बेसता मेहानोर येसे आंद
10
1 येसु इल्हा वळ्कालय दल्गतोर, “नना निजम-निजम वेहासेक, बोरय्ते गोर्रेना पोदिते होळियनेंके, गलमाताल होळियका गूरे पोर्रोटाल दुनकीसि होळियंतोर, ओर दोंगल आनि दोसकुनानोर आंदुर. 2 गानि बोरय्ते गलमाताल होळियंतोर, ओर गोर्रें मेहानोर आंदुर. 3 गोर्रें मेहानोनहाटीं गलमातगा कावेल कीसेक मनानोर गिल्कोम तेंडांतुर. गोर्रें ओना लेंग केंजंतां. आनि ओर ओना गोर्रेन उंद-उंदाना पोर्रोल पीसि केयंतोर, केयसि अवुन पलाते ओंतोर. 4 अन्नि गोर्रेन पलाते ओसि, ओर अवुना मुन्ने-मुन्ने दांतोर. गोर्रें ओना पज्जो-पज्जो दांता. बारित्ते अव ओना लेंगुन एरपाट कींतां. 5 गानि एरपाट हिलवोना पज्जो अव होन्नों, ओनागटाल लक्कु वित्तंतां. बारित्ते अव ओना लेंगुन एरपाट किय्यों,” इंचि ओर्क वेहतोर.6 येसु इद उदाहरन लोकुल्कुंक वेहतोर. गानि येसु बदुना बारेमते वळ्कतोर इत्तद ओर्क अर्तम आया हिल्ले. 7 अदुनहाटीं येसु मरुंदि मल्का ओर्क इल्हा वेहतोर. “नना निजम वेहासेक केंजट, गोर्रें होळियना गलमा ननेन आंदुन. 8 नाकन्ना मुन्ने वातोर अंटोरे दोंगाल्क, दोसकुनानोर आंदुर. गानि गोर्रें ओरा पोल्लें केंजा हिल्लें. 9 गलमा ननाने आंदुन. बोरय्ते नहगटाल लोप्पो नेंगंतोर, ओन नना पिसागोटंतन. ओर लोप्पो-पलाते होनुळ-वायुळ कींतोर आनि तिनालय ओन्क मेता दोर्कंता. 10 दोंगाल्क सिराप दोंगा कियालय, हव्कालय, नासडेम कियालये वांतुर. गानि नना नावा गोर्रेंकु पिसवर हियालय वातन. आनि अदगुडा पुरागा पिसवर हियालय वातन. 11 बेस मेहानोन ननाने आंदुन. बेस मेहानोर, गोर्रेनाहाटीं ओर ओना जीवा हींतोर. 12 गानि बूतिक मेहालय वातोर, ओर निजम मेहानोर आयोर. मेहनेंके ओन्क तोडेल्लिगिंटा दिस्सानय्ते, गोर्रेन अग्गेन होळसि बेकेनो वित्तंतोर. बारित्ते अव गोर्रे ओनव आयों. अस्के आ तोडेल्लि वासि गोर्रेन पोर्रो अर्रंता आनि गोर्रें बारे सिल्लर-सिल्लर आंता. 13 ओर बूतिक वातोर इंचि अल्हा वित्तंतोर वातोर. ओन्क गोर्रेना पिकिर हिल्ले. अदुनहाटीं ओर वीतंतोर. 14-15 गानि नना बेस मेहानोन आंदुन. बल्हा अय्ते बाबाल नाकुन एरपाट कींतोर, नना बाबान एरपाट कींतन, अल्हेन नावा गोर्रेन नना एरपाट कींतन, अव नाकुन एरपाट कींतां. नना नावा गोर्रेनाहाटीं जीवा हींतन. 16 इद पोद्दितव आयवा गोर्रेंगुडा नहगा मंतां. नाकु अवुनगुडा तरानद मंता, अवगुडा नावा लेंग केंजनूं. अस्के अन्नि उंदे मंदा आसि मनंतां आनि अवुना मेहानोरगुडा वरोरे मनांतोर. 17 नना हासि मर्रा जीवाते तेदंतन इंचि नना नावा जीवा हीसंतन, इदुनहाटींगे नावा बाबाल नाकुन वेल्लेन पावरम कींतोर. 18 नावा जीवातुन नहगटाल बोरे तेंडकुन्नुर, नावा जीवातुन नना कुद्दे हींतन. नावा बाबाल नाकु आदेस हीताहेंका नावा जीवातुन हियना आनि मर्रा दान मल्सि तेंडकुनना अदिकारम नाकु मंता,” इंचि येसु इत्तोर.
19 इव पोल्लेनहेंदाल मरुंदि मल्का यहुदिल्क वरोनद वरोंक अर्रका वेरे-वेरे आतुर. 20 ओराव्टेटाल वेल्लेटोर, “ओन्क देय्यम पीसि ओर पिस्सल आतोर, मिमेट ओना पोल्लें बारि केंजांतिर?” इंचि इत्तुर. 21 गानि इच्चुर बारे, “इव पोल्लें देय्यम पीतोनां आयों. देय्यम बस्केनना कळ्क दिसवोना कळ्कुन दिस्सानाल किया परंतना?” इंचि इत्तुर.
यहुदिल्क येसुना विरोद कींतुर
22 पीनि कालम वासि मत्ता. येरुसलेम सहरते गुळिते होळियना हानुकa इनना पंडुगु मत्ता. 23 अस्के गुळितगा येसु सुलेमान इनना पंदिरतगा तिरियसेक मत्तोर. 24 अस्के, इच्चुर यहुदि लोकुल्क येसुना सुट्टु आतुर. आसि, “निमे इंका बच्चूं रोजकु माकुन मर्ममते इर्रंतिन? निमे गिंटा किरिस्तुन आयानय्ते माकु कुल्ला-कुल्ला वेहा,” इंचि पूसकीतुर. 25 अस्के येसु ओर्क इल्हा जवाब हीतोर, “नना मीकु मुन्नेन वेहतन, गानि मिमेट नम्मा हिल्लिर. नावा बाबाना पोर्रोल्ते नना कियना कबाह्के नावा बारेमते गवाइ वेह्चंतां. 26 गानि मिमेट नावा गोर्रेना मंदातोर आयिर. अदुनहाटीं मिमेट ना पोर्रो विस्वासम कीसेक हिल्लिर. 27 नावा गोर्रें नावा लेंगुन केंजंतां. नावा गोर्रेन नना एरपाट कींतन आनि अव नावा पज्जो-पज्जो वांतां. 28 नना अवुंक बस्केळ्क पिस्सना पिसवर हींतन, अव बस्केन नासडेम आयों आनि नावा कय्दाल अवुन बोरे गुंजकुना परोर. 29 बारित्ते अवुन नाकु, नावा बाबाल हीतोर. नावा बाबाल अंटोरकन्ना पेद्दोड आंदुर. अदुनहाटीं बाबाना कय्दाल अवुन बोरे गुंजकुना परोर. 30 बाबल, नना मोमोट इव्वुरोम उंदे आंद,” इंचि इत्तोर. 31 अस्के मरुंदि मल्का आ यहुदिल्क येसुन पेरतुर. 32 अय्ते येसु, “नावा बाबाल नाकु वेहताप नना बेसता कबाह्क वेल्लेन मीकु कीसि हुपिस्तन. अव्टेटाल बद कबळहाटीं नाकुन बंडाने तनालय हूळसंतिर?” इंचि ओर्कुन पूसकीतोर. 33 अस्के ओर, “निमे कीता बेसता कबाह्कुनाहाटीं नीकुन बंडाने तन्नोम. गानि निमे पेनदा अपमानम कीतिन. अचोने आयका निमे मनकन आसिगुडा निवद निमे पेन इंचि वेहकुंतिन, अदुनहाटीं मोमोट नीकुन बंडाने तनंतोम” इत्तुर.
34 अस्के येसु ओर्क इल्हा जवाब हीतोर, “मीवा मूसाना नियमते, ‘नना इंचेक, मिमेट पेनकु आंदिर,’ इंचि इच्चुर लीडर्कुन पेन इत्तद, रासि हिल्लेना?b मंता. 35-36 दर्मसास्त्रम बस्केन तप्पु वेहो. ओक्कला, पेन दाना पोल्ले, बोर्क-बोर्क अय्ते दोर्कतनो, ओर्कुन पेनकु इंचि इत्ताय्ते, नाकुन बाबाल पेरसि इद दुनियाते लोहचीतस्के, ‘नना पेनदा मर्रिन’ इल्हा इंचि इत्ते, नना पेनदा अपमानम कीतन इंचि मिमेट बल्हा इंतिर? 37 नावा बाबाल कियना कबाह्क नना कियाकोंटे, नाकुन नममट. 38 गानि नना अव कबाह्कुन कींतन इंचि, नाकुन नम्मकोन्ना, नना कियना कबाह्कुनपोर्रो अय्ना विस्वासम इर्रट. अस्के, बाबाल ना लोप्पो, नना बाबाना लोप्पो मंतोम इंचि मीकु तेळियार,” इंचि येसु इत्तोर. 39 अस्के ओर मरुंदि मल्का येसुन दोर्का पियालय हूळतुर, गानि ओर ओरा कय्दाल तपिच्कुंचि अगटाल होत्तोर.
40 येसु मर्रा योर्दन बेरेटा हब्बेरा, बगा अय्ते मुन्ने योहान बापतिस्मा हियुंदुर, अदे जेगाते होत्तोर. होंचि अग्गेन मत्तोर. 41-42 अस्के ओनगा वेल्लेन मंदि वातुर. वासि, “बापतिस्मा हियना योहान इचंत्रम आयनव बवे कबाह्क किया हिल्लोर. गानि ई मनकना बारेमते ओर बतल अय्ते वेहतोरो, अव अन्नि निजम आतां,” इंचि ओरद-ओरे वळ्कालय दल्गतुर. आनि अगा वेल्लेन मंदि येसुनपोर्रो विस्वासम कीतुर.