गालिल सेरवुनगा येसु वातोर
21
1 इवंता आता पज्जो, येसु मरुंदि मल्का सिस्युल्कुंक तिबेरिया समुद्रमताa ओड्डुंक सिस्युल्कुंक दिसतोर. अद इल्हा जर्गता: 2 अगा सिमोन पत्रु, दिदुम इनना तोमल, गालिल राज्येमता काना नाटेना नतेनल, जब्दिना मर्क आनि येसुना इंका इव्वुर सिस्युल्कु जमा आसि मत्तुर. 3 अस्के सिमोन पत्रु, “नना जिम्मां पियालय दांतन,” इंचि ओर्कुन इत्तस्के ओर, “मोमोटगुडा नितोनि वांतोम,” इत्तुर आनि होंचि डोंगाते उदतुर. गानि अद नर्कामेड ओर्क उंदिंका जिम्मा दोर्का हिल्ले.4 अद रोजु पंगा आयनेंके येसु वासि ओड्डुनगा निलसि मत्तोर. गानि ओना सिस्युल्क, ओन येसु आंदुर इंचि एरपाट किया हिल्लुर. 5 अस्के येसु, “मिहगा इच्चुंगना जिम्मां मंतंगा, पिलाल्कनिटा?” इंचि पूसकीतोर. अय्ते ओर, “उंदिंका हिल्ले,” इंचि इत्तुर. 6 अस्के येसु ओर्क, “डोंगाता तिना बाजुंक ओल्ला वाटट, अस्के मीकु जिम्मां अर्रंतां,” इंचि वेहतोर. येसु वेहतापे ओर ओल्ला वाटतुर. अस्के हुळाट! ओर ओल्लातुन ओड्डुंक इग्गा परा हिल्लुर, अचोने वेल्ले जिम्मां ओल्लाते अर्तां. 7 अस्के येसु बोन अय्ते पावरम कियुंदुरो आ सिस्युड, “ओर सामिए आंदुर,” इंचि पत्रुंक वेहतोर. अय्ते पत्रु, ओर अल्हा वेहतदुन केंजता केंजमळे तेंडसि मत्ता कपडीं केरतोर. केरसि समुद्रमते दुन्कतोर. 8 ओड्डु वेल्ले लक्कु मनाहिल्ले. दगेर-दगेरा रोंड नुह्कुना कूटां लक्कु मत्ता बारे. अदुनहाटीं कळमता सिस्युल्कु, जिम्माने निंडिस मत्ता ओल्लातुन इग्गिसेके अदे डोंगाते वातुर.
9 ओर ओड्डुंक एवतस्के, रेय्सि हूळते, अगा ओर्क इच्चुं हारीं आनि तडमि पोर्रो वाटसि, इच्चुं जिम्मां दिसतां. 10 अस्के येसु, “मिमेट इंद-इंदके पीता जिम्मानाल इच्चुं जिम्मां हीके पीसि वटु,” इंचि ओर्कुन इत्तोर. 11 अदुनहाटीं सिमोन पत्रु डोंगाते एक्कीसि ओल्लातुन एताल ओड्डुंक इग्गुतोर. अद ओल्लाते नूटा एबै मूड पेद्दा-पेद्दा जिम्मां निंडिस मत्तां. अचोने वेल्ले जिम्मां निंडिस मनिना गानि अद ओल्ला हर्रा हिल्ले. 12 पजा येसु, “वटु, वासि नास्ता कीम्टु,” इंचि ओर्कुन केयतोर. सिस्युल्कुंक, ओरे सामि इंचि एरपाट आताहाटीं, “निमे बोन आंदिन?” इंचि पूसकियालय बोनके हिम्मत आया हिल्ले. 13 अस्के येसु वासि, आ हारिन आनि जिम्मान येतसि ओर्क हीतोर. 14 येसु हासि मर्रा जीवाते तेदता पज्जो, इल्हा सिस्युल्कुंक ओर दिसमळ, इद मूळोव मल्का आंदु.
येसु पत्रुंक अदिकारम हींतोर
15 अंटोरा तिनुळ आतास्के येसु सिमोन पत्रुन, “योहानुना मर्रि सिमोनु, ईर अंटोरकन्ना निमे नाकुन एक्को पावरम कींतिना?” इंचि पूसकीतोर. अस्के सिमोन, “हो सामि! नना नीकुन पावरम कींतन इंचि नीकु एर्के मंता,” इंचि इत्तोर. “अय्ते निमे नावा गोर्रे पोरिह्कुन मेहा,” इंचि येसु पत्रुंक वेहतोर. 16 रोंडोव मल्का येसु, “योहानुना मर्रि सिमोनु, निमे नाकुन पावरम कींतिना?” इंचि पूसकीतोर. अस्के, “हो सामि! नना नीकुन पावरम कींतन इंचि नीकु एर्के मंता,” इंचि पत्रु इत्तोर. “अय्ते निमे नावा गोर्रेन बेस मेहा,” इंचि वेहतोर. 17 येसु मूळोव मल्का पत्रुन, “योहानुना मर्रि सिमोनु, निमे नाकुन पावरम कींतिना?” इंचि पूसकीतोर. “योहानुना मर्रि सिमोनु, निमे नाकुन पावरम कींतिना?” इल्हा मूळोव मल्का येसु पूसकीताहाटीं, पत्रुंक दुक्कम वासि, “हो सामि! नीकु अय्ते अंता एरपाट मंता. नना नीकुन पावरम कींतन इंचिगुडा नीकु एरपाटे मंता,” इंचि पत्रु इत्तोर. अस्के येसु, “अय्ते निमे नावा गोर्रें मेहा. 18 नना निजम-निजम वेहासेक, निमे लेयोन मत्तिन अस्के, नीवा कपडीं निमे हदुरकुनिंदिन. आनि नि इस्टमाता जेगातगा होनिंदिन. गानि नीवा मातिरतनमते, निमे नीवा कय्क हाह्ते, बोरो वेरेतोर वासि नीवा कपडीं हदुरनुर आनि नीकु इस्टम हिलुवा जेगाते नीकुन पीसि ओयनुर,” इंचि वेहतोर. 19 पत्रु बसोंटा हामुर हासि, पेनदुक महिमाता कदर हियनुरो, इदुन ओन्क हुप्पिचालय येसु अल्हा वळ्कतोर. अल्हा वळकता पजा, “नावा पज्जो ताका,” इंचि ओन्क वेहतोर.
20 पत्रु पजोळ्क मल्सि हूळतस्के, येसु बोन अय्ते पावरम कियुंदुरो आ सिस्युड, बोरय्ते पंडुगुना गाटो तिननेंके वेल्लेन दगेर उद्दिस, सामि, नीकुन बोर दोकाते पीसि हींतोर इंचि, पूसकीता आ सिस्युड, ओना पज्जो वायनद ओन्क दिसतोर. 21 ओन हूळसि पत्रु, “ईनद बता संगति सामि?” इंचि येसुन पूसकीतोर. 22 अस्के येसु, “नना मल्सि मर्रा वायनदाका ओर पिस्सि मनगोम इंचि नाकु इस्टमातस्के, ओना बारेमते नीकु बतल गावाले? निमे नावा पज्जो ताका,” इंचि पत्रुंक वेहतोर. 23 दानहेंदाल, आ सिस्युड हायोर इत्ता पोल्ले, कळमता सिस्युल्कुन नड्डुम पैलांचि होत्ता. गानि आ सिस्युड हायोर इंचि येसु इना हिल्लोर. ओर सिराप “नना मल्सि मर्रा वायनदाका ओर पिस्सि मनगोम इंचि नाकु इस्टमातस्के, ओना बारेमते नीकु बतल गावाले?” इंचि इत्तोर.
आकिरता पोल्ले