Kugbɔnliliitiiu kun Pɔɔl ŋmàn̄ ki tīī
Kɔranti
yabee
Tibɔkilkaal
Kugbɔnliliitiiu nee poonee, ti ká yii Pɔɔl nì Kɔranti yab kansikin kaa mɔ̄ ki dóò. Kɔranti yab kansikin biba nìn yīntiǹ-u ní ki nìn lì yii waa sá Yeesu kpambal. Pɔɔl nín gbìl̄ mimmee, u nìn kíí-bi nì tininjati, ama u nìn sòon̄ mun yii u néeń Kɔranti yab ní ki là u nì bi-kansikin ń nīn mɔ̄. An pu ní u nín gbìl̄ tibɔmɔntiil tin nyánní Kɔranti tiŋkinee, an nìn mɔ́ɔkiǹ-u (7.5-15).
U nín sòon̄ animbinaaman ŋin poon úǹ u-ba kɔ́ Eefeesi tiŋgbaŋkinee (1.1-11) ki dóòyee, u téetì agìń ŋin di kɔ́ u nì Kɔranti yab kansikinee ní ki sòon̄ Yeesu Kriisitoo kpambal tundi nín sá diŋyee. An pu ní u lī kun pu ní u sòon̄ nì bi an pɔ̄ɔ̄ kugbɔmpeepeekaau poonee. U nín sòon̄ nì bi an pɔ̄ɔ̄ mimmee cáań-bi dibakpántil ní an mɔ́ɔkiǹ-u (1.12–7.16).
Tootoo un an sá bí tɔ̄ kí tīī Kriisitoo yab bin bí Juudee tiŋkinee puee (8–9), u gbāam̀ Kɔranti yab bí dàkà tiniti. U lī yii: «Ni nyí ti-Dindaan Yeesu Kriisitoo ŋanti tin u ŋá-tee. Úǹ un sá ugaajee gíiǹ u-ba usoodaan, timbi ń kpántí bigaajab úǹ soodaŋku pu» (8.9).
Kugbɔŋu nee nín nìkī puee (ayil 10–13) kpántì fiii. Pɔɔl nyáń bin bíi kɔ́kɔĺ-u yii waa sá Kriisitoo kpambal tiŋman pu yalee pu. Tibɔti tin u ŋmàn̄ ki dūu kúntì kugbɔŋu neeyee sá kunabitiiu bɔti, ama an kaa fɔ̀kɔ̀ (13.11-13).
Pɔɔl nín sòon̄ nì tininjati min kugbɔŋu nee poonee kaa máaǹ kí bàkatīǹ-ti: Pɔɔl kaa nìn bíi mɔ́tí u-ba pu àá tin u nyée pu. U yaa nìn bíi mɔ̀ bí béé yii u sá Kriisitoo kpambalee, an nìn sá yii binib ń fōō Tibɔmɔntiil kí kíí mmɔmin ní kí béé yii Kriisitoo lafun sá bi-Dindaan.