येसुन पिलातुस राज्यपालना मुन्ने निल्हांतुर
23
1 पजा अद पंचादितगटाल अंटोर लोकुल्क तेदतुर आनि येसुन अगटाल पिलातुस इनना राज्यपालनगा ओतुर. 2 ओसि, “ईर मावा यहुदि लोकुल्कुंक एकरेवुल्क वेहचि ओर्कु तप्पुड हर्रि हुप्सानेंके मोमोट हूळतोम. इंका कैसर राजांक कर दोहामन्नि इंचि वेहांतोर. अचोने आयका ओनद ओरे, ‘नना पेन पेरताकिरिस्तु राजुन आंदुन,’ इल्हा वेह्कुंतोर,” इंचि दोसेल्क दोस्सालय दल्गतुर.3 अस्के पिलातुस येसुन, “निमे यहुदिल्कुना राजुन आंदिना?” इंचि पूसकीतोर. अय्ते येसु, “निमेन इंचंतिन गदा,” इंचि इत्तोर.
4 अस्के पिलातुस पेद्दा पेर्मालोर्कुन आनि लोकुल्कुन, “नाकु ई मनकनगा बतले तप्पु दिस्सेक हिल्ले,” इंचि इत्तोर.
5 गानि लोकुल्कु मात्रम पिलातुस राज्यपालना पोल्ले केंजाकोंटा, “ईर पुरागा यहुदि लोकुल्कुना देसेमते ओना पोल्लें कराहचि अंटोर लोकुल्कुंक एकरेवुल्क वेह्चंतोर. इद कबळ ईर गालिल एरियाते सुरुव कीसि इंदके इगेळदाकाa एवतोर,” इंचेके इरगा लोल्लि कियालय दल्गतुर.
येसुन हेरोद राजानगा ओंतुर
6 लोकुल्क इनानदान केंजसि पिलातुस, “बतल, ई मनकल गालिल एरियातोरा?” इंचि पूसकीतोर. 7 अव रोजकुने गालिल एरियातुन हेरोद अंतिपस राजाल ताकिच्चेके मत्तोर. येसु गालिल एरियातोर इंचि तेळियतस्के, पिलातुस ओन हेरोद राजानेके लोहचीतोर. आ वेलाते हेरोद राजालगुडा येरुसलेम सहरतेन मत्तोर.
8 हेरोद अंतिपस राजाल येसुना बारेमते केंजसि मत्तोर अदुनहाटीं वेल्लेन वर्सानाल येसुन हूळाना आसेते मत्तोर. इंका ओन्कु येसुना कयदाल बतलन्ना इचंत्रम आयना चिन्ह हूळानद मत्ता. अदुनहाटीं येसुन हूळसि हेरोद राजांक वेल्लेन कुसि आता. 9 पजा हेरोद राजाल येसुन वेल्लेन सवाल्क पूसकीतोर. गानि येसु ओना उंदिंका सवालुंक जवाब हिया हिल्लोर. 10 पेद्दा पेर्मालोर आनि दर्मसास्त्रम कराहना गुरुल्क मात्रम येसुनपोर्रो ओरा मनसुंक वातप तप्पुक-दोसेल्क दोस्सेक मत्तुर. 11 पजा हेरोदगुडा ओना सिपाइल्कुनतोनि कलियसि येसुन कारेड्डाल्क कीसेके कवतोर. येसुंकु राजालोर केर्राना कपडीं केराह्चि ओर मर्रा पिलातुसनेके लोहचीतोर. 12 अदे रोजू हेरोद अंतिपस राजाल आनि पिलातुस ईर इव्वुर दंटातोर आतुर. दीनकन्ना मुन्ने ओर वरोंक वरोर विरोदमते मनुंदुर.
पिलातुस येसुंक हामुर सिक्सा हींतोर
13 पजा पिलातुस पेर्मालोर्कुन, यहुदिल्कुना पेद्दाल्कुन आनि लोकुल्कुन केयतोर. 14 केयसि ओर्कुन इल्हा इत्तोर, “लोकुल्कुंक एकरेवुल्क वेहचि ओर्क तप्पुड हर्रि हुप्सुसंतोर इंचि येसुन मिमेट इगे तत्तिर. आनि नना मीवा मुन्नेन ईन बेस परमेरका कीसिपूसकीतन. मिमेट ईनपोर्रो दोसता तप्पुक-दोसेल्कुनाल उंदिगुडा नाकु ईना लोप्पो दिसा हिल्लें. 15 इंका हेरोद अंतिपस राजांकगुडा ईना लोप्पो तप्पुक-दोसेल्क दोर्का हिल्लें. अदुनहाटीं ओर ईन मर्रा नाहेकेन तिराह्चि लोहतोर. ईन्कु हामुर सिक्सा हियनलायक ईर बतल तप्पु किया हिल्लोर. 16 अदुनहाटीं नना ईन पोट्टें देब्बां तंचि होळसींतन,” इंचि इत्तोर. 17 b 18 अस्के अंटोर लोकुल्क कलियसि उंदेतीर, “ई येसुंक हामुर सिक्सा हीम, मावाहाटीं बरब्बन होळसीम,” इंचि इरगा वरगेयालय दल्गतुर. 19 (ई बरब्बल इनानोर सहरता मनकलोर्कुन सरकारता विरोदमते कीसि मत्तोर. इंका बचुटुरो मंदितुन हव्कीसिगुडा मत्तोर. अदुनहाटीं ओन जेलने वाटसि मत्तुर.) 20 पिलातुसना मनसुने येसुन होळसियानद मत्ता, अदुनहाटीं ओर लोकुल्कुंक इंकुंदि मल्का विनंति कीतोर. 21 गानि लोकुल्कु मात्रम, “ओन क्रुसुनपोर्रो मोल्लां कोह्कीसि वेलळ वाटट, ओन क्रुसुनपोर्रो वेलळ वाटट,” इंचि इरगा मोत्कुंचेके मत्तुर. 22 अयना पिलातुस मुडोव मल्का ओर्कुन, “बारि? ईर बतल तप्पु कीतोर? ईनकु हामुर सिक्सा हियनलायक नाकु बतले तप्पु दोर्का हिल्ले. अदुनहाटीं नना ईन पोट्टे देब्बां तंचि होळसींतन,” इंचि इत्तोर. 23 गानि लोकुल्क मात्रम उंदेतीर, “येसुन क्रुसुनपोर्रो वेलळ वाटा,” इंचि इरगा मोत्कुंचेके मत्तुर. ओरा मोत्कुन्मळता मुन्ने पिलातुसनद उंदिंका पोल्ले ताका हिल्ले. 24 अदुनहाटीं पिलातुस, लोकुल्कुना इच्चा परकारमे आयि, इंचि इत्तोर. 25 पजा सरकारता विरोदम कीसि, लोकुल्कुन हव्कीसि जेलुंक होंचि मत्ता बरब्बन लोकुल्कु तल्कताहेंका ओन होळसिया वेहतोर. आनि येसुन बारे लोकुल्कुना इच्चा मत्ताप कीकुन्निर इंचि ओरा कयदुक अप्पजेपतोर.
येसुन क्रुसुनपोर्रो वेलळ वाटमळ
26 अस्के सिपाइल्क येसुन ओना क्रुसुन कांजा वेहचि, पिलातुसना लोतागटाल ओसेके मत्तुर. येसुंक क्रुस कांजालय ताकत हिलाकोंटा आसि मत्ता. अच्चोटेने ओर्कु कुरेनि सहरता सिमोन पोर्रोलतोर वरोर मनकल कलियतोर.c ओर नेलीनाल येरुसलेम सहर होंचेके मत्तोर. अय्ते सिपाइल्क ओन दोर्का पीसि येसु कांजसेके मत्ता क्रुसुन ओन्क कांजा वेहतुर. अस्के सिमोन अद क्रुसुन कांजसेके येसुना पज्जो-पज्जो होत्तोर. 27 अस्के लोकुल्कुनद उंदि पेद्दा मंदा येसुना पज्जो होंचेके मत्ता. अद मंदाते इच्चुं मुर्ताह्क इंका मत्तां, अव येसुनाहाटीं वेल्लेन बादाते इरगा अळसेके मत्तां. 28 अस्के येसु अवुनहेके तिरियसि अवुन इल्हा इत्तोर. “ए येरुसलेम सहरता मुर्ताह्कुनिटा! मिमेट नावाहाटीं अळमटु, गानि मीवा मर्क-मियाह्क आनि मीवा सतताहाटीं अळट. 29 बारित्ते मुन्ने इसोंटा तकलिपता रोजकु वायनव मंतां गदा, अव रोजकुने, ‘गोड्होत्ता मुर्तळके सुकम मंता, पिलाल्क आयवा मुर्तळके सुकम मंता, बस्केन मर्तल्लुर आयवा मुर्तळके सुकम मंता,’ इंचेके लोकुल्कु इनानुर. 30 इंका ओरु, ‘मावा पोर्रो वासि अर्राटु,’ इंचि गुट्टान इनानुर आनि ‘माकुन पूळसट’ इंचि गुप्पान इनानुर.d 31 ईर लोकुल्क, मरा पच्चगा मननेंकेन इल्हा कीसंतुर अय्ते, वत्सोत्ता मरातुन बल्हा कियनुरो?”e इंचि इत्तोर.
32 पेद्दा तप्पु कीता इंका इव्वुर मनकलोर्कुनगुडा हामुर सिक्सा हिय्यालय येसुनतोनि ओसेक मत्तुर. 33 पजा ओर “तला बोरसेम”f इनना जेगातगा एवतुर. एवतस्के येसुन क्रुसुनपोर्रो मोल्लां कोह्कीसि वेलळ वाटतुर. अल्हेने पेद्दा तप्पु कीता आ इव्वुर मनकलोर्कुनगुडा येसुनतोनि ओना तिना बाजुंक वरोन आनि रोड्डा बाजुंक वरोन क्रुसुंक वेलळ वाटतुर.
34 अस्के येसु, “पेनबाबा, नाकुन हव्काना लोकुल्क बतल कीसंतुरो, अद ओर्के तेळियो. ईर्कुन मापि कीम,” इंचि पेनदुक पारतना कीतोर. gपजा सिपाइल्क सिट्टीं वाटसि येसुना कपडिन पंचकुत्तुर. 35 अगा जर्गनदुनंता लोकुल्क नित्तिसि हूळसेक मत्तुर. यहुदिल्कुना पेद्दाल्क, “ईर अय्ते वेरे मनकलोर्कुन पिसागोटतोर गदा! ईर गिंटा निजमे पेन पेरता किरिस्तु आयानय्ते, ओना जीवातुन ओरे पिसागोटकुन्निर,” इंचि कारेड्डाल्क कियुंदुर. 36-37 सिपाइल्कगुडा ओना दग्गेर्क वासि ओन कारेड्डाल्क कीतुर. ओन्कु इरगा पुल्लटा पंडिना पानकम उह्चि, “ओक्कला निमे यहुदिल्कुना राजुन आयानय्ते, नीवा जीवातुन निमेन पिसागोटकुन,” इंचि कारेड्डाल्क कियुंदुर. 38 इंका ओना तलातगा पोर्रो, “ईरु यहुदिल्कुना राजाल आंदुर,” इंचि उंदि पाटि पोर्रो राससि क्रुसुंक हिरकिस्तुर.
39 अगा येसुनतोनि वेलळ वाटसि मत्ता इव्वुर तप्पु कीता मनकलोरव्टेटाल वरोर, “निमे पेन लोहता किरिस्तुने गदा! अय्ते निवद निमेन आनि माकुनगुडा पिसागोटा,” इंचि येसुन कारेड्डम कीतोर. 40 गानि तप्पु कीता इंका वरोर मनकल बारे अल्हा इत्ता मनकन गदरिच्चि, “ईन्क दोर्कता सिक्से नीकुगुडा दोर्कता. अयना नीकु पेन इत्ते वेर्रे हिल्लेना रो? 41 मनोम अय्ते तप्पु कीतोम इंचि कायदा परकारम मनाकु सिक्सा दोर्कता. गानि ईर अय्ते बतले तप्पु किया हिल्लोर,” इंचि इत्तोर. 42 मर्रा येसुन, “येसु, निमे राजाल आतस्के नाकुन मति कीम,” इंचि इत्तोर. 43 अस्के येसु ओन, “नना नीकु निजम वेहचेके, निमे इय्यालेन नावातोनि स्वर्गमते मनकिन,” इंचि इत्तोर.
येसु जीवा होळसंतोर
44 अद वेलाक पिय्याटव पन्नेंड एगसेके मत्ता बारे. अस्केटाल अय्ते मूड एगनदाका पूरा बूमिअंता हिर्रु-हीकट आसि मत्ता. 45 पोळदुना वेलगुगुडा दिस्साकोंटा आता. अस्के येरुसलेम सहरते मनना गुळिता लोप्पो पवित्र जेगा आनि अन्नि जेगाकन्ना एक्को पवित्र जेगाता नड्डुम मत्ता परदा पोर्रोटाल हिळुदाका हर्सि रेंड तुकडां आता.h 46 अस्के येसु, “ए पेनबाबा! नना नावा आत्मातुन नीवा कयदे हीसंतन,”i इंचि लगांचि वरगेयसि जीवा होळस्तोर.
47 दरोगल अगा जर्गतदुनंता हूळसि, “ई मनकल निजमे सत्तेमंतुड मत्तोर,” इंचेके पेनदुन तल्स्कुत्तोर.
48 अगा हूळालय जमा आता अंटोर लोकुल्कु अगा जर्गतदुनंता हूळसि ओर ओरा चातिन तनकुंचेके मल्सि होत्तुर. 49 गानि येसुन एरपाट कियानोर अंटोर आनि गालिल एरियाताल ओना पज्जो-पज्जो वातव मुर्ताह्कु इच्चुर लक्कु नित्तिसि अगा जर्गतदुनंता हूळसेक मत्तां.j
येसुन गति कियमळ
50-51 पजा अगा यहुदिया एरियाता अरिमताइ नाटेनोर वरोर योसेप इनना मनकल मत्तोर, ओर यहुदिल्कुना पंचादिता मेंबर मत्तोर. अयना पंचादिते येसुन हव्कना बारेमते येतता निर्नायम ओन्कु इस्टम मनाहिल्ले. बारित्ते ओर बेस सत्तेमंतुड मत्तोर. ओर इस्राएल देसेमते पेन दाना राज्येम बस्के निल्हंता इंचि एदुर हूळसेके मत्तोर. 52 ई योसेप पिलातुसनगा होंचि येसुना पिनगुन गति कियनाहाटीं तल्कतोर. 53 तल्कीसि येसुना पिनगुन क्रुसुनपोर्रोटाल हिळु रेहतोर. पजा एक्को दराता हामुर कप्पिडते ओना पिनगुन हुटतोर. अल्हा कीसि बंडातुन तुल्हाचि तयार कीता बोंदाते ओसि इरतोर. अद बोंदाते दीनकन्ना मुन्ने बोना पिनगुन इर्रा हिल्लुर. 54 आ रोजु नोमकेमताहाटीं तयारीं कियना रोज आंदु.k जेरासेप अय्ते पोळद होंचि नोमकेम रोज होळियानदे मत्ता.
55 पजा येसुनतोनि गालिल एरियाताल वाता मुर्ताह्क पिनगुन ओयनेंके बोंदातुन हूळनाहाटीं योसेपुना पज्जो अर्सि होत्तां. इंका अव येसुना पिनगुन बोंदाते बल्हा इरतुर अदुनगुडा हूळतां. 56 आयंका अव मुर्ताह्कु अगटाल तिरियसि होंचि बेस गमागमा गब्बु वायना वस्तुक आनि अत्तर निय येसुना पिनगुंक होकानाहाटीं तयार कीतां. गानि वारमता नोमकेम रोजु होळियताहाटीं मूसाना नियम परकारम बद्दे कबळ किया मन्नि इंचि लोने मत्तां.