Room i

Kugbɔŋu kun Pɔɔl ŋmàn̄ ki tīī

Room

yabee

Tibɔkilkaal

Kriisitoo kúm nì u-fìkititam boon fiiiyee, an bí kii Juuda yab bin nìn kpántì Kriisitoo yabee, kii Akiilasi nì Priisiilee (kpèè Atuun 18.2) nìn kíĺ ki bíi gbìtī Tibɔmɔntiil Room, dibeel tiŋyilin. An pu ní Kriisitoo nikitil diba nìn pée bí niin ŋyunti ŋun ní bi nìn bí Siirii nì Asii nì Greesi timmun ki sòoǹ Unimbɔti bɔtee. Unimbɔti nìn tīī Pɔɔl ditundi ú cù «áli duulinya gbeennyɔkɔ». An pu ní u nìn là kí cù Room tiŋkin, kí kpáàa cù Eespaanyi mun. Taa béè yii u ŋúń ki cūtì Eespanyaaa, waa ŋúń, ama kí ŋmā kí bɔ́ntí u-saŋŋu gbantee, u nìn ŋmàn̄ kugbɔŋu «ki tīī nimbi bin bí Roomee» (1.7), an dàkà yii Kriisitoo yab bin bí kitiŋ gbantinee. Kriisitoo yab gbanti dikitil diba nìn kpáfí Priisiil nì Akiilasi dumpu (kpèè 16.3-5).

Pɔɔl ŋmàn̄ kugbɔŋu gbantee ki pùtīi cántì ki tùkū Kriisitoo yab bin bí niinee u nín gbìl̀ ditundi din u cáá kí tɔ̄ bin kaa sá Juuda yabee cee taapu puee. U-gbɔŋku gbanti cántì tiŋan tibɔti tin u sòoǹee. Úǹ u-ba kúlifì tibɔti gbanti ki lī yii: Tibɔmɔntiil sá mpɔn ŋun Unimbɔti cáa fìil̄ bin kɔkɔ fōō-tì ki kííyee, mpeepeekaamee Juuda yab, ama ki kpáaǹ bin kaa sá Juuda yabee mun (1.16).

Mpèé ŋun máaǹ kí nīn bí Juuda yab nì bin kaa sá Juuda yabee kansikinee (cilinjee mbimbim min bin kaa sá Juuda yab ki fōō Kriisitoo ki kííyee máaǹ kí nīn cáá kí dūú dī nì Juuda yab marabee) nìn sá tibɔti tin nìn páb́ ki tīī Kriisitoo yab bipeepeekaabee. Ti kāntí tibɔti gbanti Pɔɔl gbɔnti tikpil poon, kii Galaati gbɔŋku. Doo nee nee, Pɔɔl bíi lì yii Tibɔmɔntiil tin u sòoǹee sá ki tīī unil kamaa ní ugàntil kpá (1.16). Míǹ boonee ní u gíti cántì min Unimbɔti dì ki fìil̄ unil un wáŋkì ki fōō-u ki kíí, báà an niliuee yaa pée yāntì ki sá uŋyee (1.18–8.39).

Míǹ boonee ní u gíti sòon̄ tibɔti tin dɔ̄ ki sá yii Juuda yab dijandi yíì kaa dá láá là kí fōō Kriisitoo kí kííyee pu. U sòon̄ ki bántì yii bi nín yíì kaa fōō ki kííyee kaa pìintí Unimbɔti nín bɔ́ntì kí tɔ̄ u-tundi puee nsan, di sá yii Unimbɔti ŋanti di dāa yì dinyɔɔbunluŋkikaal (ayil 9–11). Iyunti nee poonee, Unimbɔti laŋŋaŋfitiiku kun u dàkā bin kaa sá Juuda yabee máaǹ kí yàntī bí nīn bí dimaŋfapɔndi tiŋman pu yalin (12.1–15.13).

Kí kúntée ní Pɔɔl sòon̄ u nín cáá nlandɔkɔ kí cù Room tiŋkin puee, ní ki kpáàa ŋmàn̄ ki jáam̀-bi (15.14–16.27).

Bin kɔkɔ pée nyàab̀ kí béé tiŋan difiil din Unimbɔti dì Yeesu Kriisitoo pu kí fīī unilee yaa kàan̄ kugbɔŋu nee, án làá ŋá-bi maamaaci bí ká Unimbɔti nín bɔ́ntì kí tɔ̄ ditundi diŋyee nín sá dikpaandi puee (11.33-36). Án làá yàntī bí ká kunyannyaau bí nóó Unimbɔti min máaǹee.