2 Kɔranti 8

Maseeduwaan yab niti

1 Nnabiyaamu, ti là ní béé Unimbɔti nín ŋá tiŋan tin ki tīī Kriisitoo nikitiŋ ŋin bí Maseeduwaan ŋi túń ditundi diŋyee ní. 2 Bi nìn bí agìń tikpil poon, ama ní bi-pɔɔpindi nìn gíti lákatì. An di yāntì ní min kɔkɔ bi sá bisoodambee, bi dàkā bi-niti an nyāŋkì. 3 M lēē bi-mɔ́ɔŋŋu yii bi tīī nì dipɔbil diba min bi ŋúńee áli ki jítiǹ min bi ŋūǹee pu kpataaa. 4 Bi gbāam̀-ti tikpil, yii tí pée pɔ̄ bi mun diyimɔɔl bí tɔ̄ tootoo kí tūtuǹ Kriisitoo yab bin bí Juudeeyee^a. 5 Bi tīī ki jítì min pu timbi bàà dàkafēe, di sá yii bi dá láá péé ki dū bi-ba ki tīī ti-Dindaan ki wāatì ní ki ŋá Unimbɔti nín là puee, ki dū bi-ba ki tīī ti mun. 6 An pu ní ti gbāam̀ Tiiti yii ú gítiń ni-cee kí tīī-ni kunyannyaau ní púntí ni-tootoou un u nìn tīī-ni kunyannyaau ni kíĺee kí tɔ̄ nì tiniti. 7 Ni cáá tikɔkɔ nì tikɔkɔ: ni cáá fookii, ki nyí disoondi, ki cáá dinyil, ki cáá difaŋgiil tikɔkɔ pu, nì dineendi ti mun pu. An puee ti là yii ní dū tin kɔkɔ ni cááyee kí dàkà tootoo nee poon ni-niti.

8 Kaa sá mara ní m bíi tìì-ni, ama m bíi máafí-ni biba faŋgiil ní, ni mun ń ŋmā kí dàkà ni-neendi nín sá ibaamɔn puee. 9 Kun puee ni nyí tiŋan tin ti-Dindaan Yeesu Kriisitoo ŋá-tee. Úǹ un sá ugaajee, u gíiǹ u-ba usoodaan^b, timbi ń kpántí bigaajab úǹ soodaŋku pu.

10 Man nín ká tin tibɔti nee poonee ní m là kí tùkù-ni: m ká yii an ŋān̄ ní nìkī ni-tundi din ni nìn kíĺ jiilee, kun puee nimbi di nìn péé péé ki kánní an landɔkɔŋu ní ki nìn péé ki tɔ́ mun. 11 An puee kɔŋkɔnnee, ní púntímaan ni-tundi gbanti, án nín làá ŋá pu bí dāá ká min ni lēē ni-pɔbiliŋ poon yii ni làá ŋée, ní púntí kí ŋá ni-pɔŋŋu nyɔkɔm. 12 Ni yaa làá tīī tiba nì dipɔbil dibee, an kaa sá ni nín làá tīī kuŋyee wíiŋŋu di sá tiba Unimbɔti cee, ní tīī min nyɔkɔm ni ŋūǹee di sá.

13 An kaa sá yii ní dū tin ni cááyee kɔkɔ kí jòò bin kíǹee kí ŋmìntī ni-ba, ama an máaǹ un bi tútúǹee nì un tútúǹ-uee kɔkɔ ń nīn ŋmà ní. 14 Kɔŋkɔnnee ni cáá tikpil kí ŋmā kí tūtuǹ bin kaa cááyee, ní daliŋkin ní ni mun yaa lóòyee, ní bi mun ń jòoń nimbi, míǹ di làá yàntī ni-kɔkɔ ń ŋmàntī. 15 A lì kii Unimbɔti gbɔŋku poon nín lī puee yii:

«Un fāā tikpilee kaa cáá ki lákatì,

ní tiba kaa lóò un fāā fiiiyee^c.»

Tiiti nì u-tɔntɔnjutiibi

16 M jáaḿ Unimbɔti un di tīī Tiiti difaŋgiil ni-pu kii ti mun nín cáá ni-pu miŋyee. 17 Ti nín bālifì-u yii ú cù ni-ceeyee, u kíí-ti yii u làá cù, áli gba úǹ u-ba nìn pée bɔ́ntì yii u dòoń ni-cee. 18 Ti dū u nì kinabiki kin túń dituŋkpaandi Unimbɔti bɔti sòontam poon, Kriisitoo nikitiŋ kɔkɔ pàkà-uee, ki túnní ni-cee. 19 Kriisitoo nikitiŋ mun gíti lēē-u yii ú céeǹ-ti tí cáá tootoo un ti ŋá nì tinitee kí cùnnì Jeerusaleem. An di làá dàkà ti nín néeń kí tūtuǹ ti-jutiibi puee ní kí tīī ti-Dindaan tinyool.

20 Taa là biba ń nīn bí ki sòoǹ ki bíiĺ-ti kunimbigbaau kun ti yōoǹ kí cáá yàkatī binib nee pu. 21 Ti là yii tin ti ŋáańee ń nīn ŋān̄ ti-Dindaan ceeyaaa, kí nīn ŋān̄ binib mun cee^d.

22 Ti túnní-bi ni-cee bi nì ti-nabiki kiba kin ti cɔ́ŋkì ŋfunyɔm tikpil ki ká yii u cáá difaŋgiil tikɔkɔ poonee. Ama kɔŋkɔnnee, u gíti mɔ̄tìi ká difaŋgiil dimákakpaandi din u cáá ni-puee pu. 23 Tiiti úǹ sá man bɔɔ ní ki sá m-tɔntɔnjuti ni-cee. Bin kíǹee, Kriisitoo nikitiŋ di túnní-bi ní bi-bimbim tìì Kriisitoo tinyool. 24 Dàkàmaan-bi ni-neendi, Kriisitoo nikitiŋ ń béé ibaamɔn yii ti cáá nsan kí nīn fàal̀ ni-pu.