पापमताल मनसु मार्सकुंटु
13
1 अदे वेलाते अगा मत्ता लोकुल्कुनाल इच्चुर लोकुल्क वासि येसुंक, “गालिल एरियाता इच्चुर मनकलोर गुळिते मोक्कु हीसेके मननेंके पिलातुस ओना सिपाइल्कुन लोहचि ओर्कुन हव्का वेहतोर. आ सिपाइल्कु ओर्कुन गुळितेन हव्कुतुर. इल्हा पिलातुस ओरा नेत्तुरतुन मनोम मोक्कु हियना नेत्तुरते कल्पतोर,” इंचि वेहतुर. 2 अस्के येसु ओर्कु इल्हा जवाब हीतोर, “गालिल एरियाताल वाता ई मनकलोर्कुंक इसंटा हामुर वाता अय्ते, ई मनकलोर गालिल एरियाता वेरे मनकलोर्कुंकन्ना एक्को पापम कीतुर इंचि मिमेट इन्कुंचंतिरा? 3 नना वेहासेक! अल्हा बिल्कुले आयो. गानि पापमताल मनसु मार्सकुंचि पेनदाहेके तिरियाकुंटे मिमेटगुडा ओरालेसींगे हासि नासडेम आंतिर. 4 सरे इंदके वेहाट! सिलो इनना गोपुरम aकूलसि अर्ताहेंके पद्देनमिदि मंदि मनकलोर हातुर. अय्ते ई गोपुरम कूलता वेलाते येरुसलेमते मत्ता वेरे मनकलोर्कुंकन्ना हासोत्ता ई पद्देनमिदि मनकलोर एक्को तप्पु कीतुर इंचि इन्कुंचंतिरा? 5 हिल्ले. नना मीकु वेहनद बतल इत्ते, पापमताल मनसु मार्सकुनाकुंटे मिमेट अंटोरगुडा ओरालेसींगे हासि नासडेम आंतिर.”कबळक ओज्जुवा मरा
6 ओर्कु बेस तेळियनाहाटीं पजा येसु इंकुंदि वेसुड वेहालय सुरुव कीतोर. “वरोर मनकल ओना अंगुर तोटाते उंदि अंजिर मरा वाटतोर. उंदि रोज अद मरा कायां हादतना, हादा हिल्लेना, इंचि हूळालय होत्तोर, गानि अदुंक कायां हादसि मनाहिल्लें. 7 अस्के आ मनकल ओना तोटाते कबळ कियना जीतागानकु, हुळा, ई अंजिर मरा कायां हादता बारे इंचि नना मूडु वर्सानाल इगे दीन हूळालय वासंतन, गानि दीनकु बस्केन उंदि काया इंका नाकु दिस्सा हिल्ले. इसंटा मरातुन इर्सि बता पायदा? नर्कीसि पोहा, इंचि वेहतोर. 8 अस्के आ जीतागाड, मालक, ई उंदि वर्सामेड मन्निकांटी. नना दीन सुट्टु तव्सि बेस एरवु वाटंतन. 9 अस्केनना हादते सरे, हिलाकोंटे नर्कीसि पोहा वच्चु,” इंचि इत्तोर.
नोमकेम रोजुननाडु येसु उंदि मुरताटुन बेस कींतोर
10 उंदि नोमकेम रोजुननाडु येसु उंदि दर्मसास्त्रम कराहना लोते कराहसेक मत्तोर. 11 देय्यम पीताहेंका पद्देनमिदि वर्सानाल बिमार अर्सि मत्ता उंदि मुरतळ अगा मत्ता. दाना नळि वंकर आसि गूनि पेय्सि मत्ताहेंका दान्कु बेस नित्ता वायाकोंदु. 12-13 येसु दान हूळसि ओना दग्गेर्क केयतोर. केयसि, “बाई! निमे नीवा रोगमताल पलाते अरतिन,” इंचि, पजा दाना तलापोर्रो कय इरतोर. कय इरता इरमळे अद बेस नित्तुता, आनि पेनदुन तल्सुकुनालय दल्गुता.
14 बिमार मत्ता मुर्ताटुन नोमकेम रोजुननाडु येसु बेस कीताहेंका दर्मसास्त्रम कराहना लोता अदिकारिंक इरगा होंगु वाताb. अस्के ओर लोकुल्कुन, “कबाह्क कियालय उंदि वारमते हारूं रोजकु मंतां गदा! अय्ते आ रोजकुने वासि मिमेट मीवा बिमारकुनाल बेस आम्टु, गानि नोमकेम रोजुननाडु वासि आयो,” इंचि इत्तोर.
15 अस्के येसु जवाबुने ओर्कुन, “अरे डोंगि लोकुरिटा, नोमकेमनाडु मीवाव्टेटाल हरेक मनकल कोंदातुन आयि गाडदितुन आयि लेहाकुंचि एर उहालय ओयिरा? 16 अय्ते पद्देनमिदि वर्सानाल पेद्दा देय्यम पीसि मत्ता अब्राहामुना वंसमता ई मुरताटुन, नोमकेम रोजुननाडु बेस कीते इव्टे तप्पु बतल मंता?” इंचि इत्तोर.
17 येसु वळकुता ई पोल्लें केंजसि बोर लोकुल्क अय्ते ओना विरोदमते मत्तुरो, ओर्क अंटोर्क सिग्गु वाता. गानि येसु कीता इचंत्रम आयना कबाह्कुन हूळसि लोकुल्क मात्रम इरगा कूस आतुर.
पेनदा राज्येम बल्हा मनंता?
18 पजा येसु इल्हा वेहालय सुरुव कीतोर. “पेनदा राज्येम बल्हा मनंता? आनि नना दान बदुनलेह्का मंता इन्कन? 19 पेनदा राज्येम उंदि आवाल्कुना पेडेतालेह्का मंता. आ पेडेतुन वरोर मनकल ओना तोटाते ओसी वाटतोर. अद मोलिय्सि बेरस्ता आनि पेद्दा मरा आता. अस्के परियाना पिट्टें दाना पंगांक गूडां दोह्कुत्तां.”c
20 येसु मर्रा इल्हा वेहालय दल्गतोर. “नना पेनदा राज्येमतुन बदुनलेह्का मंता इंचि इन्कन? 21 बदो उंदि मुरतळ पुल्लटा तोळ पिंडितुन मूडु तव्वना पिंडिते कल्पुता. अदुनहाटीं आ पिंडि अंता पुल्लगा आता. पेनदा राज्येमगुडा इल्हे आ तोळ पिंडि लेह्का मंता.” इंचि वेहतोर.
इर्कुटोम हर्रि
22 येसु येरुसलेम होननेंके वेल्लेन नाह्कुने आनि सहरकुने होंचि अगाटा लोकुल्कुंक पेनदा पोल्लें कराहसेक होत्तोर. 23 अस्के बोरो वरोर मनकल येसुन, “सामि, पापमताल मुक्ति इच्चुर मंदिके दोर्कंतना?” इंचि पूसकीतोर.
24 अस्के येसु ओन्कु इल्हा वेहतोर. “मिमेट बस्केळक इर्कुटोम हरदाल होळियालय इरगा कोसिस कीम्ट.d नना वेहानद बतल इत्ते, आ हरदाल वेल्ले मंदि होळियालय हूळांतुर गानि ओर होळिया परुर. 25 लोता मालक तेदसि उंदि मल्का तल्पु वाटानय्ते मिमेट पलाते नित्तिसि तल्पुन टोक-टोक कीसेके, ‘सामि मावाहाटीं तल्पु तेंडा,’ इंचि इंदकिर. गानि अस्के ओर मीवातोनि, ‘मिमेट बगाटाल वातिर? नना मीकुन एरपाट किय्योन,’ इंचि इंतोर. 26 अस्के मिमेट, ‘नीवातोनि कलियसि मोमोट तित्तोम, उट्टोम. इंका निमे मावा नाटे वासि माकु बजारकुने पेनदा पोल्लें कराहतिन,’ इंचि इंदकिर. 27 गानि ओर मात्रम, ‘नना मीकु वेहासेक मिमेट बगाटाल वातिरो, बोर आंदिरो नना मीकुन एरपाट किय्योन. अरे कराब कबाह्क कियना लोकुरिटा, नहगाटाल लक्कु होंटु,’” इंचि इंतोर.
28 “पेनदा राज्येमते अब्राहाम, इसहाक, याकोब इंका अंटोर पेनदा कबुरतोर्कुन मिमेट हूळांतिर, गानि मीकुन मात्रम अगटाल, बस्केळक अळमळ आनि पल्कु कोर्कसेके मनना जेगाते दोब्बिसि हियमळ जर्गंता. 29 अस्के बूमिता नालूं मूलानाल इत्ते उत्तर-दक्सिन, पुर्व-पस्चिमताल लोकुल्क पेनदा राज्येमते वांतुर आनि वासि ओरा जेगाते गाटो तिनालय उद्दांतुर. 30 अयना उंदि पोल्ले मिमेट बेस केंजट! इंदके इद बूमिते बोर मनकलोर अय्ते तक्को विलुवा दोर्कीसि सिन्ना मंतुरो, ओर पेनदा राज्येमते पेद्दोर आयनुर, आनि इंदके इद बुमिते बोरय्ते पेद्दा मंतुरो, ओर अगा सिन्नोर आयनुर.”
येरुसलेमते येसुंक हामुर वांता
31 अच्चोटेन इच्चुर परिसिल्क वासि येसुन, “नीकुन अंतिपस हेरोद राजाल हव्कालय हूळसंतोर, निमे इगेटाल बद्दना वेरे जेगाते पेय्सि होन,” इंचि इत्तुर.
32 अस्के येसु ओर्क इल्हा वेहालय दल्गतोर. “सरे! मिमेट होंचि आ नक्काकु वेहट गदा, ‘इय्याला नाळी नना देय्याल्कुन पेच्हासि गेदमंतन, बेस हिलवोर्कुन बेस कींतन, आनि मन्ने नावा कबाटुन महांतन.’ 33 अयना येरुसलेम सहरता पलाते वरोर पेनदा कबुरतोंक हामुर वायमळ बेस आयो. अदुनहाटीं इय्याला, नाळी, मन्ने नाकु ताकसेकेन मना पींता.”
34 पजा येसु येरुसलेमता लोकुल्कुन मति कीसि, इल्हा इत्तोर. “ए येरुसलेमतुना! निमे पेनदा कबुरतोर्कुन हव्कंतिन, इंका पेन निहगा लोहचीतोर पोर्रो बंडां हुक्कंतिन. कोर्रु दाना पीसेन रेक्काना हिळु बल्हा मुच्चंतनो, अल्हेन ननागुडा नीवा पिलाल्कुन जमा कियना इंचि बच्चुंगो मल्कां कोरतन. गानि निमे मात्रम कोराहिल्लिन. 35 गानि केंजा! नीकुन पेन होळसिसि होन्नार. नना नीकु वेहनद बतल इत्ते, ‘सामिना पोर्रोलते वायानोर वेल्लेन आसिर्वादम दोर्कुतोर’ इंचि बदवेरदाका अय्ते वेहिनो अदवेरदाका निमे नाकुन मर्रा हूळिन,” इंचि इत्तोर.