Room 15

Ŋá tin làá fáatiǹ a-jutee

1 Timbi bin ká mpɔn Unimbɔti saŋŋu poonee, ti máaǹ kí tūtuǹ bin kaa láá ká mpɔnee kí jī kimɔtii bi-pu, kí taa nín̄ nyàab̀ min làá nīn fáatiǹ-tee. 2 Báà ŋma ń nyàab̀ min làá tūtuǹ u-jutee mmɔntiim ú báań inyaan. 3 Di sá yii Kriisitoo kaa nìn nyàab̀ kí ŋá min fáatì-uee, ama, kii an nín ŋmàn̄ puee yii: «Asiibil ŋin bi nìn sìí sii Unimbɔtee, lítì man pu^a.» 4 Di sá yii tin kɔkɔ bi nìn ŋmàn̄ Unimbɔti gbɔŋku poon dooooyee sá kí dàkà-ti tí nīn cáá kimɔtii nì kunyannyaau, kí nīn máká Unimbɔti pu. 5 Unimbɔti un di tìì kimɔtii nì kunyannyaauee ń tūtuǹ-ni ní ŋá ubaanti kii Yeesu Kriisitoo nín là puee. 6 Ni-kɔkɔ ń ŋmā kí kpāfì kinyɔɔbaantii kí nyɔ̄ŋkì Unimbɔti un sá ti-Dindaan Yeesu Kriisitoo Baayee.

Tibɔmɔntiil sá ki tīī anibul kɔkɔ

7 Míǹ puee, kii Kriisitoo nín fōō-ni puee, ní nīn fòol̄maan tɔb án tīī Unimbɔti tinyool. 8 An taapu sá yii Kriisitoo dɔ́miń Juuda yab kansikin ki túń ditundi ki ŋá min Unimbɔti nìn pōoǹ ki tīī bi-naanjabee ki dàkā yii Unimbɔti sá deedeedaan, 9 ní ki dɔ́miń bin kaa sá Juuda yabee mun ń nyɔ̄ŋkì Unimbɔti u-saasɔl pu, kii an nín ŋmàn̄ puee, yii:

«An pu ní m làá nyɔ̄ŋkì-si atimbun kansikin,

kí gāā ilan kí pàkà a-yindi.»

10 An gíti ŋmàn̄ yii:

«Atimbun, fàal̀maan nì dinibul din Unimbɔti lútèe!»

11 An gíti tí ŋmàn̄ yii:

«Nimbi atimbun kɔkɔ ń nyɔ̄ŋkì ti-Dindaan,

ní anibul kɔkɔ ń pàkà-u!»

12 Yeesaya mun nìn lī yii:

«Jeesee naantiiu ubɔ làá dāan̄,

u làá dāá yīkì kí jī atimbun kɔkɔ pu dibeel,

ní atimbunee kɔkɔ làá dāá nīn máká u-pu^b.»

13 Unimbɔti un tìì dimákalee ń gbéeǹ-ni dipɔɔpindi kí tīī-ni ŋgbansɔŋfi mmɔntiimin ni nín fōō u-bɔti ki kíí puee, án nín làá ŋá pu u-Fam pɔŋŋu ń yàntī ní nīn cɔ́tí u-pu tikpil tikpilee.

Pɔɔl bíi sòoǹ u-tundi bɔti

14 M-nabiyaamu, man m-ba nyí yii ni sá binib bin tiŋan gbí ni-pɔbiliŋ, ki nyí tin kɔkɔ ni máaǹ kí nīn nyée, ki ŋūǹ kí nīn sáŋkí tɔb muee. 15 Nì míǹ kɔkɔee, m ŋmàn̄ ki cántì ajan aba, kaa fāŋkì kí fàtīí téetí-ni tin ni nìn nyí dooooyee. M yaa ŋmàn̄-ni mimmee, an sá diyimɔɔl din Unimbɔti pú-mi 16 ḿ nīn sá Yeesu Kriisitoo tɔntɔnliu bin kaa sá Juuda yabee ceeyee pu. Unimbɔti dū Tibɔmɔntiil disoondi ki ŋúbiǹ-mi, an ŋman kii bisaraaŋaliibi tundi ní m bíi tūǹee, ḿ ŋmā kí dū bin kaa sá Juuda yabee kí tīī Unimbɔti, u-Circir Fam ń yàntī bí nīn sá saraamɔnti un làá fáatí-uee. 17 Man nì ti-Dindaan Yeesu Kriisitoo nín ŋá ubaantee puee ní m ŋūǹ kí nīn gàafī nì ditundi din m tūǹ ki tìì Unimbɔtee pu. 18 Di sá yii maa làá wàan̄ kí lì tiba an yaa kaa sá tin Kriisitoo dī m-pu ki ŋá, ki cáań binib bin kaa sá Juuda yabee ń nīn tɔ́ Unimbɔtee. Kriisitooyee di yāntì m sòon̄ anyɔɔbun ki túń atuun 19 ki ŋá tidaandi nì maamaacib, nì Unimbɔti Fam pɔŋŋu. Míǹ ní m sòon̄ Tibɔmɔntiil tin sá Kriisitoo yatee an kɔkɔ, ki yōoǹ Jeerusaleem ki dāa sāā Iliirii tiŋki. 20 M pɔ̄ɔntí m-ba kí sòoǹ Tibɔmɔntiilee laakin binib kaa láá gbìl̄ Kriisitoo puee, án nín làá ŋá pu ḿ taa mā kí tɔ́kɔń laakin biba nìn kíĺee. 21 Míǹ ní m ŋá kii an nín ŋmàn̄ puee yii:

«Binib bin cee baa sòon̄ u-puee

làá dāá ká-u,

bin bin kaa nìn gbìl̄ u-puee

làá dāá gbìl̄ taapu.»

Pɔɔl là kí cùú màntì Room yab pu

22 Ditundi gbanti pu ní m mākafì miŋa nì miŋa kí dāan̄ ni-cee ní kaa ŋúń. 23 Kɔŋkɔnnee, maa ti cáá ditundi diba ntimu gbanti poon. M baasii nyàab̄ kí dāan̄ ni-cee abin kupaau sèé. 24 M yaa làá cù Eespaanyee, see ḿ dīń ni-cee, man nì ni ń kàl̄, ní kpáàa tūtuǹ-mi ḿ cù kitiŋ gbantin. Mimmee m làá ŋmā kí kàl̄ ni-cee ŋyunti ŋubɔ fiii an mɔ̄ɔkiǹ-mi. 25 Kɔŋkɔnnee, m dá láá cá Jeerusaleem kí tɔ̄ ditundi diba kí tīī Unimbɔti yab bin bí niinee. 26 Kun puee Kriisitoo yab bin bí Maseeduwaan nì Akayee kpáfì ki tɔ́ animbil kí tūtuǹ Kriisitoo yab bin bí Jeerusaleem ki sá bisoodambee. 27 Bíǹ bi-ba di lēē yii bi làá ŋá míǹ, ní an lafun máaǹ bí ŋá-bi míǹ, kun puee Kriisitoo yab bin bí Jeerusaleemee dū Tibɔmɔntiil ki yākatì nì bi. Míǹ puee, an máaǹ bi mun ń dū bi-wanti kí tūtuǹ-bi^c. 28 M yaa dū inannakan in bi nākaǹní-mee ki dūu tīī-bi, ki kpēē tibɔti gbanti ki dóòyee, m làá dīń ni-cee, ní kí nín nìkī Eespaanyi. 29 M nyí yii Kriisitoo làá bìin̄ m-dāantam ni-cee pu án nīn mɔ̄ tikpil.

30 Ama, nnabiyaamu, m mèé-ni ti-Dindaan Yeesu Kriisitoo nì dineendi din Circir Fam tììyee pu, ni-nimbiliŋ ń nīn máǹ ŋwimmeem pu. Ní nīn mèé Unimbɔti ki tútúǹ-mi, 31 ḿ ŋmā kí nyā Juudee yab bin kaa fōō ki kííyee ŋaan, ní Unimbɔti yab bin bí Jeerusaleemee mun ń fōō nì dipɔbil diba ditutundi din m cáǹ kí tīī-bee. 32 Míǹ ní, Unimbɔti yaa kíí, m làá ŋmā kí bàń ni-cee nì dipɔɔpindi man nì ni ń kàl̄ ḿ ŋùŋfì. 33 Unimbɔti un tìì ŋgbansɔŋfee ń nīn bí ni-kɔkɔ cee. Ameeni.