येसु वरोर परिसिना लोन दांतोर
14
1 उंदि नोमकेम रोजुननाडु येसु परिसि अदिकारिल्कुनाल वरोर अदिकारिना लोन गाटो तिनालय होत्तोर. अगा मत्तोर अंटोर लोकुल्कु येसुन बदन्ना पोल्लेते दोर्का पियालय ओनहेके बेस हूळसेके मत्तुर. 2 अगा येसुना मुन्ने वरोर काल्क-कय्क तोयाना बिमार मत्ता मनकल मत्तोर. 3 अस्के येसु, “नोमकेम रोजुननाडु बिमार मत्तोर्कुन बेस कियमळ दर्मसास्त्रम परकारम बेसा, बेस आयोना?” इंचि दर्मसास्त्रम कराहना गुरुल्कुन आनि परिसिल्कुन पूसकीतोर. 4 गानि ओर बतले वळकाकोंटा चुपचाप मत्तुर. पजा येसु आ तोयसि मत्ता मनकनपोर्रो कय ताससि ओन बेस कीतोर आनि अगटाल होना वेहतोर. 5 आ मनकल होत्ता पज्जो येसु ओर्कुन, “मीवाव्टेटाल बोरादन्ना गाडदि आयि कोंदा आयि नोमकेम रोजुननाड कुहिते अर्ते दान मिमेट अदे रोजुने पलातुक तेंडिरा?” इंचि पूसकीतोर. 6 अयना ओर मात्रम येसुंक जवाब हिया परा हिल्लुर.बस्केळक सिन्नागासि मनना
7 पजा अगा बोजनमहाटीं वाता मनकलोर्कु, पेद्दा मनकलोर उद्दाना जेगां पह्कीसि उद्दालय हूळुंदुर. अदुन हूळसि येसु ओर्कु इल्हा वेहतोर. 8 “बोरन्ना मीकुन मरमिने गाटो तिनालय केयतस्के मिमेट होंचि पेद्दा मनकलोर उद्दना जेगाते उदमट. बारित्ते मीकुन बोर मनकल अय्ते केयतोरो ओर मीकन्ना एक्को कदर मत्ता मनकनगुडा केयसि मनानुर. 9 पजा मीकुन इव्वुर्कुन केयता आ मनकल मिहगा वासि, ‘निमे उदिसि मनना जेगाते ईन उद्दाहीम’ इंचि मीकुन अगटाल तेहानुर. अस्के मीवद सिग्गु होंचि अंटोरा मुन्ने सिन्नाल्क उद्दाना जेगाते होंचि हिळु उद्दा पींता. 10 अदुनहाटीं बोरन्ना मीकुन गाटो तिनालय केयांतोर अस्के मिमेट होंचि, सिन्नाल्क उद्दाना जेगाते हिळु उदिसि मंटु. बस्के अय्ते मीकुन केयता मनकल वासि मीकुन, ‘दादा, इगेटाल तेदसि आ बेसता जेगाते होंचि उद्दा,’ इंचि वेहनुर अस्के मीवातोनि कलियसि गाटो तिनना अंटोर हेडमितोरा मुन्ने मीकु बेस कदर दोर्कार. 11 बारित्ते, बोरय्ते ओनद ओरे ‘नना पेद्दोन’ इंचि वेहकुंतोर, ओन पेन सिन्ना कियार आनि बोरय्ते ‘नना सिन्नोन’ इंचि वेहकुंतोर, ओन पेन पेद्दा कियार.”
मीकु इनाम दोर्कंता
12 पजा येसुन बोरय्ते केयतोरो आ मनकंकगुडा येसु उंदि पोल्ले वेहतोर. “निमे नर्का-पिय्यल बस्के बोजनम हियिना आ बोजनमते नीवा दंटागाह्कुन, नीवा दादल-तमुह्कुन, जीवातोर-हेडमितोर्कुन आनि मीवा पक्का लोह्कुना सिरमंत लोकुल्कुन केयुमा. ओर्कुन केयते, निमे ओर्कुन केयताप ओरगुडा नीकुन केयांतुर आनि इल्हा नीवा रुनम aतीरंता. 13 ओर्कुन केयानदानकन्ना निमे गरिबोर्कुन, गुड्डोर्क-गूनोर्कुन, ताका परवोर्कुन केया. 14 अस्के नीवा रुनम तीरसालय ओर नीकु बतल हिया पर्रुर. गानि पेनदा नदरते सत्तेमंतुल्क मत्तोर हासि मर्रा जीवाते तेदतस्के पेनहेंदाल नीकु नीवा इनाम तप्पाकोंटा दोर्कंता.”
उंदि पेद्दा बोजनमता वेसुड
15 येसु इत्ता आ पोल्लेतुन केंजसि, उद्दिस गाटो तिनानोराव्टेटाल वरोर मनकल येसुन, “पेनदा राज्येमते उद्दिस बोजनम कियना मनकल आसिर्वादम दोर्कुतोर आंद,” इंचि इत्तोर.
16 अस्के येसु ओन्कु वेसुडते इल्हा वेहतोर: “वरोर मनकल पेद्दा बोजनम इरतोर आनि आ बोजनमकु वेल्लेन मंदितुन केयतोर. 17 गाटों-कुसरीं वेतस्के, ‘सरे! बोजनम अय्ते तयार आता, मनोम बोर्कुन अय्ते केयतोम आ मनकलोर्कुन होंचि केयाट,’ इंचि आ मालक ओना जीतागान लोहतोर.”
18 “गानि आ जीतागाड बोनगा होनिना ओर अंटोर रकारकाल्कुना कारनाल्क वेहचि तप्पिच्कुत्तुर. ओराव्टेटाल मोदाला कलियतोर, नना उंदि पूना पोलम अस्तन, नाकु दान हूळापींता, निमे बतल इनिना बेसे गानि नना वाया परोन, नाकुन माप कीम इत्तोर.”
19 “इंका वरोर, ‘नना हेय्यूं जोडीं कोंदां अस्तन, अव बल्हा कबळ कींतंगों नाकु अवुन हूळापींता. नाकुन माप कीम, नना वाया परोन,’ इत्तोर. 20 मर्रा इंका वरोर, ‘नना इंदके-इंदकेन मरमीं आतन, अदुनहाटीं नना वाया परोन,’ इंचि इत्तोर.”
21 “अस्के आ जीतागाड मल्सि वासि जर्गुतद अंता ओना मालकुंक वेहतोर. अस्के मालकुंक इरगा होंग वाता. पजा ओर अदे होंगुने ओना जीतागान, निमे बिराना सहरता बजार-बजार, मूला-मूलाक होंचि गरिबोर्कुन, गुड्डोर-गूनोर्कुन आनि कुंटोर्कुन इग्गे केयकुंचि वा, इंचि वेहतोर.”
22 “अस्के जीतागाड मालक वेहतापे कीतोर. पजा मर्रा मल्सि वासि मालकुनतोनि, मालक, निमे वेहतापे नना होंचि केयसि तत्तन. अय्नागानि इंका वेल्लेन जेगा मिग्लिस मंता, इंचि इत्तोर.”
23 “अस्के मालक ओना जीतागान, पका पीसि मत्ता नाह्कुने होंचि पोलाल्कुने बजारकुने मत्ता लोकुल्कुन बतिमलाडसि पीसि वा. नावा लोन पुरागा निंडिसि मनगोम अचोने. 24 नना मीकु निजम वेहचंतन, नना मुन्ने केयसि मत्ता वरोर मनकलगुडा नना हीता बोजनमता रुसि हूळा परुर, इंचि इत्तोर.”b
पिलान परकारम पिसवर मनना
25-26 येसुनतोनि वेल्लेन मंदि लोकुल्क ताकिस वासेके मत्तुर. अस्के येसु ओराहेके तिरियसि इल्हा वळकालय दल्गतोर: “नहगा वांतन इंचि इनकुत्तोर बोरन्ना आयिर, ओर ओना यावन-बाबान, मुत्तो-पिलाल्कुन, तम्मुर-तादन, तक्काह्क-हेलाह्कुन, इंका ओना जीवातुन एक्को पावरम कीते, ओर नावा सिस्युड आया परोर. 27 अचोने आयका बोर ओना क्रुस पीसि ताकोनc इंतोर, ओरगुडा नावा सिस्युड आया परोर.”
28 “मीवाव्टेटाल बोरन्ना आयिर, उंदि एत्तुंक एत्तु मिद्दे दोहंतन इन्कुत्ते, ओर मोदाला आरामते उद्दिसि इद मिद्देतुन दोहालय बच्चोन वेल्ले कर्सु वायार? इंका बतल-बतल अय्ते गावालेनो, अव अन्नि मंतंगां मरि हिल्लेंगां? इवुना बारेमते विचारम किय्योरा? कींतोर. 29-30 ओक्कला अल्हा कियाकोंटे ओर पायवा अय्ते दोहांतोर गानि मिद्देता कबळ मात्रम पुरागा किया परोर. असंटास्के अदुन हूळतोर अंटोर ओन कारेड्डाल्क कीसेके, अद हूळट रो! ई मनकल मिद्दे दोहालय अय्ते सुरुव कीतोर गानि पुरागा दोहा पराहिल्लोर, इंचि इंतुर.”
31 “हिलाकोंटे, इसंटोर बोरन्ना राजाल मंतोरा? बोरय्ते, ‘नना पदि वेय्कुना सिपाइल्कुन पीसि इरवै वेय्कुना मंदि सिपाइल्कुन गेल्सा परांतना?’ इंचि गिच्चचोगुडा विचारम कियाकोंटा लडाइ कियालय दांतोर! 32 ओक्कला अल्हा कीते आ राजाल बोनतोनि अय्ते लडाइ कियानद मंता, ओना सिपाइल्क लक्कु मनानेंके इच्चुर विस्वासमता सिपाइल्कुन एदुर लोहचि सांति-समादानम कियना विचारम कींतोर. 33 इल्हेने मीवाव्टेटाल बोरन्ना आयिर, मिहगा मत्तव अन्नि आस्ति-पास्तिन होडसोन इंतोर, ओर नावा सिस्युड आया परोर.”
रुसि हिलुवा होव्वोर