येसुंक हामुर सिक्सा हींतुर
19
1 अस्के पिलातुस येसुन दोर्का पीसि पोट्टे देब्बां तना वेहतोर. 2 सिपाइल्क बारे, उंदि हाह्कुना वेलितुन किरिटम कीसि, येसुना तल्लक तासतुर. तासि ओन्क नेळि पंडि रंगुना कपडीं केराहतुर. 3 केराहता पजा, “यहुदिल्कुना राजांक जय” इंचेके ओना सेंपा पोर्रो तंतुर.4 पिलातुस मरुंदि मल्का पलाते पेय्सि, “हूळाट, ओन्क सिक्सा हियालय, नाकु ओना लोप्पो बतले कसूर दोर्का हिल्ले, इद मीकु तेळियना इंचि नना ओन मीहेके पलाते तच्चंतन,” इंचि वेहतोर. 5 पजा येसु हाह्कुना किरिटम आनि नेळि पंडि रंगुना कपडीं केरसि पलाते पेय्स्तोर. अस्के पिलातुस, “हूळाट ई मनकन,” इंचि ओर्कुन इत्तोर. 6 येसुन हूळसि, पेद्दा पेर्मालोर आनि गुळितगा कावेल कियानोर, “ओन क्रुसुनपोर्रो वेलाड वाटा, ओन क्रुसुनपोर्रो वेलाड वाटा,” इंचि वरगेयतुर. अस्के पिलातुस ओर्कुन, “ओन ओसि मिमेटे क्रुसुनपोर्रो वेलाड वाटाट, नाकु ओना लोप्पो बदे कसूर दोर्का हिल्ले,” इंचि इत्तोर. 7 अद केंजसि लोकुल्कुना मंदा, “माकु उंदि नियम मंता. आनि ओर, नना पेनदा मर्रिन, इंचि इत्तोर. अदुनहाटीं मावा नियम परकारम ओर हायमळे गावाले,” इंचि इत्तुर. 8 ओर अल्हा इन्मळतुन केंजसि, पिलातुस वेल्लेन वेरियतोर.
9 अस्के पिलातुस येसुन मर्रा राजवाडाते ओसि, “निमे बगाटाल वातिन?” इंचि पूसकीतोर. गानि येसु बतले जवाब हिया हिल्लोर. 10 अदुनहाटीं, पिलातुस येसुन, “निमे नातोनि बारि वळ्कसेक हिल्लिन? नीकुन होळसियना आनि क्रुसुनपोर्रो वेलाड वाटना अदिकारम नाके मंता, इंचि नीकु एर्का हिल्लेना?” इंचि पूसकीतोर. 11 अस्के येसु, “पोर्रो मनना पेन आ अदिकारम नीकु हीता, अचोने! हिलाकोंटे नीकु नावा पोर्रो बतले अदिकारम हिल्ले. अदुनहाटीं, नाकुन नीवा कय्दुक अप्पजेपतोंके एक्को पापम दल्गंता,” इंचि इत्तोर.
12 अस्केटाल पिलातुस, येसुन होळसालय वेल्लेन कोसिस कीतोर. गानि लोकुल्कुना मंदा, “ओक्कला निमे ओन होळसियानय्ते, निमे कैसर राजाना दंटातोन आयिन. इंका नना राजान इंचि इनना हरेक मनकल, महाराजाना विरोदमते वळ्कतोर आंतोर,” इंचेके वरगेयालय दल्गतुर. 13 अव पोल्ले केंजसि, पिलातुस येसुन मर्रा पलाते तत्तोर. तच्चि, न्यायम कियनेंके उद्दना कुर्सिते उद्तोर. अद कुर्सि मनना जेगातुन, इब्रानि बासाते, गब्बाताa इंतुर. 14 अद रोज, दाटसि होनना पंडुगुना तयारीं कियना रोज आंद. अस्केळ्क, पन्नेंड एगसि मत्ता. अस्के, “इद हूळाट, मीवा राजाल!” इंचि पिलातुस यहुदिल्कुन इत्तोर. 15 अस्के यहुदिल्क, “ओन लक्कु ओम, ओन लक्कु ओम! ओसि क्रुसुनपोर्रो वेलाड वाटा,” इंचि वरगेयालय दल्गतुर. अय्ते पिलातुस, “बतलु! नना मीवा राजान, क्रुसुनपोर्रो वेलाड वाटाकना?” इंचि ओर्कुन पूसकीतोर. अस्के पेद्दा पेर्मालोर, “माकु कैसर राजान होळसिसि वेरे बोरे राजाल हिल्लोर,” इंचि वरगेयतुर. 16 पजा पिलातुस, येसुन क्रुसुनपोर्रो वेलाड वाटालय ओरा कय्दुक अप्पजेपतोर अय्ते, ओर येसुन ओतुर.
येसुन क्रुसुनपोर्रो वेलाड वाटंतुर
17 येसु ओना क्रुसुन कांजसि पीसि, “तला बोरसेम” इनना जेगातगा होत्तोर. (इब्रानि बासाते, अद जेगातुन गोलगोता इंतुर). 18 अगा ओना काल्क-कय्कुंक मोल्लां कोह्कीसि ओन क्रुसुंक वेलाड वाटतुर. येसुन नड्डुम इरसि ओना रोंड बाजकुंक इंकिव्वुर्कुन क्रुसुंक वेलाड वाटतुर. 19 अस्के पिलातुस, “नासरेत नाटेना येसु, यहुदिल्कुना राजाल,” इल्हा उंदि बल्लापोर्रो कसूर सिट्टि रासि, येसुना क्रुसुंक कोह्का वेहतोर. 20 येसुन वेलाड वाटता जेगा सहरकु दग्गेरे मत्ता. आनि अद बल्लापोर्रो इब्रानि, लटिन आनि ग्रीक बासाने रासि मत्ता. अदुनहाटीं वेल्लेटोर यहुदिल्क, आ कसूर सिट्टितुन हदवुंदुर. 21 पजा यहुदि पेद्दा पेर्मालोर पिलातुसनगा होंचि, “यहुदिल्कुना राजाल इंचि रासमा. दान जेगाते, नना यहुदिल्कुना राजान, इंचि ओर इत्तोर, इल्हा रासा,” इंचि वेहतुर. 22 अस्के पिलातुस, “नना रासतन! रासतन. अचोने!”
23 सिपाइल्कु येसुन क्रुसुनपोर्रो वेलाड वाटतंका, ओना कपडीं तेंडकुत्तुर. तेंडकुंचि, वरो-वरोंक उंदि-उंदि हिस्सा वायना हिसाबते, नालूं पाल्क कीतुर. ओना अंगितुनगुडा तेंडकुत्तुर. अद अंगि पोर्रोटाल हिळुदाका पोळ्गुंक-पोळ्गु कुट्टु वाटाकेन मत्ता. 24 अदुनहाटीं सिपाइल्क, “दीन मनम हराहमन्नि, गानि सिट्टिं वाटकोम. अस्के अद बोर्क दोर्कंतो हूळकोम,” इंचि ओर-ओरे इन्कुत्तुर. “ओर नावा कपडिन हिस्सां कीसि, नावा अंगिहाटीं सिट्टिं वाटंतुर,”b इंचि दर्मसास्त्रमते रासि मत्ता पोल्ले पुरागा आयनाहाटीं अल्हा जर्गता. आनि सिपाइल्कगुडा अदुनहाटींगे अल्हा कीतुर.
25 येसुन वेलाड वाटता क्रुसुना दग्गेरे, येसुना यावल, ओना सिन्नावल, कोल्पाना मुत्तो मरियम, आनि मगदलेनि नाटेना मरियम इव निलसि मत्तां. 26 येसु, ओना यावल आनि ओर बोन अय्ते पावरम कीतोर आ सिस्युड, ओना दग्गेरे निलसि मत्तद हूळसि, येसु ओना यावन, “यावा, ईर हूळा नीवा मर्रि!” इंचि वेहतोर. 27 आनि आ सिस्युनेके हूळसि, “इद हूळा, नीवा यावल!” इंचि वेहतोर. अस्केटाल आ सिस्युड दान ओना यावल इंचि लोन ओतोर.
येसु जीवा होळसंतोर
28 अदंता आता पजा, ओर बद कबळहाटीं वातोर, अद कबळ पूरा आता, इंचि ओर एरपाट कीतोर. एरपाट कीसि, दर्मसास्त्रमते रासि मत्तद पूरा आयनाहाटीं, “नाकु दूपा आसंता,”c इंचि इत्तोर. 29 अगा उंदि अळका मत्ता, अव्टे मुरगिसि होत्ता अंगुर पंडिना पानकम मत्ता. ओर अद अळकाते दूदि मुळाह्तुर आनि हिस्सोप इनना मराता कोम्मक कळाह्चि, येसुना तोळदागा ओतुर. 30 येसु आ मुरगिसोत्ता अंगुर पंडिना पानकमता रुसि हूळसि, “पूरा आता,” इंचि इत्तोर. अल्हा इंचि, हिडु तला वराहचि जीवा होळ्सतोर.
31 अद नोमकेम आनि दाटसि होनना पंडुगुना तयारीं कियना रोज मत्ता. अद रोजुने पीनगुल्कु क्रुसुनपोर्रो वेलाड मनमळ यहुदिल्कुंक इस्टम हिल्ले. अदुनहाटीं यहुदि पेद्दाल्क पिलातुसनगा वासि, “ओरा काल्कुन उराहचि, सेत्तातुन हिडु रेहा वेहा,” इंचि पूसकीतुर. 32 अस्के सिपाइल्क वासि, येसुनतोनि क्रुसुनपोर्रो वेलाड वाटसि मत्ता इव्वुरा काल्कुन उराहतुर. 33 पजा ओर येसुनगा वासि हूळतस्के, येसु हासे मत्तोर, इंचि ओना काल्क उराह हिल्लुर. 34 गानि ओराव्टेटाल वरोर सिपाई येसुना संका हिडु, गोर्काते कोह्कतोर. अय्ते कोह्कता कोह्कुळे नेत्तुर आनि एर पोंगता. 35 अंदता हूळतोर ओर, मिमेटगुडा विस्वासम कियगोम इंचि ओना गवाइ वेहतोर. ओर वेहता गवाइ निजम आंद. ओर सत्तेम वेहचंतोर इंचि ओन्क एरपाट. 36-37 “ओना बोक्कानाल उंदि बोक्किंका उंरुंगो” आनि इंकुंदि जेगाते, “ओन कोह्कतोनहेके हूळानुर”d इंचि दर्मसास्त्रमते रासि मत्ता पोल्लें पुरागा आयगोम इंचि, इल्हा जर्गता.
येसुन बोंदाते तासंतुर
38 अवंता आता पजा, अरिमताइ नाटेना योसेप इनानोर, पिलातुसनगा होंचि, “येसुना पीनगुन हीम,” इंचि पूसकीतोर. पिलातुस ओम इत्तस्के ओर येसुना पीनगुन ओतोर. (ई योसेपगुडा येसुना वरोर सिस्युडे, गानि ओर यहुदि पेद्दाल्कुंक वेरियसि, लोप्पो-लोप्पो विस्वासम कियुंदुर.) 39 उंदि मल्का नर्कटा वेलाक वासि येसुंक कलियता निकोदेमसगुडा योसेपुनतोनि वातोर. ई निकोदेमस, दगेर-दगेरा मुप्पै (30) किलोना “बोलम” आनि “अगर” इनना गमागमा गब्बु वायना वस्तुक पीनगुंक होकालय पीसि वातोर. 40 ओर इव्वुर कूळसि, यहुदिल्कुना गति कियना रिवाज परकारम, आ गमागमा वायना वस्तुकुनंता येसुना मेंदुल्क होकतुर. होकसि, येसुना पीनगुन उंदि पूना पोळ्गु कप्पिडते हुटतुर. 41 येसुन क्रुसुंक वेलाड वाटता जेगाक दग्गेरेन उंदि तोटा मत्ता. आ तोटाते उंदि पूना बोंदा मत्ता, अद बोंदाते अदवेरदाका बस्केन बोनदे पीनगुन इर्रा हिल्लुरe. 42 अद बोंदा दग्गेरे मत्ता, आनि अद यहुदिल्कुना दाटसि होनना पंडुगुना तयारीं कियना रोज मत्ता. अदुनहाटीं ओर येसुन अदे बोंदाते इरतुर.