Room 16

Ijaam

1 M dū ti-niisal Fooyibee un tūǹ ditundi Kriisitoo nikitil din bí Saŋkireeyee^a kansikinee ki ŋá ni-ŋaan. 2 Fōōmaan-u ti-Dindaan pu kii Unimbɔti nib nín máaǹ kí nīn fòol̄ tɔb puee. Ní ajan ŋin kɔkɔ poon an bàlifī yii ní tūtuǹ-uee, ní tūtum̀maan-u. Míǹ ní u mun jòoń binib tikpil, ki kpáaǹ man m-ba.

3 Ní jāam̀ Priisiil nì Akiilasi^b, m-tɔntɔnjutiibi Yeesu Kriisitoo tundin. 4 Bi kíí kí dū bi-ba kí tīī ŋkúm man ŋmátí. An kaa sá man baba di làá jāam̀-bi an pu, Kriisitoo nikitiŋ ŋin kaa sá Juuda yabee kɔkɔ mun làá jāam̀-bi. 5 Ní jāam̀ Kriisitoo nikitil din kpáfí bi-dumpuee mun. Ní jāam̀ Eepayineeti, m-bɔɔ un m néeńee, un péé péé ki fōō ki kíí Asii tiŋkinee. 6 Ní jāam̀ Maarii un túń ditundi tikpil ki tīī-nee. 7 Ní jāam̀ Androonikuusi nì Juniyaasi, man nì bin pēē kubaabinaatoou ki pēē sarka muee. Yeesu kpambaliŋ kansikinee, bi tɔ́-bi tikpil. Bíǹ péeǹ man ki fōō Kriisitoo ki kíí.

8 Ní jāam̀ Ampiliyatuu, m-bɔɔ un pu maa mɔ̄ ti-Dindaan puee. 9 Ní jāam̀ Urbeen, ti nì un kpáfí ki tūǹ ditundi Kriisitoo puee, kí jāam̀ m-bɔɔmɔnti Sitaku mun. 10 Ní jāam̀ Apeeleesi, un jíń falaa Kriisitoo pu, kaa lítèe. Ní jāam̀ Ariistoobul dicaŋkun yab. 11 Ní jāam̀ Eeroodiyoon, man nì un pēēyee. Ní jāam̀ Naasiisi dicaŋkun yab bin sá ti-Dindaan yabee. 12 Ní jāam̀ Triifeeni nì Triifoosi, bin tūǹ ditummɔntiil ki tìì ti-Dindaanee, kí jāam̀maan ti-niisamɔnti Peersiidi un túń atummɔnti tikpil ki tīī ti-Dindaanee. 13 Ní jāam̀ Rufusi^c un ti-Dindaan lútì ú tɔ̄ u-tundee, kí kpáàa jāam̀ u-na un kpántì ma mun nee. 14 Ní jāam̀ Asiŋkiltu nì Fileegɔn nì Eermeesi nì Patrooba nì Eermaasi, nì ti-nabiyaamu mun bí bi-ceeyee. 15 Ní jāam̀ Filooloogu nì Julii nì Neeree nì u-niisal Oolimpa nì Unimbɔti yab bin kɔkɔ bí bi-ceeyee.

16 Ni-kɔkɔ ń jāam̀maan tɔb tiŋan kii nnabiyaamuee. Kriisitoo nikitiŋ kɔkɔ jáamiń-ni.

Tibɔkpaafikaal tijoolkaal

17 Nnabiyaamu, m kpáafí-ni ní nīn nyí nì ni-ba nì bin fá tibɔmɔntiil tin bi dàkā-nee ki cāabìń diyakatil, ki yàntī binib lítée. Sútí kí wàatīmaan bidambi. 18 An nibee kaa nóó ti-Dindaan Kriisitoo. Bi nyàab̀ bi-ba jim ní^d, ní ki sòoǹ anyɔɔbummɔɔn ki kíiĺ binib, ki yàntī bin nyil kaa náaǹee lítí. 19 Báà ŋma nyí ni nín tɔ́ ti-Dindaanee, an puee, m-pɔbil sɔ̀m̀ ni-pu. Ama m là ní nīn sá bin nyí ki ŋáań tiŋanee, kí nīn sá bin bí circir, kaa là ikpitee. 20 An kaa làá yúntí, Unimbɔti un tìì ŋgbansɔŋfee làá yàntī ní tāā kí mátí Sitaan.

Ti-Dindaan Yeesu ŋanti ń nīn bí ni-pu!

21 M-tɔntɔnjuti Tiimootee^e jáamiń-ni. Lusiyusi nì Jasɔn nì Soospatee, man nì bin pēēyee, mun jáamiń-ni.

22 Man Teertiyusi un ŋmàn̄ kugbɔŋu neeyee mun jáamiń-ni ti-Dindaan pu.

23 Gaayusi un dumpu m kóòyee, nì un dumpu Kriisitoo nikitil kɔkɔ kpáfée, jáamiń-ni. Eelasitu un ŋúb́ bi-tiŋki nimbiliŋee, nì ti-nabiki Kaartusi jáamiń-ni^f.

[ 24 Ti-Dindaan Yeesu Kriisitoo ŋanti ń nīn bí ni-kɔkɔ pu. Ameeni^g.]

Tí pàkàmaan Unimbɔti!

25 Tí nyɔ̄ŋkìmaan Unimbɔti! Nì tibɔmɔntiil tin m sòoǹ Yeesu Kriisitoo puee, Unimbɔti cáá mpɔn kí báań-ni inyaan nnimbɔtisan poon. Doooo ŋyuntikpikee, tibɔtee nìn bí dibalin, Unimbɔti kaa nìn dáá bīitì ti-pu, 26 ama kɔŋkɔnnee u nyántì-tì mpaampiin pu. U dī tigbɔn tin u-bɔnaatiliibi ŋmàn̄ ki nāatì u-bɔtee pu ki yāntì atimbun kamaa nib béè ti-pu án nín làá ŋá pu bí fōō kí kíí kí nīn kíǹ ki tɔ́ Unimbɔtee. Jaanjaan Nimbɔtiu nín là puee dee.

27 Míǹ puee, Unimbɔti un baba sá uciŋfitee ń ká tinyool Yeesu Kriisitoo pu kí nīn pée cá jaanjaan! Ameeni.