकुंतोर, ओन्कु बस्केळ्क पिस्सना पिस्वर दोर्कंता.h 34 नना मीक वेहानद बतल इत्ते, नना वायाना नर्का उंदे कटुलते इव्वुर मनकलोर मंदानुर. गानि पेन वरोन बारे पीसि ओयार, इंकावरोन बारे अगाने होळसि हियार. 35 अल्हेने रोंडु मुर्ताह्कु जोत्ता नोर्सेक मंदानुं, पेन उंदिदान पीसि ओयार, इंकुंदिदान बारे अगाने होळसि हियार. ( 36 इव्वुर मनकलोर पोलमते मत्ते, पेन वरोन पीसि ओयार, वरोन बारे अगाने होळसि हियार,” इंचि इत्तोर.)i
37 अस्के सिस्युल्कु येसुन, “इव पोल्लें बगा आयानुं सामि?” इंचि पूसकीतुर. अस्के, “बगानना बतलन्ना हाते, अगा गद्दाल्कु जमा आयानुं,”j इंचि येसु इत्तोर.