पेन बाबानहेके होनना हर्रि येसुए
14
1 इंका येसु, “मिमेट मीवा मनसुन कस्टमते वाटमट. पेनदापोर्रो विस्वासम इर्रट, इंका ना पोर्रोगुडा विस्वासम इर्रट. 2 नावा बाबाना लोते वेल्लेन अर्रां मंतां. ओक्कला हिलाकोंटे मंचि मत्ते, मीवाहाटीं जेगा तयार कियालय होंचंतन इंचि, नना मीकु वेहचि मन्नेन. 3 नना होंचि अवुन सदुरतंका, मल्सि वासि मीकुन ओंतन. अस्के मनानगेन, मिमेटगुडा मंदकिट. 4 आनि नना होनना हर्रि अय्ते मीकु एर्का मंता,” इंचि सिस्युल्कुन इत्तोर.5 अस्के तोमल, “निमे बेके होंचंतिनो माकु अय्ते एरपाटे हिल्ले गुरु! असोंटस्के, माकु नीवा होनना हर्रि बल्हा तेळियंता?” इंचि इत्तोर. 6 पजा येसु, “हर्रि, सत्तेम, आनि पिसवर ननाने आंदुन. नाकुन होळसि बाबानगा बोरे एव्वा परोर. 7 नना बोन आंदुन, इंचि मिमेट एरपाट कीसि मत्ते, नावा बाबान इंका मिमेट एरपाट कीसि मन्नेर. इंदकेटाल मिमेट ओन एरपाट कींतिर, आनि ओन हूळतिरगुडा,” इंचि वेहतोर.
8 अस्के पिलिप, “सामि, माकु बाबान हुपिस्ते, अचोने सालु,” इंचि येसुन इत्तोर. 9 अस्के येसु ओन्क इल्हा वेहतोर, “नना इच्चूं रोजकुनाल मीवातोने मंतन, अयना निमे नाकुन एरपाट किया हिल्लिना पिलिपु? नाकुन हूळतोर, ओर बाबान हूळतोर. अयना, माकु बाबान हूप्सा, इंचि निमे बल्हा इंचंतिन? 10 नना बाबाना लोप्पो आनि बाबाल नावा लोप्पो मंतोर. इदुन निमे विस्वासम कीसेक हिल्लिना? नना वेहना पोल्लें ना इच्चटा नना वेहसेक हिल्लेन, गानि नावा लोप्पो मनना नावा बाबाल, ओना कबाह्कुन नाहेंदाल कीकुंचंतोर. 11 नना बाबाना लोप्पो, बाबाल नावा लोप्पो मंतोर इत्ता पोल्लेपोर्रो मिमेट विस्वासम इर्रट. हिलाकोंटे नना कियना कबाह्कुनहेंदाल अयना नाकुन विस्वासम कीम्टु. 12 नना मीकु निजम-निजम वेहासेक, बोरय्ते नाकुन नम्मंतुर, ओरगुडा नना कियनसोंटा कबाह्क कियानुर. अचोने आयका नना कियना कबाह्कुंकन्ना पेद्दा-पेद्दा कबाह्क कियानुर. बारित्ते नना नावा बाबानाहेके होंचंतन. 13 अदुनहाटीं, मिमेट नावा पोर्रोल्ते बतल तल्किना, नावा बाबांक कदर वायानाहाटीं नना अदुन कींतन. 14 ओक्कला मिमेट ना पोर्रोल्ते बतल तल्किना, अद नना कींतन.”
पवित्र आत्मा हींतन इंचि येसु पोल्ले हींतोर
15 “मिमेट गिंटा नाकुन पावरम कीते, नना वेहता आदेसकुन पीसि ताकट. 16 अस्के बाबांक विनंति कींतन. आनि बाबाल मीवाहाटीं बस्केळ्क मीवातोनि मनालय इंका वरोर सहायम कियानोन हींतोर. 17 आ सहायम कियानोर इत्ते, पवित्र आत्मा मीकु सत्तेमतुन हुप्संता. दुनियातोर दानहेके हूळसेक हिल्लुर, दान एरपाट कीसेक हिल्लुर. अदुनहाटीं अद दुनियातोर्क दोर्को. गानि मिमेट दान एरपाट कींतिर. बारित्ते अद मीवातोनि मंता आनि पजा मीवा लोप्पेन मन्नार. 18 नना मीकुन दिक्कु हिलवोरलेह्का होळसि होन्नोन, नना मिहगा मल्सि वांतन. 19 इंका कोन्नि रोजकु आता पज्जो, दुनियातोर नाकुन हूळा परुर, गानि मिमेट नाकुन हूळा परकिट. बारित्ते नना जीवातेन मनंतन, आनि मिमेट इंका जीवातेन मंदकिर. 20 अल्हा जर्गतस्के, नना बाबाना लोप्पो, मिमेट ना लोप्पो आनि नना मीवा लोप्पो मंतन इंचि मीकु तेळियार. 21 बोरय्ते नना वेहता आदेसकुन स्वीकार कीसि अवुन पीसि ताकंतोर, ओरे नाकुन पावरम कियानोर आंदुर. आनि बोरय्ते नाकुन पावरम कींतोर, ओन नावा बाबालगुडा पावरम कींतोर. पजा ननागुडा ओन पावरम कीसि, नना कुद्दु ओन्क दिस अरकन,” इंचि येसु वेहतोर.
22 पजा इस्कारियोत नाटेनोर आयका, इंका वरोर यहुदल, “सामि, निमे माके बारि दिस अरकिन? दुनियातोर्कुंक बारि दिस्सिन?” इंचि पूसकीतोर. 23 अस्के येसु ओन्क जवाब हीतोर, “नाकुन पावरम कियानोर अंटोर नना वेहता पोल्लेन पोर्रो ताकंतुर, आनि नावा बाबाल ओर्कुन जीवा कींतोर. असंटोनगा मोमोट होंचि ओना लोप्पो जेगा पींतोम. 24 नाकुन पावरम कियवोर, ओर नावा पोल्लेन पोर्रो ताकोर. आनि मिमेट केंजना पोल्लें नावा आयों, गानि नाकुन लोहचीता बाबानव आंदुं. 25 इव पोल्लें नना मीवातोनि मननेंकेन वेहतन. 26 अय्नागानि, बाबाल नावा पोर्रोल्ते लोहना सहायम कियानोर, इत्ते पवित्र आत्मा, मीकु अन्नि पोल्लें करहार. अचोने आयका, नना मीकु वेहता अन्नि पोल्लें अद मीकु मति कीसि हिय्यार. 27 नना मीकु सांतितुन हीसि होंचंतन. दुनिया हियानसोंटा सांति आयो, गानि नना नावा सांतितुन मीकु हीसंतन. अदुनहाटीं मिमेट मीवा मनसुन कस्टमते वाटमट, वेरिया हियमट. 28 नना लक्कु होंचंतन, गानि मर्रा तिरियसि मीहेके वांतन, इंचि नना मीकु वेहचि मत्तन, अदुन मिमेट केंजतिरे गदा! अय्ते, मिमेट नाकुन निजम पावरम कियानय्ते, नना बाबानाहेके होंचंतन इंचि वेहतस्के मिमेट कूस आसि मंदकिट. बारित्ते बाबाल नाकन्ना पेद्दोड आंदुर. 29 इव अन्नि पोल्लें निजम आयनुं अस्के, मिमेट विस्वासम कियगोम इंचि, नना इव पोल्लें जर्गका मुन्नेन वेहतन. 30 इंका मीतोनि एक्को वळकोन. बारित्ते दुनिया पोर्रो राज्येम एलाना अदिकारि वासेकेन मंतोर. वासि अय्ना नावा पोर्रो ओन्क बतले अदिकारम हिल्ले. 31 अयना, नना बाबान पावरम कींतन इत्ता पोल्ले, दुनियाक तेळियगोम इंचि, बाबाल नाकु वेहतापे नना कींतन. सरे तेदट! मनम इगेटाल दाकोम,” इंचि येसु इत्तोर.