येसु जीवाते तेदांतोर
20
1 वारमता मोदाटा रोजु, इत्ते अयतारमनाडु, मुसामुसा हीकट मननेंकेन, मगदलेनि नाटेना मरियम बोंदातगा होत्ता. अगा दान्क, बोंदा हर्दुक अड्डम इरसि मत्ता बंडा तेंडिस मत्ताप अद हूळता. 2 अदुनहाटीं अद मरियम, सिमोन पत्रुनगा आनि येसु बोन अय्ते पावरम कियुंदुरो आ सिस्युनगा विच्चि होंचि, “सामिना पीनगुन बोंदाताल बोरो तेंडिस ओतुर, आनि अदुन बगा इरतुरो, माकु तेळियो,” इंचि वेहता. 3 अद वेहतद केंजसि, पत्रु आनि आ इंका वरोर सिस्युड बोंदातेके होनालय पेय्स्तुर. 4 ओर इव्वुर वीतसेके होनंनेके, आ इंका वरोर सिस्युड पत्रुंकन्ना मुन्ने विच्चि, बोंदातगा एवतोर. 5 अगा एवसि, ओर पलाताले माळकिस हूळतोर, अय्ते ओन्क सिराप येसुंक हुटसि मत्ता कपडीं दिसतां. गानि ओर लोप्पो नेंगा हिल्लोर. 6-7 पजा पत्रुगुडा अगा एवतोर. आनि लोप्पो होळियसि, येसुंक हुटसि मत्ता कपडिन हूळतोर. गानि येसुना तल्लक हुटसि मत्ता कप्पिड मडता कीसि, वेरे जेगाते मत्तद ओन्क दिसता. 8 पजा, बोंदातगा मुन्ने एव्ता सिस्युडगुडा लोप्पो होळियसि, हूळसि विस्वासम कीतोर. 9 अदवेरदाकागुडा, “येसु हासि तप्पाकोंटा मर्रा जीवाते तेदंतोर,” इंचि दर्मसास्त्रमते रासि मत्ता पोल्ले ओर्क तेळिया हिल्ले. 10 पजा ओर सिस्युल्क ओरा लोह्कुने मल्सि होत्तुर.मगदलेनि मरियमुंक येसु दिसंतोर
11 मगदलेनि नाटेना मरियम मात्रम बोंदाता पलाते निलसि अळसेक मत्ता. अळसेके-अळसेकेन अद लोप्पो माळकिस हूळता. 12 अस्के, तेल्लटा कपडीं केरता रोंड पेनदा दूतां दान्क दिसतां. अवु येसुना सेत्तातुन इरतागा उंदि तल्लातेके, उंदि बारे काल्कुनहेके उद्दिस मत्तां 13 आ दूतां, “बाई, निमे बारि अळसंतिन?” इंचि पूस कीतस्के, “नावा सामिना मेंदुलतुन बोंदाताल बोरो बेकेनो ओसि इरतुर, नाकु एरपाट हिल्ले,” इंचि मरियम इत्ता. 14 अल्हा इंचि अद पजोळ्क तिरियता. अस्के अगा येसु निलसि मत्तद दान्क दिसता. गानि ओरे येसु इंचि, अद एरपाट किया हिल्ले. 15 अस्के येसु, “बाई, निमे बारि अळसंतिन? बोर्कुन पह्कसंतिन?” इंचि मरियमुन पूसकीतोर. अस्के मरियम ओन, ओर तोटाक कावेल मनानोर बारे इन्कुंचि, “दादा, निमे गिंटा सामिना पीनगुन इगेटाल ओयानय्ते, अदुन बगा इरतिन नाकु वेहा नना होंचि तरकुंतन,” इंचि इत्ता. 16 अय्ते येसु, “मरियम,” इंचि दान केयतोर. अस्के मरियम ओनहेके तिरियसि हूळसि, दाना बासाते, “रबोनि” इंचि इत्ता. (रबोनि इत्ते इब्रानि बासाते गुरु इंचि अर्तम) 17 अस्के येसु दान, “इदवेरदाका नना बाबानगा होना हिल्लेन. निमे नाकुन इट्टुमा, गानि नावा तम्मुह्कुनगा होंचि इल्हा वेहा: नना नावा बाबाल आनि मीवा बाबाल, इंका नावा पेन आनि मीवा पेनदागा पोर्रो होंचंतन, इंचि ओर्क वेहा,” इंचि दानकु वेहतोर. 18 अस्के मरियम सिस्युल्कुनगा होंचि, “नना सामिन हूळतन, ओर मीकु इव पोल्लें वेहा इत्तोर,” इंचि ओर्क येसु वेहता पोल्ले वेहता.
19 अदे रोजु, पोळ्द अर्राना वेलाक, सिस्युल्क अंटोर, यहुदि पेद्दाल्कुना वेर्रेक, तल्पुंक तालम वाटसि, उंदि अर्राते जमा आसि मत्तुर. अचानक, येसु ओरा नड्डुम वासि निल्तोर आनि, “मीकु सांति दोर्कि,” इंचि इत्तोर. 20 अल्हा वळकीसि, येसु ओर्क ओना कय्कुंक आनि पक्काक मत्ता देब्बां हुपिस्तोर. सामिन हूळसि ओर वेल्लेन कुसिते निंडिस होत्तुर. 21 येसु मर्रा उंदि मल्का ओर्कुन, “मीकु सांति दोर्कि. बाबाल नाकुन ई दुनियाते लोहताप, ननागुडा मीकुन ई दुनियाते लोहंतन,” इंचि इत्तोर. 22 अल्हा वेहचि, “पवित्र आत्मा येतट,” इंचि ओर पोर्रो उह्कुतोर. 23 उह्कीसि, “मिमेट बोना पापाल्क मापि कींतिरो, ओरा पापाल्क मापि आंतां, आनि मिमेट बोरा पापाल्क अय्ते मापि किय्यिरो, ओरा पापाल्क मापि आयों,” इंचि ओर्क वेहतोर.
तोमांकु येसु दिसंतोर
24 येसु वासि मत्तोर अस्के, ओना पन्नेंड सिस्युल्कुनाल वरोर, तोमा इनना सिस्युड मना हिल्लोर. (ई तोमान दिदुम इंचिगुडा इंतुर) 25 अदुनहाटीं सिस्युल्क, “मोमोट सामिन हूळतोम,” इंचि ओन्क वेहतुर. गानि तोमल, “नना कुद्दु ओना कय्कुंक कोह्कता पुनकुन हूळसि, आ पुनकुने नना वेलु इर्रुवा, इंका गोर्काते कोह्कता बर्रातगा कय इर्रुवा, नना विस्वासम किय्योन,” इंचि इत्तोर.
26 ओर अल्हा इंचि एनिमिदि रोजुक आता पजा, सिस्युल्क मर्रा अदे लोते तल्पुंक तालम वाटसि जमा आसि मत्तुर. ई मल्का ओरतोनि तोमालगुडा मत्तोर. तल्पुंक तालम वाटसि मननेंकेगुडा येसु ओरा नड्डुम वासि निल्तोर. निलसि, “मीकु सांति दोर्कि,” इंचि इत्तोर. 27 पजा येसु तोमान, “तोमा, नावा कय्दा पुनकुने नीवा वेलु इर्सि हूळा. आनि नीवा कय हाह्चि, नावा पक्काक मनना गोर्का बर्राते नीवा कय इर्रा. निमे अनमानमते मन्मा, विस्वासम कीम,” इंचि वेहतोर. 28 अस्के तोमल, “ना सामि, ना पेनदुना,” इंचि तोमल येसुंक जवाब हीतोर. 29 पजा येसु ओन, “निमे नाकुन हूळसि विस्वासम कीतिन. गानि बोर नाकुन हूळाकोन्ना विस्वासम कींतोर, ओर आसिर्वादम दोर्कतोर आंद,” इत्तोर.
इद पुस्तकोम रासता उद्देसम