2 Kɔranti 7

1 Nnabineeŋkaamu, an nín sá yii timbi ní Unimbɔti pōoǹ ipoon gbantee, tí fámaan atuŋkpiti ŋin kɔkɔ bíiĺ tiwun nì kinaŋee, kí fàŋkì Unimbɔti kí nyāntí ti-pɔbiliŋ poon tikpiil kɔkɔ kí nīn bí circir.

Pɔɔl pɔbil píil̀

2 Ní dū ni-pɔbiliŋ kí tīīmaan-ti, di sá yii taa yīntiǹ ubɔ ni-kansikin, kaa bíil̀ ubɔ ni-kansikin, kaa jíń ni-kansikin ubɔ. 3 Kaa sá m là kí wòoǹ-nee pu ní m lì míǹ, di sá m pée lī dooooyee yii ni kɔ́ ti-pɔbiliŋin tiŋan. Báà dimaŋfalinaaa, ŋkúminaaa, ti làá nīn gbíntì ki bí míǹ ní. 4 M cáá dimákakpaandi ni-pu, ni-bɔti mɔ̄ǹ-mi tikpil. Ti-falaabi poonee, dipɔɔpiŋkpaandi din m cáá ni-puee tīī-mi kunyannyaau.

5 Di sá yii ti nín bāań Maseeduwaanee, taa gbìl̄ mmɔn, ti kántì agìń kɔkɔ nì ŋi-bul ní timbi ti-ba bí kujaaun ní tifaandi kɔ́-ti. 6 Ama Unimbɔti un tìì bin wunti yɔ̄tèe kunyannyaauee tīiń-ti kunyannyaau ŋyunti ŋun ní Tiiti bāań ti-ceeyee. 7 Kaa sá u nín dɔ́miń ti-ceeyee ŋmaniŋma pu ní ti ká kunyannyaau, ama u nín máafì-ti nimbi ni-ba nín tīī u mun kunyannyaau kuŋyee pu. U máafì-ti ni nín mɔ̀ ki nyàab̀ kí bàà gíti ká-mee, nì ni nín bí ki yáliŋkí m-pu miŋyee, an di gíti mɔ́ɔkiǹ-mi ki lákatì.

8 An puee kugbɔŋu kun m nìn ŋmàn̄-nee yaa nìn kɔ́ǹ-ni kunimbaauaaa, an kaa ti páb́-mi kɔŋkɔnnee. Tin nìn páb́-mee di sá m nín ká yii kugbɔŋu gbanti kɔ́ǹ-ni kunimbaau ŋyunti ŋubɔ poon fiiiyee. 9 Ama kɔŋkɔnnee an mɔ́ɔkiǹ-mi. An kaa sá an nín kɔ́ǹ-ni kunimbaauee, ama an nín kpántì ni-bimbimee pu. Mimmee timbi kaa ŋá-ni ikpiti iba dee, an sá Unimbɔti di dī ni-nimbaaku pu ki gíiǹní-ni u-cee. 10 Kun puee kunimbaau kun Unimbɔti kɔ̄ntí binibee cāabìń dibakpántil ní, ní unil ń ká difiil, ní kunimbaauee kaa ti páb̀-u. Ama kunimbaau kun duulinya nee gìŋ́ŋi tììyee cáǹ ŋkúmin ní. 11 Ni ká Unimbɔti nín kɔ́ǹ-ni kunimbaau kuŋyee nín cáań-ni tiŋan tiŋyeeyaa! Ni kíǹ ki ŋúb́ Unimbɔti bɔti mmɔntiimin, ki kíǹ ki bíi gbàam̄ ni-bɔkpil pu. Tikpitil tin ŋée kaa mɔ́ɔkiǹ-ni, ni kíǹ ki fàŋkí Unimbɔti, ní an júkufí-ni ní ká-ti. Ni kíǹ ki cáá difaŋgiil, ki kíǹ ki wāĺ yii an máaǹ bí dáaĺ ikpitidaan tafal. Tin ni ŋá nee puee, ni dàkā yii naa bí tibɔti gbantin.

12 An puee m yaa nìn ŋmàn̄-ni kugbɔŋuee, an kaa sá un ŋá ikpitee pu, kaa tí sá un bi ŋá ikpitee mun pu. Ama m là ní ká difaŋgiil din ni cáá ti-puee Unimbɔti nimbiin ní. 13 An di tīī-ti kunyannyaau.

Tiiti nín bāańee, an kaa sá kunyannyaau ŋmaniŋma ní ti ká, ama ti ká dipɔɔpiŋkpaandi mun, kun puee an mɔ́ɔkiǹ-u tikpil kunyannyaau kun ni-kɔkɔ tīī-u ni-cee niinee. 14 Kí wàatī ú dāan̄ ni-ceeyee, ti nìn tīī-ni disíndi u-cee, ní naa kɔ́ǹ-ti icoo kii ti nín pée sòoǹ nì ni ibaamɔn baabadal puee. Míǹ ní disíndi din ti tīī-ni Tiiti ceeyee cūtì ki kāl̀ deedeedee. 15 U yaa téetì ni-kɔkɔ nín nìn tɔ́-u min min, ki pílifíǹ-u, ki fōō-u min min nì tifaandi yɔ́kɔ́ yɔkɔee, ní dineendi din u cáá ni-puee mɔ̀tīi wīintí. 16 An mɔ́ɔkiǹ-mi tikpil, kun puee kɔŋkɔnnee m kíǹ ki cáá ni-pu dimákal tikɔkɔ poon.