उसार दिवांजी
16
1 पजा येसु सिस्युल्कुनतोनि मर्रा वेहामळ सुरु कीतोर: “वरोर सिरमंत मनकल मत्तोर. ओनगा वरोर दिवांजी मत्तोर. सिरमंत मनकानगा बोरो लोकुल्क वासि, ‘नीवा दिवांजी नीवा दनमतुन नासडेम कीसंतोर,’ इंचि वेहातुर. 2 अस्के सिरमंत मनकल दिवांजीन केयसि, ‘नीवा बारेमते इल्हा बारि केंजसेक मंतन? इंदके नीकुन दिवांजी कबळते इरा परोन, निमे इच्चुं रोजुक कीता कबाटद पूरा इसाब हीम,’ इत्तोर. 3 इत्ता पजा आ दिवांजी, ‘इंदके नना बतल कीकन? नावा मालक अय्ते नाकुन कबळ पोर्रोटाल तेंडसंतोर. इंदके नावागा कास्तकरि कबळ कियानच्चो बलम हिल्ले आनि बिच्चम तल्कालय नाकु सिग्गु वांता,’ इंचि विचारम कियालय दल्गतोर. 4 ‘नाकुन दिवांजीता कबाटाल तेंडिना गानि लोकुल्कु ओरा लोह्कुने केयमळ गावाले इत्ते नना बतल कियगोमो अद नाकु तेळियता,’ इंचि इनकुत्तोर. 5 इनकुंचि सिरमंत मनकांक बोरय्ते बाकि मत्तुर, ओर्कुन वरोन-वरोन केयतोर, केयसि वरोन पूसकीतोर, ‘निमे ओन्क बच्चोन बाकि मंतिन?’ 6 ‘नालुं वेय्कु लिटर्कु जय्तुन निय बाकि मंतन,’ इंचि इत्तोर. इत्तस्के दिवांजी ओन, ‘इद पीम नीवा काता बुक आनि बिराना दीन रोंड वेय्कु लिटर्क रासा,’ इंचि इत्तोर. 7 मर्रा इंकावरोन दिवांजी, ‘निमे बच्चोन बाकि मंतिन?,’ इत्तोर. ओर, ‘नूर गिद्दें गोह्कु हियना मंतन,’ इंचि इत्तोर. इत्तस्के ओन इंका, ‘इद पीम नीवा काता बुक आनि इवने एन्बै गिद्दें रासा,’ इंचि इत्तोर.8 “पजा बेयमानि दिवांजी तेल्विते कीता कबाह्कुन आ सिरमंत मनकल हूळसि, ‘निमे उसार मंतिन’ इंचि ओन इत्तोर. इल्हेने पेनदा लोकुल्कुंकन्ना एक्को, पेनदुन एरपाट कीयवा लोकुल्कु वरोंक-वरोर हीयमळ-एतमळते वेल्ले तेल्विते मनांतुर. 9 नना वेहानद बतल इत्ते, बूमिपोर्रोटा मीवा दनमतुन कर्चकीसि, दंटातोर्कुन दोर्किचकुंटु, बारित्ते अद दनम बस्के अय्ते मारंता, अस्के बस्केने मारवा लोह्कुने मीक जागा दोरकंता.
10 “बोर सिन्ना पोल्लेते सत्तेमते मंतोर ओर पेद्दा पोल्लेते इंका सत्तेमते मंतोर इल्हेने बोर सिन्ना पोल्लेते सत्तेमते हिल्लोर ओर पेद्दा पोल्लेते इंका सत्तेमते हिल्लोर. 11 अदुनहाटीं मिमेट गिंटा ई दुनियाता सम्सारमतसोंटा सिन्ना पोल्लेते सत्तेमते हिलाकुंटे, पेन दाना राज्येमता सम्सारमतुन मीवा कय्दे बल्हा हियार? 12 इंका वरोना सम्सारमताहाटीं मिमेट सत्तेमते हिलाकुंटे, बद सम्सारमतुन अय्ते पेन मीक हींतन इंचंता, अद मीक बल्हा दोर्कार?
13 “वरोर जीतागाल इव्वुर मालकनगा कबळ किया परोर. अल्हा कबळ कीते वरोन बेस हूळांतोर, इंकावरोन बारे बेस हूडोर, हिलाकुंटे वरोना पोल्ले केंजंतोर, इंका वरोना पोल्ले बारे केंजोर. अल्हेने मिमेट मीवा सम्सारमतुन आनि पेनदुन उंदे मल्का सेवा किया परिर,” इंचि वेहातोर.
पेनदा पोल्ले बस्केळ्क मनंता
14 येसु इव पोल्लें वेहानेंके, अगा परिसिल्क मत्तुर. ओर कोत्ताना पोर्रो बागा जीवा कियुंदुर. अदुनहाटीं येसुना पोल्लें केंजसि ओन कारेड्डाल्क कीतुर. 15 पजा येसु ओर्कुन, “मिमेट लोकुल्कुना मुन्ने, ‘मोमोट सत्तेमतोरम’ इंतिर, गानि पेन मीवा मनसुन एरपाट कींता. बव पोल्लें अय्ते मनकना विचारमते कदरतव मंतां, अव पोल्लेन पेन बिल्कुल हय्सो.”
16 “बापतिस्मा हियना योहान वायानादाका मूसाल रासता नियमकु आनि पेनदा कबुरतोरा रासता पोल्लेंन परकारम ताकुंदुर. दाना पजा, पेनदा राज्येमता बारेमते बेसता कबुर लोकुल्कुंक वेहमळ जर्गसेक मंता. वेल्लेटुर लोकुल्कु पेनदा राज्येमते होळियना इंचि वेल्ले कोसिस कीसेक मंतुर. 17 उंदि वेलाते बूमि आनि मब्बु नासडेम आयार गानि दर्मसास्त्रमते रासतद उंदि सिन्ना पोल्ले इंका नासडेम आयो.”
18 “बोरे आयिर, मुन्नेटा मुत्तोन होळसि, इंकुंदि मुर्ताटुन तुंगानय्ते, ओर बोगमतनम कीतापे. अल्हेने बोरे आयिर, मुय्दोन होळसीता मुर्ताटुन तुंगानय्ते, ओर इंका बोगमतनम कीतापे.”
सिरमंत मनकल आनि गरिब मनकल
19 “इंकुंदि पोल्ले केंजाट, वरोर सिरमंत मनकल मत्तोर. ओर, एक्को दराता नेंडि पंडिना रंगुना मलमल कपडिं केरुंदुर आनि ओर रोज सुकमते, आनंदमते मनुंदुर. 20 गानि वरोर लाजर इनानोर गरिब मनकल मत्तोर. ओनकु मेंदुलंता पुनकु आसि मत्तां. ओन रोज सिरमंत मनकना गलमातगा बोरो तच्चि, होळसि होनुंदुर. 21 सिरमंत मनकल तिननेंके हिळु अरतव मेत्तुकुल्कु तिंचि पीर निहंतन इंचि अगा हूळसेक मनुंदुर. इंका ओना मेंदुल्ता पुनकुन नय्कु वासि नाकुंदुं.”
22 उंदि रोज बतल आता इत्ते, आ गरिब मनकल हासोत्तोर. अस्के पेनदा दूतां वासि ओना जीवातुन स्वर्गमते पीसि ओसि, अब्राहामुनाa पक्काते इरतां. कोन्नि रोजकुना पजा सिरमंत मनकल इंका हातोर. ओन बोंदा दोसतुर. 23 सिरमंत मनकना जीवा नरकमते तकलिपने तन्लाडसेक मननेंकेb वेल्ले लक्कुने ओनकु अब्राहाम दिसतोर आनि ओना पक्काते लाजर मत्तोर. 24 अस्के ओर अब्राहामुन जोरसे केयसि, “मावा एनकटा मातिर दादा, नावापोर्रो दया कीम आनि लाजरुन नावाहेके लोहाचिम. नना तडमिते तन्लाडसेक मंतन. ओर वासि ओना वेदुन एते मुळाहचि नावा नाल्केतुन सल्लागा कियिरकांटि,” इंचि इत्तोर. 25 अस्के अब्राहाम ओन, “हूळा पेडा, निमे मति कीम, निमे जीवाते मननेंके निक बतल गावाले मत्ता अव अन्नि दोर्कतां, गानि लाजरुंक मात्रम अव अन्नि सुकम दोर्का हिल्लें. इंदके इगे ईनकु बतल तकलिप हिल्ले गानि निमे मात्रम तडमिते तन्लाडसेक मंतिन. 26 मर्रा उंदि पोल्ले बतल इत्ते, मीवा-मावा नड्डुम उंदि पेद्दा लोंद्का मंता. अदुनहाटीं मावाहेंदाल मीवाहेके बोरन्ना वाकोम इत्ते वाया परुर, मीवागाटाल बोरन्ना मावाहेके वाकोम इनना गानि वाया परुर, इंचि इत्तोर. 27 अस्के आ सिरमंत मनकल इत्तोर, ‘अल्हा अय्ते मातिर दादा, नना निक विनंति कींतन, लाजरुन नावा बाना लोन लोहाचिम. 28 बारित्ते नाक हेय्युर तादह्क-तम्मुह्क मंतुर. ईर होंचि इव पोल्लें ओर्क वेहते, ओर इसोंटा तकलिपना जागाताल तपानुर,’ इंचि इत्तोर. 29 इत्तस्के अब्राहाम, ‘ओरगा मूसाल रासता नियमकु आनि पेनदा कबुरतोर रासता पुस्तकाल्क मंतां. अवुन हदविसि, अल्हे केंजीर, अल्हे ताकिर,’ इत्तोर. 30 अस्के सिरमंत मनकल इत्तोर, ‘अल्हा आयो अब्राहाम दादा, हातोरा लोप्पोटाल बोरन्ना होंचि ओर्क वेहते, ओर पापाल्कुनाल मनसु मार्सकुंतुर,’ इत्तोर. 31 अस्के अब्राहाम ओन, मूसाल रासता नियमकु आनि पेनदा कबुरतोर रासता पोल्लेन बोरय्ते केंजुर, ओर्कु वेहालय हाता मनकल जीवा अरसि होंचि वेहाना गानि ओर केंजुर,” इंचि इत्तोर.