येसु जीवाते तेदतोर
(मरकुस १६:१-१०; लूका २४:१-१२; योहान २०:१-१०)
28
1 नोमकेम आतारित्ते इंकुंदि रोजु अयतारम पंग आयनेंके मगदलेनि नाटेनद मरियम आनि दाना दंटातद इंकुंदि मरियम,
इव गोरीतुन हुळालय होत्तां.
2 अस्के उंदि पेनदा दूता स्वर्गमताल अगा रेय्ता.
अदुनहाटीं अगा पेद्दा बुकंपम आता.
पजा आ पेनदा दूता गोरीक अड्डम मत्ता बंडातुन तेंडता आनि अदे बंडापोर्रो उद्दुता.
3 दाना रुपम पोड्दुनालेसीं जगजगा मेर्सेक मत्ता आनि दाना अंगि बर्पलेह्का तेल्लगा मत्ता.
4 दान हूळसि कावेल कियानोर पक्का वेरियतुर आनि वेरियसि गज-गजा वनकालय दल्गतुर,
इंका हाताप आतुर.
5 अस्के पेनदा दूता आ मुर्ताह्कुन,
“मिमेट वेरियमट,
क्रुसुनपोर्रो मोल्लां कोह्किस हाव्कुता येसुन पह्कसेक मंतिट,
इद नाकु एरपाटे मंता.
6 गानि ओर इग्गे हिल्लोर,
ओर वेहताप ओर मल्सि जीवाते तेदतोर.
वटु,
ओना पीनगु इरता जेगातुन हुळाट.
7 आनि बिराना होंचि ओना सिस्युल्कुंक वेहट गदा,
ओर हामुरताल जीवाते तेदतोर,
ओर मीकन्ना मुन्नेन गालिल एरियाते होंचेक मंतोर,
अगा ओर मीकु दिस्सानुर,
बतल अय्ते नना मीकु वेहतन,
दान मति इर्राट,”
इंचि इत्ता.
8 अस्के आ मुर्ताह्क वेर्रेते आनि वेल्लेन आनंदमते,
गोरीतगाटाल जटपेट पेय्सि ओना सिस्युल्कुंक इद कबुर वेहालासिंक विततां.
9 आगटाल पेय्सि होननेंके,
येसु अवुंक कलियसि अवुन,
“बेस पिस्सट,”
इंचि इत्तोर.
पजा अव ओना दग्गेर होंचि काल्क मोळकतां.
10 अस्के येसु अवुन,
“वेरियमट होंट,
नावा तम्मुह्कुंक वेहट गदा,
ओर गालिल एरियातेके होन्निरकांटी,
अग्गेन ओर नाकुन हूळंतुर,”
इंचि इत्तोर.
कावेल कियानोरा आबद्दम गवाइ
11 अव सिस्युल्कुंक वेहालय होंच्चेकेन मत्तां,
अच्चोटेन गोरीतगा कावेल कीसेक मत्तोर इच्चुर सिपाइल्क सहरते होत्तुर,
होंचि अग्गा जर्गुता कबुर अन्नि पेद्दा पेर्मालोर्कुंक वेहतुर.
12 अस्के ओर यहुदि पेद्दाल्कुंक कलियसि उंदि उपायम कीतुर.
आनि सिपाइल्कुंक वेल्लेन कोत्तां हीसि वेहतुर गदा,
13 “ ‘मोमोट निद्रते मननेंके ओना सिस्युल्क नर्का वासि ओना पीनगुन दोंगातनमते ओतुर,’
इल्हा लोकुल्कुंक वेहट.
14 इ पोल्ले गिंटा राज्यपालना केव्दे अर्रानय्ते मोमोट ओन समत कीसि मीकु देब्बा वायकुंटा कींतोम,”
इंचि इत्तुर.
15 अस्के ओर कोत्तां एतसि वेहताप कीतुर,
आनि इ पोल्ले यहुदिल्कुना लोप्पो इदवेरादाका इंका इल्हे ताकसेक मंता.
येसु सिस्युल्कुनतोनि वळकांतोर
(मरकुस १६:१४-१८; लूका २४:३६-४९; योहान २०:१९-२३; प्रेरितुल्कुना कबाह्क १:६-८)
16 अद आतंका पदाकोंडु मंदि सिस्युल्क गालिल एरियाते येसु वेहता गुट्टापोर्रो होत्तुर.
17 ओर येसुन हूळसि ओन मोळकुतुर.
अय्नागानि इच्चुर सिस्युल्कुंक अनमानम मत्ता.
18 अस्के येसु ओरा दग्गेर होंचि ओर्कुन,
“स्वर्गमते आनि बूमिपोर्रोटा हक्कु अंता नाकु हीसि मंता.
19 अदुनहाटीं मिमेट होंचि अन्नि देसेल्कुना लोकुल्कुन सिस्युल्क कीम्टु.
ओर्कु बाबाना पोर्रोलते,
मर्रिना पोर्रोलते आनि पवित्र आत्माता पोर्रोलते बापतिस्मा हीम्टु.
20 नना मीकु हीता आदेस परकारम ओर्कु ताकलासिंक कराहट,
आनि ई दुनिया मुंळगना आकिर वेलादाका नना बस्केळक मीवातोटी मनंतन,”
इंचि इत्तोर.