Kugbɔmpeepeekaau kun Pɔɔl ŋmàn̄ ki tīī
Kɔranti
yabee
Tibɔkilkaal
Pɔɔl nín cōom̀ ki túń Unimbɔti tundi nliliitiiminee, u nìn kāl̀ Greeki yab tiŋki kin bi yíì Kɔrantee poon iŋmal saalku nì ita ní. Bin nìn bí Kriisitoo nikitil din u nìn náań niinee nìn sá bin kaa sá Juuda yabee ní. Baa nìn tí sá bigaajab mun.
Kɔranti tiŋki nìn cáá meelab yulilaŋki, an puee kì nìn cáá tigaajati tikpil. Dibàntil nìn còom̄ kitiŋee poon tiŋan, ní animbikɔntigbiil nìn bí ní biciŋfitiibi kitiŋi bí ní inimbɔtijaam yíri yiri mun bí. Ama ajɔkɔntuun mun nìn gbóotì niin. An puee an nìn pɔ̄ɔ̄ ki tīī bin nìn fōō Kriisitoo ki kíí ki bí tíǹ gbanti kɔkɔ kansikinee. An pu ní an nìn sá Pɔɔl nlandɔkɔ u dàkafī kaa gèeǹ.
Pɔɔl nín yíkì kitiŋ gbantin ki búntèe, u nìn gbìl̄ ŋfunyɔm kupaau tibɔkpitil tikpil tin nìn bíi jītí Kriisitoo nikitiŋ gbanti kansikinee. An yāntì Pɔɔl ŋmàn̄-bi tigbɔn tinaa, tili kā Dipoompɔndi poon, ní tili tin kíǹee pu ní u sòon̄ 1 Kɔra 5.9-13 nì 2 Kɔra 2.3, 7.8. Tigbɔn tili gbanti tíǹ wáŋkì. Tigbɔn tili tin bí Dipoompɔndi poonee, u ŋmàn̄-tì ŋyunti ŋun u nìn yíkì ntataatiim ki cōom̀ ki túń Unimbɔti tundee. Kupeepeekaauee, Eefeesi tiŋkin ní u nìn bí ki ŋmàn̄-ku (kpèè 1 Kɔra 16.8), ní ki bí Eefeesi àá Maseeduwaan ní ki ŋmàn̄ kuliliitiiu.
Kugbɔmpeepeekaau kun u ŋmàn̄ ki tīī Kɔranti yabee poonee, u nín jáam̀-bi ki pàkā Unimbɔti u-ŋanti pu ki dóòyee (1.1-9), Pɔɔl tùkū Kɔranti yab yii bí pɔ́ɔǹ kí já kí pɔ̄ɔkiǹ digàntil (1.10–4.21), kí nyāntí ajɔkɔntuun bi-nikitil kansikin (ayil 5) ní kí gbèen̄ kí taa ti yíiń bi-nabiyaamu ibeeyiin bin kaa nyí Unimbɔtee cee (6.1-11). U gíti cántì ki tùkū-bi Kriisitoo yab nín máaǹ kí dū bi-wunti kí tɔ̄ atuun ŋiŋyee (6.12-20). Míǹ boonee ní u kíí Kɔranti yab nín bālifì-u tibɔti tiŋyee:
- Ticati bɔti (ayil 7),
- Tiwaatootinan bɔti nì mbimbim min Kriisitoo yɔu máaǹ kí nīn cáá kí dūú dī nì tin nyáń ti-ba nì dinimbɔtinoolee (8.1–11.1),
- Kriisitoo yab kitiŋi kpāfitam nì ti-Dindaan jikaati bɔti (11.2-34),
- Circir Fam nín pūǹ dipɔl diŋyee (ayil 12–14),
- bitaŋkpiibi fìkititam bɔti (ayil 15).
Kugbɔŋuee kúntì nì ibɔkaan iba (tootoo un bi bíi tòóyee nì Pɔɔl nín bɔ́ntì kí tɔ̄ atuun ŋiŋyee...) nì ijaam (ayil 16).
Tibɔti tin binib pée kāntí bi-maŋfal wiiŋyi poonee puee, Pɔɔl kaa sòon̄ ki pɔ̀n̄ úǹ u-ba. U dàkā yii unil yaa yú nì Unimbɔti deedeeyee, u làá ŋmā kí nyā tibɔti gbantin. Kunabitiiu neendi jítiǹ tin kɔkɔ kíǹee (ayil 13).