येसु मर्रा जीवाते तेदंतोर
24
1 पजा वारमता मोदाटा रोजु इत्ते अय्तारम हक्केरेन पोळद पेय्साका मुन्नेन, आ मुर्ताह्क अव तयार कीता गमागमा गब्बु वायना वस्तुक पीसि येसुन इरता बोंदातगा एवतां. 2 एवस्के बोंदाता हरदुक अड्डम ताससि मत्ता बंडा पक्काक दोबसि मत्तदुन अव हूळतां. 3 अस्के अव मुर्ताह्क लोप्पो होळियसि हूळतां अय्ते अवुंक अगा येसु सामिना पिनगु दिसा हिल्ले. 4 अव इदुना बारेमते इल्हा बल्हा आता इंचि विचारमते मननेंकेन उंदे मल्का इव्वुर मनकलोर जगा-जगा मेरसना कपडिं केरसि अवुनगा वासि निलतुर. 5 अस्के अव इरगा वेरियसि तल्ला हिळु वराहसि दंडम दोस्तां. पजा ओर मनकलोर अवुन, “जीवाते मनना मनकन हातोरव्टे बारिंक पह्कसंतिर? 6-7 ओर इगे हिल्लोर, हामुरताल जीवाते तेदतोर. ओर मीवातोनि गालिल एरियाते मननेंके मीकु, ‘मनकना रूपमते पुटतोन नाकुन पापि मनकलोरा कयदे पीसि हियमळ जर्गार, पजा ओर नाकुन क्रुसुनपोर्रो मोल्लां कोह्कीसि हव्कानुर. गानि नना मूड रोजकुने मर्रा जीवाते तेदकन. इवन्नि निजम आयनुंगें,’ इंचि वेहचि मत्तोर. इद मीकु मति हिल्लेना?” इंचि इत्तुर. 8 अस्के अव मुर्ताह्कुंक येसु मुन्ने वेहता पोल्लें मति वातां.9 पजा अव मुर्ताह्क बोंदातगा हूळतव आनि केंजतव पोल्लेन बोंदातगटाल मल्सि होंचि पदाकोंडु प्रेरितुल्कुंक आनि अगा मत्ता कळमता सिस्युल्कुंक वेहतां. 10 अव मुर्ताह्कुने, मगदलेनि नाटेना मरियम, योहानि, याकोबुना यावल मरियम, इंका इवुनतोनि मत्ता मुर्ताह्क. इवे मुर्ताह्क अव हूळतव आनि केंजतव अन्नि पोल्लें प्रेरितुल्कुंक वेहतां. 11 गानि प्रेरितुल्कुंक आ मुर्ताह्कुना पोल्लें अट्टिगेन अन्पिस्तां. अदुनहाटीं अवुना पोल्लेन ओर नम्मा हिल्लुर. 12 अयना पत्रु अगटाल तेदसि बोंदातेके विततोर. अगा लोप्पो होळियसि हूळते, सिराप येसुना पिनगुन हुटसि मत्ता कपडिं बल्हा मत्तव अल्हे अरसि मत्तद दिसता. अगा अल्हा हूळसि इल्हा बल्हा आता इंचेके ओनद-ओरे मनसुने विचारम कीसेके मल्सि लोन होत्तोर.
इमाउस नार होनना हरदे येसु दिसंतोर
13 अदे रोजु येसुना सिस्युल्कुनाल बोरो इव्वुर इमाउस इनना नार होंचेके मत्तुर. अद नार येरुसलेम सहरताल दगेर-दगेरा पदाकोंडु किलो मिटर्क लक्कु मंता.a 14 ओर इव्वुर येरुसलेमते जर्गता अन्नि गटनान बारेमते वळसेके होंचेके मत्तुर. 15 ओर अव पोल्लें वळकसेके होंचेके मननेंके येसु उंदे मल्का कुद्दु ओरगा वासि ओरतोनि कलियसि ताकालय दल्गतोर. 16 गानि ओर बोर आंदुर इंचि ओर्क इव्वुर्क एरपाट आयाकोंटा कियमळ जर्गता. 17 पजा येसु ओर्कुन, “मिमेट बव पोल्लेना बारेमते वळसेके ताकसंतिर?” इंचि पूसकीतोर. अस्के ओर इव्वुर दुक्कमते अग्गेन निततुर. 18 पजा ओर इव्वुरगटाल वरोर किलयुपास इननोर, “इव रोजकुने येरुसलेमते जर्गता गटनान बारेमते नीकु एरपाट हिल्लेना?. पंडुगुंक वातोरव्टेटाल इव गटनां तेळियवोन निमे वरोने मंतिना?” इंचि जवाब हीतोर. 19 अस्के येसु, “बव पोल्लें आंदुं?” इंचि पूसकीतोर. पूस कीतस्के ओर इल्हा वेहालय दल्गतुर. “नासरेत नाटेना येसुना बारेमता पोल्लें आंदुं दादा. ओर इसंटा मनकल मत्तोर गदा, ओर बतल वेहिना, बतल किय्यिना पेनदा ताकततोने कियुंदुर. ओर पेनदा कबुरतोर मत्तोर. लोकुल्कगुडा ओन बेसतोर इंचि इनुंदुर. 20 गानि मावा पेद्दा पेर्मालोर, अदिकारिल्क ओन्कु हामुर सिक्सा हियमळ गावाले इंचि ओन पीसि पिलातुसना कयदे हीतुर. आनि पजा लोकुल्कु ओन क्रुसुनपोर्रो मोल्लां कोह्कीसि हव्कतुर. 21 गानि ओरे इस्राएलतोर्कुन पगातोरा कयदाल होळसियानुर इंचि मोमोट आसे पळतोम.”
“इव अन्नि गटनां हन्नेट दियेन जर्गतां. 22 अचोने आयका मावाव्टेटाल इच्चुं मुर्ताह्कगुडा माकुन गयबेत कीतां. अव इय्याला हक्केरेन बोंदातगा होंचि मत्तां. 23 गानि अगा अवुंक येसुना पिनगु दिस्सा हिल्ले. अदुनहाटीं अव मल्सि वासि, माकु पेनदा दूतां दिसतां, अव माकु येसु जीवाते तेदतोर, इंचि वेहतां, इंचेके अव मुर्ताह्कु माकु वेहतां. 24 अवुना पोल्लें केंजसि मातोनि मत्तोर इच्चुर बोंदातगा होंचि हूळतुर. अय्ते अव मुर्ताह्क बल्हा वेहतांगो अल्हेन मत्ता, येसु अगा मना हिल्लोर,” इंचि वेहतोर. 25 अस्के येसु ओर्कुन, “अरे बुद्दि तक्को लोकुरिटा, पेनदा कबुरतोर मुन्ने वेहचि मत्ता पोल्लेन मिमेट बस्के नम्मंतिर? 26 पेन लोहता पिसागोटना किरिस्तु ओना पेनबाबानाहेंदाल पेद्दा कदर दोर्किच्कुनाका मुन्ने ओर इवन्नि तकलिप अर्रानायोना?” इंचि इत्तोर. 27 पजा येसु मूसाना नियमते, अंटोर पेनदा कबुरतोर रासता पोल्लेने अल्हेने दर्मसास्त्रमते ओना बारेमते बगा-बगा राससि मंतानो अवुनंता ओर्कु बेस तेळियानाल वेहतोर. 28 पजा इल्हा ओर ओर्क होनना मत्ता नाटुक दगेर एवतुर. अस्के येसु, ओन्कु इंका मुन्नेळ्क होनानद मंता इत्ताप ओर्क दिसतोर. 29 अदुनहाटीं ओर ओन, “इंदके पोळ्द होत्ता, इय्याला निमे इगेन महगा आगा दादा!” इंचि वेल्लेन विनंति कीतुर. अस्के येसु ओरगा मननाहाटीं ओरतोनि लोप्पो होत्तोर.
30 पजा येसु ओरतोनि कलियसि गाटो तिनालय उदतोर, अस्के हारितुन पीसि पेनदुक दन्यवाद कीतोर. कीसि दान तुकडां कीसि ओर्क हीसेक मत्तोर. 31 अल्हा हारि तुकडां हियनेंकेन ओरा इव्वुरा कळ्क जग्गरा आतां आनि ईर येसु आंदुर इंचि एरपाट कीतुर. गानि येसु ओर्क दिस्साकोंटा मायाम आतोर. 32 पजा ओर इव्वुर ओरद-ओरे, “हरपीसि मनातोनि वळकसेके ताकनेंके ओर मनाकु दर्मसास्त्रमते राससि मत्ता पोल्लेना निजम अर्तमतुन बेस तेळियानाल वेहतोर. अस्के ओना पोल्लें केंजसि बच्चोन बेस अन्पिच्चेक मत्ता!” इंचेके वळ्ककुत्तुर.
33 पजा ओर अगटाल बिराना तेदसि मर्रा तिरियसि येरुसलेम होत्तुर. होतस्के अगा पदाकोंडु मंदि प्रेरितुल्क आनि इंका कळमता लोकुल्कु उंदगा जमा आसि मत्तद ओर हूळतुर. 34 अस्के आ जमातोर, “हो, इद निजमे! येसु सामि जीवाते तेदतोर. ओर सिमोन पत्रुंक दिसतोर,” इंचि वळकसेके मत्तुर. 35 अस्के ओर इव्वुरगुडा हरपीसि होननेंके बतल-बतल जर्गता, इंका येसु हारितुन उरहासि ओर्क हियनेंके ओर येसुन बल्हा एरपाट कीतुर, इदंता अंटोर्क वेहतुर.
येसु ओना सिस्युल्कुंक दिसंतोर
36 ओर इव्वुर इव पोल्लें अंटोर्क वेहचेकेन मत्तुर, अचोटेन येसु ओरा नड्डुम वासि निलतोर. नित्तिसि, “मीकु अंटोर्क सांति दोर्कि,” इंचि इत्तोर.
37 अस्के ओर अंटोर, मोमोट येसुना बूतमतुन हूळसंतोम, इन्कुंचि इरगा वेरियतुर. 38 गानि येसु ओर्कुन, “मिमेट इच्चोन बारि वेरियतिर? मीवा मनसुने नावा बारेमते अनमानम बारि वाता? 39 नावा कय्क-काल्कुन हुळाट! नाकुन इट्टिस हुळाट, ननाने आंदुन! बूतमकु हव्विं-बोक्कां मन्नों गानि नाकु मंतां,” इंचि इत्तोर. 40 इल्हा वळकसेके येसु ओना कय्क-काल्कुन ओर्क हुपिस्तोर. 41 अस्के ओर वेल्लेन कुसिते, इल्हा बल्हा आता इंचेके इचंत्रम आसि ओर्क इंकागुडा पुरागा विस्वासम आया हिल्ले. येसु ओर्कुन अल्हा हूळसि, “मिहगा बतलन्ना तिनालय मंतना?” इंचि पूसकीतोर. 42 अस्के ओर ओन्कु उंदि बोळस्ता जिम्मा तुकडा हीतुर. 43 पजा येसु अद तुकडातुन ओरा मुन्नेन तित्तोर.
44 तित्तारित्ते येसु ओर्कु इल्हा वेहतोर, “इव पोल्लें बव इत्ते, नाकुन हव्कका मुन्ने नना मीवातोनि मत्तन, अस्के मीकु वेहतव आंदुं. मूसाना नियमते, पेनदा कबुरतोरा पुस्तकाल्कुने इंका बजन संहिताने राससि मत्ता अन्नि पोल्लें निजम आयनदे मत्ता,” इंचि इत्तोर.
45 पजा दर्मसास्त्रमते राससि मत्ता पोल्लें तेळियना इंचि येसु ओर्क तेल्वि हीतोर. 46 आनि ओर्कुन, “दर्मसास्त्रमते राससि मत्ताप, किरिस्तुंक वेल्लेन तकलिपकु वासि ओर हायनुर, पजा मूंड रोजकुने मर्रा जीवाते तेदनुर इद अदे पोल्ले आंद. 47 पापाल्क मापि आयनाहाटीं मनसु मार्सकुनुळ अवसरम मंता. इदे कबुरतुन येरुसलेमताल सुरुव कीसि, दुनियाता अन्नि देसेल्कुने किरिस्तुना अदिकारमते वेहमळ जरगार. 48 इव अन्नि पोल्लेंक मिमेटे गवाइ मंतिर. 49 इंका नावा पेन बाबाल हींतन इंचि पोल्ले हीता आ पवित्र आत्मातुन नना मिहगा लोहांतन. गानि बदवेरदाका अय्ते स्वर्गमताल पवित्र आत्माता ताकत मीवापोर्रो रेय्योनो, अदवेरदाका मिमेट इदे येरुसलेम सहरते मंटु,”b इंचि इत्तोर.
येसुना स्वर्गमते तेदसि होनमळ
(मरकुस 16:19-20; पवित्र आत्माता कबाह्क 1:9-12)
50 पजा येसु ओर्कुन यरुसलेम सहर दग्गेर मनना बेतानि इनना नाटाहेके ओतोर. ओसि ओर ओना कय तेहचि ओर्कु आसिर्वादम हीतोर. 51 ओर्क आसिर्वादम हियनेंकेन येसु ओरागटाल लक्कु आतोर. पजा ओन पेन स्वर्गमते तेहाचि ओता. 52 अस्के ओर अंटोर येसुंक टोंगरां ऊनसि मोळकतुर, मोळकीसि अगटाल वेल्लेन कुसिते येरुसलेम सहर मल्सि होत्तुर. 53 पजा ओर बस्केळक गुळिते जमा आसि पेनदुन तल्सकुंचेके मनुंदुर.