येसुना दंटगाड लाजर हांतोर
11
1 लाजर पोर्रोल्तोर वरोर मनकल बीमार अर्सि मत्तोर. ओर ओना मरियम आनि मार्ता इनना अक्काह्कुनतोनि बेतानि इनना नाटे मनुंदुर. 2 मुन्ने उंदि मल्का उंदि मुरतळ, सामिना काल्कुंक अत्तर निय होकसि दाना केल्कुने उसुमता, अद इदे मरियम आंद. ई बीमार अर्ता लाजर दाना तम्मुरे आंदुर. 3 अदुनहाटीं अव रोंड अक्काह्क, “सामि, नीवा पावरमगल्लोड वरोर, बीमारते मंतोर,” इंचि येसुंक कबुर लोहतां.4 अद कबुर केंजसि येसु, “लाजरुंक अद बीमारि ओन हव्कीसि ओयालय वाया हिल्ले, गानि पेनदा पेदातनमतुन हुप्सालय वाता. इदुनहेंदाल पेनदा मर्रिंक कदर दोर्कार,” इंचि इत्तोर.
5 येसुंक मार्ताल, दाना अक्कल आनि लाजर ईर इत्ते पावरम. 6 लाजर बीमारते मंतोर इत्ता कबुर तेळियिगानि येसु बद नाटे अय्ते मत्तोरो, अदे नाटे इंका रोंड रोजकु आगतोर. 7 पजा येसु, “वट, मनम यहुदिया राज्येम मल्सि दाकोम,” इंचि ओना सिस्युल्कुन इत्तोर.
8 गानि सिस्युल्क, “रब्बी, कोन्नि रोजकु मुन्नेन अगाटा यहुदि पेद्दाल्क नीकुन बंडाने तंचि हव्कालय हूळतुर. अय्ना निमे मर्रा अग्गेन दांतिना?” इंचि येसुन इत्तुर.
9 अस्के येसु, “पोद्दाला पन्नेंड गंटां मन्नोंगां? ई वेलाते ताकानोर दुनियाता वेलगुन हूळसेक ताकंतोर, इंचि ओना कादुक बतल दल्गो आनि ओर हिड अर्रोर. 10 गानि नर्काटा वेलाते ताकानोना कादुक मात्रम बतलन्ना दल्गिसि ओर हिड अर्रा परंतोर. बारित्ते ओना लोप्पो वेलगु मन्नो,” इंचि ओर्क वेहतोर.
11 इव पोल्लें आता पजा मर्रा येसु, “मना दंटगाड लाजर निद्रा होत्तोर, गानि ओन नना निद्रताल तेहालय दांतन,” इंचि सिस्युल्कुन इत्तोर. 12 अस्के सिस्युल्क, “सामि, ओक्कला ओर निद्रा होंचि मनानय्ते बेस आंतोर,” इंचि इत्तुर. 13 येसु लाजरना हामुरता बारेमते वळ्कतोर. गानि सिस्युल्क अय्ते लाजर निजम निद्रा होंचि आराम कीसंतोर इंचि इन्कुत्तुर. 14 अदुनहाटीं येसु ओर्क, “लाजर हासोत्तोर,” इंचि कुल्ला-कुल्ला वेहतोर. 15 वेहचि, “हासोत्तस्के नना ओनगा मना हिल्लेन. इद मी हाटींगे जर्गता, इंचि नना कूस मंतन. दीनहेंदाल मिमेट ना पोर्रो विस्वासम कीकिट. वट! इंदके मनम ओनगा दाकोम,” इंचि इत्तोर. 16 अस्के तोमल(ईन येमलa इंचिगुडा केयांतुर)पोर्रोल्ता वरोर सिस्युड, “दट! येसुनतोनि हायालय मनमगुडा दाकोम,” इंचि कळमता सिस्युल्कुन इत्तोर.
हातोर्कुनगुडा जीवा अराहना ताकत येसुनगा मंता
17 बेतानि नाटे एवतस्के, लाजरुन बोंदाते ताससि नालूं रोजकु आता, इंचि येसुंक तेळियता. 18 बेतानि नार येरुसलेम सहरताल दगेर-दगेरा मूड किलो मीटर्क लक्कु मंता. 19 तम्मुर हासोत्ताहेंका वेल्लेन दुक्कमते मनना मार्ता आनि मरियमुंक दैरनेम हियालय वेल्लेटोर यहुदिल्क वासि मत्तुर. 20 येसु वासंतोर इंचि मार्तांक तेळियतस्के ओन्क कलियालय अद एदुर होत्ता. गानि मरियम मात्रम लोने मत्ता. 21 मार्ताल येसुंक कलियसि, “सामि, निमे गिंटा इग्गे मंचि मत्ते, नावा तम्मुर हायाकोन्नेर. 22 गानि इंदके अय्ना बतल आयो. निमे पेनदुन बतल तल्कते अद, नीकु पेन हींता, इंचि नाकु एरपाट,” इंचि इत्ता.
23 अस्के येसु, “नीवा तम्मुंक मर्रा जीवा अर्रंता,” इंचि इत्तोर. 24 पजा मार्ताल, “हो सामि, हातोर अंटोर्क जीवा अर्रना आकिरता रोजुने, ओर मर्रा जीवाते तेदानुर इंचि नाकु एरपाट मंता,” इंचि इत्ता. 25 अद केंजसि येसु, “हातोर्कुन तेहानोन आनि जीवातुन ननाने आंदुन. ना पोर्रो विस्वासम कीतोर, हायिना गानि मर्रा जीवाते तेदांतुर. 26 जीवाते मननेंके ना पोर्रो विस्वासम इर्रनोर अंटोर्क बस्केन हामुर वायो. इद पोल्लेतुन निमे नम्मंतिना मार्ता?” इंचि दान पूसकीतोर. 27 अस्के अद, “हो सामि, पेनदा मर्रिन निमेन आंदिन, इंचि नना नम्मंतन. इंका इद दुनियाते वायना मत्तोर किरिस्तुनगुडा निमेन आंदिन.,” इंचि इत्ता.
28 इचोन वळ्कीसि अद अगटाल पेय्सि होत्ता. होंचि मरियमुन सपुडदाका पकाक केयता. केयसि, “गुरु वातोर, ओर नीकुन केयसंतोर,” इंचि वेहता. 29 मार्ताना पोल्ले केंजता केंजमळे मरियम बिराना तेदसि येसुनगा होत्ता. 30 येसु इंका नाटे होळिया हिल्लोर. मार्ताल ओन्क बगाय्ते कलियतनो, अदे जेगाते मत्तोर. 31 मरियमुंक दैरनेम हियालय दानतोनि लोते बोरय्ते मत्तुरो, ओर मरियमुन कुस्कुने तेदसि होननेंके हूळतुर. हूळसि, “अद लाजरुना बोंदातगा होंचि अळंता बारे,” इन्कुंचि ओरगुडा दाना पज्जेन होत्तुर. 32 येसु मत्ता जेगातगा मरियम एवसि, ओन हूळता. हूळसि ओना काल्कुन पोर्रो अरसि, “सामि, निमे इगे मंचि मत्ते ना तम्मुर हायाकोन्नेर,” इंचि इत्ता.
33 मरियम आनि दानतोनि वातोर अंटोर यहुदिल्कुना अळुळ हूळसि, येसुंक बादा अन्पिस्ता. मनसुने ओर वेल्लेन दुक्कमते मत्तोर. 34 पजा येसु, “ओन मिमेट बगा इरतिर?” इंचि पूस कीतस्के, “वासि हूळा सामि!” इंचि इत्तुर. 35 अस्के येसु अळतोर. 36 अस्के यहुदिल्क, “हूळट, लाजर इत्ते ओन्क बच्चोन पावरमो!” इंचि इत्तुर. 37 गानि इच्चुर लोकुल्क, “ईर मनकल, वरोर गुड्डिंक कळ्क दिस्सानाल कीतोर अय्ते, लाजरुन हामुरताल कापाळा पराकोन्नेरा?” इंचि इत्तुर.
हासोत्ता लाजरुंक येसु जीवा अराहंतोर
38 येसुंक मरुंदि मल्का मनसुने बादा अन्पिस्ता. पजा ओर लाजरुना बोंदातगा होत्तोर. अद बोंदा उंदि पडालेह्का मत्ता. आनि दाना सोर्रेक अड्डम उंदि बंडा दोब्बिस मत्ता. 39 पजा येसु, “अद बंडातुन तेंडट,” इंचि इत्तोर. गानि हासोत्तोना अक्कल मार्ताल, “सामि, ओर हासि नालूं रोज्क आसंता. अदुनहाटीं ओना सेत्ता इरगा गब्बु पीसि मंदगोम!” इंचि इत्ता.
40 अस्के येसु, “निमे विस्वासम कियानय्ते पेनदा पेदातनमतुन हूळकिन, इंचि नना नीकु वेहा हिल्लेना?” इंचि दान इत्तोर. 41 अदुनहाटीं ओर आ बंडातुन तेंडतुर. पजा येसु पोर्रो हूळसेके, “बाबा, निमे ना पारतना केंजताहाटीं, नीकु दन्यवाद. 42 निमे बस्केळ्के नावा पारतना केंजंतिन इंचि नाकु एरके. गानि नाकुन निमेन लोहतिन इत्तादुन, ना सुट्टु निलसि मत्ता लोकुल्क नम्मुगोम इंचि ओराहाटींगे नना ई पोल्ले वळ्कतन,” इंचि इत्तोर.
43 इल्हा वळकीसि येसु, “ए लाजर, पलातुक पेय्सि वा!” इंचि लगांचि केयतोर. 44 अस्के हासोत्ता लाजर पलाते वातोर, अस्के ओना कय्क-काल्क हामुर कप्पिडते हूट्टिस मत्ता, ओना मोकोमगुडा उंदि सेल्लाते हूट्टिस मत्ता. पजा येसु, “ओना कट्टुकु लेह्चि ओन होना हीम्टु,” इंचि इत्तोर.
येसुन हव्कालय यहुदिल्क पिलान कींतुर
45 येसु कीता अद कबळतुन हूळसि, मरियमुनगा वाता यहुदिल्कुनाल वेल्ले मंदि यहुदिल्क, येसुन नम्मुतुर. 46 गानि ओराव्टेटाल इच्चुर लोकुल्क मात्रम, परिसिल्कुनगा होंचि येसु बतल-बतल कीतोर अदुन वेहतुर. 47 अदुनहाटीं पेर्मालोर्क आनि परिसिल्क कलियसि उंदि पेद्दा पंचादि उपिस्तुर. उपिच्चि, “ओर मनकल अय्ते वेल्लेन अद्बूतामाता चिन्हां कीसि हुपिच्चंतोर. अय्ते मनम बतल कीकोम? 48 ओर कियानदुनंता मनम इल्हेन हूळसेके मत्ते, अंटोर ओने नम्मिसि ओन राजाल कींतुर. पजा रोम सरकारता सिपाइल्क वासि मना गुळितुन आनि मना लोकुल्कुन नासडेम कीसि पोहांतुर,” इंचि वळ्कतुर. 49 ओरव्टे वरोर कयपाल इनानोर मत्तोर. अद वर्सा ओरे पेद्दा पेर्माल मत्तोर. ओर, “मीकु बतले तेळियोना! 50 देसेमता अंटोर लोकुल्क नासडेम आयनदानकन्ना, लोकुल्कुनाहाटीं वरोर मनकल हाते, बेस आयोना!” इंचि इत्तोर.
51-52 सिराप यहुदि लोकुल्कुना पायदाहाटींगे आयो गानि, पूरा दुनियाते बेके-बेकेनो सिल्लर आसि मत्ता पेनदा लोकुल्कुन उंदि कियालय, येसु ओना जीवातुन हींतोर इत्ता पोल्लेतुन ओर वेहतोर. इद पोल्ले ओर ओना सतता विचारमताल वळ्का हिल्लोर, गानि अद वर्सा ओर पेद्दा पेर्माल मत्तोर इंचि बविस्यवानि कीतोर. 53 इल्हा अद रोजुनाल येसुन हव्कालय यहुदि पेद्दाल्क पिलान कीतुर. 54 अदुनहाटीं येसु अस्केटाल यहुदिल्कुन नड्डुम अंटोर्क दिस्सेक वेलियाकोंदुर. पजा ओर येरुसलेम सहर होळसिसि उस्के बूमिक दगेर मनना एप्राइम इनना नार होत्तोर. होंचि अगा ओना सिस्युल्कुनतोनि मनालय दल्गतोर.
55 अस्के यहुदिल्कुना दाटसि होनना पंडुगु दगेर्क एवसि मत्ता. अदुनहाटीं ओरा सततुन नोर्कुनना रिवाज कियालय पंडुगुंकन्ना मुन्नेन वेल्लेन लोकुल्क नाह्कुनाल येरुसलेम होत्तुर. 56 ओर अंटोर येसुन पह्क्सेके मत्तुर. गुळिते नित्तिसि, “मीकु बतल अन्पिचेक, ओर ई पंडुगुनाहाटीं वांतोरा, वायोरा?” इंचि वरोंक-वरोर पूसकियुंदुर. 57 अचोने आयका पेर्मालोर्क, परिसिल्क, येसुन दोर्का पियनाहाटीं, “येसु बगा मंतोर इत्ता संगति बोर्कन्ना तेळियते, माकु वासि वेहाट हूळाट!” इंचि आदेस हीसि मत्तुर.