तप्सोत्ता गोर्रेता वेसोड
15
1 उंदि रोज कर वसुल कियानुर आनि पापि लोकुल्कु येसुना पोल्लें केंजालय ओनगा जमा आतुर. 2 जमा आतद हूळसि, परिसिल्कु आनि दर्मसास्त्रम कराहना गुरुल्क येसुन, “ई मनकल पापि लोकुल्कुन दग्गेर्कु केयसि उपसंतोर आनि ओरतोनि कलियसि गाटोगुडा तिंतोर,” इंचि गुल्गसेक इत्तुर.3 ओर इनानद केंजसि येसु ओर्क उंदि वेसोड वेहतोर. 4 इनकुंट! “वरोनगा नूर गोर्रें मत्तां, अवुन मेहानेंके अंटेताल उंदि गोर्रे तप्सोत्ता. पजा कळमातव टोंबै तोम्मिदि गोर्रेन अगाने मंदा वाटसि, अद उंदि तप्सोत्ता गोर्रे दोर्कनादाका पहकालय ओर दांतोर. 5 पजा अद गोर्रे दोर्कुतस्के ओर कूस आसि दान हट्टापोर्रो वाटकुंचि पीसि वांतोर. 6 वासि, दंटातोर्कुन, लोता पक्कातोर्कुन केयसि, ‘नावा तप्सोत्ता गोर्रे नाक दोर्कुता, नावातोनि कलियसि आनंदम कीम्ट,’ इंचि इंतोर. 7 नना मीक वेहानद बतल इत्ते, बोर्क अय्ते पापमताल मनसु मार्सकुंचि पस्चतापम कियना अव्सरम हिल्ले, असोंटा टोंबै तोम्मिदि मंदि सत्तेमंतुल्कुना बारेमते आयना आनंदमकन्ना, वरोर पापि मनकल ओना पापमताल मनसु मार्सकुत्ते ओनाहाटीं स्वर्गमते बच्चोरो आनंदम आंता,” इंचि वेहातोर.
कोत्ताना वेसोड
8 “मर्रा उंदि वेसोड वेहांतन केंजाट. उंदि मुर्तटागा पदि एंडि कोत्तां मतां. आ पदि कोत्तानाल उंदि कोत्ता बगानो अरसि होत्ता. अस्के अद मुरतळ सिमलि निरिचि, लोनअंता हेय्सि आ कोत्ता दोर्कनदाका पह्कंता. 9 आनि अद कोत्ता दोर्कुतस्के, दाना दंटातवुन, लोता दग्गेटावुन केय्सि, ‘नावद बगानो अरसोत्ता कोत्ता दोर्कुता, मिमेट नातोनि कलियसि आनंदम कीम्ट,’ इंचि इंता. 10 नना मीक वेहांतन, इदुनलेसींगे वरोर पापि मनकल ओना पापमताल मनसु मार्सकुत्ते ओनाहाटीं स्वर्गमते पेन दाना दूतानतोनि आनंदम कींता,” इंचि इत्तोर.
लोताल पेय्सि होत्ता मर्रिना वेसोड
11 येसु इंकुंदि वेसोड वेहातोर. “वरोर मनकंकु इव्वुर मर्क मत्तुर. 12 उंदि रोजु सिन्ना मर्रि ओना बाबोन, बाबा, सम्सारमताल बच्चोन नावा पालू मंता, अद नाकु पंचि हीम, इत्तोर. इत्तस्के ओना बाबो सम्सारमतुन इव्वुर मर्कुंक पंचि हीतोर.”
13 “कोन्नि रोजकुना पजा, सिन्ना मर्रि ओना पालुंक वाता सम्सारमतुन बोत्तिगा पीकुंचि, बेकेनो लक्कु देसेम पेय्सि होत्तोर. अगा होंचि बोगम कबाह्कुने ओना सम्सारमतुन नासडेम कीतोर. 14 ओनगा मत्तव अंता मारतस्के आ देसेमते पेद्दा करवु अर्ता, ओनगा बतले हिलाकुंटा आता. 15 अदुनहाटीं ओर आ देसेमता वरोर मनकनगा जीतम मत्तोर. आ मनकल ओना पोलाल्कुने पद्दीं मेहालय ओन लोहचितोर.a 16 पजा ओर पेडल पद्दीं मेयाना मेतातुन तिंचि पीर निहकन बारे इंचि इन्कुंदुर, गानि अद मेता इंका ओनकु बोरे हिय्या हिल्लुर.”
17 “अस्के ओनकु लोता मति वाता, नावा बाबानगा बच्चुरो जीतागाह्कु मंतुर, ओर तिंडि तिनना गानि मारो आनि नना बारे इगे कर्वुंक हासेके मंतन. 18 नना ई देसेम होळसि, नावा बाबानगा मल्सि दांतन आनि होंचि इंतन, ‘बाबा, स्वर्गमता पेनदुक आनि नीकु विरोदमते नना पापम कीतन. 19 इंदके नना नीवा मर्रिन लायक हिल्लेन गानि निहगा नाकुन नीवा जीतागानलेह्का इर्कुन इंचि इंतन,’ इल्हा इनकुत्तोर. 20 पजा ओर अगटाल ओना बाबोनेके पेय्सतोर. पजा ओर ओना बाबाना लोतुक वेल्लेन लक्कु मत्तोर अस्के ओना बाबाल ओन हूळतोर. मर्रिन हूळसि बाबोंक वेल्ले पापम अन्पिस्ता. अदुनहाटीं ओर एदुर वित्सि होंचि ओन चातिक अदमुकुत्तोर आनि बुरतोर. 21 अस्के मर्रि बाबोन, ‘बाबा, स्वर्गमता पेनदुक आनि नीकु विरोदमते नना पापम कीतन. इंदके नना नीवा मर्रिन लायक हिल्लेन,’ इत्तोर.”
22 गानि बाबाल ओन लोन तच्चि, जीतगाह्कुन तोनि, बिराना होंचि बेसता कपडीं तच्चि इन्कु केरहट, ईना वेलदुक उंदि मुद्दा दोस्सट आनि काल्कुंक हेरपुह्क केरहट.b 23 अल्हेने बेस बल्सता कुर्रातुन तच्चि कोय्यट आनि अदुन तिंचि मनम कूस आकोम. 24 बारित्ते, नावा मर्रि नहागटाल वेल्लेन लक्कु होंचि हासोत्ताप मत्तोर, इंदके ओर मल्सि वातोर. तप्सोंचि मत्तोर गानि इंदके दोर्कतोर, इंचि इत्तोर. इल्हा ओर कूस आयालय दल्गुतुर.
पेद्दा मर्रि होंग आंतोर
25 “पजा बतल आता इत्ते, ओना पेद्दा मर्रि नेदहेके होंचि मत्तोर. ओर नेदाल लोन वायानेंके लोता दग्गेरे एवतोर अस्के ओन्कु पाटां पारानद, एगरानद अल्किर केंजा वाता. 26 केंजा वातस्के ओर वरोन जीतागान केयसि, लोन बतल जर्गुसंता? इंचि पूसकीतोर. 27 अस्के आ जीतागाड, ‘नीवा तम्मुर बेस मल्सि वातोर. अदुनहाटीं नीवा बाबाल, बेस बल्सता कुर्रातुन कोय्या वेहातोर,’ इंचि इत्तोर.”
28 “इद पोल्ले केंजसि पेद्दा मर्रिंक इरगा होंग वाता. आनि ओर लोप्पो होळयोन इंचि पलातेन मत्तोर. अस्के ओना बाबाल पलाते वासि, ओन समजांचलय दल्गतोर. 29 गानि पेद्दा मर्रि बाबोन, इच्चुं वर्सानाल नना नीवा सेवा कीसेके वातन, निवद बद्दे पोल्ले तेंडसि पोहाहिल्लेन. गानि नावा दंटातोरतोनि कलियसि कूस आयालय, बस्केने नाकु निमे उंदि एटि पोरिनगुडा हिया हिल्लिन. 30 गानि नीवा ई मर्रि, नीवा सम्सारमतुन बोगम कबाह्कुने पूरा नासडेम कीतोर, ओनाहाटीं निमे बेस बल्सता कुर्रातुन कोय्या वेहतिन, इंचि इत्तोर.”
31 “इत्तस्के ओना बाबाल, नावा पेडा, निमे बस्केळकु नावातोनि मनांतिन, आनि नहगा बतल-बतल अय्ते मंता, अद अंता पूरा नीवादे आंदु. 32 गानि ईर नीवा तम्मुर वेल्लेन लक्कु होंचि हासोत्ताप मत्तोर, इंदके मल्सि वातोर. तप्सोंचि मत्तोर गानि इंदके दोर्कतोर. अदुनहाटीं मनम कूस आयमळ गावाले इत्तोर.” इल्हा वेहचि येसु वेसोड वेहमळ महातोर.