योहान 13

येसु ओना सिस्युल्कुना काल्क नोर्रांतोर

1 इद दुनियातुन होळसि पेन बाबानगा मल्सि होनना वेला दग्गेर्क एव्ता इंचि, येसुंक दाटसि होनना पंडुगुंकन्‍ना मुन्‍नेन तेळियता. इद दुनियाते मनना ओना लोकुल्कुन ओर वेल्‍लेन पावरम कीतोर. आनि अद पावरमतुन आकिरदाका ओरपोर्रो हुपिच्‍चेकेन मत्‍तोर. 2 येसु आनि ओना सिस्युल्क नर्कटा वेलाते गाटो तिनालय उद्‍दिस मत्‍तुर. गानि गाटो तिन्‍नका मुन्‍नेन देय्यम, इस्कारियोत नाटेना सिमोन इनानोना मर्रि यहुदन लोप्पो वासि, येसुंक दोका हियालय ओन एक्‍किसता. 3 पेन बाबाल अन्‍नि अदिकाराल्क येसुना कय्दुक हीतोर, इंका ओर पेनदागटाल वातोर आनि पेनदागेन मल्सि दांतोर इत्‍तद अन्‍नि ओन्क एरपाटे मत्‍ता. 4 अदुनहाटीं ओर गाटो तिनालय उद्‍दिस मत्‍तागटाल तेदतोर. तेदसि, केरसि मत्‍ता अंगितुन तेंडतोर. तेंडसि उंदि सेल्‍लातुन नडिक हुटतोर. 5 पजा उंदि गमेलाते एर पीसि सिस्युल्कुना काल्क नोरसेके, नडिक हुटसि मत्‍ता सेल्‍लाते उस्मालय दल्‍गतोर. 6 अल्हा कीसेके ओर सिमोन पत्रुनगा वातोर. अस्के पत्रु, “निमे नावा काल्क बारि नोरसंतिन सामि?” इंचि येसुन पूसकीतोर. 7 अस्के येसु, “नना कियानद नीकु इंदके अर्तमायो, गानि मुन्‍ने-मुन्‍ने निके तेळियार,” इंचि इत्‍तोर. 8 पजा पत्रु, “निमे नावा काल्क बस्केन नोरमा,” इंचि इत्‍तोर. अस्के येसु, “नना गिंटा नीवा काल्क नोर्रकोंटे, निमे नावोन आया परिन,” इंचि वेहतोर. 9 अस्के सिमोन पत्रु, “अय्ते सिराप नावा काल्के आयो, नावा कय्‍कुन, नावा तल्‍लातुनगुडा नोर्रा सामि!” इंचि इत्‍तोर. 10 पजा येसु, “बोरय्ते एर तुंगतोर, ओर बेस साप मनंतोर. ओर सिराप काल्क नोरकुत्‍ते सालु. अल्हेन मिमेट बेस साप मंतिर, गानि मिहागटाल अंटोर बेस साप हिल्‍लिर,” इंचि वेहतोर. 11 ओन्क दोका हियानोर बोर इंचि, ओन्क एरपाट मत्‍ता. अदुनहाटीं ओर, “मिहागटाल अंटोर बेस साप हिल्‍लिर,” इंचि इत्‍तोर.

12 ओरां अंटोरा काल्क नोरमळ आता पजा, येसु अंगि केरसि ओर मुन्‍ने उद्‍दिस मत्‍ता जेगाते होंचि उद्तोर. उद्‍दिस इल्हा वळ्कालय दल्‍गतोर, “नना मीकु बतल कीतन, मीकु अर्तम आतना? 13-16 मिमेट नाकुन गुरु आनि सामि इंचि केयंतिर. नना गुरु आनि सामिन आंदुन, अदुनहाटीं मिमेट इनानद बरोबरे. नना गुरुन आनि सामिन आसिगुडा मीवा काल्क नोरतन. अय्ते मिमेटगुडा वरोना काल्क वरोर नोरसेके सेवा कियना. नना मीकु निजम-निजम वेहासेक, वरोर दासि मनकल ओना मालकुंकन्‍ना पेद्‍दा आयोर. अल्हेन वरोर कबुरतोर ओन लोहतोनकन्‍ना पेद्‍दा आयोर. नना बल्हा अय्ते कीतनो, अल्हेन मिमेटगुडा कियना इंचि, इद उंदि उदाहरन हुपिस्तन. 17 इंदके इव पोल्‍लें मीकु तेळियतां. अदुनहाटीं मिमेट इवुन पीसि ताकतिरित्‍ते, पेन मीकु आसिर्वादम हींता.”

येसु ओन्क दोका हियानोना बारेमते कुद्‍दु वेहांतोर

(मत्‍तयाल 26:20-25; मरकुस 14:17-21; लूकाल 22:21-23)

18 “नना मी अंटोरा बारेमते वळ्कसेक हिल्‍लेन. नना बोर्कुन अय्ते पेर्कुत्‍तन, ओरा बारेमते नाक बेस एरपाट. गानि, ना हारि तित्‍तोरे नाकु अड्‍डम आतोर, इल्हा दर्मसास्त्रमते रासि मत्‍ता पोल्‍ले पुरागा आयना इंचि इल्हा जर्गपींता. 19 इल्हा जर्गतस्के, ओन ननाने आंदुन, इंचि मिमेट विस्वासम कियनाहाटीं, इव पोल्‍लें जर्गका मुन्‍नेन मीकु वेहासेक मंतन. 20 नना निजम-निजम वेहासेक, नना लोहतोन, बोरय्ते स्वीकार कींतोर, ओर नाकुन इंका स्वीकार कींतोर. नाकुन स्वीकार कियानोर, ओर नाकुन लोहचीतोनगुडा स्वीकार कींतोर,” इंचि येसु इत्‍तोर.

21 इव पोल्‍लें वळकुळ आतस्के येसुंक मनसुने बादा अन्‍पिस्ता. पजा ओर, “नना निजम-निजम वेहासेक, मीवा लोप्पोटाल वरोर नाकुन दोकाते पीसि हींतोर,” इंचि इत्‍तोर. 22 येसु बोना बारेमते वळ्कतोरो इंचि तेळियका, सिस्युल्क वरोना मोकोम वरोर हूळकुत्‍तुर. 23 येसुना सिस्युल्कुनाल येसु बोन अय्ते पावरम कियुंदुरो, ओर येसुना दग्गेरेन उद्‍दिस मत्‍तोर. 24 अय्ते सिमोन पत्रु, “येसु बोना बारेमते इंचंतोरो पूस कीम,” इंचि ओन्क कय सय्गे कीतोर. 25 अस्के आ सिस्युड इंकिच्‍चो येसुनेके जर्गिसि येसुना रोमबोच्‍चेतगा तला इरसि, “ओर बोर आंदुर सामि?” इंचि पूसकीतोर. 26 अस्के येसु, “नना ई हारी तुकडातुन कुसिटे मुळ्हाचि बोनकय्ते हींतन, ओर ओरे आंदुर,” जवाब हीतोर. पजा हारि तुकडातुन कुसिटे मुळ्हाचि इस्कारियोत नाटेना सिमोनुना मर्रि यहुदांक हीतोर. 27 यहुदल हारि तुकडा एतता एतमळे, ओन देय्यम पीता. अस्के येसु यहुदन, “निमे कियनद बतलो, अद बिराना कीम,” इंचि इत्‍तोर. 28 गानि येसु ओन अल्हा बारि इत्‍तोर इत्‍ता संगति मात्रम अगा तिनालय उद्‍दिस मत्‍तोर्कुंक बोर्के अर्तम आया हिल्‍ले. 29 कोत्‍तना जोरा यहुदानगेन मनुंदु. अदुनहाटीं पंडुगुंक अम्‍सरम मत्‍ता बतलन्‍ना सामान अस्सि तर्रालय वेहतोर बारे, इंचि इच्‍चुर इन्कुत्‍तुर. इंकिच्‍चुर बारे, अव्टेटाल इच्‍चूं गरिब लोकुल्कुंक हीम इंचि वेहतोर आंद, इंचि इन्कुत्‍तुर. 30 पजा यहुदल हारी एत्‍कुंचि, बिराना पलाते होत्‍तोर. अस्के वेल्‍लेन नर्का आसि मत्‍ता.

येसु ओना हामुरता बारेमते वळ्कंतोर

(मत्‍तयाल 26:31-35; मरकुस 14:27-31; लूकाल 22:31-34)

31 यहुदल पलाते होतस्के, येसु इल्हा वेहालय दल्‍गतोर. “मनकना रूपमते पुटतोंक नाकु, कदर दोर्कना वेला इंदके एव्ता. नाकु जर्गना अन्‍निटवुनहेंदाल पेनदुक महिमाता कदर दोर्कार. 32 नावाहेंदाल पेनदुक महिमाता कदर दोर्कानय्ते, पेन नाकु दाना कदर हिय्यार. अद आल्सेम कियाकोंटा बिरानेन हींता. 33 नावा पिलाल्कनिटा! नना इंका गडसेम मीवातोनि मनंतन. पजा मिमेट नाकुन पह्ककिर. बल्हा नना यहुदिल्कुना पेद्‍दाल्कुंक, नना बगा दांतन, अगा मिमेट वाया परिर, इंचि वेहतनो, अल्हेन मीकु इंका वेहचंतन. 34 अदुनहाटीं नना मीकु उंदि पूना आदेस हीसंतन, मिमेट वरोंक-वरोर पावरम कीम्टु. नना मीकुन बल्हा पावरम कीतन, अल्हेन मिमेटगुडा वरोंक-वरोर पावरम कीम्टु. 35 मीवा वरोनद वरोर पावरम कियमळतुन हूळसि, मिमेट नावा सिस्युल्क आंदिर, इंचि अंटोर लोकुल्कुंक तेळियसि दांता,” इंचि येसु वेहतोर.

36 पजा सिमोन पत्रु, “निमे बेके दांतिन सामि?” इंचि पूसकीतोर. अय्ते येसु, “नना होनानगा, निमे इंदके वाया परिन. गानि नना होत्‍तंका पजोटाल वाकिन,” इंचि इत्‍तोर. 37 गानि पत्रु, “इंदके नना नितोनि बारि वाया परोन सामि? नीवाहाटीं नना नावा जीवा हियालयगुडा तयार मंतन,” इंचि इत्‍तोर. 38 अस्के येसु, “बतल! निमे नावाहाटीं जीवा हींतिना? नना नीकु निजम-निजम वेहासेक, निमे मूड मल्कां, नाकुन एरपाट किय्योन, इंचि इंदकिन, अस्केन गोगोड कूसार,” इंचि इत्‍तोर.